2 Ataꞌ ay jun vin̈ yajal soldado romano,

ay jun vin̈ schecabꞌ vin̈ te xajan yuuj,

palta te penaay vin̈,

van scham vin̈.

3 Ayic ix yabꞌan yabꞌixal Jesús vin̈,

ix schecancot juntzan̈ ebꞌ vin̈ ichamtac vinac israel vin̈,

bꞌat yalan ebꞌ vin̈ dꞌa Jesús yic scot yacꞌ bꞌoxoc vin̈ schecabꞌ vin̈ chiꞌ.

4 Ayic ix ilchaj Jesús yuj ebꞌ vin̈,

ix och ijan ebꞌ vin̈ yalani:

—Smoj ton tza col vin̈,

5 yujto xajan co chon̈abꞌ tic yuj vin̈.

A vin̈ ix acꞌan tumin ayic ix bꞌo spatil co culto.

6 Yuj chiꞌ,

ix bꞌat Jesús yedꞌ ebꞌ vin̈.

Vanxo scꞌoch ebꞌ dꞌa slacꞌanil spat vin̈,

axo vin̈ ix checancot juntzan̈ ebꞌ yamigo yal dꞌa Jesús icha tic:

—Ix yalcot vin̈ yajal soldado icha tic:

Mamin,

mocabꞌ ixtej a bꞌa a ja dꞌayin,

yujto man̈ in mojoc tzach och dꞌa yol in pat.

7 Yuj chiꞌ in qꞌuixvi ach in sayaneqꞌui.

Ton̈ejocabꞌ tzalaꞌ,

ol bꞌoxoc scꞌool vin̈ in checabꞌ tic uuj.

8 Vojtac to a in tic ayin dꞌa yalan̈ smandar vin̈ tzin acꞌan mandar,

ay pax ebꞌ soldado ayoch dꞌa yalan̈ in mandar.

Tato sval dꞌa junoc:

Ixic,

ta xin xchi,

sbꞌatn̈ej.

Svalanpax dꞌa junocxo:

Cotan̈,

ta xin xchi,

scotn̈ej.

Tato tzin chec scꞌulej junoc tas junoc in checabꞌ,

scꞌulejn̈ej.

Icha svutej vacꞌan mandar ebꞌ chiꞌ,

icha chiꞌ tzutej acꞌan mandar smasanil tas a ach tic,

xchicot vin̈,

xchi ebꞌ.

9 Ayic ix yabꞌan jun chiꞌ Jesús,

ix te sat scꞌool yuj vin̈,

ix och qꞌuelan dꞌa juntzan̈ ebꞌ anima tzacꞌanoch yuuj,

ix yalan dꞌa ebꞌ:

—Val yel,

manta bꞌaj svil junoc dꞌa scal ebꞌ quetisraelal tzin acꞌanoch dꞌa scꞌool icha jun vin̈ tic,

xchi Jesús.

10 Ayic ix jax ebꞌ schecabꞌ vin̈ yajal soldado chiꞌ,

ix yilan ebꞌ to vachꞌxo scꞌol vin̈ penaay chiꞌ.

11 Ix lajvi chiꞌ,

ix bꞌat Jesús dꞌa jun chon̈abꞌ scuch Naín,

tzijtum ebꞌ scꞌaybꞌum ix bꞌat yedꞌoc yedꞌ jantac pax ebꞌ anima.

12 Axo yic van scꞌoch ebꞌ dꞌa jun chon̈abꞌ chiꞌ,

ix yilan ebꞌ,

van bꞌat smucchaj jun chamnac.

Tzijtum ebꞌ ay dꞌa jun chon̈abꞌ chiꞌ edꞌjinac.

A vin̈ ix cham chiꞌ,

aton jun pitan̈ yuneꞌ jun ix chamnac yetbꞌeyum.

13 Ayic ix yilanoch ix snun vin̈ chamnac chiꞌ Jesús,

ix ocꞌ scꞌol dꞌa ix,

ix yalan dꞌa ix:

—Man̈ ach ocꞌoc,

xchi dꞌa ix.

14 Ix snitzanoch sbꞌa Jesús dꞌa stzꞌey bꞌaj ayecꞌ bꞌachan jun chamnac chiꞌ,

ix yacꞌanecꞌ scꞌabꞌ dꞌa yibꞌan̈.

Ix och vaan ebꞌ bꞌachjinac chiꞌ.

Ix yalan Jesús dꞌay:

—Ach quelem,

a in sval dꞌayach:

Qꞌuean̈ vaan,

xchi.

15 Axo vin̈ quelem chiꞌ,

ix qꞌuex cꞌojan vin̈,

ix och ijan vin̈ sloloni.

Axo Jesús ix acꞌanxican vin̈ dꞌa ix snun chiꞌ.

16 Ayic ix yilan jun chiꞌ ebꞌ,

ix xivqꞌue ebꞌ,

ix och ijan ebꞌ yalan vachꞌ lolonel dꞌa Dios,

ix yalan ebꞌ:

—Ay jun schecabꞌ Dios ix checlaj dꞌa co cal tic,

te nivan yelcꞌochi,

xchi ebꞌ.

Ix yalanpax ebꞌ:

—Ix ja Dios on̈ scol a on̈ schon̈abꞌ on̈ tic,

xchi ebꞌ.

17 A dꞌa masanil yol yic Judea yedꞌ dꞌa spatic yichan̈,

ix abꞌchaj tas ix scꞌulej Jesús.

18 A ebꞌ scꞌaybꞌum vin̈aj Juan,

vin̈ acꞌjinac bautizar,

xidꞌ alan dꞌay yuj jantacn̈ej tas ix scꞌulej Jesús.

Yuj chiꞌ,

ix yavtancot chavan̈ ebꞌ scꞌaybꞌum vin̈,

19 ix schecanbꞌat ebꞌ vin̈ scꞌanbꞌej dꞌa Jesús tato a Cristo,

mato chꞌoc junocxo van stan̈van ebꞌ sjavi.

20 Yuj chiꞌ,

ix cꞌoch ebꞌ dꞌay.

Ix yalan ebꞌ icha tic:

—A vin̈aj Juan,

vin̈ acꞌjinac bautizar on̈ checancoti yic tzul co cꞌanbꞌej dꞌayach tato a ach tan̈vabꞌiltaxon a javi,

mato chꞌoc junocxo sco tan̈vej sjavi,

xchi ebꞌ dꞌay.

21 A ix cꞌoch ebꞌ,

man̈ jantacoc ebꞌ penaay yuj juntzan̈ ilya ix bꞌoxi scꞌol yuj Jesús.

Ay ebꞌ bꞌaj ix icꞌjiel juntzan̈ ebꞌ enemigo yedꞌ pax ebꞌ max uji yilani ix laj bꞌoxi yilan ebꞌ.

22 Ix tacꞌvi Jesús dꞌa ebꞌ schecabꞌ vin̈aj Juan chiꞌ:

—Paxan̈ec,

ix alec dꞌa vin̈aj Juan chiꞌ tas ix eyilaꞌ,

tas ix eyabꞌi.

Alec dꞌa vin̈ to a ebꞌ toxonton max uji yilani,

vachꞌxo yilan ebꞌ.

A ebꞌ max uji sbꞌeyi,

sbꞌeyxi ebꞌ.

A ebꞌ slaj cꞌa yuj yabꞌil lepra,

ix bꞌoxi scꞌool ebꞌ.

A ebꞌ max uji yabꞌani,

tzaxo yabꞌ ebꞌ.

Ay ebꞌ chamnac,

ix pitzvixi.

Axo dꞌa ebꞌ mebꞌaꞌ van yaljiel yabꞌixal colnabꞌil.

23 A ebꞌ max somchajel spensar vuuj,

vachꞌ yic ebꞌ.

Icha chiꞌ tzeyutej eyalan dꞌa vin̈ e cꞌochi,

xchi Jesús dꞌa ebꞌ.

24 Ayic toxo ix pax ebꞌ schecabꞌ vin̈aj Juan chiꞌ,

ix och ijan Jesús yalan dꞌa ebꞌ anima yuj vin̈:

—¿Tas xidꞌ eyilnac dꞌa tzꞌinan luum?

¿Tom a junoc teꞌ aj tzꞌibꞌxi yuj icꞌ xidꞌ eyilnac?

25 Tato malaj jun,

¿tas xidꞌ eyilnac?

¿Mato a junoc anima te vachꞌ spichul xidꞌ eyilnac?

Cojtac to a ebꞌ vachꞌ spichul chiꞌ yedꞌ ebꞌ syacꞌ sgana,

ayecꞌ ebꞌ dꞌa spat ebꞌ vin̈ yajal.

26 Palta jun,

¿tas xidꞌ eyilnac?

¿Tom xidꞌ eyilnac jun vin̈ tzꞌalanel slolonel Dios?

Yel,

yalumel slolonel Dios yaj vin̈aj Juan chiꞌ.

Palta man̈ocn̈ej jun chiꞌ yopisio vin̈.

27 Aton yabꞌixal vin̈aj Juan chiꞌ yalnaccan Dios dꞌa Slolonel Tzꞌibꞌabꞌilcani.

Ayocto yalannaccan yuj vin̈ icha tic:

29 A ebꞌ anima smasanil yedꞌ ebꞌ tecumel alcabar,

ayic ix yabꞌan ebꞌ tas ix yal Jesús,

ix yalan ebꞌ to te yel syal Dios,

yujto acꞌbꞌil bautizar ebꞌ yuj vin̈aj Juan chiꞌ.

30 Palta axo ebꞌ vin̈ fariseo yedꞌ ebꞌ vin̈ cꞌaybꞌum dꞌa ley Moisés,

man̈ acꞌbꞌiloclaj bautizar ebꞌ vin̈ yuj vin̈,

icha chiꞌ ix aj schꞌoxani to a tas sgana Dios dꞌa ebꞌ vin̈,

malaj yelcꞌoch dꞌa sat ebꞌ vin̈.

31 Yuj chiꞌ ix yalan Jesús:

—¿Mach yedꞌ ol in lajbꞌej ebꞌ anima dꞌa jun tiempoal tic?

¿Chajtil yaj spensar ebꞌ tze naꞌa?

32 Lajan ebꞌ icha ebꞌ unin stajni dꞌa mercado.

Ay ebꞌ tzꞌalan dꞌa ebꞌ yetuninal:

Ayic ix co puꞌan co flauta,

maj ex chan̈alvoclaj.

Ayic ix on̈ bꞌitan dꞌa cuseltaquil,

maj ex ocꞌlaj quedꞌoc,

xchi ebꞌ.

Icha ebꞌ unin malaj sgana dꞌa junoc tas chiꞌ,

icha chiꞌ eyaj a ex tic.

33 Yujto ix ulecꞌ vin̈aj Juan,

maj valaj vin̈,

maj yucꞌlaj vino vin̈ dꞌa scal ebꞌ yetanimail.

A exxo ix eyalaꞌ to ayoch enemigo dꞌa vin̈.

34 A ticnaic in ja paxi,

a in Acꞌbꞌil in cot yuj Dios voch animail tic,

tzin vaꞌi,

svucꞌan aꞌ dꞌa scal ebꞌ quetanimail.

Tzeyalanpaxi to bꞌucꞌtzin in,

ucꞌum in an̈,

svamigoan pax ebꞌ tzꞌem dꞌa ajmulal yedꞌ ebꞌ vin̈ tecumel alcabar.

35 Palta a ebꞌ ay sjelanil Dios dꞌay,

scheclajel sjelanil ebꞌ chiꞌ dꞌa tastac scꞌulej,

xchi Jesús dꞌa ebꞌ.

36 Ay jun vin̈ fariseo scuch Simón ix avtan Jesús dꞌa spat yic sva yedꞌ vin̈.

Ix cꞌoch dꞌa spat vin̈,

tzꞌeyan ix ajem dꞌa sat jun alan̈ lichꞌanem dꞌa sat luum yic vael.

37 Ay jun ix ay dꞌa chon̈abꞌ chiꞌ,

ay specal to ajmul ix ix.

Ix yabꞌan ix to ix cꞌoch Jesús vael dꞌa spat vin̈ fariseo chiꞌ.

Yuj chiꞌ ix cꞌoch ix bꞌaj ay yoc Jesús,

yedꞌnac jun alabastro^* ix,

bꞌudꞌan yuj jun yal sucꞌuqꞌui sjabꞌ.

38 Ix och ijan ix yoqꞌui,

ix sbꞌicanel yoc chiꞌ ix yedꞌ yal sat.

Axo dꞌa xil sjolom ix,

ix suc tacjoc.

Ix stzꞌubꞌanelta yoc chiꞌ ix,

ix stobꞌanecꞌ jun yal sucꞌuqꞌui sjabꞌ chiꞌ ix dꞌa yoc Jesús chiꞌ.

39 Axo ix yilan vin̈ fariseo chiꞌ,

ix snaan vin̈:

Tato yel schecabꞌ Dios jun vin̈ tic,

tzam nachajel yuj vin̈ to a jun ix ix van syaman yoc vin̈ tic,

ajmul ix ix,

xchi vin̈ dꞌa spensar.

40 Yuj chiꞌ ix yalan Jesús dꞌa vin̈:

—Ach Simón,

ay jun tas ol val dꞌayach,

xchi dꞌa vin̈.

—Al dꞌayin ach co Cꞌaybꞌumal,

xchi vin̈.

41 —Ay chavan̈ ebꞌ vin̈ vinac ay smajan tumin dꞌa spatrón.

Ay jun vin̈,

500 denario smajan vin̈.

Axo junxo vin̈ 50 denario n̈ej smajan vin̈ chiꞌ.

42 Yujto maj tzacꞌvan ebꞌ vin̈ stupan sbꞌoc chiꞌ,

yuj chiꞌ ton̈ej ix acꞌji lajvoc sbꞌoc ebꞌ vin̈ yuj vin̈ ay yic qꞌuen tumin chiꞌ.

Al dꞌayin,

¿mach junoc ebꞌ vin̈ más val stzalaj yedꞌ vin̈ ay yic qꞌuen tumin chiꞌ?

xchi dꞌa vin̈.

43 —A tzin naꞌa,

a vin̈ más nivan yic ix acꞌji lajvoc chiꞌ,

a vin̈ más val stzalaj yedꞌ vin̈,

xchi vin̈aj Simón chiꞌ dꞌay.

—Yel tzalaꞌ,

aton vin̈,

xchi Jesús.

44 Ix lajvi chiꞌ ix och qꞌuelan Jesús dꞌa jun ix ix chiꞌ,

ix yalan dꞌa vin̈aj Simón chiꞌ:

—¿Tzam il jun ix ix tic?

Ayic in ochul dꞌa yol a pat,

maj acꞌ jabꞌoc aꞌ bꞌaj tzin bꞌiquel voc.^*

Axo jun ix ix tic,

a dꞌa yal sat ix sbꞌiquel voc,

sucan tacjoc ix yedꞌ xil sjolom.

45 Maj a tzꞌubꞌlaj in tiꞌ,

yic tzacꞌan stzatzil in cꞌool.

Axo jun ix tic,

yictax in ja dꞌa tic,

max och van ix stzꞌubꞌanelta voc tic.

46 Maj acꞌqꞌue aceite dꞌa in jolom,

axo ix,

ix tobꞌanecꞌ jun yal sucꞌuqꞌui sjabꞌ dꞌa voc tic.

47 Yuj chiꞌ sval dꞌayach to nivan smul ix ix acꞌji lajvoc,

yuj chiꞌ tzin ste sxajanej ix.

Xal junoc anima jabꞌn̈ej smul tzꞌacꞌji lajvoc,

jabꞌn̈ej tzin sxajanej,

xchi dꞌa vin̈.

48 Ix yalan Jesús dꞌa ix icha tic:

—A a mul toxo ix acꞌji lajvoc,

xchi dꞌa ix.

49 A juntzan̈xo ebꞌ avtabꞌil,

cꞌojjabꞌ em ebꞌ taꞌ yedꞌoc,

ix och ijan ebꞌ yalani:

—¿Tas yaj jun vin̈ tic,

yuj chiꞌ syal vin̈ to syacꞌ lajvoc mul vin̈?

xchi ebꞌ.

50 Axo Jesús ix alan dꞌa ix:

—Ach colchaji yujto in acꞌoch dꞌa a cꞌool.

Yuj chiꞌ juncꞌolal tzach paxi,

xchi dꞌa ix.