A Vachꞌ Abꞌix Ix Stzꞌibꞌejcan
SAN MARCOS
A vin̈aj Juan tzꞌacꞌan bautizar ix alanel slolonel Dios
1
Icha tic ix aj yel yich vachꞌ abꞌix yic Jesucristo,
Yuninal Dios.
Marcos 1.1-13
2 A jun schecabꞌ Dios scuchan Isaías ix tzꞌibꞌancan tas xchi Dios dꞌa Yuninal.
Ix yalan Dios icha tic:
Ol in checbꞌat jun in checabꞌ,
ol bꞌabꞌlaj bꞌat dꞌayach.
Icha tzꞌaj sbꞌo bꞌe,
icha chiꞌ ol yutoc sbꞌoan sbꞌeybꞌal ebꞌ anima,
ayic manto ach cꞌochi,
xchi.
3 A jun chiꞌ ol avaj dꞌa tzꞌinan luum,
ol yalan icha tic:
Icha tzꞌaj sbꞌo bꞌe ayic sjavi junoc yajal,
icha chiꞌ tzeyutej e bꞌoan e bꞌeybꞌal,
yujto ol javoc vin̈ Cajal,
icha chiꞌ ol yalaꞌ,
xchican dꞌa Slolonel Dios chiꞌ.
4 A vin̈aj Juan ix acꞌan bautizar ebꞌ anima dꞌa tzꞌinan luum chiꞌ,
ix yalan vin̈ dꞌa ebꞌ ix cꞌoch dꞌay:
Yovalil tze na val e bꞌa yuj e mul yic tzꞌacꞌjican lajvoc e mul chiꞌ yuj Dios.
Ichato chiꞌ ol ex vacꞌan bautizar,
xchi vin̈ dꞌa ebꞌ.
5 Axo ebꞌ anima dꞌa junjun chon̈abꞌ dꞌa yol yic Judea yedꞌ smasanil ebꞌ aj Jerusalén ix cꞌoch ebꞌ smaclej yabꞌ dꞌa vin̈aj Juan chiꞌ.
Slajvi yalanqꞌueta smul junjun ebꞌ,
ichato chiꞌ tzꞌacꞌji bautizar ebꞌ yuj vin̈ dꞌa aꞌ nivan Jordán.
6 A vin̈aj Juan chiꞌ,
a xil nocꞌ camello ayoch spichuloc vin̈,
axo stzecꞌul vin̈,
tzꞌuum.
Axo juntzan̈ nocꞌ icha nocꞌ yol sojoy schi vin̈.
Axo nocꞌ yal chabꞌ,
aꞌ nocꞌ syucꞌ vin̈.
7 Ix yalanel vin̈ dꞌa scal ebꞌ anima:
—Ay junxo mach tzacꞌan sja vuuj,
ecꞌalto yopisio dꞌa vichan̈.
Man̈ in mojoc vacꞌan servil,
vachꞌchom ton̈ej tzin em n̈ojan in tijanel schꞌan̈al xan̈abꞌ.
8 A in tic tzex vacꞌ bautizar dꞌa a aꞌ.
Axo ol acꞌan Yespíritu Dios dꞌayex,
ichato ol ex acꞌjoc bautizar yuuj,
xchi.
Ix acꞌji bautizar Jesús
9 A dꞌa jun tiempoal chiꞌ,
ix cot Jesús dꞌa Nazaret,
dꞌa yol yic Galilea,
xidꞌ yacꞌan bautizar sbꞌa dꞌa vin̈aj Juan dꞌa aꞌ nivan Jordán.
10 Ayic van sqꞌuexta dꞌa yol aꞌ,
ix yilan sjacvi satchaan̈.
Ix emul Yespíritu Dios dꞌa yibꞌan̈ icha nocꞌ paramuch.
11 Ix abꞌchaj yaljiemta jun lolonel dꞌa satchaan̈,
ix yalan icha tic:
—A ach ton tic Vuninal ach,
xajanabꞌil ach vuuj.
Tzin tzalaj val edꞌoc,
xchi dꞌa Jesús.
A vin̈ Satanás ix acꞌan proval Jesús
12 Ix lajvi chiꞌ ix icꞌjibꞌat Jesús yuj Yespíritu Dios dꞌa jun lum tzꞌinan luum.
13 Ataꞌ ix xidꞌecꞌ 40 cꞌual bꞌaj ay juntzan̈ nocꞌ nocꞌ ay smay.
Ataꞌ ix yacꞌlej vin̈ Satanás yacꞌan proval.
Ix lajvi chiꞌ,
axo ebꞌ ángel ix ulecꞌ yacꞌ servil.
Ix el yich smunlaj Jesús dꞌa Galilea
14 Ayxo och vin̈aj Juan dꞌa preso,
ix cꞌoch Jesús dꞌa Galilea.
Ataꞌ ix yalcanel vachꞌ abꞌix,
tas ol aj yoch ebꞌ anima dꞌa yol scꞌabꞌ Dios.
Marcos 1.14-45
—Ix cꞌoch stiempoal,
jabꞌxon̈ej yoch Dios Yajalil.
Yuj chiꞌ,
naec e bꞌa.
Aqꞌuecoch jun vachꞌ abꞌix yic colnabꞌil dꞌa e cꞌool,
xchi.
A Jesús ix avtancot chan̈van̈ ebꞌ yamum chay
16 Van yecꞌ Jesús dꞌa stiꞌ aꞌ n̈ajabꞌ yic Galilea.
Axo ix yilani,
ataꞌ ayecꞌ vin̈aj Simón yedꞌ jun yucꞌtac scuchan Andrés.
Van yacꞌanem chꞌan̈ schimpa ebꞌ yic yamlabꞌ chay dꞌa yol aꞌ,
yujto yamum chay ebꞌ.
17 Ix yalan Jesús dꞌa ebꞌ:
—Ochan̈ec in cꞌaybꞌumoc,
ol vacꞌoch eyopisio.
Icha tzeyutej eyaman nocꞌ chay tic,
icha chiꞌ ol eyutoc eyicꞌancot ebꞌ anima dꞌayin,
xchi Jesús dꞌa ebꞌ.
18 Val dꞌa jun rato chiꞌ ix yactancan chꞌan̈ schimpa ebꞌ chiꞌ,
ix och ebꞌ scꞌaybꞌumoc Jesús chiꞌ.
19 Axo ix bꞌat jabꞌxo Jesús chiꞌ,
ix yilanbꞌat ebꞌ yuninal vin̈aj Zebedeo,
aton vin̈aj Jacobo yedꞌ vin̈aj Juan.
Ayoch ebꞌ dꞌa yol jun barco,
van snipan schimpa ebꞌ.
20 Ix yavtancot ebꞌ.
Yuj chiꞌ,
ix yactancan smam ebꞌ chiꞌ yedꞌ ebꞌ smajan ebꞌ dꞌa yol teꞌ barco chiꞌ,
ix bꞌat ebꞌ yedꞌoc.
A jun vin̈ bꞌaj ix el jun enemigo
21 Ix cꞌoch ebꞌ dꞌa chon̈abꞌ Capernaum.
Axo dꞌa scꞌual icꞌoj ip,
aton sábado,
ix och ijan Jesús scꞌaybꞌan ebꞌ dꞌa yoltac spatil culto.
22 Ix te sat scꞌool ebꞌ yabꞌan juntzan̈ cꞌaybꞌubꞌal ix yalaꞌ,
yujto ayic ix cꞌaybꞌaj ebꞌ yuuj,
ix checlajeli to ay yopisio yuj Dios,
man̈ ichoc ebꞌ cꞌaybꞌum dꞌa ley Moisés.
23 Ataꞌ ix cꞌoch jun vin̈ ayoch jun enemigo dꞌay.
Ix qꞌue yav jun enemigo chiꞌ,
ix yalani:
24 —¿Tas alan ic dꞌayon̈,
ach Jesús aj Nazaret?
¿Tom tzach ja on̈ a sateli?
Vojtac ach.
A ach tic,
sicꞌbꞌil ach el yuj Dios,
xchi dꞌay.
25 Axo Jesús ix tuman jun enemigo chiꞌ:
—Tzꞌin xa chi.
Elan̈ dꞌa vin̈ tic,
xchi.
26 Ix cot dꞌa sjolom vin̈ yuj jun enemigo chiꞌ.
Ix te el yav vin̈.
Ichato chiꞌ bꞌian,
ix el jun enemigo chiꞌ.
27 Ix te sat scꞌool ebꞌ anima smasanil yilani.
Yuj chiꞌ,
ix laj yalanqꞌue ebꞌ:
—¿Tas yaj jun vin̈ tic?
¿Tas cꞌaybꞌubꞌal jun vin̈ sjavi tic?
A vin̈ tic,
ay spoder vin̈ scachan ebꞌ enemigo.
Ina ticnaic,
scꞌanabꞌajax vin̈ yuj ebꞌ,
xchi ebꞌ anima chiꞌ.
28 Dꞌa val jun rato chiꞌ,
ix pucax el yabꞌixal Jesús dꞌa masanil yol yic Galilea chiꞌ.
Tzijtum ebꞌ ix bꞌoxi scꞌool yuj Jesús
29 Ix lajvi yelta ebꞌ dꞌa yol spatil culto chiꞌ,
ix bꞌat Jesús yedꞌ vin̈aj Jacobo yedꞌ vin̈aj Juan.
Ix cꞌoch ebꞌ dꞌa spat vin̈aj Simón yedꞌ vin̈aj Andrés.
30 Axo ix sn̈iꞌ vin̈aj Simón chiꞌ,
van scham ix yuj cꞌacꞌal yabꞌil.
Yuj chiꞌ ix yalan ebꞌ yabꞌ Jesús to penaay ix.
31 Ichato chiꞌ ix cꞌoch dꞌa stzꞌey ix.
Ix syaman scꞌabꞌ ix,
ix yicꞌanqꞌue vaan ix.
Val dꞌa jun rato chiꞌ ix bꞌoxi scꞌol ix yuj jun cꞌacꞌal yabꞌil chiꞌ,
ix och ijan ix scꞌatcꞌancot ebꞌ.
32 Axo yic toxo ix bꞌat cꞌu,
vanxo sqꞌuicꞌbꞌi,
ix icꞌjibꞌat ebꞌ penaay smasanil dꞌa Jesús yedꞌ ebꞌ ayoch enemigo dꞌay.
33 Ix smolbꞌan sbꞌa ebꞌ aj chon̈abꞌ chiꞌ smasanil dꞌa ti puerta.
34 Tzijtum macan̈il yabꞌil tzꞌicꞌan ebꞌ,
ix bꞌoxican ebꞌ yuj Jesús chiꞌ.
Tzijtum ebꞌ enemigo ix icꞌjiel dꞌa ebꞌ.
Maj chajoclaj lolon ebꞌ enemigo chiꞌ,
yujto yojtacxo ebꞌ to Yuninal Dios.
Ix ecꞌ Jesús yalcanel slolonel Dios dꞌa Galilea
35 Ayto scꞌanaꞌ ix qꞌue vaan Jesús,
ix bꞌat dꞌa stiel chon̈abꞌ.
Ataꞌ ix lesalvi.
36 Axo vin̈aj Simón yedꞌ ebꞌ yetcꞌaybꞌumal,
ix bꞌat ebꞌ sayeqꞌui.
37 Axo ix ilchaj yuj ebꞌ,
ix yalan ebꞌ dꞌay:
—Masanil ebꞌ anima,
van yecꞌ ebꞌ ach sayeqꞌui,
xchi ebꞌ dꞌay.
38 Palta ix yalan Jesús dꞌa ebꞌ:
—Coyec dꞌa juntzan̈ aldea dꞌa lacꞌan tic,
yic bꞌat valcanel slolonel Dios dꞌa scal ebꞌ anima taꞌ.
Yuj jun tic in coti,
xchi dꞌa ebꞌ.
39 Ix lajvi chiꞌ,
ix ecꞌ yalancanel slolonel Dios dꞌa yoltac spatil culto dꞌa yol yic Galilea.
Ix yicꞌanel ebꞌ enemigo chiꞌ dꞌa ebꞌ anima.
Bꞌoxinac scꞌool jun vin̈ penaay yuj lepra
40 Ay jun vin̈ penaay yuj jun yabꞌil scuchan lepra ix cꞌoch dꞌa Jesús.
Ix em cuman vin̈,
ix yalan vin̈:
—Tato syal a cꞌool,
syal in acꞌan bꞌoxoc,
xchi vin̈ dꞌay.
41 Axo Jesús ix ocꞌ scꞌool,
ix syamlan vin̈.
—Tzin nibꞌej sbꞌoxican a cꞌool,
xchi dꞌa vin̈.
42 Ix lajvi yalan jun chiꞌ,
ix tacji jun yabꞌil chiꞌ dꞌa vin̈,
ix bꞌoxi scꞌool vin̈.
43 Ix lajvi chiꞌ,
ix checji pax vin̈ yuj Jesús.
Ayic ix schecan pax vin̈ chiꞌ,
ix cham val yalan dꞌa vin̈:
44 —Abꞌi,
ayta bꞌaj tzalel jun tic.
Palta ixic,
chꞌox a bꞌa dꞌa vin̈ sacerdote.
Bꞌat acꞌan jun silabꞌ dꞌa Dios icha yalnaccan Moisés,
yic tzꞌilji to ach bꞌoxi,
xchi dꞌa vin̈.
45 Axo ix bꞌat vin̈,
ix syamanoch vin̈ yalaneli chajtil ix aj sbꞌoxi.
Ix spucanel specal vin̈,
yuj chiꞌ max yal yoch Jesús dꞌa yol junoc chon̈abꞌ,
yujto tzijtum ebꞌ sgana scꞌoch dꞌay.
Bꞌaj malaj val anima ix eqꞌui,
palta ix laj cot ebꞌ anima dꞌa junjun lugar,
ix cꞌoch ebꞌ dꞌay.