A Jesús ix checanbꞌat 72 ebꞌ scꞌaybꞌum
10
Ix lajvi chiꞌ,
ix yacꞌan yopisio juntzan̈xo ebꞌ scꞌaybꞌum Jesús,
72 sbꞌisul ebꞌ.
Ix sbꞌabꞌlaj checanbꞌat ebꞌ.
Chatacvan̈il ix aj sbꞌat ebꞌ dꞌa junjun chon̈abꞌ,
dꞌa junjun lugar bꞌaj ol ecꞌ pax Jesús chiꞌ.
Lucas 10.1-24
—A ebꞌ anima tic,
lajanxo ebꞌ icha ixim trigo stiempoalxo sjochchaji.
Val yel nivanto ebꞌ,
palta jayvan̈n̈ej mach smunlaj dꞌa scal ebꞌ.
Yuj chiꞌ,
lesalvan̈ec dꞌa jun aj munlajel chiꞌ,
yic ol schecbꞌat ebꞌ smunlajvum bꞌat yicꞌchaan̈ ebꞌ.
3 Ixiquec a ex tic.
Icha tzꞌaj sbꞌat nocꞌ calnel dꞌa scal nocꞌ oques,
icha chiꞌ tzꞌaj ex in checanbꞌati.
4 Man̈ eyicꞌbꞌat e pa,
yedꞌtal e tumin yedꞌ pax e xan̈abꞌ.
Man̈ ex och lin̈an lolonel yedꞌ ebꞌ anima tze cha dꞌa yoltac bꞌe.
5 Ayic tzex cꞌoch dꞌa junoc pat,
tzeyacꞌan stzatzil scꞌol ebꞌ icha tic:
Ayocabꞌ juncꞌolal dꞌa yol e pat tic,
xe chi dꞌa ebꞌ.
6 Tato ay ebꞌ snibꞌan juncꞌolal chiꞌ,
ol acꞌjoc dꞌa ebꞌ icha tzꞌaj eyalan chiꞌ.
Tato max snibꞌej ebꞌ jun,
man̈ ol elcꞌochlaj icha tzeyal chiꞌ dꞌa ebꞌ.
7 An̈ej dꞌa jun pat chiꞌ tzeyacꞌ e posado.
A tas sva ebꞌ tze va yedꞌ ebꞌ,
yujto a mach smunlaji,
smoj schaan stojol.
Max yal ton̈ej tzex bꞌeyecꞌ dꞌa caltac pat.
8 Ayic tzex cꞌoch dꞌa junjun chon̈abꞌ bꞌaj tzex chaji,
tze van̈ej tas syacꞌ ebꞌ dꞌayex.
9 Tzeyacꞌ bꞌoxoc scꞌol ebꞌ penaay bꞌaj tzex cꞌoch chiꞌ,
tzeyalan dꞌa ebꞌ:
Stiempoalxo eyoch dꞌa yol scꞌabꞌ Dios,
xe chi dꞌa ebꞌ.
10 Tato max ex chaji dꞌa junoc chon̈abꞌ bꞌaj tzex cꞌochi,
tzex ecꞌ dꞌa yoltac calle,
tzeyalan icha tic:
11 A spococal jun e chon̈abꞌ tic ix can dꞌa coc,
sco tziccaneli,*
sco chꞌoxancaneli to man̈xa calan quic dꞌayex.
Palta nachajocabꞌel eyuuj to stiempoalxo eyoch dꞌa yol scꞌabꞌ Dios,
xe chi dꞌa ebꞌ.
12 A in tic sval dꞌayex to ayic ol ja scꞌual yic ol chꞌolbꞌitaj ebꞌ anima,
más nivan syaelal jun chon̈abꞌ chiꞌ ol acꞌjoc dꞌa yichan̈ ebꞌ aj Sodoma.
A juntzan̈ chon̈abꞌ max cꞌanabꞌajani
13 A ex val tic ex aj Corazín yedꞌ ex ex aj Betsaida,
te chuc eyicoꞌ.
Octom dꞌa chon̈abꞌ Tiro yedꞌ dꞌa chon̈abꞌ Sidón bꞌobꞌil juntzan̈ milagro icha ix in bꞌo dꞌa e cal tic.
Tato icha chiꞌ,
pecataxom snanac sbꞌa ebꞌ ay dꞌa chon̈abꞌ chiꞌ.
Yacꞌnac am och juntzan̈ spichul ebꞌ ya svaꞌi,
yacꞌnac am qꞌue qꞌuen ticꞌaqꞌuil taan̈ ebꞌ dꞌa sjolom,
yic scheclaji to scus ebꞌ yuj smul.
14 Palta a dꞌa scꞌual yic ol chꞌolbꞌitaj ebꞌ anima,
ecꞌal yaelal ol acꞌjococh dꞌa eyibꞌan̈ dꞌa yichan̈ ebꞌ aj Tiro yedꞌ ebꞌ aj Sidón chiꞌ.
15 An̈ejtonaꞌ ex pax tic ex aj Capernaum,
¿tom tze na to ol eyicꞌchaan̈ e bꞌa?
Sval dꞌayex to ol ex lajvoqueloc.
16 Xal ex in cꞌaybꞌum ex,
a ebꞌ ol chaan yabꞌ dꞌayex,
syalelcꞌochi,
a dꞌayin ol scha yabꞌ ebꞌ.
A ebꞌ tzex paticaneli,
syalelcꞌochi,
a in tzin spatiquejel ebꞌ.
A ebꞌ tzin paticanel chiꞌ,
a jun checjinac in coti,
a spatiquejel ebꞌ,
xchi Jesús dꞌa ebꞌ scꞌaybꞌum chiꞌ.
Ix jax ebꞌ 72 scꞌaybꞌum Jesús
17 Ix jax ebꞌ 72 dꞌa tzalajcꞌolal,
ix yalan ebꞌ:
—Mamin,
a ebꞌ enemigo ix scꞌanabꞌajej ebꞌ tas ix calaꞌ ayic ix cacꞌlabꞌan a bꞌi,
xchi ebꞌ.
18 Ix yalan Jesús dꞌa ebꞌ:
—A in tic vilnac tas ajnac scot vin̈ Satanás dꞌa satchaan̈ yemnac ul vin̈ dꞌa yolyibꞌan̈qꞌuinal tic,
icha yecꞌ copnaj lebꞌlon ayic scꞌan̈ cꞌu.
19 A in tic svacꞌ eyopisio yic syal eyem tecꞌtecꞌ dꞌa yibꞌan̈ nocꞌ chan yedꞌ nocꞌ sinaan,
yic tzeyacꞌan ganar dꞌa yibꞌan̈ jantacn̈ej yipalil vin̈ eyajcꞌool.
Malaj junoc tas syal ex yixtani.
20 Man̈ yujoc to tzex scꞌanabꞌajej ebꞌ enemigo tzex tzalaji,
palta tzalajan̈ec yujto tzꞌibꞌabꞌilxo e bꞌi dꞌa satchaan̈,
xchi Jesús dꞌa ebꞌ.
Ix tzalaj Jesús
21 A dꞌa jun rato chiꞌ,
a Jesús ix te tzalaj yuj Yespíritu Dios,
ix yalani:
—Mamin,
a ach Yajal ach dꞌa satchaan̈ yedꞌ dꞌa yolyibꞌan̈qꞌuinal tic,
sval vachꞌ lolonel dꞌayach,
yujto ix a cꞌubꞌejel juntzan̈ tic dꞌa ebꞌ jelan yedꞌ dꞌa ebꞌ ecꞌal spensar dꞌa yichan̈ ebꞌ yetanimail.
Axo dꞌa ebꞌ emnaquil syutej sbꞌa icha unin ix acꞌ ojtacajeloc.
Icha chiꞌ ix utej Mamin,
yujto icha chiꞌ ix el dꞌa a cꞌool,
xchi Jesús dꞌa slesal.
22 Ix lajvi chiꞌ,
ix yalan dꞌa ebꞌ anima ayecꞌ taꞌ:
—A in Mam acꞌjinac masanil tastac dꞌa yol in cꞌabꞌ.
Malaj mach ojtannac in a in Yuninal in tic.
An̈ej in Mam chiꞌ ojtannac in.
An̈ejaꞌ,
malaj mach ojtannac in Mam chiꞌ,
a inn̈ej Yuninal in vojtac yedꞌ ebꞌ in gana svacꞌ yojtaquejeli,
xchi Jesús dꞌa ebꞌ.
23 Ix lajvi chiꞌ,
ix ecꞌ qꞌueleloc dꞌa ebꞌ scꞌaybꞌum,
ix yalan dꞌa ebꞌ icha tic:
—Vachꞌ yic ebꞌ tzꞌilan juntzan̈ tzeyil tic.
24 Val yel sval dꞌayex to tzijtum ebꞌ schecabꞌ Dios dꞌa pecaꞌ yedꞌ ebꞌ rey snibꞌejnac yil jun van eyilan tic,
palta man̈ yilnacoclaj ebꞌ.
An̈ejtonaꞌ jun van eyabꞌan tic,
snibꞌej ebꞌ yabꞌnac,
palta man̈ yabꞌnacoclaj ebꞌ,
xchi dꞌa ebꞌ.
A jun vin̈ aj Samaria vachꞌ spensar
25 Ix lajvi chiꞌ,
ay jun vin̈ cꞌaybꞌum dꞌa ley Moisés ix qꞌue lin̈an.
Ix snibꞌej vin̈ ix yacꞌ proval Jesús,
yuj chiꞌ ix scꞌanbꞌej vin̈ dꞌay:
—Ach co Cꞌaybꞌumal,
¿tas ol aj in chaan in qꞌuinal dꞌa juneln̈ej?
xchi vin̈.
Lucas 10.25-42
26 —¿Tas tzꞌibꞌabꞌilcan dꞌa ley Moisés?
¿Tas xchi ayic tzavtan yabꞌ ebꞌ anima?
xchi Jesús chiꞌ dꞌa vin̈.
27 —Syal icha tic:
Tze xajanej Cajal co Diosal dꞌa smasanil e cꞌool,
dꞌa smasanil e pixan,
dꞌa smasanil eyip,
dꞌa smasanil e pensar.
Icha eyaꞌilan e bꞌa,
ichaocabꞌ chiꞌ e xajanan ebꞌ ay dꞌa spatic schiquin e pat,
xchi vin̈ dꞌa Jesús.
28 —Vachꞌ ix utej alani,
tato icha chiꞌ tzutej a bꞌa,
ol a cha a qꞌuinal dꞌa juneln̈ej,
xchi Jesús dꞌa vin̈.
29 Palta a vin̈,
snibꞌej vin̈ scol sbꞌa dꞌay,
yic max can vin̈ dꞌa qꞌuixvelal,
yuj chiꞌ ix yalanxi vin̈ dꞌa Jesús:
—¿Mach ebꞌ yovalil tzin xajanej chiꞌ syal chiꞌ?
xchi vin̈ dꞌay.
30 Yuj chiꞌ ix yalxi jun abꞌix tic Jesús dꞌa vin̈:
—A junel ay jun vin̈ van sbꞌey dꞌa jun bꞌe scot dꞌa Jerusalén scꞌoch dꞌa Jericó.
Ix yamji vin̈ yuj juntzan̈ ebꞌ elcꞌum.
Ix laj elcꞌajel tastac yedꞌnac vin̈ yedꞌ spichul vin̈.
Ix macꞌji vecchaj vin̈,
ijan ix cham vin̈ smacꞌan ebꞌ.
31 Axo ix ecꞌ jun vin̈ sacerdote dꞌa jun bꞌe chiꞌ,
ton̈ej ix bꞌatcan qꞌuelan vin̈ dꞌa vin̈,
bꞌen̈ej ix ecꞌbꞌat vin̈.
32 Ix cꞌochpax jun vin̈ yin̈tilal Leví,
axo ix yilanbꞌat vin̈ ix macꞌji vecchaj chiꞌ vin̈,
ix sqꞌuexbꞌean sbꞌa vin̈ dꞌa vin̈,
ix ecꞌbꞌat vin̈.*
33 Palta ix ecꞌpax jun vin̈ aj Samaria taꞌ.
Ayic ix yilan vin̈,
ix ocꞌ scꞌool vin̈ dꞌa vin̈.
34 Ix cꞌoch vin̈ dꞌa stzꞌey vin̈,
ix yan̈tan vin̈,
ix yacꞌanoch aceite vin̈ yedꞌ vino bꞌajtac ix lajvi chiꞌ.
Ix sbꞌacꞌan vin̈.
Ix yacꞌanqꞌue vin̈ dꞌa yibꞌan̈ schej,
ix yicꞌanbꞌat vin̈ bꞌaj ay posado,
ix stan̈van vin̈ taꞌ.
35 Axo dꞌa junxo cꞌu,
ix yacꞌanelta chabꞌ tumin vin̈ dꞌa vin̈ ay yic posado chiꞌ,
ix yalan vin̈:
Tzil val janicꞌ jun vin̈ penaay tic.
Tato nivan tza laj yuj vin̈,
ol in tup dꞌayach a ol in jax junelxo,
xchican vin̈.
36 Yuj chiꞌ tzin cꞌanbꞌej dꞌayach,
¿mach junoc ebꞌ vin̈ oxvan̈ tic yetanimail sbꞌa yedꞌ vin̈ ix yamji yuj ebꞌ elcꞌum chiꞌ tza naꞌa?
xchi Jesús dꞌa vin̈ cꞌaybꞌum dꞌa ley Moisés chiꞌ.
37 —Aton vin̈ ix ocꞌ scꞌool chiꞌ dꞌa vin̈,
xchi vin̈ dꞌa Jesús.
—Yel,
atoni.
Yuj chiꞌ,
ixic,
icha chiꞌ tzutej a bꞌa,
xchi Jesús dꞌa vin̈.
Ayecꞌ Jesús dꞌa spat ix Marta yedꞌ ix María
38 Axo ix bꞌat Jesús dꞌa yol bꞌe,
ix cꞌoch dꞌa jun aldea.
Ataꞌ ay jun ix scuch Marta.
Ix schaanoch Jesús chiꞌ ix dꞌa yol spat.
39 Ay pax junxo ix snulej ix scuchan María.
A ix María chiꞌ,
ix em cꞌojan ix dꞌa yichan̈ Jesús yic syabꞌ ix tas syalaꞌ.
40 Axo ix Marta chiꞌ,
man̈ jantacoc tas scꞌulej ix,
ix cꞌoch ix dꞌa Jesús chiꞌ,
ix yalan ix:
—Mamin,
¿tom max il jabꞌoc,
to a ix in nulej tic,
in yactejcan ix dꞌa yol scꞌabꞌ in munlajel tic in chꞌocoj?
Al dꞌa ix to scolvaj ix vedꞌoc,
xchi ix.
41 Ix yalan Jesús dꞌa ix: