Acꞌjinac proval Jesús yuj vin̈ diablo
4
A Jesús te ayoch Yespíritu Dios dꞌay,
ix el bꞌaj ayecꞌ dꞌa aꞌ nivan Jordán.
Ix icꞌjibꞌat yuj Espíritu chiꞌ dꞌa tzꞌinan luum.
Lucas 4.1-30
2 40 cꞌual ix ecꞌ taꞌ,
axo vin̈ diablo ix cꞌoch yacꞌ proval.
Maj valaj Jesús chiꞌ dꞌa juntzan̈ cꞌual chiꞌ,
yuj chiꞌ ix och svejel.
3 Ix yalan vin̈ diablo chiꞌ dꞌay:
—Ina Yuninal ach Dios,
al dꞌa jun qꞌueen tic to tzꞌoch panil,
xchi vin̈ dꞌay.
4 Ix tacꞌvi Jesús dꞌa vin̈:
—Syal dꞌa Slolonel Dios Tzꞌibꞌabꞌilcan icha tic:
Man̈ yujocn̈ej tas svaji ay co qꞌuinal,
xchi Slolonel chiꞌ,
xchi dꞌa vin̈.
5 Ix lajvi chiꞌ,
ix icꞌjiqꞌue Jesús dꞌa jun nivan tzalan yuj vin̈.
Ix schꞌoxan juntzan̈ nivac chon̈abꞌ vin̈ dꞌa masanil yolyibꞌan̈qꞌuinal tic dꞌa Jesús chiꞌ.
6 Ix yalan vin̈ dꞌay:
—Ol ach vacꞌoch yajalil dꞌa masanil juntzan̈ chon̈abꞌ tzin chꞌox tic dꞌayach.
Ol ach och bꞌeyumal yuuj.
A juntzan̈ tic dꞌa yol in cꞌabꞌ ay,
svacꞌn̈ej dꞌa mach bꞌaj in gana svacꞌaꞌ.
7 Tato tzach em cuman dꞌayin,
tzalan a bꞌa dꞌayin,
icn̈ej yaj juntzan̈ tic smasanil,
xchi vin̈ diablo chiꞌ dꞌay.
8 Axo ix yalan Jesús dꞌa vin̈:
—Syal dꞌa Slolonel Dios Tzꞌibꞌabꞌilcani:
An̈ej dꞌa Dios Cajal tzeyal e bꞌa.
An̈ej pax dꞌay tzeyaqꞌuem e bꞌa,
xchi dꞌa Slolonel chiꞌ,
xchi dꞌa vin̈.
9 Ix lajvi chiꞌ,
ix icꞌjixibꞌat Jesús yuj vin̈ diablo chiꞌ dꞌa chon̈abꞌ Jerusalén.
Ix yicꞌanqꞌue vin̈ dꞌa schon stemplo Dios,
ix yalan vin̈ dꞌay:
Ol yal Dios dꞌa ebꞌ yángel to tzach stan̈vej ebꞌ.
11 Ol ach quetzchajqꞌue yuj ebꞌ,
yic vachꞌ man̈ ol a tenoch oc dꞌa qꞌuen qꞌueen,
xchi Slolonel Dios chiꞌ,
xchi vin̈ diablo chiꞌ.
12 Ix yalan Jesús dꞌa vin̈:
—Tzꞌibꞌyajpaxcani:
Man̈ eyacꞌ proval Cajal,
aton co Diosal,
xchi dꞌa Slolonel Dios,
xchi Jesús.
13 Yujto man̈xa junocxo tas bꞌaj syal yacꞌji proval Jesús yuj vin̈ diablo chiꞌ,
yuj chiꞌ ix actajcan yuj vin̈ junoc tiempoal.
Elnac yich smunlajel Jesús
14 Ix jax Jesús dꞌa Galilea,
te ayoch spoder Yespíritu Dios dꞌay.
Ix laj abꞌchaj yabꞌixal dꞌa juntzan̈ lugar chiꞌ.
15 Ix ecꞌ scꞌaybꞌej ebꞌ anima dꞌa yoltac spatil culto.
Masanil ebꞌ ix alan vachꞌ lolonel dꞌay.
16 Ichato chiꞌ ix cꞌoch dꞌa chon̈abꞌ Nazaret bꞌaj qꞌuibꞌnac.
Axo dꞌa scꞌual syicꞌ yip ebꞌ israel,
ix och dꞌa yol spatil culto ichataxon smodo.
Ix qꞌue lin̈an yic syavtan Slolonel Dios Tzꞌibꞌabꞌilcani.*
17 Yuj chiꞌ,
ix acꞌjibꞌat jun bꞌaj tzꞌibꞌabꞌilcan Slolonel Dios chiꞌ dꞌay,
aton tas tzꞌibꞌabꞌilcan yuj vin̈aj Isaías schecabꞌ Dios.
Ix xuyanbꞌati,
ix sayan bꞌaj syal icha tic:
18 A Yespíritu Dios Cajal ayoch dꞌayin,
yujto aꞌ acꞌjinac vopisio yic svalanel jun vachꞌ abꞌix dꞌa ebꞌ mebꞌaꞌ.
In scheccoti yic svacꞌ snivanil scꞌool ebꞌ ilcꞌolal yaji.
Tzul val yabꞌ ebꞌ icha preso yaji chajtil tzꞌaj scolchaj ebꞌ.
In checjicot vacꞌ bꞌoxoc ebꞌ max uji yilani.
Tzul vicꞌanel ebꞌ ayoch tas dꞌa yibꞌan̈ dꞌa libre.
19 An̈ejtonaꞌ tzul valaneli to toxo sja stiempoal jun colnabꞌil syacꞌ Dios Cajal.
Icha chiꞌ syal Slolonel Dios tic,
xchi Jesús dꞌa ebꞌ.
20 Ix chulanxican jun bꞌaj tzꞌibꞌabꞌilcan chiꞌ,
ix yacꞌanxi dꞌa vin̈ sicꞌumal.
Ichato chiꞌ ix em cꞌojan* scꞌaybꞌej ebꞌ.
Axo masanil ebꞌ ayoch dꞌa yol chiꞌ,
ix te och qꞌuelan ebꞌ dꞌay.
21 Ix syamanoch scꞌaybꞌan ebꞌ,
ix yalani:
—A val dꞌa jun cꞌual tic,
ix elcꞌoch syal Slolonel Dios tic dꞌa eyichan̈,
xchi dꞌa ebꞌ.
22 Masanil ebꞌ ix te sat scꞌool yuj juntzan̈ lolonel vachꞌ ix yal Jesús,
yuj chiꞌ ix yal vachꞌ lolonel ebꞌ dꞌay.
Ix laj scꞌanbꞌan yabꞌ junjun ebꞌ:
—¿Man̈toc a vin̈ tic yuninal vin̈aj José?
xchi ebꞌ.
23 Yuj chiꞌ ix yal Jesús dꞌa ebꞌ:
—A ex ton tic ol eyal dꞌayin:
Ach an̈tum,
munil tzan̈tej a bꞌa.
A tas a cꞌulejnac dꞌa chon̈abꞌ Capernaum,
cꞌulej pax dꞌa a chon̈abꞌ tic quilaꞌ,
xe cham dꞌayin.
24 Val yel sval dꞌayex,
malaj junoc schecabꞌ Dios ay yelcꞌoch dꞌa sat ebꞌ yetchon̈abꞌ.
25 Tze nacot yabꞌixal vin̈aj Elías dꞌa pecaꞌ,
chajtil ecꞌnac vin̈.
Nan̈al schan̈il abꞌil man̈xo yacꞌnacoc n̈abꞌ.
Te nivan vejel janac dꞌa yibꞌan̈ ebꞌ anima smasanil.
A dꞌa jun tiempoal chiꞌ,
tzijtum ebꞌ ix chamnac yetbꞌeyum ay dꞌa scal ebꞌ quetisraelal.
26 Palta man̈oc dꞌa junoc ebꞌ ix chiꞌ checjinacbꞌat vin̈aj Elías yuj co Mam Dios yic scolvaji.
An̈ej dꞌa jun ix aj Sarepta dꞌa yol yic Sidón,
an̈ej taꞌ cꞌochnac vin̈.
27 An̈ejtonaꞌ,
tze napaxcot yabꞌixal jun vin̈ schecabꞌ Dios scuchan Eliseo.
Tzijtum ebꞌ quetisraelal yamchajnac yuj jun yabꞌil scuch lepra.
Palta malaj junoc ebꞌ bꞌoxinac yuj vin̈aj Eliseo chiꞌ,
an̈ej jun vin̈ aj Siria scuchan Naamán,
an̈ej vin̈ bꞌoxinac yuj vin̈,
xchi Jesús dꞌa ebꞌ.
28 Axo ebꞌ ayecꞌ yedꞌ taꞌ,
ayic ix yabꞌan ebꞌ,
ix te cot yoval ebꞌ smasanil dꞌay.
29 Yuj chiꞌ ix laj qꞌue vaan ebꞌ,
ix spechanel ebꞌ dꞌa stiel chon̈abꞌ,
yujto a jun chon̈abꞌ chiꞌ dꞌa jolom tzalan ay,
ataꞌ ijan ix syumbꞌat ebꞌ dꞌa sat cꞌacap.
30 Palta axo Jesús bꞌen̈ej ix ecꞌbꞌat dꞌa scal ebꞌ,
ix bꞌati.
Ix bꞌoxi scꞌool jun vin̈ ayoch enemigo dꞌay
31 Ichato chiꞌ,
ix emta Jesús dꞌa chon̈abꞌ Capernaum dꞌa yol yic Galilea.
Ataꞌ ix scꞌaybꞌej ebꞌ anima dꞌa scꞌual icꞌoj ip.
Lucas 4.31-44
32 Ix te sat scꞌool ebꞌ yabꞌan juntzan̈ cꞌaybꞌubꞌal chiꞌ,
yujto ayic ix yalaneli,
ix checlaji to te ay yopisio yuj Dios.
33 A dꞌa yol spatil culto ay jun vin̈ ayoch enemigo dꞌay.
Ix el yav jun enemigo chiꞌ.
34 —Ach Jesús aj Nazaret.
¿Tas yuj tzacꞌoch a bꞌa quedꞌoc?
¿Tom tzach javi on̈ a sateli?
Vojtac ach,
a ach tic sicꞌbꞌil ach el yuj Dios,
xchi jun enemigo chiꞌ.
35 Axo Jesús ix tuman jun enemigo chiꞌ,
ix yalan dꞌay:
—Tzꞌin xa chi,
actejcan jun vin̈ tic,
xchi dꞌay.
Ix lajvin̈ej chiꞌ,
ix syuman telvoc jun vin̈ bꞌaj ayoch chiꞌ,
ix eli,
maj lajvoclaj vin̈ yuuj.
36 Masanil ebꞌ anima ayecꞌ taꞌ,
ix te sat scꞌol ebꞌ yuuj,
ix laj yalan junjun ebꞌ:
—¿Tastaxlaj yaj juntzan̈ slolonel jun vin̈ tic?
A slolonel vin̈ tic schꞌoxaneli to ay spoder schecanel juntzan̈ enemigo tic,
tzꞌel ebꞌ bꞌian,
xchi ebꞌ.
37 Ix laj el yabꞌixal Jesús dꞌa juntzan̈ lugar ay dꞌa slacꞌanil chiꞌ.
Ix laj bꞌoxi scꞌol ebꞌ penaay yuj Jesús
38 Axo ix elta Jesús dꞌa yol spatil culto,
ix cꞌoch dꞌa spat vin̈aj Simón.
A ix sn̈iꞌ vin̈aj Simón chiꞌ,
te penaay ix yuj cꞌacꞌal yabꞌil.
Ix tevi ebꞌ dꞌa Jesús yuj ix.
39 Ix snitzanbꞌat sbꞌa Jesús chiꞌ bꞌaj jichanecꞌ ix chiꞌ,
ix scachanoch vaan jun ilya chiꞌ.
Ix el jun cꞌacꞌal yabꞌil chiꞌ dꞌa ix.
Junanto rato chiꞌ ix qꞌue vaan ix,
ix cꞌatcꞌajcot ebꞌ yuj ix.
40 Axo dꞌa yemcꞌualil,
masanil juntzan̈ ebꞌ penaay ix icꞌjicot dꞌa Jesús.
Chꞌocchꞌoc ilyail tzꞌicꞌan ebꞌ.
Ix yacꞌanecꞌ scꞌabꞌ dꞌa yibꞌan̈ ebꞌ,
ix laj bꞌoxican ebꞌ.
41 Tzijtum ebꞌ anima bꞌaj ix laj el ebꞌ enemigo,
ix laj el yav ebꞌ,
ix yalan ebꞌ:
—A ach tic Yuninal ach Dios,
xchi ebꞌ dꞌay.
Palta axo Jesús ix cachan ebꞌ enemigo chiꞌ,
maj schalaj lolon ebꞌ,
yujto ojtacabꞌil yuj ebꞌ to Cristo.
Ix yalel slolonel Dios Jesús dꞌa Galilea
42 Ayic van sacbꞌi,
ix bꞌat Jesús dꞌa stiel chon̈abꞌ bꞌaj tzꞌinan.
Axo ebꞌ anima,
van sayjiecꞌ yuj ebꞌ,
ix cꞌoch ebꞌ bꞌaj ayecꞌ chiꞌ.
Sgana ebꞌ maj bꞌatlaj Jesús chiꞌ,
43 palta ix yalan dꞌa ebꞌ:
—Yovalil ol bꞌat val pax el yabꞌixal dꞌa juntzan̈xo chon̈abꞌ,
yic syabꞌ ebꞌ chajtil tzꞌaj yoch ebꞌ dꞌa yol scꞌabꞌ Dios.
Yuj chiꞌ in checjicoti,
xchi dꞌa ebꞌ.
44 Ix ecꞌn̈ej Jesús dꞌa yoltac spatil culto dꞌa yol yic Judea.
Ix yalanel slolonel Dios.