Max yal co chꞌolbꞌitan ebꞌ quetcreyenteal
14
Ay ebꞌ creyente manto tecꞌanoclaj,
yujto manto nachajel scꞌaybꞌubꞌal Cristo yuj ebꞌ.
A ebꞌ icha chiꞌ,
chaec och ebꞌ eyedꞌoc.
Man̈ e telaj e bꞌa yedꞌ ebꞌ yuj juntzan̈ tas manto nachajel yuj ebꞌ.
2 A ebꞌ creyente tecꞌanxo,
yojtac ebꞌ smasanil tas syal co chiꞌani.
Axo ebꞌ manto tecꞌanoc,
tzato xiv ebꞌ schiꞌan nocꞌ chibꞌej,
an̈ej an̈ itaj schi ebꞌ.
3 Palta a on̈ sco chi masanil tasi,
max yal co bꞌuchan ebꞌ max chiꞌan quedꞌoc.
An̈ejtonaꞌ,
a ebꞌ max chiꞌan juntzan̈ chiꞌ quedꞌoc,
max yal on̈ yalubꞌtan̈an ebꞌ,
yujto chabꞌilon̈xo yuj Dios yedꞌ ebꞌ.
4 Qꞌuinaloc ay junoc mach smunlaj dꞌa spatrón,
¿tom ay calan quic co chꞌolbꞌitan tas yaji?
An̈ejton jun spatrón chiꞌ ay yalan yic yalan dꞌay tato vachꞌ dꞌa yichan̈ mato maay.
An̈ejtonaꞌ ich on̈ pax taꞌ dꞌa Cajal Jesús.
Palta vachꞌ ol on̈ aj dꞌa yichan̈,
yujto ay spoder yoch quedꞌoc,
yic vachꞌ scutej co bꞌa dꞌay.
5 Ay ebꞌ creyente tzꞌalani to ay juntzan̈ cꞌual nivan yelcꞌochi.
Ay pax ebꞌ tzꞌalani,
lajann̈ej junjun cꞌu,
malaj junoc cꞌual ecꞌal yelcꞌoch dꞌa yichan̈ junocxo,
xchi ebꞌ.
Yuj chiꞌ co naec jun tic dꞌa co pensar junjun on̈ bꞌaj tzon̈ cani.
6 A ebꞌ scꞌanabꞌajan juntzan̈ cꞌu sval tic,
icha chiꞌ syutej sbꞌa ebꞌ,
yic schꞌoxel ebꞌ to ay yelcꞌoch Cajal Jesús dꞌa yichan̈ ebꞌ.
An̈ejtonaꞌ a mach max cꞌanabꞌajan juntzan̈ cꞌu chiꞌ,
icha chiꞌ syutej sbꞌa ebꞌ,
yujto ay yelcꞌoch Cajal Jesús dꞌa ebꞌ.
Yedꞌ pax junxo tic:
A mach yaln̈ej tas schiꞌa,
schin̈ej yic schꞌoxoꞌ to ay yelcꞌoch Cajal Jesús dꞌay,
yujto syacꞌ yuj diosal dꞌa Dios yuuj ayic schiꞌani.
Axo mach max chiꞌan juntzan̈ chiꞌ smasanil,
icha chiꞌ scꞌulej yic schꞌoxoꞌ to ay yelcꞌoch Cajal Jesús chiꞌ dꞌay,
yujto syacꞌ pax yuj diosal dꞌa Dios yuj tas schiꞌa.
7 Yacbꞌan pitzanon̈to,
malaj junoc on̈ quic co bꞌa.
An̈ejtonaꞌ ayic ol on̈ chamoc,
malaj junoc on̈ quic pax co bꞌa.
8 Tato pitzan on̈,
yuj quicꞌanchaan̈ Cajal Jesús pitzan on̈.
Tato tzon̈ chami,
yuj quicꞌanpaxchaan̈ tzon̈ chami.
Yuj chiꞌ,
vachꞌchom pitzan on̈ ma tzon̈ chami,
yic on̈n̈ej Cajal Jesús chiꞌ.
9 Yujto ix cham Cristo,
ix pitzvixi,
yic vachꞌ tzꞌoch Yajalil dꞌa yibꞌan̈ ebꞌ chamnac yedꞌ pax dꞌa quibꞌan̈ a on̈ pitzan on̈to tic.
10 Yuj chiꞌ,
max yal co chꞌolbꞌitan tas yaj junoc cucꞌtac canabꞌ.
Max yal calani to malaj vachꞌ yochi.
Yujto co masanil ol on̈ cꞌoch dꞌa yichan̈ Dios,
ato taꞌ ol schꞌolbꞌitej tas caj junjun on̈.
11 Yujto syalcan dꞌa Slolonel icha tic:
A in Yajal in tic,
yel pitzan in.
Yuj chiꞌ,
val yel ol laj em cumjabꞌ ebꞌ anima smasanil dꞌa vichan̈.
Yovalil ol laj yal ebꞌ to a inn̈ej Dios in,
xchicani.
12 Yuj chiꞌ,
yovalil junjun on̈ ol cal dꞌa Dios tastac ix co cꞌulej.
Ay smay cacꞌan somchaj spensar ebꞌ yicxo Dios
13 Yuj chiꞌ,
max yal-laj co chꞌolbꞌitan tas caj junjun on̈.
Más vachꞌ a val junxo tic sco cꞌulej:
Vachꞌ scutej co bꞌa yil ebꞌ cucꞌtac ebꞌ canabꞌ,
yic vachꞌ malaj junoc ebꞌ ol bꞌat dꞌa schucal cuuj,
yic malaj pax junoc ebꞌ ol somchajel spensar cuuj.
14 A in tic,
yujto ayoch Cajal Jesús dꞌa in cꞌool,
vojtacxo sicꞌlabꞌil to malaj junoc tas ay yovalil yuj dꞌa yol yicoꞌ.
Palta tato ay junoc mach snaani to ay yovalil junoc tas yuj Dios,
max yal scꞌulani,
yujto ayton yovalil dꞌa yol yicoꞌ.
15 Qꞌuinaloc tato ay junoc tas ay yovalil schiji yuj ebꞌ cucꞌtac ebꞌ canabꞌ,
tato sco chiꞌa,
scus ebꞌ cuuj.
Tato icha chiꞌ scutej co bꞌa,
man̈ vanoc co xajanan ebꞌ syal chiꞌ.
Palta aytalaj junoc ebꞌ ix cham Cristo yuuj satel yuj junoc tas sco chiꞌa.
16 A on̈ tic cojtac to vachꞌ juntzan̈ chiꞌ,
palta tato ay ebꞌ tzꞌalani to chuc,
más vachꞌ max co chilaj dꞌa yichan̈ ebꞌ.
17 A ticnaic,
ayon̈xooch dꞌa yol scꞌabꞌ Dios.
Yuj chiꞌ,
man̈xo smojoc scacꞌoch co pensar dꞌa tas sco chiꞌa yedꞌ dꞌa tas scuqꞌuej.
Palta smoj tojol scutej co pensar,
juncꞌolal tzon̈ aji.
Sco chaan jun tzalajcꞌolal syacꞌ Espíritu Santo dꞌayon̈.
18 Tato icha chiꞌ scutej cacꞌan servil Cristo,
ol tzalaj Dios quedꞌoc.
Ol yilanpax ebꞌ quetanimail to vachꞌ co bꞌeybꞌal.
19 Yuj chiꞌ,
co naec val tas scutej co bꞌa,
yic juncꞌolal tzon̈ aj co masanil.
Sco naani chajtil scutej co bꞌa cacꞌan stecꞌanil junjun ebꞌ yicxo Dios.
20 Ay smay sjuviel smunlajel Dios dꞌa ebꞌ quetcreyenteal yuj tas sco chiꞌa.
Yuj chiꞌ,
man̈ co cꞌulejec icha chiꞌ.
Yel toni,
malaj junoc tas ay yovalil co chiꞌan dꞌa yichan̈ Dios,
palta tato ay ebꞌ somchajel spensar yuj tas sco chiꞌa,
yovalil scactejcan co chiꞌani.
21 Yuj chiꞌ,
tato ay ebꞌ somchajel spensar yujto sco chi nocꞌ chibꞌej,
ma yujto scuqꞌuej vino,
ma yuj junocxo tas sco cꞌulej,
tato icha chiꞌ,
más vachꞌ scactejcan co cꞌulan juntzan̈ chiꞌ.
22 Yujto cacꞌnacoch Dios dꞌa co cꞌool,
yuj chiꞌ snachajel cuuj to malaj junoc tas ay yovalil yuj Dios chiꞌ.
Palta munil sco na juntzan̈ tic dꞌa yichan̈ Dios.
A juntzan̈ tas sco cꞌulej,
tato cojtac to malaj yovalil dꞌa yichan̈ Dios chiꞌ,
te vachꞌ quicoꞌ.
23 Palta ayic sco chiꞌan junoc tasi,
tato sco naꞌa to ay yovalil dꞌa yichan̈ Dios,
tato icha chiꞌ,
tzꞌoch co mul dꞌay,
yujto max cacꞌoch dꞌa co cꞌool to vachꞌ scutej co bꞌa.
Yaln̈ej tas sco cꞌulej,
tato max cacꞌoch dꞌa co cꞌool to vachꞌ dꞌa yichan̈ Dios,
tato icha chiꞌ,
tzꞌoch co mul dꞌay.