A ebꞌ vin̈ mago xidꞌ ilan Jesús
2
A dꞌa chon̈abꞌ Belén,
dꞌa yol yic Judea,
ataꞌ ix alji Jesús.
A dꞌa jun tiempoal chiꞌ,
a vin̈aj Herodes ayoch reyal dꞌa Judea.
Ay juntzan̈ ebꞌ vin̈ vinac scuchan mago schuman yedꞌ qꞌuen cꞌanal.
Ayic toxo ix alji Jesús,
ix cot ebꞌ vin̈ bꞌaj sja cꞌu.
Ix ja ebꞌ vin̈ dꞌa Jerusalén.
2 Ix scꞌanbꞌanecꞌ ebꞌ vin̈:
—¿Bꞌaj ay jun unin toto ix alji,
jun ol och e reyaloc a ex israel ex tic?
A bꞌaj sja cꞌu,
ataꞌ ix quil sqꞌueul jun qꞌuen cꞌanal.
A qꞌuen schꞌoxani to ix alji.
Yuj chiꞌ on̈ coti,
yic scaqꞌuem co bꞌa dꞌay,
xchi ebꞌ vin̈.
Visita de los magos (Mateo 2.1-23)
3 Axo ix yabꞌan specal jun chiꞌ vin̈aj rey Herodes,
ix te somchaj spensar vin̈.
Yedꞌ jantac ebꞌ ay dꞌa Jerusalén chiꞌ,
ix te somchajqꞌue ebꞌ yedꞌ vin̈.
4 Ix yavtancot masanil ebꞌ vin̈ sat sacerdote vin̈ yedꞌ ebꞌ vin̈ cꞌaybꞌum dꞌa ley Moisés.
Ix scꞌanbꞌan vin̈ dꞌa ebꞌ vin̈:
—¿Bꞌajtil ol aljoc vin̈ Cristo?
xchi vin̈ dꞌa ebꞌ vin̈.
5 Ix yalan ebꞌ vin̈:
—A dꞌa chon̈abꞌ Belén,
dꞌa yol yic Judá,
ataꞌ ol aljoc vin̈.
Yujto ay jun schecabꞌ Dios tzꞌibꞌannaccan icha tic:
6 A jun chon̈abꞌ Belén,
dꞌa yol yic Judea,
yunen̈ej dꞌa yichan̈ juntzan̈xo chon̈abꞌ ay dꞌa yol yic Judá chiꞌ.
Palta ecꞌal yopisio dꞌa yichan̈ juntzan̈xo chon̈abꞌ chiꞌ.
Yujto ataꞌ ol aljoc jun vin̈ yajal,
A ol ilan in chon̈abꞌ Israel,
xchi dꞌa Slolonel Dios Tzꞌibꞌabꞌilcani,
xchi ebꞌ vin̈.
7 Axo vin̈aj Herodes chiꞌ ix checan avtajcot ebꞌ vin̈ mago chiꞌ.
Elcꞌaltac ix scꞌanbꞌej vin̈ yabꞌ dꞌa ebꞌ vin̈,
bꞌacꞌn̈itax ix schꞌox sbꞌa jun cꞌanal chiꞌ dꞌa ebꞌ vin̈.
8 Ix lajvi yabꞌan vin̈,
ix checjibꞌat ebꞌ vin̈ yuj vin̈ dꞌa chon̈abꞌ Belén.
Ayic manto bꞌat ebꞌ vin̈,
ix stzꞌacan yal vin̈ icha tic:
—Ixiquec dꞌa Belén chiꞌ.
Cham val e cꞌanbꞌan eyabꞌi bꞌajtil ayecꞌ jun unin chiꞌ.
Slajvi schax chiꞌ eyuuj,
tzul eyalan dꞌayin,
yic ol in bꞌat vacꞌpaxem in bꞌa dꞌay,
xchi vin̈.
9 Ix lajvi yabꞌan juntzan̈ chiꞌ ebꞌ vin̈,
ix bꞌat ebꞌ vin̈.
Axo jun cꞌanal syil ebꞌ vin̈ bꞌaj sjavi cꞌu chiꞌ,
bꞌabꞌel sbꞌat yuj ebꞌ vin̈,
masanto ix cꞌoch dꞌa stojolal yibꞌan̈ bꞌaj ay jun unin chiꞌ.
Ataꞌ ix och vaan.
10 Axo ix yilanxi jun cꞌanal chiꞌ ebꞌ vin̈,
ix te tzalaj ebꞌ vin̈.
11 Ix och ebꞌ vin̈ dꞌa yol jun pat chiꞌ.
Ix yilan jun unin chiꞌ ebꞌ vin̈ yedꞌ snun,
aton ix María.
Ix em cuman ebꞌ vin̈ dꞌay.
Ix yacꞌanem sbꞌa ebꞌ vin̈ dꞌay.
Ix lajvi chiꞌ,
ix sjacan juntzan̈ scaxa ebꞌ vin̈ bꞌaj ayem juntzan̈ silabꞌ.
Ix sian oro ebꞌ vin̈ dꞌa jun unin chiꞌ.
Ix sian juntzan̈ te sucꞌuqꞌui sjabꞌ ebꞌ vin̈,
sn̈usji yedꞌ juntzan̈xo yal te sucꞌuqꞌui sjabꞌ scuchan mirra.
12 Axo ix alji dꞌa ebꞌ vin̈ dꞌa svayich,
to maxtzac ecꞌ ebꞌ vin̈ yal dꞌa vin̈aj Herodes chiꞌ.
Yuj chiꞌ chꞌocxo bꞌe bꞌaj ix pax ebꞌ vin̈ dꞌa schon̈abꞌ.
Ix bꞌat vin̈aj José elelal dꞌa Egipto
13 Ix lajvi spax ebꞌ vin̈ mago chiꞌ,
ay jun yángel Dios Cajal ix chꞌox sbꞌa dꞌa vin̈aj José chiꞌ dꞌa svayich,
ix yalani:
—Qꞌuean̈ vaan.
Icꞌbꞌat vin̈ unin tic edꞌoc yedꞌ snun.
Elan̈ec dꞌa elan̈chamel.
Tzex bꞌat dꞌa Egipto.
Tzex cann̈ej taꞌ,
masanto ol valxi dꞌayach,
yujto a vin̈aj Herodes ol checan sayjoquecꞌ jun unin tic,
yujto sgana vin̈ ol yacꞌ miljocchamoc,
xchi jun ángel chiꞌ.
14 Yuj chiꞌ,
ix qꞌue vaan vin̈aj José chiꞌ.
Ix yicꞌanbꞌat jun unin chiꞌ vin̈ yedꞌ ix María dꞌacꞌvalil.
Ix bꞌat ebꞌ dꞌa Egipto.
15 Ataꞌ ix aj ebꞌ masanto ix cham vin̈aj Herodes chiꞌ.
Icha chiꞌ ix aj yelcꞌoch tas yalnaccan Dios Cajal a ix lolon dꞌa stiꞌ jun schecabꞌ.
Xchi icha tic:
A dꞌa Egipto ix vavtej paxta Vuninal,
xchi.
A vin̈aj Herodes checjinac miljoccham ebꞌ unin
16 Axo ix yilan vin̈aj Herodes chiꞌ to majxo ecꞌ ebꞌ vin̈ mago chiꞌ yal dꞌa vin̈,
ix snaanel vin̈ to ton̈ej ix acꞌji musansatil vin̈ yuj ebꞌ vin̈.
Yuj chiꞌ,
ix te cot yoval vin̈.
Ix schecan miljoccham jantacn̈ej ebꞌ vinac unin vin̈ ay dꞌa chon̈abꞌ Belén yedꞌ ebꞌ ay dꞌa slacꞌanil jun chon̈abꞌ chiꞌ.
Ix laj cham ebꞌ schabꞌil abꞌil yedꞌ ebꞌ manto tzꞌacvi chabꞌ abꞌil.
Yujto icha chiꞌ stiempoal ix scꞌanbꞌej vin̈ dꞌa ebꞌ vin̈ mago chiꞌ.
17 Icha chiꞌ ix aj yelcꞌoch tas tzꞌibꞌabꞌilcan yuj jun vin̈ schecabꞌ Dios scuchan Jeremías.
Xchi icha tic:
18 Ix abꞌchaj jun av dꞌa chon̈abꞌ Ramá.
Ay jun nivan oqꞌuel yedꞌ jun nivan cuscꞌolal.
A ix Raquel,
ix ocꞌ ix yuj ebꞌ yuneꞌ.
Malaj sgana ix tzꞌacꞌji snivanil scꞌool,
yujto man̈xalaj ebꞌ yuneꞌ ix,
xchi.
19 Axo yic ix cham vin̈aj Herodes chiꞌ,
ix schꞌoxan sbꞌa jun yángel Dios Cajal dꞌa vin̈aj José chiꞌ dꞌa svayich,
ayic ayecꞌ vin̈ dꞌa Egipto.
Ix yalan dꞌa vin̈:
20 —Qꞌuean̈ vaan.
Icꞌbꞌat vin̈ unin tic yedꞌ snun.
Paxan̈ec dꞌa e chon̈abꞌ,
yujto a ebꞌ vin̈ sgana smilancham jun unin tic,
chamnacxo ebꞌ vin̈,
xchi jun ángel chiꞌ.
21 Ix lajvi chiꞌ,
ix qꞌue vaan vin̈aj José chiꞌ.
Ix yicꞌancot jun unin chiꞌ vin̈ yedꞌ ix snun dꞌa yol yic Israel chiꞌ.
22 Palta ix yabꞌan vin̈aj José chiꞌ to a jun vin̈ yuninal vin̈aj Herodes scuchan Arquelao aycanoch sqꞌuexuloc vin̈ smam chiꞌ yacꞌan mandar dꞌa Judea chiꞌ.
Yuj chiꞌ,
ix xiv vin̈ scꞌoch cajan taꞌ.
Ix yalan Dios dꞌa vin̈ dꞌa svayich tas scꞌulej.
Yuj chiꞌ ix bꞌatcan ebꞌ dꞌa yol yic Galilea.
23 Ayic ix cꞌoch ebꞌ taꞌ,
ix cajnaj ebꞌ dꞌa chon̈abꞌ Nazaret.
Icha chiꞌ ix aj yelcꞌoch tas yalnaccan ebꞌ schecabꞌ Dios dꞌa pecaꞌ.
Tzꞌibꞌabꞌilcan yuj ebꞌ,
chajtil to ol yal ebꞌ anima to aj Nazaret Jesús.