Tzꞌacꞌjibꞌat stzatzil scꞌool ebꞌ creyente
16
A ix canabꞌ Febe tic,
yacꞌnac servil ix dꞌa jun iglesia dꞌa chon̈abꞌ Cencrea.
Tzeyil janicꞌ ix.
2 Vachꞌ tzeyutej e chaan ix scꞌoch taꞌ,
yujto yicxo ix Cajal Jesús quedꞌoc.
Yujto a on̈ creyente on̈ tic,
smoj icha chiꞌ scutej co chaan ebꞌ cucꞌtac ebꞌ canabꞌ tzꞌecꞌ dꞌayon̈.
Tzex colvaj dꞌa ix yuj tastac yovalil tzꞌoch yuuj.
Yujto tzijtum ebꞌ bꞌaj ix colvaj ix.
An̈ejtonaꞌ colvajnac pax ix dꞌayin.
3 Tic svacꞌbꞌat stzatzil scꞌool ix canabꞌ Priscila yedꞌ vin̈ cucꞌtac Aquila,
aton ebꞌ junn̈ej ix in munlaj yedꞌoc dꞌa yic Cristo Jesús.
4 Ijan chamnac ebꞌ vuuj,
ayic xidꞌ in scolanelta ebꞌ dꞌa yol scꞌabꞌ chamel.
Yuj chiꞌ svacꞌ yuj diosal dꞌa ebꞌ.
Man̈oc inn̈ej svacꞌ yuj diosal dꞌa ebꞌ,
a ebꞌ creyente dꞌa junjun iglesia dꞌa scal ebꞌ man̈ israeloc,
syacꞌpax yuj diosal ebꞌ dꞌa ebꞌ.
5 Svacꞌbꞌat stzatzil scꞌol ebꞌ creyente smolbꞌej sbꞌa dꞌa spat ebꞌ chiꞌ.
Svacꞌanpaxbꞌat stzatzil scꞌol vin̈ cucꞌtac Epeneto.
Te xajanabꞌil vin̈ vuuj.
A vin̈ ix bꞌabꞌlaj acꞌanoch Cristo dꞌa scꞌool dꞌa yol yic Asia.
6 Svacꞌanpaxbꞌat stzatzil scꞌol ix María,
jun ix smunlaj val dꞌa e cal.
7 Svacꞌanpaxbꞌat stzatzil scꞌol ebꞌ vetchon̈abꞌ,
aton vin̈aj Andrónico yedꞌ ix Junias.
Junn̈ej ochnac on̈ yedꞌ ebꞌ preso junel.
Nivan yelcꞌoch ebꞌ dꞌa co cal a on̈ schecabꞌ on̈ Cristo tic.
A ebꞌ bꞌabꞌel creyente dꞌa vichan̈.
8 Svacꞌanpaxbꞌat stzatzil scꞌol vin̈ cucꞌtac Amplias.
Xajan vin̈ vuuj,
yujto yacꞌnacoch Cajal Jesús vin̈ dꞌa scꞌool.
9 Svacꞌanpaxbꞌat stzatzil scꞌol vin̈ cucꞌtac Urbano,
yujto junn̈ej tzon̈ munlaj yedꞌ vin̈ dꞌa yic Cristo Jesús.
Svacꞌanbꞌat yic vin̈ cucꞌtac Estaquis,
xajanabꞌil pax vin̈ vuuj.
10 Svacꞌanpaxbꞌat stzatzil scꞌol vin̈ cucꞌtac Apeles.
A vin̈ chiꞌ ix checlaj val eli to ayoch Cristo dꞌa scꞌool vin̈.
Svacꞌanpaxbꞌat stzatzil scꞌol ebꞌ yic vin̈aj Aristóbulo.
11 Svacꞌanpaxbꞌat stzatzil scꞌol vin̈ vetchon̈abꞌ scuch Herodión yedꞌ ebꞌ yic vin̈aj Narciso creyentexo.
12 Svacꞌpaxbꞌat stzatzil scꞌol ebꞌ ix canabꞌ Trifena yedꞌ ix Trifosa.
A ebꞌ ix chiꞌ smunlaj val ebꞌ ix dꞌa yic Cajal Jesús.
Svacꞌpaxbꞌat yic ix canabꞌ Pérsida.
Xajan ix vuuj,
nivanxo ix munlaj ix dꞌa yic Cajal Jesús.
13 Svacꞌanpaxbꞌat stzatzil scꞌol vin̈ cucꞌtac Rufo,
aton vin̈ nivan yelcꞌoch dꞌa scal ebꞌ yicxo Dios yedꞌ pax stzatzil scꞌol ix snun vin̈.
A ix snun vin̈ chiꞌ,
icha val in nun yutejnac sbꞌa ix dꞌayin.
14 Svacꞌpaxbꞌat stzatzil scꞌol vin̈ cucꞌtac Asíncrito,
vin̈aj Flegonte,
vin̈aj Hermas,
vin̈aj Patrobas,
vin̈aj Hermes yedꞌ juntzan̈xo ebꞌ vin̈ cucꞌtac ayecꞌ yedꞌ ebꞌ vin̈.
15 An̈ejtonaꞌ,
svacꞌpaxbꞌat stzatzil scꞌool vin̈ cucꞌtac Filólogo,
ix canabꞌ Julia,
vin̈ cucꞌtac Nereo yedꞌ ix yanabꞌ vin̈,
ix canabꞌ Olimpas yedꞌ pax masanil ebꞌ cucꞌtac ayecꞌ yedꞌ ebꞌ.
16 Slaj eyacꞌlaj stzatzil e cꞌool dꞌa tzalajcꞌolal yujto yic exxo Dios.
A ebꞌ yicxo Cristo dꞌa junjun chon̈abꞌ dꞌa tic,
syacꞌbꞌat stzatzil e cꞌool ebꞌ.
17 Ex vucꞌtac ex vanabꞌ,
ay ebꞌ ay dꞌa e cal van yacꞌlan e poj e bꞌa.
Syacꞌlan pax ebꞌ yacꞌan juvoquel e pensar.
Palta man̈ ichoc taꞌ syal juntzan̈ cꞌaybꞌubꞌal bꞌaj cꞌaybꞌabꞌil ex.
Yuj chiꞌ,
tzeyil val e bꞌa dꞌa ebꞌ.
Yovalil tzeyiqꞌuel e bꞌa dꞌa ebꞌ.
18 Yujto a ebꞌ chiꞌ,
man̈oc Cajal Jesucristo syacꞌ servil ebꞌ.
An̈ej juntzan̈ tas sgana snivanil ebꞌ syacꞌ servil.
Syacꞌan musansatil juntzan̈ ebꞌ maxto nachajel yuuj ebꞌ.
Te nanam syutej sbꞌa ebꞌ yalani.
Ichato vachꞌ syal ebꞌ,
palta man̈ vachꞌoclaj.
19 Palta a ex tic,
masanil anima ojtannac tas tzeyutej e cꞌanabꞌajan Dios.
Yuj chiꞌ tzin tzalaj eyuuj.
In gana jelan tzeyutej e bꞌa dꞌa juntzan̈ tas vachꞌ.
Axo juntzan̈ tas malaj svachꞌil,
man̈ e comon cꞌulej.
20 A Dios acꞌum juncꞌolal.
A ol acꞌan eyacꞌ ganar vin̈ Satanás dꞌa elan̈chamel,
ol can vin̈ dꞌa yalan̈ eyuuj.
In gana syacꞌ svachꞌcꞌolal Cajal Jesucristo dꞌayex taꞌ.
21 A vin̈aj Timoteo tic,
junn̈ej tzin munlaj yedꞌ vin̈ dꞌa tic.
Syacꞌbꞌat stzatzil e cꞌool vin̈ yedꞌ ebꞌ vetchon̈abꞌ tic,
aton vin̈aj Lucio,
vin̈aj Jasón yedꞌ vin̈aj Sosípater.
22 A in Tercio in,
a in van in tzꞌibꞌanbꞌat jun scarta vin̈aj Pablo tic dꞌayex,
svacꞌpaxbꞌat stzatzil e cꞌool,
yujto yic ex Cajal Jesús vedꞌoc.
23 Syacꞌpaxbꞌat stzatzil e cꞌool vin̈ cucꞌtac Gayo.
A dꞌa spat vin̈ ayon̈ eqꞌui.
A dꞌa tic smolbꞌej sbꞌa ebꞌ creyente smasanil.
A vin̈ cucꞌtac Erasto,
tesorero yic jun chon̈abꞌ tic yaj vin̈,
syacꞌbꞌat stzatzil e cꞌool vin̈ yedꞌ vin̈ cucꞌtac Cuarto.
Syal vachꞌ lolonel vin̈aj Pablo dꞌa Dios
24-25 A ticnaic,
calec vachꞌ lolonel dꞌa Dios,
yujto syal yacꞌan co tecꞌanil dꞌa masanil tiempo.
Yujto icha chiꞌ syal jun vachꞌ abꞌix svalcaneli,
aton yabꞌixal Jesucristo.
Yictax ix sbꞌoan yolyibꞌan̈qꞌuinal tic Dios,
cꞌubꞌabꞌilxo yabꞌixal Cristo yuuj.
26 Palta axo ticnaic,
syacꞌ jun abꞌix tic yojtaquejel ebꞌ anima yuj Slolonel tzꞌibꞌabꞌilcan yuj ebꞌ schecabꞌ dꞌa pecaꞌ.
A Dios chiꞌ,
ayn̈ej ecꞌ dꞌa masanil tiempo.
A tzꞌalani to a ebꞌ anima ay dꞌa junjun chon̈abꞌ,
yovalil syojtaquejel jun abꞌix tic ebꞌ,
yic ol yacꞌoch ebꞌ dꞌa scꞌool,
axo scꞌanabꞌajan ebꞌ chiꞌ taꞌ.
27 An̈ej Dios te jelan.
Calec vachꞌ lolonel dꞌay yuj Jesucristo dꞌa masanil tiempo.
Amén.