Ix schecbꞌat chavan̈ scꞌaybꞌum vin̈aj Juan dꞌa Jesús
11
Ayic ix lajvi yalan juntzan̈ checnabꞌil chiꞌ Jesús dꞌa ebꞌ scꞌaybꞌum slajchavan̈il,
ix bꞌati.
Ix ecꞌ yalel slolonel Dios yabꞌ ebꞌ anima dꞌa juntzan̈ chon̈abꞌ dꞌa jun lugar chiꞌ,
ix scꞌaybꞌanpax ebꞌ anima chiꞌ.
2 A dꞌa jun tiempoal chiꞌ,
ayoch vin̈aj Juan dꞌa preso,
vin̈ tzꞌacꞌan bautizar.
Ix yabꞌan vin̈ tastac van scꞌulan Cristo,
yuj chiꞌ ix schecbꞌat chavan̈ ebꞌ vin̈ scꞌaybꞌum vin̈ dꞌa Jesús chiꞌ.
3 Ix bꞌat scꞌanbꞌan ebꞌ vin̈ dꞌay icha tic:
—¿Tom a ach tic tan̈vabꞌil a ja cuuj,
mato chꞌoc junocxo sco tan̈vej sjavi?
xchi ebꞌ vin̈ dꞌay.
4 Yuj chiꞌ ix yalan dꞌa ebꞌ vin̈:
—Paxan̈ec dꞌa vin̈aj Juan chiꞌ,
tzeyalan dꞌa vin̈ tastac van eyabꞌani,
eyilan dꞌa tic.
5 Tzeyal dꞌa vin̈ to a ebꞌ max ujilaj yilani,
tzaxo yal yilan ebꞌ.
A ebꞌ max uji sbꞌeyi,
tzaxo yal sbꞌey ebꞌ.
A ebꞌ slaj cꞌa yuj lepra,
slaj bꞌoxican scꞌool ebꞌ.
A ebꞌ max uji yabꞌani,
tzaxo yabꞌ ebꞌ,
yedꞌ ebꞌ chamnac,
ay ebꞌ van spitzvixi.
Axo ebꞌ mebꞌaꞌ,
van yalji vachꞌ abꞌix yic colnabꞌil dꞌa ebꞌ.
6 Yuj chiꞌ a ebꞌ tzin acꞌanoch yipoc scꞌool,
te vachꞌ yic ebꞌ.
Icha chiꞌ tzeyutej eyalan dꞌa vin̈aj Juan chiꞌ a tzex cꞌochxi,
xchi Jesús chiꞌ dꞌa ebꞌ vin̈.
7 Ayic toxo ix bꞌat ebꞌ vin̈ schecabꞌ vin̈aj Juan chiꞌ,
ix och ijan Jesús yalan dꞌa ebꞌ anima yuj vin̈aj Juan chiꞌ:
—¿Tas xidꞌ eyilnac dꞌa tzꞌinan luum?
¿Tom a junoc teꞌ aj tzꞌibꞌxi yuj icꞌ xidꞌ eyilnac?
8 Tato maay jun,
¿tas xidꞌ eyilnac?
¿Mato a jun anima te vachꞌ spichul xidꞌ eyilnac?
Cojtac to a ebꞌ vachꞌ spichul chiꞌ ayecꞌ ebꞌ dꞌa spat ebꞌ vin̈ rey.
9 Palta jun,
¿tas xidꞌ eyilnac?
¿Tom xidꞌ eyilnac jun vin̈ tzꞌalanel slolonel Dios?
Yel,
yalumel slolonel Dios yaj vin̈aj Juan chiꞌ,
palta man̈ocn̈ej jun chiꞌ yopisio vin̈.
10 Aton yabꞌixal vin̈aj Juan chiꞌ yalnaccan Dios dꞌa Slolonel Tzꞌibꞌabꞌilcani.
Ayic ayocto yalannaccan yuj vin̈ icha tic:
Ol in checbꞌat jun in checabꞌ,
ol bꞌabꞌlaj bꞌat uuj.
Icha tzꞌaj sbꞌo bꞌe,
icha chiꞌ ol yutoc sbꞌoan sbꞌeybꞌal ebꞌ anima,
ayic manto ach cꞌochi,
xchican dꞌa Slolonel Dios chiꞌ.
11 Sval dꞌayex to a dꞌa scal ebꞌ anima,
malaj junoc mach ecꞌto yelcꞌoch dꞌa vin̈aj Juan chiꞌ.
Palta dꞌa scal ebꞌ ayoch dꞌa yol scꞌabꞌ Dios,
vachꞌchom ebꞌ malaj val yelcꞌochi,
másxo ecꞌto svachꞌil yic ebꞌ dꞌa yichan̈ yic vin̈aj Juan chiꞌ.
12 Atax ix och ijan vin̈aj Juan chiꞌ yacꞌan bautizar,
masanto ticnaic,
tzijtum ebꞌ anima yelcꞌolal tzꞌoch dꞌa yol scꞌabꞌ Dios.
Ay ebꞌ tecꞌtecꞌ syutej sbꞌa,
syacꞌ val pural sbꞌa ebꞌ yacꞌanoch sbꞌa dꞌa yol scꞌabꞌ.
13 Ayic manto alji vin̈aj Juan chiꞌ,
yalnaccan ebꞌ schecabꞌ Dios smasanil to ol vachꞌ och Dios Yajalil.
An̈ejtonaꞌ,
icha pax chiꞌ yalan ley Moisés.
14 Tato e gana tzeyacꞌoch dꞌa e cꞌool,
a vin̈aj Juan chiꞌ aton vin̈aj Elías,
vin̈ tan̈vabꞌil sjavi eyuuj.
15 A juntzan̈ tzeyabꞌ tic,
naec val sicꞌlabꞌil.
16 —¿Mach yedꞌoc ol in lajbꞌej ebꞌ anima dꞌa jun tiempoal tic?
¿Chajtil yaj spensar ebꞌ tze naꞌa?
Lajan ebꞌ icha ebꞌ unin stajni dꞌa mercado.
Ay ebꞌ tzꞌalan dꞌa ebꞌ yetuninal:
17 Ayic ix co puꞌan co flauta eyuuj,
maj ex chan̈alvoclaj.
Ayic ix on̈ bꞌitan dꞌa cuseltaquil,
maj ex ocꞌlaj quedꞌoc,
xchi ebꞌ.
Icha ebꞌ unin malaj sgana dꞌa junoc tas chiꞌ,
icha chiꞌ eyaj a ex tic.
18 Yujto a sbꞌeybꞌal vin̈aj Juan chiꞌ,
malaj juntzan̈ tas vachꞌ svaꞌa syuqꞌuej vin̈,
yuj chiꞌ tzeyalani to enemigo ayoch dꞌa vin̈.
19 Axo ticnaic in japax a in Acꞌbꞌil in cot yuj Dios voch animail tic,
tzin vaꞌi,
svucꞌan aꞌ dꞌa scal ebꞌ anima.
Tzeyalanpaxi to bꞌucꞌtzin in,
ucꞌum in an̈,
svamigoan pax ebꞌ vin̈ tecumel alcabar yedꞌ juntzan̈xo ebꞌ chuc sbꞌeybꞌal.
Palta a ebꞌ ay sjelanil Dios dꞌay,
scheclajelta sjelanil ebꞌ chiꞌ dꞌa tastac scꞌulej,
xchi Jesús dꞌa ebꞌ.
A juntzan̈ chon̈abꞌ bꞌaj max sna sbꞌa ebꞌ anima
20 Ix lajvi chiꞌ,
ix och ijan Jesús yalani tas smul ebꞌ anima dꞌa juntzan̈ chon̈abꞌ bꞌaj ix sbꞌo juntzan̈ milagro,
yujto vachꞌchom te ay milagro ix sbꞌo taꞌ,
palta max sna jabꞌoc sbꞌa ebꞌ.
Ix yalani:
21 —A ex val tic ex aj Corazín,
te chuc eyicoꞌ.
Yedꞌ ex aj Betsaida,
te chuc pax eyicoꞌ.
Octom dꞌa Tiro yedꞌ dꞌa Sidón ix bꞌoji juntzan̈ milagro icha ix bꞌoji dꞌa e cal tic.
Tato icha chiꞌ,
pecataxom snanac sbꞌa ebꞌ.
Toxom ix yacꞌoch juntzan̈ pichul ebꞌ ya svaꞌi.
Toxom ix yacꞌqꞌue qꞌuen ticꞌaqꞌuil taan̈ ebꞌ dꞌa sjolom,
yic scheclajeli to ste cus ebꞌ yuj smul.
22 Yuj chiꞌ sval dꞌayex,
ato ol ja jun cꞌual yic ol chꞌolbꞌitaj yaj ebꞌ anima,
yelxo val nivan e yaelal ol acꞌjoc dꞌa yichan̈ ebꞌ aj Tiro yedꞌ ebꞌ aj Sidón chiꞌ.
23 An̈ejtonaꞌ,
icha ex chiꞌ ex aj Capernaum.
Nivanoc tze naꞌ to smoj ol ex qꞌuecꞌoch dꞌa satchaan̈.
Palta ton̈ej ol ex emcan dꞌa scal ebꞌ chamnac.
Octom a dꞌa Sodoma bꞌobꞌil juntzan̈ milagro icha ix bꞌoji dꞌa e cal.
Tato icha chiꞌ,
snanac am sbꞌa ebꞌ,
axo schon̈abꞌ ebꞌ chiꞌ,
ay am ecꞌ ticnaic.
24 Yuj chiꞌ sval dꞌayex,
ato ol ja jun cꞌual yic ol chꞌolbꞌitaj yaj ebꞌ anima,
yelxo val nivan e yaelal ol acꞌjoc dꞌa yichan̈ ebꞌ aj Sodoma chiꞌ,
xchi Jesús.
A Jesucristo tzꞌacꞌan quicꞌ quip
25 A dꞌa jun tiempoal chiꞌ,
ix lesalvi Jesús,
ix yalan icha tic:
—Mamin,
Yajal ach dꞌa satchaan̈ yedꞌ dꞌa yolyibꞌan̈qꞌuinal tic.
Yuj val dios dꞌayach Mamin,
yujto ix a cꞌubꞌejel juntzan̈ tic dꞌa ebꞌ jelan,
dꞌa ebꞌ te ay spensar dꞌa yichan̈ ebꞌ yetanimail,
axo dꞌa ebꞌ icha unin,
ataꞌ ix a chꞌoxoꞌ.
26 Icha chiꞌ ix aj Mamin,
yujto icha chiꞌ a gana,
xchi dꞌa Dios.
27 Ix lajvi chiꞌ,
ix yalanxi:
—A in Mam ix acꞌanoch masanil tas dꞌa yol in cꞌabꞌ.
A in Yuninal in tic,
malaj junoc mach ojtannac in sicꞌlabꞌil,
an̈ej in Mam ojtannac in.
An̈ejtonaꞌ,
malaj junoc mach ojtannac in Mam chiꞌ.
A inn̈ej Yuninal in,
vojtac,
ojtacabꞌil pax yuj ebꞌ in gana svacꞌ yojtaquejeli.
28 Cotan̈ec dꞌayin masanil ex tzꞌel eyip e munlaji yedꞌ ex te al eyaj yuj eyicatz,
ol vacꞌ eyicꞌ eyip.
29 Ol vacꞌ junoc icatz e cuch vedꞌoc.
Cꞌaybꞌejec dꞌayin,
yujto a in tic nanam in,
emnaquil in.
Tato icha chiꞌ,
ol eyicꞌ eyip.
30 Yujto a jun icatz svacꞌ e cuch tic,
man̈ aloc,
man̈ ajaltacoc in eyacꞌan servil,
xchi Jesús dꞌa ebꞌ.