Yacꞌnac va oyeꞌ mil vinac Jesús
6
Ix lajvi chiꞌ ix bꞌatxi Jesús,
ix cꞌochxi dꞌa junxo scꞌaxepalecꞌ aꞌ n̈ajabꞌ yic Galilea,
scuchan pax aꞌ Tiberias.
2 Tzijtum ebꞌ anima ix och tzacꞌan yuuj,
yujto ix yil juntzan̈ satubꞌtac schꞌox yil ebꞌ ayic syacꞌan bꞌoxoc scꞌol ebꞌ penaay.
Jesús alimenta una multitud (Juan 6.1-15)
3 Axo Jesús chiꞌ,
ix bꞌat yedꞌ ebꞌ scꞌaybꞌum dꞌa jun tzalan.
Ataꞌ ix em cꞌojan yedꞌ ebꞌ.
4 Vanxo sja stiempoal sqꞌuin̈ ebꞌ israel yic snajicot tas aj yelnaccot ebꞌ smam yicham ebꞌ dꞌa Egipto.
5 Axo ix yilan Jesús,
tzijtum ebꞌ anima van scꞌoch dꞌay.
Yuj chiꞌ ix yalan dꞌa vin̈aj Felipe:
—¿Bꞌajtil ol co man tas sva ebꞌ anima tic?
xchi dꞌa vin̈.
6 Palta ton̈ej ix yal icha chiꞌ,
yic syabꞌi tas ol yal vin̈aj Felipe chiꞌ,
yujto yojtacxo tas ol yutoc.
7 Ix yalan vin̈aj Felipe chiꞌ dꞌay:
—Vachꞌchom quedꞌnac chabꞌoc ciento denario pan,
palta max yabꞌlaj yic tzꞌacꞌchaj jabꞌ jabꞌoc dꞌa junjun ebꞌ,
xchi vin̈.
8 Ay pax junxo scꞌaybꞌum Jesús,
scuch Andrés,
yucꞌtac sbꞌa vin̈ yedꞌ vin̈aj Simón Pedro.
Ix yalan vin̈ dꞌa Jesús chiꞌ:
9 —Ay jun vin̈ unin ayecꞌ quedꞌ dꞌa tic,
yedꞌnac oyeꞌ ixim pan cebada vin̈ yedꞌ cha pitan̈ nocꞌ chay.
Palta ¿tom ol yabꞌ jabꞌ tic dꞌa scal ebꞌ smasanil?
Ina te tzijtum ebꞌ,
xchi vin̈.
10 Yuj chiꞌ,
ix yalan Jesús dꞌa ebꞌ scꞌaybꞌum chiꞌ:
—Alec dꞌa ebꞌ anima tic to tzꞌem cꞌojan ebꞌ smasanil,
xchi dꞌa ebꞌ.
A jun lugar bꞌaj ayecꞌ ebꞌ chiꞌ,
nivan acꞌlic.
Ix em cꞌojan ebꞌ smasanil,
ay am oyeoc mil ebꞌ vin̈ vinac.
11 Axo Jesús ix icꞌanchaan̈ ixim pan chiꞌ,
ix yacꞌan yuj diosal dꞌa Dios yuj ixim.
Ix schecan pucjocbꞌat ixim dꞌa ebꞌ cꞌojanem chiꞌ.
Icha pax chiꞌ ix yutej nocꞌ chay chiꞌ.
Ix yabꞌlej ebꞌ,
ato syalaꞌ jantac snibꞌej ebꞌ.
12 Axo yic ix lajvi sva ebꞌ sicꞌlabꞌil,
ix yalan Jesús dꞌa ebꞌ scꞌaybꞌum chiꞌ:
—Molec jantacto ix can chiꞌ,
yic malaj tas tzꞌixtaxi,
xchi dꞌa ebꞌ.
13 Axo ix lajvi smolan ebꞌ chiꞌ,
lajchaveto xuuc ix bꞌudꞌji yuj ixim pan ix yacꞌ sobre dꞌa ixim oyeꞌ pan cebada chiꞌ.
14 A ebꞌ anima chiꞌ,
ix yil ebꞌ jun tas satubꞌtac ix schꞌox Jesús chiꞌ.
Yuj chiꞌ ix yal ebꞌ:
—Aton jun tic,
schecabꞌ Dios tan̈vabꞌiltaxon sja dꞌa yolyibꞌan̈qꞌuinal tic,
xchi ebꞌ.
15 Palta yojtacxo Jesús to sgana ebꞌ yacꞌan pural yoch sreyaloc.
Yuj chiꞌ ix sbꞌesel sbꞌa dꞌa scal ebꞌ,
ix bꞌatcan dꞌa scal lum tzalquixtac chiꞌ schꞌocoj.
Ix bꞌey Jesús dꞌa sat aꞌ n̈ajabꞌ
16 Ayic vanxo sqꞌuicꞌbꞌi,
ix emcꞌoch ebꞌ scꞌaybꞌum Jesús dꞌa stiꞌ aꞌ n̈ajabꞌ.
Jesús camina sobre el agua (Juan 6.16-22)
17 Ix och ebꞌ dꞌa yol teꞌ barco,
ix bꞌatxi ebꞌ.
Sgana ebꞌ scꞌaxpajecꞌ dꞌa chon̈abꞌ Capernaum ay dꞌa stiꞌ aꞌ n̈ajabꞌ chiꞌ.
Te qꞌuicꞌbꞌalxo ix bꞌat ebꞌ.
Manto jaxlaj Jesús ix bꞌat ebꞌ.
18 Axo yic van sbꞌey ebꞌ,
ix ovajchaan̈ jun icꞌ te ov dꞌa sat aꞌ n̈ajabꞌ chiꞌ.
Ix te qꞌue chulan aꞌ yuj jun icꞌ chiꞌ.
19 Ayxom junoc nan̈al schabꞌil legua sbꞌat ebꞌ dꞌa sat aꞌ,
axo ix yilan ebꞌ van scꞌoch Jesús dꞌa ebꞌ.
Ton̈ej sbꞌeybꞌat dꞌa sat aꞌ.
Yuj chiꞌ ix te xivqꞌue ebꞌ.
20 Palta ix yalan dꞌa ebꞌ:
—Man̈ ex xivoc,
A in,
xchi dꞌa ebꞌ.
21 Ichato chiꞌ juncꞌolalxo ix chajioch yuj ebꞌ dꞌa yol teꞌ barco chiꞌ.
Elan̈chamel ix ecꞌcꞌoch ebꞌ dꞌa scꞌaxepal aꞌ bꞌaj van scꞌoch ebꞌ chiꞌ.
A ebꞌ anima sayan ecꞌ Jesús
22 Axo dꞌa junxo cꞌu,
an̈ejaꞌ yajcan ebꞌ anima chiꞌ dꞌa scꞌaxepal aꞌ chiꞌ.
Axo ix snaancot ebꞌ to junn̈ej teꞌ barco chiꞌ ix bꞌati,
an̈ej pax ebꞌ scꞌaybꞌum Jesús ix och dꞌa yol teꞌ,
maj ochlaj Jesús chiꞌ yedꞌ ebꞌ.
El pan de vida (Juan 6.22-71)
23 Yacbꞌan chiꞌ ay juntzan̈xo barco ix cot dꞌa chon̈abꞌ Tiberias,
ix cꞌoch dꞌa slacꞌanil jun lugar bꞌaj ix sva ixim pan chiꞌ ebꞌ,
aton bꞌaj ix yacꞌ yuj diosal Cajalil yuj ixim.
24 Axo ix yilan ebꞌ anima chiꞌ,
man̈xo ayoc ecꞌ Jesús chiꞌ yedꞌ ebꞌ yedꞌ pax ebꞌ scꞌaybꞌum.
Yuj chiꞌ ix laj och ebꞌ dꞌa yol juntzan̈ barco chiꞌ.
Ix bꞌat sayanecꞌ Jesús chiꞌ ebꞌ dꞌa chon̈abꞌ Capernaum.
A Jesús tzꞌacꞌan vael yic qꞌuinal
25 Axo ix cꞌoch ebꞌ anima chiꞌ dꞌa scꞌaxepalecꞌ aꞌ n̈ajabꞌ chiꞌ,
ataꞌ ix ilchaj Jesús yuj ebꞌ.
Ix scꞌanbꞌan ebꞌ dꞌay:
—Ach co Cꞌaybꞌumal,
¿tom dꞌa tic ayach eqꞌui?
¿Janicꞌ ach javi?
xchi ebꞌ dꞌay.
26 Ix yalan dꞌa ebꞌ:
—Val yel sval dꞌayex,
yujn̈ej to ex bꞌudꞌji e vaan ixim pan,
yuj chiꞌ tzin e sayaꞌ,
man̈ yujoc to ix nachajel eyuuj tas syalelcꞌoch juntzan̈ satubꞌtac ix in chꞌox chiꞌ.
27 Man̈ eyacꞌ eyip e sayan ecꞌ tas svaji,
yujto elan̈chamel slajvieli.
Palta sayequecꞌ jun vael max lajviel-laj,
yujto aꞌ ol acꞌan e qꞌuinal dꞌa juneln̈ej.
Ol vacꞌ jun chiꞌ dꞌayex,
yujto Acꞌbꞌil in cot yuj Dios voch animail,
a co Mam Dios schꞌoxaneli to chabꞌil in yuuj,
xchi Jesús dꞌa ebꞌ.
28 Yuj chiꞌ ix scꞌanbꞌan ebꞌ dꞌay:
—¿Tas ol cutoc co cꞌulan tas snibꞌej Dios sco cꞌulej chiꞌ?
xchi ebꞌ dꞌay.
29 Ix yalanxi Jesús chiꞌ dꞌa ebꞌ:
—Aton jun tic snibꞌej Dios tze cꞌulej,
to tzin eyacꞌ val och dꞌa e cꞌool,
yujto a checjinac in coti,
xchi dꞌa ebꞌ.
30 Ix scꞌanbꞌanxi ebꞌ dꞌay:
—¿Tas val junoc satubꞌtac tza chꞌox quilaꞌ yic ol ach cacꞌoch dꞌa co cꞌool?
¿Tas tza cꞌulej?
31 A ebꞌ co mam quicham ecꞌnac dꞌa pecaꞌ,
yilnac jun tas satubꞌtac ebꞌ,
svanac jun maná ebꞌ dꞌa taquin̈ luum* icha syal dꞌa Slolonel Dios Tzꞌibꞌabꞌilcani.
Aton jun tzꞌalan icha tic:
A Dios acꞌjinaccot tas sva ebꞌ dꞌa satchaan̈,
xchi,
xchi ebꞌ dꞌa Jesús chiꞌ.
32 Yuj chiꞌ ix yalanxi Jesús chiꞌ dꞌa ebꞌ:
—Val yel sval dꞌayex,
man̈oclaj vin̈aj Moisés tzꞌacꞌan jun vael yic satchaan̈ chiꞌ.
Palta a in Mam tzꞌacꞌan jun vael te yel scot dꞌa satchaan̈.
33 Yujto a jun vael syacꞌ Dios tic,
a dꞌa satchaan̈ emnaccoti.
Ay ebꞌ ay dꞌa yolyibꞌan̈qꞌuinal tic ol scha sqꞌuinal dꞌa juneln̈ej yuuj,
xchi Jesús.
34 Ix yalanxi ebꞌ:
—Mamin,
acꞌ jun vael chiꞌ dꞌayon̈ dꞌa masanil tiempo,
xchi ebꞌ dꞌay.
35 Ix yalanxi dꞌa ebꞌ:
—A in ton tic icha vael vaji,
Acꞌum in qꞌuinal.
A ebꞌ sja dꞌayin,
man̈xa bꞌaqꞌuin̈ ol och svejel ebꞌ.
A ebꞌ tzin acꞌanoch dꞌa scꞌool,
man̈xa bꞌaqꞌuin̈ ol tacjoc stiꞌ ebꞌ.
36 Palta toxo ix val dꞌayex,
vachꞌchom tzin eyilaꞌ,
max in eyacꞌoch dꞌa e cꞌool.
37 Masanil ebꞌ tzꞌacꞌji dꞌayin yuj in Mam,
ol ja ebꞌ dꞌayin.
A ebꞌ sjavi dꞌayin,
man̈ ol in pechel ebꞌ.
38 A in tic,
cotnac in dꞌa satchaan̈ yic tzul in bꞌo icha snibꞌej Dios checjinac in coti.
Man̈ yujoc ul in bꞌoan icha tas tzin nibꞌej cotnac in.
39 A tas snibꞌej in Mam checjinac in coti,
to man̈ ol satel junoc mach dꞌa scal ebꞌ syacꞌ dꞌayin.
Sgana to a in ol vacꞌ pitzvocxi ebꞌ dꞌa slajvubꞌ cꞌual.
40 A in tic,
Yuninal in Dios.
Yuj chiꞌ jantacn̈ej ebꞌ tzin ilani,
tato tzin yacꞌoch ebꞌ dꞌa scꞌool,
snibꞌej in Mam chiꞌ to scha sqꞌuinal ebꞌ dꞌa juneln̈ej.
Yuj chiꞌ a in ol vacꞌ pitzvocxi ebꞌ dꞌa slajvubꞌ cꞌual,
xchi Jesús dꞌa ebꞌ.
41 Ayic ix yabꞌan juntzan̈ chiꞌ ebꞌ aj Judea,
chuc tas ix yalubꞌtan̈ej ebꞌ dꞌa spatic Jesús chiꞌ,
yujto ix yalaꞌ:
A in ton tic icha vael vaji,
cotnac in dꞌa satchaan̈,
xchi dꞌa ebꞌ.
42 Yuj chiꞌ ix yalan ebꞌ:
—A Jesús tic,
yuninal vin̈aj José.
Cojtac smam snun vin̈,
palta syalaꞌ to dꞌa satchaan̈ cotnac,
xchi ebꞌ aj Judea chiꞌ.
43 Palta ix yalanxi Jesús dꞌa ebꞌ:
—Man̈ in eyalubꞌtan̈ej.
44 A in Mam checjinac in coti.
Malaj junoc mach syal scomon ja dꞌayin,
schaan sqꞌuinal tato man̈oc in Mam tzꞌacꞌancot dꞌayin.
A ebꞌ sja dꞌayin,
ol vacꞌ pitzvocxi ebꞌ dꞌa slajvubꞌ cꞌual.
45 Tzꞌibꞌabꞌilcan yuj ebꞌ schecabꞌ Dios icha tic:
Ol cꞌaybꞌaj masanil anima yuj Dios,
xchi ebꞌ.
Yuj chiꞌ,
a jantacn̈ej ebꞌ syacꞌoch schiquin dꞌa tas syal co Mam Dios,
tato snachajel yuj ebꞌ tas syalaꞌ,
ol ja ebꞌ dꞌayin.
46 Man̈ vanoc valani to ay mach ix ilan co Mam Dios.
Palta a in tic,
a dꞌay cotnac in,
a inn̈ej vilnac.
47 Val yel sval dꞌayex,
a mach tzin acꞌanoch dꞌa scꞌool,
ay sqꞌuinal dꞌa juneln̈ej.
48 A in tic,
icha vael vaji,
Acꞌum in qꞌuinal.
49 A ebꞌ co mam quicham,
svanac jun maná ebꞌ dꞌa taquin̈ luum,
palta an̈ejtonaꞌ chamnac ebꞌ smasanil.
50 Palta a ebꞌ svaan jun vael cotnac dꞌa satchaan̈,
malaj bꞌaqꞌuin̈ ol cham ebꞌ.
51 A in cotnac in dꞌa satchaan̈ tic,
icha vael vaji,
yujto Acꞌum in qꞌuinal.
Yuj chiꞌ,
a ebꞌ svaan jun vael tic,
ay sqꞌuinal ebꞌ dꞌa juneln̈ej.
A jun vael svacꞌ vajoc tic,
aton in nivanil,
xchi Jesús dꞌa ebꞌ.
52 Axo ebꞌ aj Judea chiꞌ,
ix stelaj sbꞌa ebꞌ yuj tas ix yal chiꞌ,
ix laj yalan ebꞌ:
—A jun vin̈ tic,
¿tas ol yutoc vin̈ yacꞌan snivanil co chi snaani?
xchi ebꞌ.
53 Yuj chiꞌ ix yalxi dꞌa ebꞌ:
—Val yel sval dꞌayex,
tato man̈ ol e chi in nivanil a in Acꞌbꞌil in cot yuj Dios voch animail tic,
man̈ ol eyucꞌanpaxlaj in chiqꞌuil,
man̈ ol e chalaj e qꞌuinal.
54 Yuj chiꞌ,
yaln̈ej mach tzꞌabꞌlan in nivanil tic,
syucꞌanpax in chiqꞌuil,
ay sqꞌuinal dꞌa juneln̈ej.
A in ol vacꞌ pitzvocxi dꞌa slajvubꞌ cꞌual.
55 Yujto a jun in nivanil tic,
yel lajan yopisio yedꞌ tas svaji.
A in chiqꞌuil lajan yopisio yedꞌ tas tzꞌucꞌji.
56 Yaln̈ej mach schiꞌan in nivanil tic,
syucꞌan pax in chiqꞌuil,
junxon̈ej tzꞌajcan vedꞌoc.
Ayin pax och dꞌay.
57 A co Mam Dios pitzan dꞌa masanil tiempo,
a checjinac in coti.
Yuuj pitzan in.
Yuj chiꞌ,
a mach schiꞌan in nivanil tic,
ol vacꞌ sqꞌuinal.
58 A ticnaic,
van valan yuj jun icha vael cotnac dꞌa satchaan̈.
A jun tic,
man̈ lajanoc yedꞌ jun maná svanac ebꞌ co mam quicham dꞌa pecaꞌ.
Nivanoc svanac ebꞌ,
palta chamnac pax ebꞌ.
Palta a mach ol vaan jun icha vael tic,
ol scha sqꞌuinal ebꞌ dꞌa juneln̈ej,
xchi Jesús dꞌa ebꞌ.
59 A dꞌa yol spatil culto dꞌa chon̈abꞌ Capernaum,
ataꞌ ix yal juntzan̈ cꞌaybꞌubꞌal tic Jesús.
Yalnac Jesús yuj qꞌuinal dꞌa juneln̈ej
60 Ayic ix yabꞌan juntzan̈ chiꞌ jantac ebꞌ anima tzacꞌanoch yuj Jesús chiꞌ,
ix yalan ebꞌ:
—Te ya juntzan̈ slolonel syal tic.
¿Tom ay mach syal schaan yabꞌi?
xchi ebꞌ.
61 Axo Jesús chiꞌ,
yojtacxo tas jun syal ebꞌ chiꞌ,
yuj chiꞌ ix yalanxi dꞌa ebꞌ:
—¿Tom a jun tic tzꞌicꞌan somchajel e cꞌool?
62 A in Acꞌbꞌil in cot yuj Dios voch animail tic,
tato ol eyil in qꞌuex bꞌaj cotnac in,
¿tas ol eyutoc eyalani?
63 A Espíritu tzꞌacꞌan qꞌuinal.
Axo co nivanil tic malaj yopisio.
A juntzan̈ lolonel ix val tic dꞌayex,
te yel,
yic pax Espíritu,
a tzꞌacꞌan qꞌuinal dꞌa juneln̈ej.
64 Palta ayex max in eyacꞌoch dꞌa e cꞌool,
xchi dꞌa ebꞌ.
Icha chiꞌ ix yutej yalan dꞌa ebꞌ,
yujto atax dꞌa yichbꞌanil yojtactaxoni mach ebꞌ max acꞌanoch dꞌa scꞌool.
Yojtac paxi mach jun ol acꞌanoch dꞌa yol scꞌabꞌ chamel.
65 Ix yalanxi:
—Yujto ayex maj in eyacꞌoch dꞌa e cꞌool,
yuj chiꞌ valnac dꞌayex,
malaj junoc mach syal scomon ja dꞌayin tato man̈oc in Mam tzꞌacꞌancot ebꞌ dꞌayin,
xin chi,
xchi Jesús dꞌa ebꞌ.
66 Atax taꞌ,
tzijtum ebꞌ tzacꞌanoch yuuj ix meltzajxi dꞌa spatic.
Man̈xa sgana ebꞌ tzꞌoch tzacꞌan yuuj.
67 Yuj chiꞌ ix scꞌanbꞌan Jesús dꞌa ebꞌ lajchavaan̈:
—Xal ex tic,
¿ay am pax e gana tzex meltzajxi dꞌa e patic?
xchi dꞌa ebꞌ.
68 Axo vin̈aj Simón Pedro ix tacꞌvi dꞌay:
—Mamin,
¿mach bꞌaj ol on̈ och tzacꞌan jun?
Malaj junxo mach icha tic sloloni yic sco cha co qꞌuinal dꞌa juneln̈ej.
69 A on̈ tic,
toxo ix ach cacꞌoch dꞌa co cꞌool.
Cojtac,
a ach tic Sicꞌbꞌil ach el yuj Dios,
xchi vin̈aj Pedro chiꞌ.
70 Ix yalanxi Jesús dꞌa ebꞌ:
—A ex e lajchavan̈il,
a in ex in sicꞌcaneli.
Palta ay jun dꞌa e cal,
schecabꞌ vin̈ diablo yaji,
xchi dꞌa ebꞌ.
71 A jun ix yal chiꞌ,
aton vin̈aj Judas yuninal vin̈aj Simón aj Queriot.
Yujto a vin̈aj Judas chiꞌ ol acꞌanoch Jesús dꞌa yol scꞌabꞌ chamel.
Palta yetcꞌaybꞌumal sbꞌa vin̈ yedꞌ ebꞌ uxluchvan̈ chiꞌ.