A juntzan̈ tas tzꞌixtanel co pensar
7
Ay juntzan̈ ebꞌ vin̈ fariseo yedꞌ jayvan̈ ebꞌ vin̈ cꞌaybꞌum dꞌa ley Moisés,
ix cot ebꞌ vin̈ dꞌa Jerusalén.
Ix smolbꞌan sbꞌa ebꞌ vin̈ bꞌaj ayecꞌ Jesús.
Marcos 7.1-23
2 Ix yilanoch ebꞌ scꞌaybꞌum Jesús chiꞌ ebꞌ vin̈,
to man̈ ichoc val yaj sleyal ebꞌ vin̈ syutej ebꞌ sbꞌican scꞌabꞌ ayic sva ebꞌ.
Ix och spaltail ebꞌ dꞌa sat ebꞌ vin̈ yuj scꞌabꞌ chiꞌ.
Yuj chiꞌ,
ix yalan ebꞌ vin̈ to malaj svachꞌil ebꞌ.
3 Yujto a ebꞌ vin̈ fariseo chiꞌ yedꞌ smasanil juntzan̈xo ebꞌ aj Israel,
an̈ej sbꞌeybꞌal smam yicham ebꞌ sbꞌeybꞌalej.
Yuj chiꞌ,
tato max sbꞌiquel scꞌabꞌ ebꞌ icha syal sbꞌeybꞌal ebꞌ chiꞌ,
max valaj ebꞌ.
4 Axo yic sjax ebꞌ dꞌa mercado,
max valaj ebꞌ masanto sbꞌic scꞌabꞌ ebꞌ,
icha chiꞌ syalelcꞌoch jun sbꞌeybꞌal ebꞌ chiꞌ.
Man jantacto juntzan̈xo tas sbꞌeybꞌalej ebꞌ,
icha yic sbꞌican el svaso ebꞌ,
xalu yedꞌ juntzan̈xo qꞌuen yamcꞌabꞌ yic vael.
5 Yuj chiꞌ,
a ebꞌ vin̈ fariseo chiꞌ yedꞌ ebꞌ vin̈ cꞌaybꞌum dꞌa ley Moisés,
ix yal ebꞌ vin̈ dꞌa Jesús:
—¿Tas yuj max scꞌanabꞌajej juntzan̈ sbꞌeybꞌal ebꞌ co mam quicham ebꞌ a cꞌaybꞌum tic?
Ina max sbꞌic scꞌabꞌ ebꞌ ayic sva ebꞌ,
xchi ebꞌ vin̈.
6 Yuj chiꞌ,
ix yal Jesús dꞌa ebꞌ vin̈:
—A ex tic,
te chabꞌ sat ex.
Yel ton val yalnaccan vin̈aj Isaías eyuuj,
ayic stzꞌibꞌannaccan vin̈ icha tic:
A ebꞌ anima tic,
an̈ej dꞌa stiꞌ ebꞌ syal vachꞌ lolonel dꞌayin.
Palta axo spensar ebꞌ,
najat yajcanel dꞌayin.
7 Nivanoc tzul yaqꞌuem sbꞌa ebꞌ dꞌayin.
An̈ej juntzan̈ schecnabꞌil anima syacꞌ ebꞌ cꞌaybꞌajoc,
xchi Dios dꞌa Slolonel.
8 Yujto a ex tic,
ix eyactejcan schecnabꞌil Dios yic vachꞌ an̈ej juntzan̈ sbꞌeybꞌal e mam eyicham tze cꞌanabꞌajej.
9 Ton̈ej tzeyixtejel schecnabꞌil Dios,
yuj e cꞌanabꞌajan juntzan̈ sbꞌeybꞌal ebꞌ e mam eyicham chiꞌ.
10 Yalnaccan vin̈aj Moisés icha tic:
Ayocabꞌ yelcꞌoch e mam e nun dꞌa e sat.
A ebꞌ sbꞌajan smam snun,
smiljicham ebꞌ,
xchi.
11 Palta a exxo tic,
tzeyalaꞌ to man̈ yovaliloc scolvaj junoc mach dꞌa smam snun.
Tato ay junoc mach tzꞌalan icha tic dꞌa smam snun:
Max yal in colvaj dꞌayex,
yujto a masanil tas ay dꞌayin,
yicn̈ej Dios yaji,
tato xchi,
te vachꞌ tzeyabꞌi.
12 Tato ay mach tzꞌalan icha chiꞌ,
a exxo tic tzeyalaꞌ to man̈xo yovaliloc scolvaj ebꞌ dꞌa smam snun chiꞌ.
13 Icha chiꞌ tzeyutej eyixtanel schecnabꞌil Dios,
yujto an̈ej sbꞌeybꞌal ebꞌ e mam eyicham tzeyacꞌ scꞌaybꞌej ebꞌ.
Tzijtumto juntzan̈xo tas tze cꞌulej icha juntzan̈ tic,
xchi Jesús dꞌa ebꞌ.
14 Ix lajvi chiꞌ,
ix yavtanxicot ebꞌ anima Jesús.
Ix yalan dꞌa ebꞌ:
—Maclejec eyabꞌ e masanil tas ol valaꞌ.
Nachajocabꞌel eyuuj:
15-16 A juntzan̈ tas tzꞌoch dꞌa co tiꞌ,
max on̈ juviel-laj yuuj dꞌa yichan̈ Dios.
Palta a juntzan̈ tas scot dꞌa co pensar,
a tzon̈ acꞌan juvoquel dꞌa yichan̈ Dios,
xchi dꞌa ebꞌ.
17 Ix lajvi chiꞌ,
ix actajcan ebꞌ anima yuj Jesús,
ix och dꞌa yol pat yedꞌ ebꞌ scꞌaybꞌum.
Ix scꞌanbꞌan ebꞌ dꞌay:
—¿Tas syalelcꞌoch jun ix al tic?
xchi ebꞌ dꞌay.
18 Ix yalanpax dꞌa ebꞌ:
—¿Tom max nachajel eyuuj?
¿Tom man̈ eyojtacoc?
A tas tzꞌoch dꞌa co tiꞌ max on̈ juviel-laj yuuj dꞌa yichan̈ Dios,
19 yujto man̈oc dꞌa co pensar scꞌochi.
Ton̈ej tzꞌem dꞌa yol co cꞌool,
axo dꞌa junxo rato,
tzꞌelixcani,
xchi dꞌa ebꞌ.
Icha chiꞌ ix yutej yalani to a jantacn̈ej tas sco vaꞌa,
malaj yovalil yuj Dios.
20 Ix yalanxi junxo tic dꞌa ebꞌ:
—A juntzan̈ tas scot dꞌa co pensar,
a tzon̈ juanel dꞌa yichan̈ Dios.
21 Yujto a dꞌa spensar ebꞌ anima spitzvi juntzan̈ chuc pensaril tic.
Ay ebꞌ ayxo yetbꞌeyum tzꞌem dꞌa mul.
Ay pax ebꞌ malaj yetbꞌeyum tzꞌempaxi.
Ay ebꞌ smacꞌancham yetanimail.
22 Ay ebꞌ tzꞌelcꞌani.
Ay ebꞌ syiloch scꞌool dꞌa junocxo.
Ay ebꞌ malaj svachꞌil syutej sbꞌa.
Ay ebꞌ tzꞌesani.
Ay ebꞌ malaj jabꞌoc sqꞌuixvelal scomon cꞌulan junoc tasi.
Ay ebꞌ schichonoch scꞌool dꞌa junoc mach vachꞌ yaji.
Ay ebꞌ comonn̈ej sbꞌuchvaji.
Ay ebꞌ acꞌumtac syutej sbꞌa.
An̈ejtonaꞌ,
ay pax ebꞌ malaj jabꞌoc spensar.
23 A juntzan̈ chucal tic,
a dꞌa spensar ebꞌ anima spitzvi.
A tzꞌixtanel ebꞌ dꞌa yichan̈ Dios,
xchi Jesús.
Ay jun ix man̈ israeloc ix yacꞌoch Jesús dꞌa scꞌool
24 Ix lajvi chiꞌ,
ix elxi Jesús dꞌa jun lugar chiꞌ,
ix cꞌoch dꞌa yol yic Tiro yedꞌ Sidón.
Axo dꞌa yol jun pat ix och vaan.
Yujto sgana to malaj mach tzꞌojtacaneli tato ayecꞌ taꞌ,
palta maj yal-laj scꞌubꞌanel sbꞌa.
Marcos 7.24-37
25 Ataꞌ ayecꞌ jun ix unin,
ayoch jun enemigo dꞌa ix,
axo ix yabꞌan ix snun ix to ix cꞌoch Jesús taꞌ.
Yuj chiꞌ,
ix bꞌat ix yilaꞌ.
Ix bꞌat em cuman ix dꞌay.
26 A jun ix chiꞌ,
griega ix,
aj Sirofenicia ix.
Ix tevi ix dꞌa Jesús,
yic syiqꞌuel jun enemigo chiꞌ dꞌa ix yuneꞌ ix chiꞌ.
27 Axo ix yalan dꞌa ix:
—Bꞌabꞌlaj vaocabꞌcan ebꞌ unin.
Man̈ vachꞌoc tato stocꞌjiecꞌ svael ebꞌ,
tzꞌacꞌjibꞌat dꞌa nocꞌ yunetac tzꞌiꞌ,
xchi.*
28 Palta axo ix tacꞌvi ix dꞌay:
—Yel ton Mamin,
palta a nocꞌ yunetac tzꞌiꞌ chiꞌ sicꞌanqꞌuechaan̈ scꞌajil yooch ebꞌ unin dꞌa yalan̈ mexa,
xchi ix dꞌay.
29 Yuj chiꞌ,
ix yalanxi Jesús dꞌa ix:
—A jun ix al tic dꞌayin,
te vachꞌ.
Syalxo a pax dꞌa a pat,
yujto toxo ix el jun enemigo chiꞌ dꞌa ix uneꞌ chiꞌ,
xchi dꞌa ix.
30 Axo ix cꞌochxi ix dꞌa spat,
ix yilan ix to cꞌotanecꞌ ix yuneꞌ chiꞌ dꞌa sat schꞌat.
Toxo ix el jun enemigo chiꞌ dꞌa ix.
Ix jacvi schiquin jun vin̈ chacan̈
31 Ayic ix elxi Jesús dꞌa Tiro bꞌaj ayecꞌ chiꞌ,
ix ecꞌ dꞌa chon̈abꞌ Sidón yedꞌ dꞌa juntzan̈ chon̈abꞌ ay dꞌa yol yic Decápolis.
Ix lajvi chiꞌ,
ix cꞌoch dꞌa stiꞌ aꞌ n̈ajabꞌ yic Galilea.
32 Axo yic ayecꞌ taꞌ,
ix icꞌjicot jun vin̈ chacan̈ dꞌay yuj ebꞌ anima,
pural syal pax slolon vin̈.
Ix tevi ebꞌ dꞌa Jesús yic syacꞌbꞌat scꞌabꞌ dꞌa yibꞌan̈ vin̈.
33 Yuj chiꞌ,
ix yicꞌanelta vin̈ dꞌa scal ebꞌ anima chiꞌ,
ix yacꞌanoch yiximal scꞌabꞌ dꞌa yol schiquin vin̈.
Ix stzubꞌani.
Ix lajvi chiꞌ,
ix slatzanoch scꞌabꞌ dꞌa sn̈iꞌ yacꞌ vin̈.
34 Ix qꞌue qꞌuelan dꞌa satchaan̈,
ix javi sicꞌson scꞌool.
—Efata,
xchi.
Syalelcꞌochi:
Jacvocabꞌi.
35 Dꞌa jun rato chiꞌ,
ix jacvi schiquin vin̈.
Ix tijviel yacꞌ vin̈.
Ix lolonqꞌue vin̈.
36 Ix lajvi chiꞌ,
ix cham val yalan Jesús dꞌa ebꞌ anima:
—Ayta bꞌaj tzeyalel jun ix eyil tic,
xchi dꞌa ebꞌ.
Axo yic ix yalan jun chiꞌ dꞌa ebꞌ,
masn̈ej ix ste alejel ebꞌ.
37 Ix te sat scꞌool ebꞌ.
Ix laj yalan ebꞌ:
—Masanil tas scꞌulej,
vachꞌn̈ej.
Sjacvi schiquin ebꞌ chacan̈.
Slolonpax ebꞌ max uji taxon sloloni,
xchi ebꞌ.