Ix lolon Jesús yedꞌ jun ix ix aj Samaria
4
Axo ix yabꞌan ebꞌ fariseo to a ebꞌ scꞌaybꞌum Jesús ix te ecꞌ sbꞌisul ebꞌ dꞌa yichan̈ ebꞌ scꞌaybꞌum vin̈aj Juan,
ecꞌto pax ebꞌ tzꞌacꞌji bautizar yuuj.
2 Palta man̈oclaj Jesús chiꞌ tzꞌacꞌan bautizar ebꞌ,
a ebꞌ scꞌaybꞌum.
Jesús habla con una mujer samaritana (Juan 4.1-42)
3 Ayic ix yabꞌan Jesús to yojtac jun chiꞌ ebꞌ fariseo chiꞌ,
ix el dꞌa yol yic Judea,
ix bꞌatxi dꞌa Galilea.
4 Yovalil a dꞌa yol yic Samaria tzꞌeqꞌui ayic smeltzaji.
5 Yuj chiꞌ ayic van yecꞌ dꞌa yol yic Samaria chiꞌ,
ix cꞌoch dꞌa chon̈abꞌ Sicar.
A jun chon̈abꞌ chiꞌ,
a dꞌa slacꞌanil jun lum luum yacꞌnaccan vin̈aj Jacob dꞌa jun yuninal scuch José,
ataꞌ ay.
6 Ataꞌ ay jun sjaj a aꞌ joybꞌilcan yuj vin̈aj Jacob chiꞌ.
Axo Jesús chiꞌ,
chimcꞌualil ix cꞌoch taꞌ.
Yujto ix cꞌunbꞌi sbꞌeyi,
yuj chiꞌ ix cꞌojnaj dꞌa stiꞌ jun aꞌ chiꞌ.
7-8 Axo ebꞌ scꞌaybꞌum,
ix bꞌat ebꞌ sman yic schimcꞌualil dꞌa jun chon̈abꞌ ay dꞌa slacꞌanil aꞌ chiꞌ.
Ayic toxo ix bꞌat ebꞌ,
ix cꞌoch jun ix tiꞌavum aj Samaria.
Ix yalan Jesús dꞌa ix:
—Acꞌ jabꞌoc aꞌ tic vuqꞌuej,
xchi dꞌa ix.
9 Ix yalan ix:
—A ach tic,
israel ach.
¿Tas yuj tza cꞌan aꞌ ucꞌ dꞌayin?
¿Tom man̈ ojtacoc to aj Samaria in?
xchi ix dꞌay.
Icha chiꞌ ix yutej ix yalani,
yujto a ebꞌ israel yedꞌ ebꞌ aj Samaria chiꞌ,
max scꞌumejlaj sbꞌa ebꞌ.
10 Ix lajvi chiꞌ,
ix yalanxi Jesús dꞌa ix:
—Tzin cꞌan vucꞌ jabꞌoc aꞌ dꞌayach,
palta man̈ ojtacoc mach in.
Man̈ ojtacoc paxi tas sgana Dios syacꞌ dꞌayach.
Octom val ojtac,
a ach am tza cꞌan dꞌayin,
a inxo svacꞌ jun a aꞌ tzꞌacꞌan a qꞌuinal,
xchi Jesús dꞌa ix.
11 —Mamin,
ina malaj junoc a lechlabꞌ bꞌaj syal icꞌanqꞌueta aꞌ.
Te jul yajem aꞌ.
¿Bꞌajtil ol icꞌ jun a aꞌ ol acꞌan in qꞌuinal chiꞌ?
12 Joybꞌilcan sjaj a aꞌ tic yuj vin̈ co mam quicham aj Jacob.
A vin̈ ucꞌjinac aꞌ yedꞌ ebꞌ yuninal dꞌa tic yedꞌ masanil nocꞌ smolbꞌetzal nocꞌ.
Chamnac vin̈,
scannac jun aꞌ tic dꞌayon̈.
A achxo tic ¿tom ecꞌal opisio dꞌa vin̈aj Jacob chiꞌ?
xchi ix dꞌay.
13 Yuj chiꞌ ix yalan dꞌa ix:
—A mach tzꞌucꞌan jun a aꞌ tic,
stacjixi stiꞌ ebꞌ.
14 Palta axo ebꞌ tzꞌucꞌan jun aꞌ svacꞌaꞌ,
man̈xa bꞌaqꞌuin̈ ol tacjocxi stiꞌ ebꞌ,
yujto a jun aꞌ svacꞌ chiꞌ,
ol aj sjaj aꞌ dꞌa spixan ebꞌ,
axo aꞌ ol acꞌan sqꞌuinal ebꞌ dꞌa juneln̈ej,
xchi Jesús dꞌa ix.
15 Ix yalanxi ix:
—Mamin,
acꞌ jun a aꞌ chiꞌ dꞌayin,
yic man̈xo ol tacjoc in tiꞌ,
yic pax man̈xo yovaliloc ol ul vicꞌqꞌueta jun aꞌ tic,
xchi ix.
16 Ix yalanxi dꞌa ix:
—Ixic,
ix icꞌcot vin̈ etbꞌeyum,
tzex ja dꞌa tic,
xchi Jesús dꞌa ix.
17 —Malaj vin̈ vetbꞌeyum,
xchi ix.
—Telan,
yel ton tzalaꞌ malaj vin̈ etbꞌeyum ticnaic.
18 Palta ovan̈xo ebꞌ vin̈ bꞌaj xidꞌnac ach.
Axo vin̈ bꞌaj ay ach ecꞌ ticnaic,
man̈ etbꞌeyumoc ton vin̈.
Yuj chiꞌ yelton tzalaꞌ:
Malaj vin̈ vetbꞌeyum xa chi,
xchi Jesús dꞌa ix.
19 Ayic ix lajvi yabꞌan juntzan̈ chiꞌ ix,
ix yalanxi ix:
—Mamin,
a svutej vabꞌani to schecabꞌ ach Dios.
20 A ebꞌ co mam quicham a on̈ aj Samaria on̈ tic,
a dꞌa jun vitz tic yalnac sbꞌa ebꞌ dꞌa Dios.
Palta a exxo israel ex tic,
tzeyalaꞌ:
A dꞌa Jerusalén,
ataꞌ yovalil bꞌat cal co bꞌa dꞌa Dios,
xe chi,
xchi ix.
21 Ix yalanxi Jesús dꞌa ix:
—Ach ix,
acꞌoch dꞌa a cꞌool tas svalaꞌ.
Ay jun tiempoal ol javoc,
man̈xooclaj dꞌa jun vitz tic ol ul eyal e bꞌa dꞌa co Mam Dios.
An̈ejtonaꞌ dꞌa Jerusalén,
man̈xo yovaliloc ol ex cꞌoch eyal e bꞌa taꞌ.
22 A ex aj Samaria ex tic,
nivanoc tzeyal e bꞌa dꞌa Dios,
palta man̈ eyojtacoclaj.
Xal on̈ israel on̈ tic,
cojtac co Diosal bꞌaj scal co bꞌa.
A dꞌa co cal ol elta jun Colvajum.
23 Ay ebꞌ to dꞌa co Mam Dios syal sbꞌa icha val dꞌa smojal.
Axo ticnaic,
toxo ix ja stiempoal,
ol yal sbꞌa ebꞌ dꞌa Dios cuchbꞌabꞌil ebꞌ yuj Espíritu icha val dꞌa smojal,
yujto a co Mam Dios,
sgana icha chiꞌ tzꞌaj yalan sbꞌa ebꞌ dꞌay.
24 A Dios,
Espíritu.
Yuj chiꞌ,
tato ay ebꞌ syal sbꞌa dꞌay,
yovalil a Espíritu scuchbꞌan ebꞌ icha val dꞌa smojal,
xchi Jesús dꞌa ix.
25 Ix yalanxi ix dꞌay:
—A in tic,
vojtac to ol ja jun Mesías.
Ayic ol javoc ol yalan masanil tastac dꞌayon̈,
xchi ix dꞌay.
(Mesías syalelcꞌochi Cristo,
Acꞌbꞌil Yopisio.)
26 —A in ton van valan tic dꞌayach,
xchi Jesús dꞌa ix.
27 A val slajvi yalan juntzan̈ chiꞌ Jesús ix jax ebꞌ scꞌaybꞌum.
Ix sat scꞌool ebꞌ yilani to van slolon Jesús yedꞌ jun ix ix.
Palta malaj junoc ebꞌ ix cꞌanbꞌan dꞌay tas scꞌanbꞌej dꞌa ix,
ma tas yuj slolon yedꞌ ix.
28 Ix yactejcan schꞌubꞌ ix dꞌa stiꞌ a aꞌ chiꞌ.
Ix bꞌat yalan ix dꞌa ebꞌ anima ay dꞌa schon̈abꞌ.
Ix yalan ix dꞌa ebꞌ:
29 —Ay jun vin̈ masanil tas ojtannac yictax in cotoch uninal.
Ix yal vin̈ dꞌayin smasanil.
Coyec vedꞌoc,
bꞌat quilecnabꞌi.
¿Tope alaj vin̈ Cristo?
xchi ix dꞌa ebꞌ.
30 Yuj chiꞌ ix elta ebꞌ dꞌa yol schon̈abꞌ chiꞌ.
Ix javi ebꞌ bꞌaj ayecꞌ Jesús.
31 Ayic manto cꞌoch ebꞌ,
ix yalan ebꞌ scꞌaybꞌum Jesús chiꞌ dꞌay:
—Ach co Cꞌaybꞌumal,
vaꞌan̈ jabꞌoc,
xchi ebꞌ.
32 Palta ix yalan dꞌa ebꞌ:
—Ay jun in vael man̈ eyojtacoc a ex tic,
xchi dꞌa ebꞌ.
33 Yuj chiꞌ ix laj scꞌanbꞌan ebꞌ dꞌay junjun:
—¿Tom ay mach ix ul acꞌan vaoc?
xchi ebꞌ.
34 Palta ix yalanxi dꞌa ebꞌ:
—Ayic tzin cꞌulan tas sgana jun in checancoti,
yic syicꞌan sbꞌa smunlajel,
ichato tzin va svabꞌi.
35 A ex tic tzeyalaꞌ:
Chan̈eto ujal sja stiempoal sjochchaj ixim trigo,
xe chi.
Palta a in sval dꞌayex:
Qꞌuean̈ec qꞌuelan,
ilecnabꞌi,
toxo ix cꞌoch scꞌual smolchajcot ebꞌ anima dꞌayin icha tzꞌaj sjochchaj ixim trigo.
36 Ay mach van schaan stojol yuj smolbꞌancot ebꞌ anima dꞌayin yic schaan sqꞌuinal ebꞌ dꞌa juneln̈ej icha yaj ebꞌ jochum trigo.
Yuj chiꞌ a mach tzꞌalanel Slolonel Dios icha tzꞌaj stzicjibꞌat ixim trigo yedꞌ ebꞌ smolbꞌancot ebꞌ anima icha tzꞌaj sjochchaj ixim,
junn̈ej ol tzalaj ebꞌ.
37 Yujto yel syal jun abꞌix tic:
Jun stzicanbꞌati,
chꞌocxo mach sjochani,
xchi.
38 A in tic,
ix ex in checbꞌat munlajel dꞌa scal ebꞌ anima icha ebꞌ sjochvi trigo,
maj eyabꞌ syail e tzicanbꞌati.
Chꞌoc ebꞌ bꞌabꞌlaj munlajnac dꞌa scal ebꞌ icha ebꞌ tzicumbꞌat trigo chiꞌ.
A exxo tic,
toxon̈ej tze jochqꞌue vaan ixim trigo chiꞌ,
xchi Jesús dꞌa ebꞌ scꞌaybꞌum chiꞌ.
39 A dꞌa jun chon̈abꞌ dꞌa yol yic Samaria chiꞌ,
tzijtum ebꞌ ix acꞌanoch Jesús dꞌa scꞌool,
yujto a jun ix ix chiꞌ ix alan dꞌa scal ebꞌ:
Yojtacn̈ej tastac tzin cꞌulej yictax in cotoch uninal,
xchi ix.
40 Ix javi ebꞌ,
ix tevioch ebꞌ dꞌa Jesús to scan yedꞌ ebꞌ.
Yuj chiꞌ chabꞌ cꞌual ix ecꞌ yedꞌ ebꞌ.
41 Tzijtumto ebꞌ ix acꞌanoch dꞌa scꞌool ayic ix yabꞌan ebꞌ tas ix yalaꞌ.
42 Yuj chiꞌ ix yal ebꞌ dꞌa ix ix chiꞌ:
—A ticnaic scacꞌoch dꞌa co cꞌool,
man̈ocn̈ej yuj tas ix al chiꞌ dꞌayon̈,
yujto scabꞌ val yedꞌ co chiquin.
Scojtacan val el sicꞌlabꞌil to dꞌa val yel a jun tic co Columal yaj dꞌa yolyibꞌan̈qꞌuinal tic,
xchi ebꞌ dꞌa ix.
Bꞌoxinac scꞌol jun yuninal jun vin̈ yajal
43 Ayic ix ecꞌ chabꞌ cꞌual chiꞌ,
ix elxi Jesús dꞌa Samaria,
ix bꞌatxi dꞌa yol yic Galilea,
Jesús sana al hijo de un oficial (Juan 4.43-54)
44 yujto yalnac Jesús to malaj yelcꞌoch junoc schecabꞌ Dios dꞌa ebꞌ anima bꞌaj cajan.
45 Ayic ix cꞌochxi dꞌa Galilea,
ix te tzalaj ebꞌ anima schaan scꞌochi,
yujto ayic ix xidꞌecꞌ ebꞌ dꞌa Jerusalén dꞌa jun sqꞌuin̈ ebꞌ israel yic snaancot ebꞌ tas aj yelnaccot ebꞌ dꞌa Egipto,
ix yil ebꞌ juntzan̈ tastac xidꞌ scꞌulej Jesús chiꞌ taꞌ.
46 Ix lajvi chiꞌ,
ix cꞌochxi Jesús chiꞌ dꞌa chon̈abꞌ Caná dꞌa yol yic Galilea,
aton bꞌaj ochnac a aꞌ vinoal yuuj.
Axo dꞌa chon̈abꞌ Capernaum ay jun vin̈ yajal yaj dꞌa vin̈ rey,
ay jun yuninal vin̈ te penaay.
47 Ayic ix yabꞌan vin̈ to ix cotxi Jesús dꞌa Judea,
ix jaxxi dꞌa Galilea,
ix bꞌat vin̈ yil Jesús.
Ix tevi vin̈ dꞌay yic sbꞌat yedꞌ vin̈ dꞌa spat,
yic sbꞌat yacꞌan bꞌoxoc scꞌool jun yuninal vin̈ chiꞌ,
yujto vanxo schami.
48 Ix yalan Jesús dꞌa vin̈:
—Tato max eyil juntzan̈ satubꞌtac tzin chꞌoxoꞌ,
juntzan̈ schꞌoxanel in poder,
tecan malaj junoc ex tzin eyacꞌoch dꞌa e cꞌool,
xchi.
49 Palta ix yalanxi vin̈ yajal chiꞌ:
—Mamin,
con̈ vedꞌ elan̈chamel,
yacbꞌan manto cham jun vuninal chiꞌ,
xchi vin̈ dꞌay.
50 Ix yalanxi Jesús icha tic:
—Paxan̈.
Man̈ ol chamlaj jun uninal chiꞌ,
xchi dꞌa vin̈.
Ix yacꞌanoch vin̈ dꞌa scꞌool tas ix yal Jesús chiꞌ,
yuj chiꞌ ix pax vin̈.
51 Vanto scꞌochxi vin̈ dꞌa spat,
axo ebꞌ schecabꞌ vin̈ ix elta schaꞌa.
Ix yalan ebꞌ:
—¿Janicꞌ ix bꞌoxi scꞌool vin̈ jun?
xchi vin̈.
—Atax dꞌa evi dꞌa tzꞌeymaj cꞌual sicbꞌi jun cꞌacꞌ chiꞌ dꞌa vin̈,
xchi ebꞌ.
53 Yuj chiꞌ ix snaancot vin̈ to icha chiꞌ yorail yal Jesús chiꞌ dꞌa vin̈ icha tic:
Man̈ ol chamlaj jun uninal chiꞌ,
xchi.
Yuj chiꞌ,
ix yacꞌoch Jesús vin̈ dꞌa scꞌool yedꞌ jantac ebꞌ ay dꞌa yol spat.
54 Aton jun schabꞌil yechel satubꞌtac schꞌox Jesús tic.
Ayic spetoj dꞌa Judea ix cꞌochxi dꞌa Galilea,
ataꞌ ix sbꞌo junxo tic.