Bꞌoxinac scꞌol jun vin̈ penaay
5
Ix lajvi chiꞌ ix qꞌuexxi Jesús dꞌa Jerusalén,
ix bꞌat yilan jun sqꞌuin̈ ebꞌ yetisraelal.
2 A dꞌa yol chon̈abꞌ Jerusalén chiꞌ,
dꞌa slacꞌanil jun puerta bꞌaj tzꞌoch nocꞌ calnel,
ataꞌ ay jun tanque scuch Betesda dꞌa stiꞌ ebꞌ israel chiꞌ.
Oyeꞌ val stentail.
Jesús cura en Sábado (Juan 5.1-15)
3-4 Tzijtum ebꞌ penaay ayecꞌ ta.
Ay ebꞌ max yal yilani,
ay ebꞌ max yal sbꞌeyi,
ay ebꞌ sicbꞌinaqueli.
5 Ay jun vin̈ 38 abꞌilxo penaay.
6 Axo ix yilan Jesús jichanecꞌ vin̈.
Yojtac to pecatax icha chiꞌ yaj vin̈.
Yuj chiꞌ ix scꞌanbꞌan dꞌa vin̈:
—¿Tzam a nibꞌej tzach bꞌoxicani?
xchi dꞌa vin̈.
7 Ix yalan vin̈ penaay chiꞌ:
—Mamin,
malaj mach tzin acꞌanem dꞌa yol aꞌ tic ayic tzꞌibꞌxi aꞌ dꞌa juntac el.
Ayic tzin nibꞌej tzin emi,
chꞌocxo ebꞌ sbꞌabꞌlaj em dꞌa vichan̈,
xchi vin̈ dꞌa Jesús.
8 Yuj chiꞌ ix yalan Jesús dꞌa vin̈:
—Qꞌuean̈ vaan,
icꞌchaan̈ a vaynubꞌ tic,
bꞌeyan̈,
xchi dꞌa vin̈.
9 Dꞌa jun rato chiꞌ,
ix bꞌoxi scꞌool vin̈.
Ix yicꞌanchaan̈ svaynubꞌ vin̈ chiꞌ,
ix syamanoch vin̈ sbꞌeyi.
Palta scꞌual icꞌoj ip.
10 Yuj chiꞌ ay jayvan̈ ebꞌ aj Judea ix alan dꞌa vin̈:
—A ticnaic,
scꞌual icꞌoj ip.
Man̈ sleyaloc tzicꞌchaan̈ a vaynubꞌ tic,
xchi ebꞌ dꞌa vin̈.
11 Ix tacꞌvi vin̈ dꞌa ebꞌ icha tic:
—A jun vin̈ in acꞌan bꞌoxoc,
a vin̈ ix alan dꞌayin:
Icꞌchan̈ a vaynubꞌ tic,
tzach bꞌeyi,
xchi vin̈,
xchi vin̈.
12 Ix scꞌanbꞌan ebꞌ dꞌa vin̈:
—¿Mach jun vin̈ ix alan chiꞌ dꞌayach to tzicꞌchaan̈ a vaynubꞌ tic,
tzach bꞌeyi?
xchi ebꞌ.
13 Palta man̈ yojtacoc vin̈ tas sbꞌi jun ix acꞌan bꞌoxoc scꞌool vin̈ chiꞌ,
yujto ix satbꞌat Jesús chiꞌ dꞌa scal jantac anima ayecꞌ chiꞌ taꞌ.
14 Axo dꞌa junelxo ix ilchaj vin̈ yuj Jesús dꞌa yamaqꞌuil stemplo Dios,
ix yalan dꞌa vin̈:
—Inai ach bꞌoxi.
Man̈xo a cꞌulej chucal,
yic man̈xo ol ja junocxo yaelal más te nivan dꞌa ibꞌan̈,
xchi dꞌa vin̈.
15 Yuj chiꞌ ix bꞌat vin̈ yal dꞌa ebꞌ vin̈ aj Judea chiꞌ to a Jesús chiꞌ ix acꞌan bꞌoxoc scꞌool vin̈.
16 Yuj chiꞌ ix te och ebꞌ vin̈ ajcꞌolal dꞌa Jesús chiꞌ,
yujto a dꞌa scꞌual icꞌoj ip ix scꞌulej juntzan̈ chiꞌ.
Jesús defiende su autoridad (Juan 5.16-47)
—A in Mam smunlajn̈ej.
Yuj chiꞌ an̈ejaꞌ tzin munlajn̈ejpaxi,
xchi dꞌa ebꞌ.
18 Yujto ix yal juntzan̈ chiꞌ Jesús,
ijanxo val sgana ebꞌ smilchamoc.
Man̈ocn̈ej yuj bꞌaj max scꞌanabꞌajej scꞌual icꞌoj ip chiꞌ,
palta yujto slajbꞌej sbꞌa yedꞌ Dios ayic syalanoch Dios chiꞌ Smamoc.
A yopisio Yuninal Dios
19 Ix yalanxi Jesús dꞌa ebꞌ:
—Val yel sval dꞌayex,
a in tic Yuninal in Dios,
max yal in cꞌulan junoc tas dꞌa yol vicoꞌ,
an̈ej tas svil scꞌulan in Mam tzin cꞌulej.
A jantacn̈ej tas scꞌulej in Mam chiꞌ,
a tzin cꞌulejpaxi.
20 A in Mam chiꞌ,
te xajan in yuuj a in Yuninal in tic.
A jantacn̈ej tas scꞌulej,
schꞌoxpax dꞌayin.
Ayto val juntzan̈xo tas te nivan ol schꞌoxoꞌ,
ol te sat e cꞌool eyilani.
21 Yujto a in Mam chiꞌ tzꞌacꞌan pax pitzvoc ebꞌ chamnac,
syacꞌan sqꞌuinal ebꞌ.
Ichinpaxtaꞌ a in Yuninal in tic svacꞌ sqꞌuinal ebꞌ in gana svacꞌ sqꞌuinal.
22 A in Mam chiꞌ,
max schꞌolbꞌitej junoc anima.
Palta a in Yuninal in tic,
ix acꞌji vopisio in chꞌolbꞌitan yaj ebꞌ anima smasanil,
23 yic vachꞌ lajan tzꞌaj vicꞌjichaan̈ icha tzꞌaj yicꞌjichaan̈ in Mam chiꞌ yuj masanil anima.
Tato ay ebꞌ malaj tzin och dꞌay,
an̈ejtonaꞌ malaj tzꞌochpax in Mam dꞌa ebꞌ,
yujto a checjinac in coti.
24 Val yel sval dꞌayex,
a ebꞌ tzꞌabꞌan in lolonel,
syacꞌanpaxoch jun in checancot ebꞌ dꞌa scꞌool,
ay sqꞌuinal ebꞌ dꞌa juneln̈ej.
Man̈xo ol bꞌatcan ebꞌ dꞌa syaelal,
yujto toxo ix colchajel ebꞌ dꞌa yol scꞌabꞌ chamel,
ix schaan sqꞌuinal ebꞌ.
25 Val yel sval dꞌayex,
a ticnaic toxo ix ja stiempoal yabꞌan in jaj ebꞌ chamnac a in Yuninal in Dios tic.
A ebꞌ tzꞌabꞌani,
ol scha sqꞌuinal ebꞌ dꞌa juneln̈ej.
26 Yujto a in Mam aj qꞌuinaltaxon dꞌa yol yicoꞌ.
Yacꞌannaccan jun chiꞌ dꞌayin to aj qꞌuinal in paxi.
27 Yacꞌannacpaxcan vopisio in chꞌolbꞌitan masanil ebꞌ anima,
yujto Acꞌbꞌil in cot yuj Dios voch animail.
28 Man̈ eyacꞌ sat e cꞌol yuj juntzan̈ sval tic,
yujto ay jun tiempoal ol javoc,
a val ebꞌ mucanxo ol yabꞌ in jaj ebꞌ.
29 Ol laj qꞌuex vaan ebꞌ bꞌaj mucan chiꞌ.
A ebꞌ vachꞌ syutej sbꞌa dꞌa yolyibꞌan̈qꞌuinal tic,
ol pitzvocxi ebꞌ,
ol schaan sqꞌuinal ebꞌ dꞌa juneln̈ej.
Axo ebꞌ scꞌulan chucal,
ol pitzvocxi ebꞌ,
palta ol bꞌatcan ebꞌ dꞌa syaelal dꞌa juneln̈ej.
30 A in tic,
malaj jabꞌoc tas syal in bꞌoan dꞌa yol vicoꞌ,
tzin chꞌolbꞌitej icha tas schec in Mam chiꞌ in cꞌulej.
Tzin chꞌolbꞌitej dꞌa stojolal,
yujto man̈oc tas icha in gana tzin cꞌulej,
palta icha sgana jun checjinac in coti,
aton in Mam.
A ebꞌ schꞌoxanel yopisio Jesús
31 Tato munil svalaꞌ to ay vopisio,
malaj yelcꞌoch jun vic sval chiꞌ.
32 Palta ay junxo tzꞌalani tas vopisio.
A jun chiꞌ,
vojtac to te yel syalaꞌ.
33 A ex tic xidꞌ e chec cꞌanbꞌaj dꞌa vin̈aj Juan tas yopisio vin̈.
A tas yalnac vin̈ vuuj,
te yel.
34 Palta a in tic,
max vacꞌochlaj yipoc in cꞌool tas syal junoc anima vuuj.
Ton̈ej svec e nacoti tas yalnaccan vin̈aj Juan chiꞌ dꞌayex,
yic tzex colchaji.
35 A tas ix yal vin̈aj Juan chiꞌ,
lajan icha junoc tas tzꞌacꞌan saquilqꞌuinal ayel yoc.
Yuj chiꞌ,
ix ex te tzalaj jayeoc cꞌual eyabꞌani.
36 Palta ay junxo ecꞌal yelcꞌoch dꞌa vin̈aj Juan chiꞌ.
A schꞌoxaneli tas vopisio,
yujto a juntzan̈ tas syacꞌ in Mam in cꞌulej,
a tzin cꞌulej.
Icha chiꞌ tzꞌaj scheclajeli to a in Mam chiꞌ checjinac in coti.
37 A in Mam chiꞌ,
a checjinac in coti,
a syacꞌ testigoal sbꞌa vuuj.
A ex tic,
malaj bꞌaj ix eyabꞌ sjaj sloloni.
Malaj bꞌaj ix eyil juneloc.
38 Max eyacꞌoch slolonel dꞌa e cꞌool,
yujto max in eyacꞌoch dꞌa e cꞌool a in checbꞌil in cot yuuj tic.
39 A ex tic scham val e sayan eyil dꞌa Slolonel Dios Tzꞌibꞌabꞌilcani,
yujto a e naani to icha chiꞌ ol aj yilchaj e qꞌuinal dꞌa juneln̈ej.
Palta vachꞌchom syal vabꞌixal Slolonel Dios chiꞌ,
40 malaj e gana tzex ja dꞌayin yic tze cha e qꞌuinal.
41 Malaj yelcꞌoch dꞌayin tato syal vachꞌ lolonel ebꞌ anima vuuj.
42 Vojtac tas yaj e pensar,
man̈ xajanoc Dios eyuuj.
43 A in tic,
acꞌbꞌil in cot yuj in Mam,
palta max in e chaꞌa.
Tato ay junocxo munil ol javoc dꞌa yol yicoꞌ,
a jun chiꞌ ol e chaꞌa.
44 ¿Tas ol aj in eyacꞌanoch dꞌa e cꞌool,
yujto an̈ej dꞌa eyichan̈ junjun ex e gana ay eyelcꞌochi,
malaj pax e gana ay eyelcꞌoch dꞌa yichan̈ Dios te yel?
45 Xe natalaj to a in ol val dꞌa in Mam chiꞌ tas e chucal.
Palta a vin̈aj Moisés ol alanoc,
aton vin̈ tze tzꞌac eyacꞌoch dꞌa e cꞌool.
46 Tato tzeyacꞌoch dꞌa e cꞌool tas stzꞌibꞌejnaccan vin̈aj Moisés chiꞌ,
tzam in eyacꞌochlaj dꞌa e cꞌool,
yujto a vin̈aj Moisés chiꞌ tzꞌibꞌannaccan vabꞌixal.
47 Palta tato max eyacꞌoch tas stzꞌibꞌejnaccan vin̈ chiꞌ dꞌa e cꞌool,
¿tas ol aj eyacꞌanoch dꞌa e cꞌool tas sval tic dꞌayex?
xchi Jesús dꞌa ebꞌ vin̈ aj Judea chiꞌ.