A svachꞌcꞌolal Dios dꞌa ebꞌ israel
11
A ebꞌ schon̈abꞌ Dios chiꞌ,
¿tom paticabꞌilel ebꞌ yuuj dꞌa juneln̈ej?
Maay.
Ina in tic,
israel in pax yedꞌ ebꞌ.
Yin̈tilal in pax vin̈aj Abraham yedꞌ ebꞌ.
A dꞌa jun macan̈ ebꞌ yin̈tilal vin̈aj Benjamín,
ataꞌ cotnac in.
2 Atax dꞌa pecaꞌ,
a Dios icꞌjinac och ebꞌ israel yicoc.
Axo ticnaic,
man̈ ol spatiquej el-laj ebꞌ.
Cojtac yabꞌixal vin̈aj Elías* dꞌa Slolonel Dios.
A junel ix lesalvi vin̈ dꞌa Dios,
ix yalan vin̈ tas smul ebꞌ yetchon̈abꞌ israel chiꞌ,
ix yalan vin̈:
3 Mamin,
a ebꞌ vetchon̈abꞌ tic,
ix smacꞌcham juntzan̈xo ebꞌ a checabꞌ ebꞌ.
A juntzan̈ yedꞌtal bꞌaj tzꞌacꞌji silabꞌ dꞌayach,
ix laj smacꞌpoj ebꞌ.
A ticnaic,
a inxon̈ej ix in cani.
Palta an̈ejaꞌ sgana ebꞌ tzin smilpaxi,
xchi vin̈ dꞌa Dios.
4 Yuj chiꞌ ix yal Dios chiꞌ dꞌa vin̈:
Maay,
ayto uquexo mil vinac sicꞌbꞌilcanel vuuj.
Malaj bꞌaj ix em cuman ebꞌ dꞌa jun syaloch ebꞌ sdiosaloc scuch Baal,
xchi dꞌa vin̈.
5 An̈ejtonaꞌ icha chiꞌ yaj ticnaic.
Ay ebꞌ yic ton Dios dꞌa scal ebꞌ vetisraelal chiꞌ.
Aton ebꞌ sicꞌnaquel Dios chiꞌ yuj svachꞌcꞌolal.
6 Yuj val svachꞌcꞌolal Dios sicꞌbꞌilel ebꞌ,
man̈ yujoc tas vachꞌ ix scꞌulej ebꞌ.
Qꞌuinaloc yuj tas vachꞌ ix scꞌulej ebꞌ sicꞌbꞌilel ebꞌ,
tato icha chiꞌ,
man̈oc am yuj svachꞌcꞌolal Dios,
scolchajel ebꞌ.
7 Palta ¿tas tzꞌaj ebꞌ israel tze naꞌa?
Ix yacꞌlej ebꞌ sayani chajtil tzꞌaj yoch ebꞌ vachꞌil dꞌa yichan̈ Dios,
palta maj yal-laj yuj ebꞌ,
yuj chiꞌ an̈ej ebꞌ sicꞌbꞌilel dꞌa scal ebꞌ chiꞌ yuj Dios ix yal yuuj.
Axo juntzan̈xo ebꞌ,
ton̈ej ix vachꞌ pitbꞌicanel ebꞌ.
8 Yujto syal dꞌa Slolonel Dios icha tic:
A Dios ix acꞌan quistalax ebꞌ.
Yuj chiꞌ,
vachꞌchom syil spoder ebꞌ,
palta max nachajel-laj yuj ebꞌ.
Vachꞌchom syabꞌ slolonel ebꞌ,
palta max nachajel-laj yuj ebꞌ.
An̈ejtonaꞌ,
icha pax chiꞌ ebꞌ ticnaic,
xchi.
9 Yalnacpaxcan vin̈aj David:
Ichaocabꞌ junoc yaal tzꞌaj juntzan̈ sqꞌuin̈ ebꞌ chiꞌ.
Telvocabꞌ ebꞌ yuj juntzan̈ sqꞌuin̈ chiꞌ.
Bꞌatocabꞌ dꞌa yibꞌan̈ ebꞌ yuuj.
10 Mocxobꞌ yal-laj yilan ebꞌ uuj.
Icha junoc vin̈ n̈ojanem dꞌa yalan̈ icatz,
ichaocabꞌ chiꞌ tzꞌajcan ebꞌ dꞌa juneln̈ej,
xchi vin̈aj David chiꞌ.
11 Palta tzin cꞌanbꞌej dꞌayex,
ayic ix juviel ebꞌ israel chiꞌ,
¿tom juneln̈ej ix juviel ebꞌ?
Maay.
Palta yujto ix juviel ebꞌ yuj schucal,
yuj chiꞌ ay ebꞌ man̈ israeloc scolchaji.
Axo ebꞌ israel ol ilanoc,
ol chichon scꞌol ebꞌ yilani.
12 Yujto juvinaquel ebꞌ israel chiꞌ,
yuj chiꞌ te vachꞌ yic ebꞌ anima smasanil dꞌa yolyibꞌan̈qꞌuinal tic.
Yujto cannac ebꞌ israel chiꞌ dꞌa yalan̈,
yuj chiꞌ te vachꞌ yic ebꞌ man̈ israeloc.
Tato icha chiꞌ,
¿jantacxom val svachꞌil quic co masanil,
ayic ol meltzajxoc och spensar ebꞌ israel chiꞌ smasanil junelxo?
13 Palta ay tas in gana sval dꞌayex a ex man̈ ex israeloc chiꞌ.
A Dios acꞌjinac vopisio in munlaj dꞌa e cal.
Yuj chiꞌ nivan yelcꞌoch jun vopisio tic dꞌayin,
14 talaj icha chiꞌ syil scꞌool ebꞌ vetchon̈abꞌ to van e colchaji,
yuj chiꞌ tope ay ebꞌ ol colchajpaxoc.
15 A ebꞌ israel chiꞌ,
paticabꞌil el ebꞌ yuj Dios junoc tiempoal.
Yuj chiꞌ,
masanil juntzan̈xo anima,
syal yoch ebꞌ juncꞌolal yedꞌ Dios.
Axo ol chajocxioch ebꞌ israel chiꞌ junelxo,
man̈xom jantacoc svachꞌil.
Ichato ol pitzvocxi ebꞌ anima dꞌa scal ebꞌ chamnac,
yujto te nivan svachꞌil ol scha ebꞌ.
16 Qꞌuinaloc a ixim bꞌabꞌel pan tzꞌelta dꞌa ixim harina yic ton Dios yaji,
ta icha chiꞌ,
yic ton Dios ixim masanil.
Icha junoc te teꞌ,
tato yic Dios yaj schꞌan̈al yibꞌ teꞌ,
an̈ejtonaꞌ yicn̈ej pax yaj teꞌ scꞌabꞌ.
17 Palta a ebꞌ israel elnac dꞌa yol scꞌabꞌ Dios,
icha junoc scꞌabꞌ teꞌ olivo stzepchajel dꞌa snun,
icha chiꞌ aj yelnac ebꞌ.
A exxo,
icha scꞌabꞌ jun teꞌ caltacteꞌal olivo scomon qꞌuibꞌi,
icha chiꞌ eyaji,
yujto man̈ ex israeloc.
Palta ichato ix ex acꞌjicanoch sqꞌuexuloc ebꞌ dꞌa jun scꞌabꞌ bꞌaj tzepbꞌilelta dꞌa snun chiꞌ,
yujto ay eyalan eyic yedꞌ ebꞌ smam yicham ebꞌ.
18 Palta man̈ e na to ecꞌto e vachꞌil dꞌa yichan̈ ebꞌ israel chiꞌ.
Yujto icha junoc scꞌabꞌ te teꞌ,
icha chiꞌ eyaji.
A junoc cꞌabꞌ teꞌ,
max yal yacꞌan yaxbꞌoc teꞌ yibꞌ.
Palta a schꞌan̈al yibꞌ teꞌ,
a tzꞌacꞌan yaxbꞌoc teꞌ scꞌabꞌ chiꞌ.
19 Tecan ayex tzeyal icha tic:
A ebꞌ israel chiꞌ,
ichato tzepbꞌilel ebꞌ dꞌa snun,
yic vachꞌ a on̈ tzon̈ ochcan sqꞌuexuloc ebꞌ,
tecan xe chi.
20 Yel toni,
ichato tzepbꞌilel ebꞌ israel chiꞌ,
yujto max yacꞌoch Dios ebꞌ dꞌa scꞌool.
Palta a ex tic,
yujn̈ej to ix eyacꞌoch Dios dꞌa e cꞌool tzex ochcan sqꞌuexuloc ebꞌ.
Yuj chiꞌ,
xeyicꞌtachaan̈ e bꞌa,
tzeyil val e bꞌa.
21 Tato maj yacꞌlaj nivancꞌolal Dios dꞌa yibꞌan̈ ebꞌ icha scꞌabꞌ teꞌ yaji,
ocxom ex pax tic,
¿tom ol ex yacꞌ nivancꞌolal tato tzeyiqꞌuel e bꞌa dꞌay?
22 Nachajocabꞌel eyuuj to nivan svachꞌcꞌolal Dios.
Palta an̈ejtonaꞌ,
ov pax sicꞌlabꞌil.
A ebꞌ juvinacxoel chiꞌ,
aycot yoval dꞌa ebꞌ.
A exxo tic,
man̈ jantacoc svachꞌcꞌolal syacꞌ dꞌayex.
Yuj chiꞌ yovalil tzex ochcan dꞌa svachꞌcꞌolal,
tato maay,
an̈ejtonaꞌ ol ex icꞌjocxieloc.
23 A ebꞌ israel chiꞌ,
tato ol yacꞌxioch ebꞌ dꞌa scꞌool,
ol ochxoc ebꞌ yicoc Dios chiꞌ.
Ichato ol acꞌjocxioch ebꞌ dꞌa teꞌ snunal chiꞌ junelxo.
Yujto a Dios ay spoder sbꞌoan icha chiꞌ.
24 A exxo man̈ ex israeloc,
ichato tzepbꞌil ex el dꞌa snunal junoc te teꞌ munil sqꞌuibꞌi,
ix ex acꞌjioch scꞌabꞌoc junoc te teꞌ vachꞌ.
Vachꞌchom man̈ ex yicoc jun chiꞌ dꞌa yalan̈taxo,
palta ix ex och yicoc.
Tato icha chiꞌ ix ex aji,
an̈ejtonaꞌ icha pax chiꞌ ebꞌ israel.
Ichato ol acꞌjocxioch ebꞌ dꞌa snunal bꞌaj elnaccoti,
aton jun yic val ebꞌ dꞌa pecaꞌ.
Yuj chiꞌ,
yelxo val ol och ebꞌ yicoc junelxo.
Ay jun tiempoal ol colchaj ebꞌ israel masanil
25 Ex vucꞌtac ex vanabꞌ,
a juntzan̈ sval tic dꞌayex,
malaj mach ojtannac dꞌa pecaꞌ.
Palta a ticnaic,
in gana to tzeyojtaquejeli yic max eyicꞌchaan̈ e bꞌa,
yujto jelan ex e naani.
A ebꞌ vetisraelal chiꞌ,
tzijtum ebꞌ pitbꞌinaccaneli.
Ol cann̈ej ebꞌ icha chiꞌ masanto ol tzꞌacvoc sbꞌisul ebꞌ man̈ israeloc ol colchajoc.
26 Ichato chiꞌ ol colchajpax ebꞌ vetisraelal smasanil.
Yujto syal dꞌa Slolonel Dios icha tic:
A dꞌa chon̈abꞌ Sion dꞌa scal ebꞌ israel,
ataꞌ ol qꞌue vaan jun Colvajum.
Aꞌ ol icꞌanel schucal ebꞌ yin̈tilal Jacob.
27 Icha tic ol vutoc vacꞌan in trato yedꞌ ebꞌ,
ayic ol vacꞌan lajvoc smul ebꞌ,
xchi Dios.
28 A ebꞌ israel chiꞌ,
ajcꞌol ebꞌ dꞌa Dios,
yujto max yacꞌochlaj jun vachꞌ abꞌix yic colnabꞌil ebꞌ dꞌa scꞌool.
Icha chiꞌ yaj ebꞌ,
yic a ex tic syal e colchaji.
Palta an̈ejaꞌ xajanabꞌil ebꞌ yuj Dios,
yujto sicꞌbꞌilcanel smam yicham ebꞌ yuuj.
29 Yujto a tas syacꞌ Dios,
juneln̈ej syacꞌaꞌ.
Maxtzac yiqꞌuecꞌlaj.
A ebꞌ avtabꞌil yuj Dios yicoc,
juneln̈ej avtabꞌil ebꞌ.
30 A dꞌa yalan̈taxo,
max e cꞌanabꞌajej Dios,
palta a ticnaic,
ix ocꞌ scꞌool dꞌayex,
yujto maj cꞌanabꞌajajlaj yuj ebꞌ israel.
31 Yel toni,
a ticnaic max scꞌanabꞌajejlaj Dios ebꞌ vetisraelal chiꞌ.
Palta icha chiꞌ yaj ebꞌ ayic ol ocꞌxoc scꞌol dꞌa ebꞌ,
icha tzꞌaj yocꞌ scꞌol dꞌayex.
32 A dꞌa yichan̈ Dios,
max co cꞌanabꞌajejlaj co masanil a on̈ anima on̈ tic.
Icha chiꞌ ix on̈ yutej,
yic vachꞌ jun lajann̈ej tzꞌaj yocꞌ scꞌol dꞌayon̈ co masanil.
33 A Dios,
man̈ jantacoc svachꞌil,
man̈ jantacoc sjelanil.
Yojtacn̈ej masanil tastac.
Malaj junoc mach syal snachajel yuuj tas syutej.
Malaj pax junoc mach snachajel sbꞌeybꞌal chiꞌ yuuj.
34 Icha syal dꞌa Slolonel:
¿Mach val junoc syal yojtacanel spensar Dios Cajal?
¿Mach val junoc syal scꞌaybꞌani?
35 ¿Mach val junoc sbꞌabꞌlaj acꞌan junoc silabꞌ dꞌay,
axo tzacꞌanto tzꞌacꞌan junocxo yic dꞌay?
xchi.
36 Yujto a masanil tastac,
an̈ej dꞌa Dios scoti.
Aypax ecꞌ yuuj,
yic scheclajelta svachꞌil.
Nivanocabꞌ yelcꞌoch Dios dꞌa masanil tiempo.
Amén.