Co cꞌulejec icha sgana ebꞌ yicxo Dios
15
A on̈ tecꞌan on̈xo tic,
snachajel cuuj to malaj yovalil juntzan̈ chiꞌ,
palta ay ebꞌ manto tecꞌanoc,
xiv ebꞌ yuuj.
Yuj chiꞌ quic yaj cacꞌan techajoc,
yujto manto te tecꞌanoc ebꞌ,
yic max somchajel ebꞌ cuuj.
Max yal an̈ej tas co gana sco sayaꞌ.
2 Co cꞌulejec junjun on̈ icha sgana ebꞌ yicxo Dios,
sec yuj chiꞌ vachꞌ ol aj snaan ebꞌ.
Tato icha chiꞌ,
ol tecꞌcꞌaj ebꞌ.
3 Yujto a Cristo,
man̈oc tas sgana ix scꞌulej.
Palta janac dꞌa yibꞌan̈ icha syal dꞌa Slolonel Dios,
aton bꞌaj syal icha tic:
Mamin,
ayic sbꞌuchvaj ebꞌ dꞌayach,
a in jun svabꞌ pax syail,
xchi.
4 Jantacn̈ej tas tzꞌibꞌabꞌilcan dꞌa Slolonel Dios dꞌa pecaꞌ,
ay yopisio on̈ scꞌaybꞌani.
Yuj Slolonel chiꞌ sco tecꞌbꞌej co bꞌa,
syacꞌanpax snivanil co cꞌool yic vachꞌ scacꞌoch Dios chiꞌ yipoc co cꞌool.
5 A Dios tzꞌacꞌan co tecꞌanil,
syacꞌanpax snivanil co cꞌool.
In gana a tzꞌoch eyedꞌoc,
yic vachꞌ juncꞌolal slaj eyutej e bꞌa,
icha yutejnac sbꞌa Cristo Jesús.
6 Tato icha chiꞌ,
junxon̈ej ol aj e pensar.
Junxon̈ej ol eyutoc eyalan vachꞌ lolonel dꞌa Dios,
aton sDiosal Cajal Jesucristo,
Smam ton paxi.
Ecꞌnac vin̈aj Pablo yalel vachꞌ abꞌix dꞌa ebꞌ man̈ israeloc
7 Yuj chiꞌ yovalil vachꞌ scutej quil-lan co bꞌa junjun on̈,
yujto icha chiꞌ ix yutej Cristo on̈ yilani,
yic vachꞌ scheclajeli to te nivan svachꞌil Dios.
8 Svalbꞌat juntzan̈ tic dꞌayex,
yujto a Cristo ulnaquecꞌ yacꞌ servil ebꞌ yetisraelal.
Ulnac eqꞌui,
yic tzꞌelcꞌoch tas yalnaccan Dios dꞌa ebꞌ co mam quicham ayic yacꞌannac stiꞌ dꞌa ebꞌ.
Icha chiꞌ yutejnac Cristo schꞌoxani to yel syal Dios.
9 An̈ejtonaꞌ,
yuj ebꞌ man̈ israeloc ulnacpaxecꞌ Cristo chiꞌ,
yic vachꞌ syal vachꞌ lolonel ebꞌ dꞌa Dios,
yujto ix ocꞌ scꞌool dꞌa ebꞌ.
Yujto icha chiꞌ syal dꞌa Slolonel:
Yuj chiꞌ jun,
sval vachꞌ lolonel dꞌayach dꞌa scal juntzan̈ nivac chon̈abꞌ,
yuj chiꞌ tzach in bꞌitej.
10 Syalanpax junxo tic dꞌa Slolonel Dios chiꞌ:
A exxo man̈ ex israeloc,
tzalajan̈ec yedꞌ ebꞌ yic Dios,
aton ebꞌ israel,
xchi.
11 Ay bꞌaj syal pax icha tic:
E masanil ex nación yedꞌ ex chon̈abꞌ man̈ israeloc,
alec vachꞌ lolonel dꞌa Dios Cajal,
xchi.
12 A vin̈aj Isaías tzꞌibꞌannaccan dꞌa Slolonel Dios:
Ay jun ol pitzvocchaan̈ dꞌa scal ebꞌ yin̈tilal vin̈aj Isaí,
aꞌ ol acꞌjoc och yajaloc ebꞌ man̈ israeloc.
Aton jun chiꞌ ol yacꞌoch ebꞌ yipoc scꞌool,
xchicani.
13 A Dios yipcꞌolal yaj cuuj.
In gana,
a svachꞌ acꞌan e tzalajcꞌolal yedꞌ e juncꞌolal,
yujto tzeyacꞌoch e cꞌol dꞌay.
Tato icha chiꞌ,
ol e vachꞌ aqꞌuejoch yipoc e cꞌool,
yujto a Yespíritu tzꞌacꞌan spoder dꞌayex.
14 Ex vucꞌtac ex vanabꞌ,
vojtacxo,
to vachꞌ e pensar,
jelan ex dꞌa yic Dios.
Vojtac to syal tze cꞌaybꞌej e bꞌa taꞌ.
15 Vachꞌchom icha chiꞌ e bꞌeybꞌal,
max in xiv in tzꞌibꞌanbꞌat juntzan̈ cꞌaybꞌubꞌal tic dꞌayex,
yic man̈ ol sat e cꞌool dꞌay.
Icha chiꞌ svutej in bꞌa,
yujto a Dios acꞌjinac jun vopisio tic yuj svachꞌcꞌolal.
16 A acꞌannac vopisio vacꞌan servil Jesucristo dꞌa scal ebꞌ man̈ israeloc.
Ay vopisio valanel vachꞌ abꞌix yic Dios,
yic vachꞌ ay ebꞌ man̈ israeloc ol vacꞌoch dꞌa yol scꞌabꞌ.
Icha junoc tas vachꞌ siaj dꞌa yichan̈ Dios,
icha chiꞌ yaj ebꞌ dꞌa yichan̈,
yujto a Yespíritu tzꞌicꞌanoch ebꞌ yicoc.
17 Yujto vacꞌnacoch Cristo Jesús dꞌa in cꞌool,
yuj chiꞌ syal valani to nivan yelcꞌoch jun munlajel tzin cꞌulej tic dꞌa Dios.
18 Max yal vicꞌanchaan̈ in bꞌa yuj tas scꞌulejnac juntzan̈xo ebꞌ tzꞌacꞌan servil Dios.
Palta max in xiv valani tas ix scꞌulej Cristo vedꞌoc,
yic svacꞌ scꞌanabꞌajej ebꞌ man̈ israeloc.
Ix in ecꞌ vacꞌ yabꞌix ebꞌ.
Ay pax juntzan̈ tas ix in chꞌox dꞌa scal ebꞌ.
19 Aton juntzan̈ milagro ix in chꞌox dꞌa ebꞌ,
yedꞌ juntzan̈xo tas schꞌoxanel spoder Dios.
A Yespíritu Dios ix yacꞌ spoder dꞌayin.
Icha chiꞌ ix vutej ecꞌ valanel vachꞌ abꞌix yic Cristo dꞌa junjun chon̈abꞌ.
A dꞌa Jerusalén ix in bꞌabꞌlaj yamejoch valaneli.
Ix laj in ecꞌ dꞌa junjun chon̈abꞌ,
masanto ix in cꞌoch dꞌa yol yic Ilírico.
20 Yujto svacꞌ vip valanel vachꞌ abꞌix yic colnabꞌil bꞌaj manto yabꞌ yabꞌixal Cristo ebꞌ anima.
Yuj chiꞌ man̈xa in gana tzin ecꞌ valel bꞌaj toxo ix ecꞌ juntzan̈xo ebꞌ yaleli.
21 Icha syal dꞌa Slolonel Dios:
A ebꞌ manto och yabꞌix,
ol yabꞌ ebꞌ.
Yedꞌ ebꞌ manta bꞌaj tzꞌabꞌan abꞌix,
ol nachajel yuj ebꞌ,
xchicani.
Sgana vin̈aj Pablo sbꞌat dꞌa Roma
22 Yuj vopisio tic,
maxto yal-laj in bꞌat ex vilaꞌ,
vachꞌchom tzijtum elxo in naan jun chiꞌ.
23 Ayxo yabꞌilal voch ijan in naani.
Xal ticnaic,
man̈xalaj in munlajel dꞌa juntzan̈ lugar tic.
24 Yuj chiꞌ tzin naꞌ to ayic ol in bꞌat dꞌa España ol in ecꞌ ex vilaꞌ,
yic ol in tzalaj ex vilani.
Ol lajvoc vecꞌ jayeoc cꞌual eyedꞌ taꞌ,
in gana ol ex colvaj vedꞌoc yic ol in cꞌoch dꞌa España chiꞌ.
25 Palta a ticnaic,
ol in bꞌabꞌlaj ecꞌ dꞌa Jerusalén yic ol vicꞌbꞌat jun ofrenda dꞌa ebꞌ creyente taꞌ.
26 Yujto a ebꞌ aj Macedonia yedꞌ ebꞌ aj Acaya,
ix el dꞌa scꞌool ebꞌ,
ix yicꞌchaan̈ jun ofrenda ebꞌ yic ebꞌ creyente mebꞌaꞌ dꞌa Jerusalén chiꞌ.
27 Ix el dꞌa scꞌol ebꞌ yacꞌan jun ofrenda chiꞌ,
yujto ichato ay sbꞌoc ebꞌ dꞌa ebꞌ.
Yujto a ebꞌ aj Jerusalén chiꞌ,
a ebꞌ colvajnac dꞌa ebꞌ man̈ israeloc chiꞌ yuj yojtacanel co Mam Dios ebꞌ.
Yuj chiꞌ,
a ebꞌ man̈ israeloc chiꞌ ay ton yalan yic ebꞌ scolvaj dꞌa ebꞌ yedꞌ yofrenda chiꞌ.
28 Yuj chiꞌ yovalil ol ecꞌ vacꞌcan jun ofrenda chiꞌ dꞌa ebꞌ aj Jerusalén chiꞌ.
Ol lajvoc chiꞌ,
ol ecꞌ ex vilani ayic van in bꞌat dꞌa España chiꞌ.
29 Vojtac to ayic ol in cꞌoch eyedꞌ taꞌ,
man̈ jantacoc svachꞌcꞌolal Cristo ol yacꞌ dꞌayon̈ eyedꞌoc.
30 Ex vucꞌtac ex vanabꞌ,
a Yespíritu Dios tzꞌacꞌan co xajanej co bꞌa.
Yuj chiꞌ tzin tevi dꞌayex to tzeyacꞌ eyip eyoch vedꞌ dꞌa lesal.
Tzex lesalvi vuuj dꞌa Dios yujto icha chiꞌ sgana Cajal Jesucristo.
31 Tze cꞌan dꞌa Dios vuuj yic ol in scolcanel dꞌa yol scꞌabꞌ ebꞌ man̈ creyenteoc dꞌa yol yic Judea.
Tzex lesalvi pax yuj jun ofrenda ol vicꞌbꞌat tic dꞌa ebꞌ creyente dꞌa Jerusalén,
yic tzalajcꞌolal ol scha ebꞌ.
32 Tzex lesalvi pax vuuj yic tzalajcꞌolal ol in cꞌoch eyedꞌ taꞌ,
ta icha chiꞌ sgana Dios.
Axo taꞌ ol vicꞌ vip jayeoc cꞌual.
33 Ochocabꞌ Dios jun acꞌum juncꞌolal eyedꞌ e masanil taꞌ.
Amén.