10
Ex vucꞌtac ex vanabꞌ,
dꞌa smasanil in cꞌool,
in gana scolchajel ebꞌ vetisraelal.
Jantac val tzin cꞌan jun tic dꞌa Dios.
2 Yel toni,
ayoch spensar ebꞌ yacꞌan servil Dios,
palta man̈ yojtacoc ebꞌ tas syutej ebꞌ yacꞌan servil icha val sgana.
3 Man̈ yojtacoc ebꞌ tas tzꞌaj yoch ebꞌ vachꞌil dꞌa yichan̈ Dios.
Ton̈ej snibꞌej ebꞌ munil tzꞌoch ebꞌ vachꞌil dꞌa yichan̈,
palta max scꞌanabꞌajej ebꞌ tas yalnac Dios yuj tas tzꞌaj coch vachꞌil yedꞌoc.
Yuj chiꞌ max yal-laj yoch ebꞌ icha sgana Dios.
4 Yuj Cristo man̈xalaj yalan yic ley Moisés yacꞌanoch anima vachꞌil dꞌa yichan̈ Dios,
yujto a ebꞌ tzꞌacꞌanoch Cristo dꞌa scꞌool,
tzꞌoch ebꞌ vachꞌil dꞌa yichan̈ Dios chiꞌ.
5 Yalnaccan vin̈aj Moisés tas sco cꞌulej tato co gana tzon̈ och vachꞌil dꞌa yichan̈ Dios yuj jun ley chiꞌ.
Aton jun syal icha tic:
Tato ay mach scꞌanabꞌajan masanil tas syal ley,
ol scha sqꞌuinal yuuj,
xchi.
6 Palta ay junxo tzꞌalani to ol yal Dios to vachꞌ on̈ dꞌa yichan̈ tato scacꞌoch dꞌa co cꞌool.
Aton jun syal icha tic:
Man̈ e na icha tic,
¿mach junoc ol qꞌue dꞌa satchaan̈?
xchi.
Syalelcꞌochi,
mach ol bꞌat icꞌanemta Cristo.
7 Syalanpax icha tic:
An̈ejtonaꞌ man̈ e na icha tic:
¿Mach junoc ol bꞌat dꞌa yol luum?
xchi.
Syalelcꞌochi,
mach junoc ol bꞌat icꞌanqꞌueta Cristo dꞌa scal ebꞌ chamnac.
8 Palta ay junxo tzꞌalan icha tic:
A jun abꞌix tic,
eyojtacxo.
Syal eyalani.
Ayxo och dꞌa e cꞌool,
xchi.
A jun abꞌix syal tic,
aton jun abꞌix scaleli.
A tzꞌalani to yovalil scacꞌoch Cristo dꞌa co cꞌool.
9 Tato scal yedꞌ co tiꞌ to a Jesús Yajal yaj dꞌayon̈,
tato dꞌa val yel scacꞌoch dꞌa co cꞌool to a Dios acꞌjinac pitzvoc dꞌa scal ebꞌ chamnac,
tato icha chiꞌ ol on̈ colchajoc.
10 Yujto scacꞌoch Cristo dꞌa co cꞌool,
yuj chiꞌ syal Dios to vachꞌ on̈ dꞌa yichan̈.
Yujto scal yedꞌ co tiꞌ to a Jesucristo Yajal yaj dꞌayon̈,
yuj chiꞌ tzon̈ colchaji.
11 Syalcan dꞌa Slolonel Dios:
Yaln̈ej mach ol acꞌanoch Jesucristo chiꞌ yipoc scꞌool,
man̈ ol somchajel-laj yuuj,
xchicani.
12 A ebꞌ israel yedꞌ ebꞌ man̈ israeloc,
lajann̈ej ebꞌ smasanil dꞌa yichan̈ Dios.
Yujto a Dios Cajal,
Yajal yaj dꞌa quibꞌan̈ co masanil.
Yaln̈ej mach on̈ scal co bꞌa dꞌay,
nivan svachꞌcꞌolal syacꞌ dꞌayon̈.
13 Icha syal dꞌa Slolonel Dios Tzꞌibꞌabꞌilcani:
Jantacn̈ej ebꞌ syal sbꞌa dꞌa Dios Cajal,
ol colchaj ebꞌ smasanil,
xchi.
14 Palta a ebꞌ manto acꞌanoch Dios Cajal dꞌa scꞌool,
¿tas ol yutoc ebꞌ yalan sbꞌa dꞌay?
¿Tas ol yutoc ebꞌ yacꞌanoch dꞌa scꞌool,
tato manto yabꞌ yabꞌixal ebꞌ?
An̈ejtonaꞌ,
¿tas ol yutoc ebꞌ yabꞌan yabꞌixal,
tato malaj mach tzꞌalan yabꞌ ebꞌ?
15 Palta,
¿tas ol yutoc ebꞌ bꞌat yalanel yabꞌixal,
tato malaj mach schecanbꞌat ebꞌ?
Syalanpax dꞌa Slolonel Dios:
Man̈xo jantacoc svachꞌil yilji,
ayic sjavi ebꞌ tzꞌalanel vachꞌ abꞌix,
xchi.
16 Palta man̈ masaniloc ebꞌ schaan yabꞌ jun abꞌix yic colnabꞌil tic.
Icha ix yalcan vin̈aj Isaías:
Mamin,
malaj val ebꞌ tzꞌacꞌanoch jun abꞌix scal tic dꞌa scꞌool,
xchi.
17 An̈ej tas scabꞌi,
a scacꞌoch dꞌa co cꞌool.
A jun abꞌix yovalil tzꞌalji,
aton yabꞌixal Cristo.
18 Palta,
¿tas tze na jun?
A ebꞌ israel,
¿tom maj yabꞌ jun vachꞌ abꞌix tic ebꞌ?
Maay,
ix yabꞌ ebꞌ smasanil.
Yujto icha tic syalcan dꞌa Slolonel Dios:
Ix bꞌeybꞌat yabꞌixal dꞌa masanil sat luum tic,
masanto ix pucaxbꞌat dꞌa masanil yolyibꞌan̈qꞌuinal tic,
xchicani.
19 Palta an̈ejaꞌ maj yacꞌoch ebꞌ dꞌa scꞌool.
¿Tas tze na yuj ebꞌ?
¿Tom max nachajel jun abꞌix chiꞌ yuj ebꞌ israel chiꞌ?
Yalnaccan vin̈aj Moisés yuj tas xchi Dios dꞌa ebꞌ israel,
ayic yalannac icha tic:
Vuuj,
ol tzꞌa e cꞌool yuj juntzan̈xo chon̈abꞌ malaj yelcꞌochi.
An̈ejtonaꞌ,
ol in tzuntzejcot eyoval yuj tas ol vacꞌ dꞌa juntzan̈xo anima manto nachajel yuuj,
xchi Dios chiꞌ dꞌa Slolonel.
20 An̈ejtonaꞌ vin̈aj Isaías,
stecꞌbꞌejnac sbꞌa vin̈ yalani tas xchi Dios yuj ebꞌ man̈ israeloc.
Yalannac icha tic:
A ebꞌ maj in sayanlaj,
ix in ilchaj yuj ebꞌ.
Yedꞌ pax ebꞌ maj in cꞌanbꞌani,
ix in chꞌox pax in bꞌa dꞌa ebꞌ,
xchi Dios chiꞌ.
21 A vin̈aj Isaías chiꞌ aljinaccani tas ix yal Dios yuj ebꞌ yetisraelal.
Aton bꞌaj syal icha tic:
Masanil tiempo svavtejcot ebꞌ israel dꞌayin,
palta max scꞌanabꞌajej jabꞌoc ebꞌ.
Te pit ebꞌ,
xchi Dios chiꞌ.