A vin̈aj Juan ix acꞌan bautizar, ix alanel slolonel Dios
3
A dꞌa jun tiempoal chiꞌ,
ay jun vin̈ scuchan Juan ix acꞌan bautizar dꞌa tzꞌinan luum dꞌa yol yic Judea.
Ataꞌ ix yalel slolonel Dios vin̈ dꞌa ebꞌ anima ix laj cꞌoch dꞌay.
2 Ix yalan vin̈ icha tic dꞌa ebꞌ:
—Naec e bꞌa yuj e chucal,
yujto toxo ol vachꞌ och Dios aj satchaan̈ Yajalil,
xchi vin̈.
3 Ay jun vin̈ schecabꞌ Dios scuchan Isaías,
ayocto ix stzꞌibꞌancan yabꞌixal vin̈aj Juan chiꞌ vin̈ dꞌa Slolonel Dios Tzꞌibꞌabꞌilcani,
xchi icha tic:
Ay jun dꞌa tzꞌinan luum,
chaan̈ ol yal icha tic:
Icha tzꞌaj sbꞌo bꞌe yic sjavi junoc yajal,
icha chiꞌ tzeyutej e bꞌoan e bꞌeybꞌal,
yujto ol javoc Dios Cajal,
xchama,
xchi dꞌa Slolonel Dios chiꞌ.
4 A vin̈aj Juan chiꞌ,
a xil nocꞌ camello ayoch spichuloc vin̈,
axo stzecꞌul vin̈,
a nocꞌ tzꞌuum.
A juntzan̈ nocꞌ icha nocꞌ yol sojoy schi vin̈,
axo nocꞌ caltacteꞌal yal chabꞌ syuqꞌuej vin̈.
5 A ebꞌ aj Jerusalén smasanil,
scꞌoch ebꞌ smaclej yabꞌ dꞌa vin̈.
Ay pax ebꞌ dꞌa junjun chon̈abꞌ dꞌa yol yic Judea yedꞌ ebꞌ ay dꞌa slacꞌanil aꞌ nivan Jordán scꞌochi,
6 ix laj yalanqꞌueta smul ebꞌ.
Ix lajvi chiꞌ,
ix yacꞌan acꞌjoc bautizar sbꞌa ebꞌ yuj vin̈ dꞌa aꞌ Jordán chiꞌ.
7 Tzijtum ebꞌ fariseo yedꞌ ebꞌ saduceo ix laj cꞌoch bꞌaj van yacꞌan bautizar vin̈ chiꞌ.
Ix yalan vin̈ dꞌa ebꞌ:
—A ex tic,
te jelan ex dꞌa chucal icha nocꞌ chan.
¿Mach ix alan dꞌayex to syal e colanel e bꞌa dꞌa jun nivan yaelal ol javoc?
8 Tato tze na e bꞌa yuj e mul,
yovalil vachꞌ tzeyutej e bꞌa yic scheclajeli to ix e na e bꞌa.
9 Man̈ eyal icha tic:
Malaj pena,
yin̈til on̈ can vin̈aj Abraham.
Yuj chiꞌ malaj tas ol javoc dꞌa quibꞌan̈,
man̈ xe chioc.
Yujto a in sval dꞌayex,
tato sgana Dios,
syal yoch juntzan̈ qꞌuen qꞌueen tic yin̈tilaloc vin̈aj Abraham chiꞌ e qꞌuexuloc.
10 A jun yaelal ol javoc chiꞌ,
lajan icha junoc vin̈ vinac lista yaj yedꞌ schꞌacabꞌ dꞌa yich juntzan̈ teꞌ avbꞌen teꞌ.
Jantacn̈ej teꞌ chuclaj sat syacꞌaꞌ,
ol laj chꞌacjoquel teꞌ.
Ol syumancanbꞌat teꞌ vin̈ dꞌa yol cꞌacꞌ.
11 A in tic,
dꞌa val yel tzex vacꞌ bautizar dꞌa a aꞌ,
yic chequel to ix e na e bꞌa.
Palta ay val junxo tzacꞌan sjavi vuuj.
A ol acꞌan Yespíritu Dios dꞌayex,
mato a cꞌacꞌ ol yacꞌ dꞌayex.
Icha to ol ex acꞌjoc bautizar yuuj.
A jun ol javoc chiꞌ,
yelxo val nivan yelcꞌoch dꞌa vichan̈.
Man̈ in mojoc vacꞌan servil,
vachꞌchom ton̈ej sviqꞌuel xan̈abꞌ.
12 A jun chiꞌ,
lajan icha junoc vin̈ sluchanqꞌue vaan strigo yedꞌ sluchlabꞌ,
yic tzꞌel smatzꞌil ixim.
Smesanxiqꞌue vaan dꞌa stecꞌlabꞌ.
Sicꞌanxibꞌat ixim trigo chiꞌ dꞌa yedꞌtal.
Axo yoc ixim chiꞌ,
sn̈ustzꞌa dꞌa yol jun cꞌacꞌ malaj bꞌaqꞌuin̈ stupi,
xchi vin̈aj Juan chiꞌ dꞌa ebꞌ.
Ix acꞌji bautizar Jesús yuj vin̈aj Juan
13 A dꞌa jun tiempoal chiꞌ,
spetoj Jesús dꞌa yol yic Galilea.
Ix cꞌoch dꞌa aꞌ nivan Jordán,
bꞌaj ayecꞌ vin̈aj Juan,
yic syacꞌan acꞌjoc bautizar sbꞌa.
14 A dꞌa sbꞌabꞌelal max yal-laj scꞌool vin̈aj Juan chiꞌ syacꞌ bautizar Jesús.
Yuj chiꞌ ix yal vin̈ dꞌa Jesús chiꞌ:
—Smoj a in tzin acꞌ bautizar,
yuj chiꞌ man̈ smojoc a in tzach vacꞌ bautizar,
xchi vin̈.
15 Palta ix yalan Jesús chiꞌ dꞌa vin̈:
—Yovalil ol a cꞌulej jun tic yujto smoj sco cꞌanabꞌajej jantacn̈ej tas syal Dios,
xchi dꞌa vin̈.
Ichato chiꞌ,
ix chaan scꞌol vin̈aj Juan chiꞌ.
16 Axo yic ix lajvi yacꞌji bautizar Jesús,
ix qꞌuexta dꞌa yol aꞌ.
Axo dꞌa jun rato chiꞌ,
ix jacvi satchaan̈.
Ix yilan yemul Yespíritu Dios dꞌa yibꞌan̈,
icha junoc nocꞌ paramuch.
17 Axo ix yabꞌan ebꞌ,
ay jun ix lolonemta dꞌa satchaan̈.
Ix yalan icha tic:
—Aton jun tic,
Vuninal.
Te xajanabꞌil vuuj.
Tzin tzalaj val yedꞌoc,
xchi.