—A jun vin̈ chiꞌ,

aton vin̈aj Juan,

vin̈ acꞌjinac bautizar,

ix pitzvixi vin̈ dꞌa scal ebꞌ chamnac.

Yuj chiꞌ ay yopisio vin̈ sbꞌoan juntzan̈ milagro chiꞌ,

xchi vin̈.

3-4 Icha chiꞌ ix yutej vin̈ yalani,

yujto a vin̈ miljinaccham vin̈aj Juan chiꞌ.

Icha tic yuuj chamnac vin̈aj Juan chiꞌ:

Ay jun vin̈ yucꞌtac vin̈aj Herodes chiꞌ scuchan Felipe.

Herodías sbꞌi ix yetbꞌeyum vin̈aj Felipe chiꞌ.

A vin̈aj Herodes chiꞌ ix montanel ix yetbꞌeyum vin̈aj Felipe chiꞌ.

Yuj chiꞌ a vin̈aj Juan chiꞌ ix bꞌat alan dꞌa vin̈aj Herodes chiꞌ icha tic:

—Man̈ smojoc tzicꞌ jun ix tic,

xchi vin̈.

Axo ix Herodías chiꞌ ix acꞌan scꞌool vin̈aj Herodes chiꞌ.

Yuj chiꞌ ix checji yamjoc vin̈aj Juan chiꞌ,

ix och vin̈ dꞌa preso,

ix och qꞌuen cadena dꞌa vin̈.

5 Sgana vin̈ smilancham vin̈aj Juan chiꞌ,

palta xiv vin̈ dꞌa ebꞌ anima,

yujto ix nachajel yuj ebꞌ anima chiꞌ smasanil to a Dios ay schecabꞌ vin̈aj Juan chiꞌ.

6 Axo yic ix och sqꞌuin̈al yabꞌilal vin̈aj Herodes chiꞌ,

ix yavtancot juntzan̈ ebꞌ nivac vinac vin̈.

Axo ix yuneꞌ ix Herodías chiꞌ,

ix cꞌoch ix dꞌa yichan̈ ebꞌ,

ix chan̈alvi ix.

Te vachꞌ schan̈alvi ix ix yil vin̈aj Herodes chiꞌ.

7 Yuj chiꞌ ix yacꞌ stiꞌ vin̈ dꞌa ix,

ix slocan sbꞌi Dios vin̈:

—Yaln̈ej tas junoc ol a cꞌan dꞌayin,

ol vacꞌ dꞌayach,

xchi vin̈ dꞌa ix.

8 Axo ix snun ix,

ix acꞌan scꞌuloc,

yuj chiꞌ ix yal ix dꞌa vin̈aj Herodes chiꞌ:

—Acꞌ sjolom vin̈aj Juan,

vin̈ tzꞌacꞌan bautizar dꞌayin dꞌa yol junoc pultu,

xchi ix.

9 Axo ix yabꞌan jun chiꞌ vin̈ rey chiꞌ,

ix te cus chaan̈ vin̈.

Palta toxo ix sloc sbꞌi Dios vin̈,

ix yabꞌanpax ebꞌ vin̈ ayecꞌ yedꞌ vin̈.

Yuj chiꞌ ix yalan vin̈ to tzꞌacꞌji dꞌa ix.

10 Ix yacꞌan órden vin̈ to sbꞌat tzepjiel sjolom vin̈aj Juan chiꞌ dꞌa preso.

11 Slajvi chiꞌ,

tzꞌicꞌchajcot dꞌa yol junoc pultu.

Icha chiꞌ ix yutej ebꞌ.

Ix acꞌji sjolom vin̈aj Juan chiꞌ dꞌa ix.

Axo ix ix acꞌan dꞌa ix snun chiꞌ.

12 Axo ebꞌ scꞌaybꞌum vin̈aj Juan chiꞌ,

ix cꞌoch ebꞌ.

Ix yicꞌanbꞌat snivanil vin̈ ebꞌ,

ix bꞌat smucanem ebꞌ.

Ix lajvi chiꞌ,

ix bꞌat yalan ebꞌ dꞌa Jesús tas ix aj vin̈aj Juan chiꞌ schami.

13 A ix yabꞌan jun chiꞌ Jesús,

ix och dꞌa yol jun teꞌ barco yedꞌ ebꞌ scꞌaybꞌum.

Schꞌocojxon̈ej ebꞌ ix bꞌat dꞌa jun lugar bꞌaj malaj anima.

Palta ix yabꞌan ebꞌ anima to sbꞌat ebꞌ.

Yuj chiꞌ ix laj elta ebꞌ dꞌa junjun chon̈abꞌ.

Ix laj bꞌat ebꞌ dꞌa yoc yic scꞌoch ebꞌ bꞌaj scꞌoch Jesús chiꞌ.

14 Axo ix elta dꞌa yol teꞌ barco chiꞌ,

ix yilani,

man̈ jantacoc ebꞌ anima ayxo ecꞌ taꞌ.

Yuj chiꞌ ix ocꞌ scꞌool dꞌa ebꞌ.

Ix yacꞌan bꞌoxoc scꞌool juntzan̈ ebꞌ penaay ix icꞌjibꞌat dꞌay.

15 Axo dꞌa yemcꞌualil,

ix cꞌoch ebꞌ scꞌaybꞌum dꞌa stzꞌey.

Ix yalan ebꞌ:

—Ina vanxo yem cꞌu,

palta dꞌa jun lugar tic malaj anima.

Yuj chiꞌ,

tecan vachꞌ tza chec pax ebꞌ anima tic dꞌa juntzan̈ aldea dꞌa slacꞌanil tic,

yic vachꞌ ol sman va sbꞌa ebꞌ taꞌ,

xchi ebꞌ dꞌay.

16 —Man̈ yovaliloc bꞌat sman va sbꞌa ebꞌ.

Aqꞌuec va ebꞌ a ex tic,

xchi Jesús dꞌa ebꞌ scꞌaybꞌum chiꞌ.

17 —Palta oyeꞌn̈ej ixim pan quedꞌnac yedꞌ cha pitan̈ nocꞌ chay,

xchi ebꞌ dꞌay.

18 —Iqꞌueccot dꞌayin,

xchi Jesús dꞌa ebꞌ.

19 Ix lajvi chiꞌ,

ix yalan dꞌa ebꞌ anima to tzꞌem cꞌojan ebꞌ dꞌa jun acꞌlic bꞌaj ayecꞌ chiꞌ.

Ix yicꞌanchaan̈ o lechan̈ pan chiꞌ yedꞌ cha pitan̈ nocꞌ chay chiꞌ.

Ix qꞌue qꞌuelan dꞌa satchaan̈,

ix yacꞌan yuj diosal yuuj.

Ix xepanbꞌat ixim pan chiꞌ.

Ix lajvi chiꞌ,

ix yacꞌanbꞌat dꞌa ebꞌ scꞌaybꞌum chiꞌ.

Axo ebꞌ ix pucanbꞌat dꞌa scal ebꞌ anima chiꞌ.

20 Ix va ebꞌ smasanil,

ix bꞌudꞌji ebꞌ.

Ayic ix lajvi sva ebꞌ chiꞌ,

ix smolanqꞌue vaan lajchavexo xuuc ixim ix yacꞌ sobre ebꞌ scꞌaybꞌum chiꞌ.

21 Oyeꞌ mil ebꞌ vin̈ vinac ix vaꞌi.

Axo ebꞌ ix ix yedꞌ ebꞌ unin ix vaꞌi,

maj bꞌisjoclaj ebꞌ.

22 Ix lajvi chiꞌ,

ix yalan Jesús dꞌa ebꞌ scꞌaybꞌum to tzꞌochxi ebꞌ dꞌa yol teꞌ barco chiꞌ,

yic sbꞌabꞌlaj cꞌaxpajcanecꞌ ebꞌ dꞌa a aꞌ chiꞌ.

Axo Jesús ixto cani,

ix yalan quilcobꞌa dꞌa ebꞌ anima chiꞌ.

23 Ix lajvi stacꞌlan sbꞌa yedꞌ ebꞌ,

ix bꞌat dꞌa jun tzalan,

yic slesalvi taꞌ.

Axo yic ix qꞌuicꞌbꞌi,

ayecꞌ taꞌ schꞌocoj.

24 Axo ebꞌ scꞌaybꞌum,

van snan̈albꞌi yecꞌcꞌoch ebꞌ dꞌa snan̈al aꞌ.

Palta pural sbꞌey teꞌ barco chiꞌ yuj aꞌ,

yujto ov sja icꞌ dꞌa yichan̈ ebꞌ.

25 Axo yic ayto sacbꞌi,

ix cꞌoch Jesús dꞌa stzꞌey ebꞌ.

Van sbꞌeybꞌat dꞌa sat aꞌ.

26 Ayic ix yilan ebꞌ scꞌaybꞌum chiꞌ sbꞌey dꞌa sat aꞌ,

ix te xiv ebꞌ yuuj.

Ix el yav ebꞌ yuj xivelal.

Ix laj yalan ebꞌ:

—Tecan to labꞌ jun squil tic,

xchi ebꞌ.

27 Palta ix yal Jesús dꞌa ebꞌ:

—Tecꞌan tzeyutej e bꞌa.

A in.

Man̈ ex xivoc,

xchi dꞌa ebꞌ.

28 Axo ix yalan vin̈aj Pedro dꞌay:

—Mamin,

tato yel a ach,

avtej in bꞌat edꞌ taꞌ,

yic ol in bꞌeybꞌat dꞌa sat aꞌ yic tzin cꞌoch dꞌayach,

xchi vin̈ dꞌay.

29 —Cotan̈,

xchi dꞌa vin̈.

Yuj chiꞌ ix elta vin̈ dꞌa yol teꞌ barco chiꞌ.

Ix bꞌeybꞌat vin̈ dꞌa sat aꞌ yic scꞌoch vin̈ dꞌa Jesús chiꞌ.

30 Axo ix yabꞌan vin̈,

te ov icꞌ,

ix xivqꞌue vin̈.

Yuj chiꞌ ijan ix bꞌat vin̈ dꞌa yich aꞌ,

ix el yav vin̈.

—Mamin,

colin,

xchi vin̈.

31 Yedꞌn̈ej chiꞌ,

ix bꞌat yamji scꞌabꞌ vin̈ yuj Jesús,

ix yalan dꞌa vin̈:

—A ach tic,

te jabꞌn̈ej tzin acꞌoch dꞌa a cꞌool.

¿Tas yuj tzacꞌ chabꞌcꞌolal?

xchi dꞌa vin̈.

32 Axo yic ix och ebꞌ dꞌa yol teꞌ barco chiꞌ,

ix och vaan jun icꞌ chiꞌ.

33 Axo ebꞌ ayecꞌ dꞌa yol teꞌ,

ix em cuman ebꞌ dꞌa yichan̈ Jesús.

Ix yalan ebꞌ:

—Val yel a ach tic,

Yuninal ach Dios,

xchi ebꞌ dꞌay.

34 Ix cꞌaxpajecꞌ ebꞌ dꞌa aꞌ chiꞌ.

Ix cꞌoch ebꞌ dꞌa Genesaret.

35 Axo ix yilan ebꞌ anima to a Jesús,

ix laj yalanel ebꞌ dꞌa juntzan̈ lugar chiꞌ.

Yuj chiꞌ ix icꞌjibꞌat masanil ebꞌ penaay dꞌay.

36 Ix scꞌanan ebꞌ syam jabꞌoc stiꞌ spichul.

A ebꞌ ix yamani,

ix bꞌoxican scꞌool ebꞌ yuuj.