13
Yovalil sco cꞌanabꞌajej ebꞌ yajal co masanil,
yujto a Dios tzꞌacꞌanoch ebꞌ dꞌa yopisio.
Qꞌuinaloc ta maay,
malaj am junoc ebꞌ ay yopisio.
2 Tato ay on̈ scacꞌ oval yedꞌ ebꞌ yajal chiꞌ,
syalelcꞌochi to van schichonoch co cꞌool dꞌa tas ix sbꞌocan Dios.
Tato icha chiꞌ tzꞌaj cacꞌan oval yedꞌ ebꞌ,
munil scacꞌoch yaelal dꞌa quibꞌan̈.
3 Yujto a ebꞌ yajal chiꞌ,
ay yopisio ebꞌ man̈ yicoc xiv ebꞌ vachꞌ sbꞌeybꞌal dꞌa ebꞌ,
palta yic xiv ebꞌ chuc sbꞌeybꞌal dꞌa ebꞌ.
Yuj chiꞌ,
tato co gana max on̈ xiv dꞌa ebꞌ,
yovalil vachꞌ scutej co bꞌeybꞌal.
Tato icha chiꞌ stzalaj ebꞌ quedꞌoc.
4 Ayoch yopisio ebꞌ yuj Dios,
yuj svachꞌiloc ebꞌ anima smasanil.
Palta tato chuc scutej co bꞌa,
smoj ton co xiv dꞌa ebꞌ,
yujto yel ay yalan yic ebꞌ yacꞌanoch yaelal dꞌa quibꞌan̈.
Yujto ayoch yopisio ebꞌ yuj Dios,
yic tzꞌacꞌjioch syaelal ebꞌ chuc syutej sbꞌa yuj ebꞌ.
5 Yuj chiꞌ yovalil sco cꞌanabꞌajej tas syal ebꞌ yajal chiꞌ.
Man̈ yujocn̈ej to tzon̈ xiv yacꞌanoch yaelal ebꞌ dꞌa quibꞌan̈ sco cꞌanabꞌajan ebꞌ,
palta sco cꞌanabꞌajej ebꞌ,
yujto cojtac to icha chiꞌ sgana Dios.
6 Yuj chiꞌ yovalil scacꞌ co tumin dꞌa ebꞌ icha syal ley,
yujto a Dios tzꞌacꞌan yopisio ebꞌ.
Van pax smunlaj ebꞌ dꞌa jun yopisio chiꞌ.
7 A ebꞌ yajal scꞌanan tumin yuj ley,
yovalil scacꞌ dꞌa ebꞌ.
Vachꞌchom chꞌan̈ ornato,
chꞌan̈ co derecho,
yovalil sco tup dꞌa ebꞌ icha syal ley.
A ebꞌ yajal chiꞌ,
tato smoj co xiv dꞌa ebꞌ,
xivoc on̈ dꞌa ebꞌ.
Tato smoj ay yelcꞌoch ebꞌ,
ayocabꞌ yelcꞌoch ebꞌ dꞌayon̈.
8 Tato ay on̈ ay co bꞌoc,
yovalil sco tupuꞌ.
Palta ay val junxo icha co bꞌoc dꞌa ebꞌ quetanimail,
aton co xajanan co bꞌa yedꞌ ebꞌ,
yujto yovalil sco xajanej co bꞌa.
Tato icha chiꞌ scutej co bꞌa,
syalelcꞌochi van co cꞌanabꞌajan sley Dios smasanil.
9 Ay juntzan̈ checnabꞌil tzꞌalan icha tic:
Man̈ ex em ajmulal.
Man̈ e milcham junoc eyetanimail.
Man̈ eyelqꞌuej junoc tasi.
Man̈ eyiloch e cꞌool dꞌa junocxo tas,
xchi.
A juntzan̈ checnabꞌil tic yedꞌ juntzan̈xo,
junxon̈ej checnabꞌil bꞌaj syiqꞌuelcꞌoch sbꞌa,
aton jun tzꞌalan icha tic:
Icha eyaꞌilan e bꞌa,
ichaocabꞌ chiꞌ tzeyutej e xajanan ebꞌ ay dꞌa spatic schiquin e pat,
xchi.
10 A mach xajanan ebꞌ yetanimail,
malaj juneloc chuc syutej sbꞌa dꞌa ebꞌ.
Yuj chiꞌ tato sco xajanej ebꞌ,
man̈xa bꞌaj scacꞌ palta dꞌa sley Dios.
11 Svalbꞌat junxo tic dꞌayex.
Nachajocabꞌel eyuuj tas yaj jun tiempo tic.
Yujto a ticnaic,
stiempoal ichato scaqꞌuel co vayan̈,
yujto toxo ol ja co Columal.
Te lacꞌanxo ay ticnaic,
man̈ ichoc ix aj co bꞌabꞌlaj chaan dꞌa yalan̈taxo.
12 A jun tiempoal tic,
lajan yaj yedꞌ dꞌacꞌvalil.
Axo yic ol ja co Columal,
ichato cꞌualil ol ajoc.
Palta ipan yecꞌ stiempoal ticnaic,
toxo val ol javoc.
Yuj chiꞌ,
cactejeccan co cꞌulan juntzan̈ scꞌulej ebꞌ anima ayto dꞌa qꞌuicꞌalqꞌuinal.
Icha syutej sbꞌa ebꞌ soldado yacꞌan oval yedꞌ juntzan̈ syamcꞌabꞌ,
ichaocabꞌ chiꞌ scutej cacꞌan quip dꞌa yic Dios,
yujto axo dꞌa saquilqꞌuinal ayon̈.
13 Ichaocabꞌ syutej sbꞌa ebꞌ vachꞌ dꞌa cꞌualil,
ichaocabꞌ chiꞌ scutej co bꞌa.
Tojol scutej co bꞌa.
Max yal co chꞌeneni uqꞌuel an̈.
Max yal tzon̈ em dꞌa ajmulal yedꞌ dꞌa juntzan̈xo tastac chucal yedꞌ co nivanil.
Max yal scacꞌ oval yedꞌ junocxo quetanimail.
Max yal yoch chian co cꞌool dꞌa junocxo yuj tas ay dꞌay.
14 Yovalil sco chaec spoder Cajal Jesucristo icha schaan syamcꞌabꞌ ebꞌ soldado yic oval.
Man̈xoocabꞌ cacꞌoch co pensar dꞌa juntzan̈ sgana co chuc pensaril.