A juntzan̈ tas tzꞌacꞌan juvoquel co pensar
15
Ay juntzan̈ ebꞌ vin̈ fariseo yedꞌ ebꞌ vin̈ cꞌaybꞌum dꞌa ley Moisés,
ix cot ebꞌ vin̈ dꞌa Jerusalén.
Ix smolbꞌan sbꞌa ebꞌ vin̈ bꞌaj ayecꞌ Jesús.
Ix scꞌanbꞌan ebꞌ vin̈ dꞌay:
2 —¿Tas yuj max scꞌanabꞌajej sbꞌeybꞌal ebꞌ co mam quicham ebꞌ a cꞌaybꞌum?
¿Tas yuj max sbꞌiquel scꞌabꞌ ebꞌ ayic sva ebꞌ icha sley ebꞌ co mam quicham chiꞌ?
xchi ebꞌ vin̈ dꞌay.
3 Yuj chiꞌ ix yalan Jesús dꞌa ebꞌ vin̈:
—A exxo tic,
¿tas yuj max e cꞌanabꞌajej juntzan̈ schecnabꞌil Dios?
An̈ej juntzan̈ sley ebꞌ co mam quicham tze cꞌanabꞌajej.
4 Yalnaccan Dios icha tic:
Ayocabꞌ yelcꞌoch e mam e nun dꞌa e sat.
A mach sbꞌajan smam snun,
smiljichamoc,
xchi Dios.
5 Palta a exxo tic,
tzeyalaꞌ to man̈ yovaliloc scolvaj junoc mach dꞌa smam snun.
Tato ay junoc tzꞌalan dꞌa smam snun:
Max yal in colvaj dꞌayex,
yujto masanil tas ay dꞌayin,
a Dios ay yicoꞌ,
tato xchi,
te vachꞌ tzeyabꞌi.
6 A exxo tic tzeyalaꞌ,
tato ay mach tzꞌalan icha chiꞌ,
man̈xo yovaliloc scolvaj dꞌa smam snun.
Icha chiꞌ tzeyutej eyixtanel schecnabꞌil Dios,
yujto an̈ej juntzan̈ sley ebꞌ co mam quicham chiꞌ tze cꞌanabꞌajej.
7 Chabꞌ sat ex.
Yel ton val tas yalnaccan vin̈aj Isaías eyuuj icha tic:
8 A ebꞌ anima tic,
an̈ej yedꞌ stiꞌ ebꞌ syal vachꞌ lolonel dꞌayin.
Palta axo spensar ebꞌ,
najat yajcaneli.
9 Nivanoc tzul yaqꞌuem sbꞌa ebꞌ dꞌayin.
An̈ej juntzan̈ schecnabꞌil anima syacꞌ ebꞌ cꞌaybꞌajoc,
xchi Dios dꞌa Slolonel Tzꞌibꞌabꞌilcani,
xchi Jesús chiꞌ dꞌa ebꞌ vin̈.
10 Ix lajvi chiꞌ,
ix yavtancot ebꞌ anima.
Ix yalan dꞌa ebꞌ:
—Abꞌec.
Nachajocabꞌ eyuuj tas svalaꞌ:
11 A juntzan̈ tas scacꞌoch dꞌa co tiꞌ,
max on̈ juviel-laj yuuj dꞌa yichan̈ Dios.
Palta a juntzan̈ tas tzꞌelta dꞌa co tiꞌ,
a tzon̈ juanel dꞌa yichan̈,
xchi dꞌa ebꞌ.
12 Yuj chiꞌ,
ix cꞌoch ebꞌ scꞌaybꞌum dꞌa stzꞌey.
Ix yalan ebꞌ:
—¿Ojtac ama to ix te cot yoval ebꞌ vin̈ fariseo chiꞌ yuj jun ix al chiꞌ?
xchi ebꞌ dꞌay.
13 Ix yalanpax dꞌa ebꞌ:
—Jantacn̈ej juntzan̈ te teꞌ man̈ avabꞌiloc yuj co Mam Dios ayecꞌ dꞌa satchaan̈,
ol tocꞌjocqꞌueta teꞌ yedꞌ schꞌan̈al yibꞌ.
Yuj chiꞌ,
icha junoc te teꞌ stocꞌjiqꞌueta yedꞌ schꞌan̈al yibꞌ chiꞌ,
icha chiꞌ ol aj ebꞌ.
14 Yuj chiꞌ,
yilxo ebꞌ.
Lajan ebꞌ icha junoc mach max uji yilani,
nivanoc squetzbꞌat junocxo mach max uji pax yilani.
Qꞌuinaloc ay junoc mach max uji yilani,
squetzanbꞌat junocxo mach max uji yilan chiꞌ yedꞌoc,
syetbꞌatej sbꞌa ebꞌ dꞌa junoc vitz schavan̈il,
xchi Jesús.
15 Axo ix yalan vin̈aj Pedro dꞌa Jesús:
—Al dꞌayon̈ tas syalelcꞌoch jun abꞌix ix al dꞌa ebꞌ fariseo chiꞌ,
xchi vin̈ dꞌay.
16 Yuj chiꞌ ix yalan Jesús:
—¿Tom max nachajpaxel jun chiꞌ eyuuj?
17 ¿Tom man̈ eyojtacoc?
A tas scacꞌoch dꞌa co tiꞌ,
a dꞌa yol co cꞌool tzꞌemcꞌochi,
axo dꞌa junxo rato,
tzꞌelxicani.
18 Palta a juntzan̈ tas tzꞌelta dꞌa co tiꞌ,
a dꞌa co pensar spitzvicoti.
Aton juntzan̈ chiꞌ tzon̈ juanel dꞌa yichan̈ Dios.
19 Yujto a dꞌa spensar ebꞌ anima spitzvi chuc pensaril,
miloj anima,
ajmulal,
elcꞌal,
testigoal dꞌa es yedꞌ bꞌuchumtaquil.
20 Aton juntzan̈ chiꞌ tzꞌicꞌan sjuviel ebꞌ anima dꞌa yichan̈ Dios.
Palta vachꞌchom max co bꞌiquel co cꞌabꞌ tzon̈ vaꞌi,
max on̈ juviel-laj dꞌa yichan̈ Dios,
xchi Jesús.
A jun ix ix man̈ israeloc yacꞌnacoch Jesús dꞌa scꞌool
21 Ix lajvi chiꞌ,
ix bꞌatxi Jesús.
Ix cꞌoch dꞌa yol yic Tiro yedꞌ dꞌa Sidón.
22 Ataꞌ ay jun ix man̈ israeloc,
aj Canaán ix.
Ix cꞌoch ix dꞌa Jesús.
Ix avaj chaan̈ ix dꞌay:
—Mamin,
yin̈til ach vin̈aj David,
ocꞌoc val a cꞌool dꞌayin.
Ay jun ix vuneꞌ ayoch jun enemigo dꞌay.
Syabꞌ val syail ix yuuj,
xchi ix dꞌay.
23 Palta max tacꞌvilaj dꞌa ix.
Axo ix cꞌoch ebꞌ scꞌaybꞌum dꞌa stzꞌey,
ix yalan ebꞌ dꞌay:
—Octom tza chec meltzaj jun ix tic,
yujto man̈ jantacoc yavaj ix dꞌa co patic,
xchi ebꞌ dꞌay.
24 Ix lajvi chiꞌ,
ix tacꞌvi Jesús:
—An̈ej dꞌa ebꞌ quetisraelal checbꞌil in cot yuj Dios.
Yujto icha yaj juntzan̈ nocꞌ calnel sateqꞌui,
icha chiꞌ yaj ebꞌ,
xchi.
25 Palta ix ecꞌbꞌat ix dꞌa yichan̈ ebꞌ.
Ix em cuman ix dꞌa yichan̈ Jesús.
Ix yalan ix dꞌay:
—Mamin,
colvajan̈ dꞌayin,
xchi ix dꞌay.
26 —Palta man̈ vachꞌoc tato stocꞌjiecꞌ yooch ebꞌ uninabꞌil,
tzꞌacꞌjibꞌat dꞌa nocꞌ yunetac tzꞌiꞌ,*
xchi Jesús dꞌa ix.
27 Palta ix tacꞌvi ix dꞌay:
—Yel ton Mamin,
palta a nocꞌ yunetac tzꞌiꞌ chiꞌ sicꞌanqꞌue scꞌajil yooch ebꞌ uninabꞌil dꞌa yalan̈ smexa vin̈ aj pat,
xchi ix dꞌay.
28 Yuj chiꞌ ix yalanxi dꞌa ix:
—A ach tic,
svilaꞌ tzacꞌ val och Dios dꞌa a cꞌool.
Yuj chiꞌ,
bꞌoocabꞌ icha tas tza nibꞌej chiꞌ,
xchi dꞌa ix.
A dꞌa jun rato chiꞌ,
ix bꞌoxican scꞌool ix yuneꞌ ix chiꞌ.
Tzijtum ebꞌ bꞌoxinac scꞌool yuj Jesús
29 Ix lajvi chiꞌ,
ix bꞌatxi Jesús.
Ix bꞌeybꞌat dꞌa stiꞌ aꞌ n̈ajabꞌ yic Galilea.
Ix cꞌoch dꞌa jun tzalan.
Ix em cꞌojan taꞌ.
30 Man̈ jantacoc ebꞌ anima ix cꞌoch bꞌaj ayecꞌ chiꞌ.
Ix icꞌjicot juntzan̈ ebꞌ max yal sbꞌeyi,
ebꞌ max uji yilani,
ebꞌ max yal sloloni yedꞌ ebꞌ malaj scꞌabꞌ.
Tzijtumto juntzan̈xo ebꞌ penaay ix icꞌjicot dꞌay.
Ix icꞌjicot ebꞌ dꞌa yichan̈ Jesús.
Axo ix acꞌan bꞌoxoc scꞌool ebꞌ.
31 A ebꞌ max yal sloloni,
ix lolonqꞌue ebꞌ,
a ebꞌ malaj scꞌabꞌ,
ix bꞌoxi ebꞌ.
A ebꞌ max yal sbꞌeyi,
ix bꞌeyxi ebꞌ.
An̈ejaꞌ ebꞌ max uji yilani,
ix yilxi ebꞌ.
Ayic ix yilan juntzan̈ chiꞌ ebꞌ anima,
ix te sat scꞌool ebꞌ.
Ix yalan vachꞌ lolonel ebꞌ dꞌa Dios.
Ix acꞌji va chan̈eꞌ mil ebꞌ vinac
32 Ix yavtancot ebꞌ scꞌaybꞌum Jesús,
ix yalan dꞌa ebꞌ:
—Tzꞌocꞌ in cꞌool yuj juntzan̈ anima tic,
yujto chabꞌjitax jacan ebꞌ dꞌayin.
A ticnaic man̈xa tas sva ebꞌ.
Max yal in cꞌool tzin chec pax ebꞌ dꞌa spat,
tato max va ebꞌ sbꞌati.
Ay smay tzꞌel yip ebꞌ dꞌa yol bꞌe,
xchi dꞌa ebꞌ.
33 —Palta tzijtum ebꞌ.
¿Tas ol cutoc cacꞌan va ebꞌ dꞌa jun tzꞌinan luum tic?
xchi ebꞌ scꞌaybꞌum chiꞌ.
34 —¿Jayeꞌ ixim pan eyedꞌnac?
xchi dꞌa ebꞌ.
—Uquen̈ej ixim yedꞌ jay cꞌotan̈ nocꞌ chay,
xchi ebꞌ dꞌay.
35 Ix lajvi chiꞌ,
ix yalan dꞌa ebꞌ anima chiꞌ to tzꞌem cꞌojjabꞌ ebꞌ dꞌa sat luum.
36 Ix yicꞌanchaan̈ ixim pan chiꞌ yuquil yedꞌ jay cꞌotan̈ nocꞌ chay chiꞌ.
Ix yacꞌan yuj diosal dꞌa Dios yuuj.
Ix xepanbꞌat ixim pan chiꞌ yedꞌ nocꞌ chay chiꞌ.
Ix yacꞌan dꞌa ebꞌ scꞌaybꞌum.
Axo ebꞌ ix pucanbꞌat dꞌa ebꞌ anima chiꞌ.
37 Ix va ebꞌ smasanil,
ix bꞌudꞌji ebꞌ.
A ix lajvi sva ebꞌ,
uqueto xuuc ixim ix yacꞌ sobre ix smolqꞌue ebꞌ scꞌaybꞌum chiꞌ.
38 Chan̈eꞌ mil ebꞌ vin̈ vinac ix vaꞌi.
Axo ebꞌ ix ix yedꞌ ebꞌ unin,
maj bꞌisjoclaj ebꞌ.
39 Ix lajvi chiꞌ,
ix yalan quilcobꞌa Jesús dꞌa ebꞌ anima chiꞌ.
Ix ochxi dꞌa yol teꞌ barco.
Ix bꞌat dꞌa yol yic Magadán.