Chajtil scutej cacꞌan servil Dios
12
Ex vucꞌtac ex vanabꞌ,
ix te ocꞌ val scꞌool Dios dꞌayon̈,
yuj chiꞌ tzin tevi dꞌayex to tzeyacꞌoch e bꞌa dꞌa yol scꞌabꞌ,
icha junoc silabꞌ pitzan,
icha chiꞌ scutej co bꞌa cacꞌan servil,
yujto yic on̈n̈ej,
yic stzalaj scꞌool quedꞌoc.
Ichaton val chiꞌ smoj scutej calan co bꞌa dꞌay.
2 Man̈xoocabꞌ lajanoc scutej co bꞌa yedꞌ ebꞌ yic yolyibꞌan̈qꞌuinal tic.
Yovalil scacꞌ qꞌuexmaj co pensar,
yic ol vachꞌ bꞌo co bꞌeybꞌal dꞌa juneln̈ej.
Tato icha chiꞌ scutej co bꞌa,
ol vachꞌ nachajel cuuj tas sgana Dios dꞌayon̈.
Aton juntzan̈ tas vachꞌ,
tas syacꞌ tzalajbꞌoc scꞌool Dios yedꞌoc yedꞌ tas malaj jabꞌoc spaltail dꞌa yichan̈.
3 A Dios acꞌjinac vopisio tic yuj svachꞌcꞌolal.
Yuj chiꞌ svalbꞌat juntzan̈ tic dꞌayex e masanil.
Malajocabꞌ junoc on̈ sco naꞌa to te jelan on̈.
Yovalil emnaquil scutej co bꞌa,
ato syalaꞌ tas copisio syacꞌ Dios dꞌayon̈,
yujto ix cacꞌoch dꞌa co cꞌool.
4 A co nivanil tzijtum macan̈il yaji.
Palta man̈ lajanoc yopisio smasanil.
5 Icha yaj co nivanil chiꞌ,
icha chiꞌ caj a on̈ creyente on̈ tic.
Vachꞌchom tzijtum on̈,
palta junn̈ej animail caj dꞌa yol scꞌabꞌ Cristo.
Icha yaj junjun macan̈ co nivanil junn̈ej yaji,
ich on̈ taꞌ,
junn̈ej caj co masanil.
6 Chꞌocchꞌoc copisio junjun on̈,
ato syalaꞌ tastac tzꞌel dꞌa scꞌool Dios yacꞌan dꞌayon̈.
Yuj chiꞌ yovalil tzon̈ munlaj val dꞌa junjun copisio chiꞌ.
A mach acꞌbꞌil yopisio yalanel slolonel Dios,
yovalil syaleli,
ato syalaꞌ jantac syutej yacꞌanoch dꞌa scꞌool.
7 A mach acꞌbꞌil yopisio yacꞌan servil,
yovalil vachꞌ syutej yacꞌan servil.
A mach ay yopisio scꞌaybꞌan ebꞌ yetcreyenteal chiꞌ,
yovalil syacꞌ val och spensar scꞌaybꞌan ebꞌ.
8 Tato ay junoc mach tzꞌiptzitan ebꞌ yetcreyenteal,
yovalil syacꞌ yip smunlaj dꞌa yopisio chiꞌ.
Tato ay mach sian junoc tas dꞌa ebꞌ ay stzapan smajanil,
yedꞌ ocabꞌ dꞌa smasanil scꞌool siej.
A mach ay yopisio scuchbꞌan ebꞌ yetcreyenteal,
yacꞌocabꞌ yip scuchbꞌan ebꞌ.
An̈ejtonaꞌ,
a mach tzꞌocꞌ scꞌool dꞌa ebꞌ ayoch dꞌa syaelal,
yovalil scolvaj dꞌa ebꞌ dꞌa tzalajcꞌolal.
A tas scutej co bꞌeybꞌal
9 Yelcꞌolalocabꞌ sco xajanej co bꞌa.
Sco chacanel masanil chucal.
Axo dꞌa tastac vachꞌ scaqꞌuec och co pensar.
10 Sco xajanej co bꞌa,
yujto cucꞌtac canabꞌ co bꞌa.
Yovalil squicꞌ emta co bꞌa junjun on̈,
yic vachꞌ ay quelcꞌoch junjun on̈.
11 Cꞌasanocabꞌ scutej co bꞌa dꞌa Cajal Jesús.
Man̈ jaraganaoc scutej co bꞌa dꞌay.
Smasanilocabꞌ co cꞌool scacꞌ servil.
12 Ayocabꞌ co tzalajcꞌolal dꞌa masanil tiempo,
yujto scacꞌoch Dios yipoc co cꞌool.
Tecꞌan scutej co bꞌa ayic sjavi yaelal dꞌa quibꞌan̈.
Man̈ cactejeccan co lesalvi dꞌa masanil tiempo.
13 Yovalil tzon̈ colvaj dꞌa stzapanil smajanil ebꞌ yicxo Dios.
Vachꞌ pax scutej co bꞌa dꞌa ebꞌ tzꞌecꞌ dꞌayon̈.
14 Tato ay ebꞌ chuc syutej sbꞌa dꞌayon̈,
yovalil sco cꞌancot svachꞌcꞌolal Dios dꞌa yibꞌan̈ ebꞌ,
man̈oc yoval scꞌool sco cꞌancot dꞌa yibꞌan̈ ebꞌ,
palta a svachꞌcꞌolal.
15 A ebꞌ stzalaji,
con̈ tzalajec yedꞌ ebꞌ,
axo ebꞌ scusi,
con̈ cusec pax yedꞌ ebꞌ.
16 Junn̈ej molan̈il tzon̈ aj co masanil.
Max yal-laj quicꞌanchaan̈ co bꞌa.
Junn̈ejocabꞌ tzon̈ ecꞌ yedꞌ ebꞌ malaj yelcꞌoch dꞌa ebꞌ anima.
Max yal co naani to te jelan on̈.
17 Tato ay ebꞌ chuc syutej sbꞌa dꞌayon̈,
max yal-laj chuc scutej pax co bꞌa dꞌa ebꞌ.
Vachꞌn̈ej scutej co bꞌeybꞌal dꞌa yichan̈ ebꞌ anima smasanil.
18 Caqꞌuec val quip yic juncꞌolal tzon̈ aj yedꞌ ebꞌ anima,
tato syalaꞌ yedꞌ masanil mach.
19 Ex xajanabꞌil vuuj,
max yal co pacan co bꞌa dꞌa ebꞌ quetanimail.
Yovalil sco tan̈vej,
yic vachꞌ munil a Dios ol acꞌan syaelal ebꞌ.
Yujto yalnaccan Dios dꞌa Slolonel icha tic:
A in ton tic ay valan vic vacꞌan syaelal ebꞌ.
A in tic ol in pactzitej dꞌa ebꞌ,
xchi Dios Cajal.
20 Syalanpax icha tic dꞌa Slolonel chiꞌ:
Tato ay svejel ebꞌ ayoch ajcꞌolal dꞌayex,
aqꞌuec va ebꞌ,
tato ay staquin̈tial ebꞌ,
aqꞌuec yuqꞌuej aꞌ ebꞌ.
Tato icha chiꞌ tzeyutej e bꞌa dꞌa ebꞌ,
ol chacbꞌoc sat ebꞌ yuj qꞌuixvelal dꞌa eyichan̈.
21 Man̈ co cha on̈ yacꞌ ganar chucal tzꞌacꞌjioch dꞌa quibꞌan̈.
Yovalil vachꞌ scutej co bꞌa,
yic a on̈ scacꞌ ganar dꞌa yibꞌan̈ juntzan̈ chucal chiꞌ.