A ebꞌ israel sicꞌbꞌilel yuj Dios
9
Yujto yic inxo Cristo eyedꞌoc,
yuj chiꞌ a juntzan̈ tas ol valbꞌat tic dꞌayex te yel,
man̈ esoc.
A jun in pensar tic tzin cuchbꞌani,
a schꞌoxani to yel juntzan̈ ol val tic dꞌayex,
yujto a Yespíritu Dios tzꞌacꞌan in naꞌa.
2 A in tic,
te nivan in cuscꞌolal.
Masanil tiempo pitzꞌanoch dꞌa in cꞌool ayic tzin naan ebꞌ vetisraelal,
yujto in gana scolchaj ebꞌ.
3 Qꞌuinaloc tato syalaꞌ tzin cꞌancot yoval scꞌool Cristo dꞌa vibꞌan̈ ticnaic,
yic tzin el dꞌa yol scꞌabꞌ axo ebꞌ vetchon̈abꞌ chiꞌ scolchajcaneli.
Tato icha chiꞌ,
ay in gana vacꞌan in bꞌa yuj ebꞌ.
4 A ebꞌ chiꞌ,
yin̈tilal Israel ebꞌ vedꞌoc.
A Dios acꞌjinacoch ebꞌ yuninaloc,
schꞌoxnacpax sbꞌa yedꞌ stziquiquial dꞌa scal ebꞌ,
yacꞌannaccan juntzan̈ strato yedꞌ ebꞌ.
Yacꞌannacpaxcan ley Moisés dꞌa ebꞌ.
Yalnaccan dꞌa ebꞌ tas syutej yalan sbꞌa ebꞌ dꞌay.
Ay pax juntzan̈ tas bꞌaj yacꞌnaccan stiꞌ dꞌa ebꞌ.
5 A juntzan̈ ebꞌ nivan yelcꞌoch dꞌa yichan̈ Dios dꞌa pecaꞌ,
aton ebꞌ smam yicham ebꞌ.
A Cristo,
ataꞌ ul yacꞌnacoch sbꞌa animail,
yochnac yetchon̈abꞌoc ebꞌ.
A Cristo chiꞌ,
aton Dios Yajal yaj dꞌa yibꞌan̈ smasanil tasi.
Masanil tiempo ol aljoc vachꞌ lolonel dꞌay.
Amén.
6 Vachꞌchom maj colchaj ebꞌ israel smasanil,
max yal calani to maj elcꞌoch tas yalnaccan Dios chiꞌ dꞌa ebꞌ.
Yujto a ebꞌ israel chiꞌ,
a dꞌa yichan̈ Dios,
man̈ masaniloc ebꞌ israel dꞌa val yel.
7 A ebꞌ israel chiꞌ,
yin̈tilal ton Abraham yaj ebꞌ,
palta man̈ masaniloc ebꞌ yel yin̈tilal vin̈ dꞌa yichan̈ Dios.
Yujto yalnaccan Dios dꞌa vin̈aj Abraham chiꞌ icha tic:
A dꞌa vin̈aj Isaac tic ol bꞌeyn̈ejbꞌat jantac in̈tilal,
xchicani.
8 A jun tic syalelcꞌochi to malaj junoc mach yuj smam yicham syal yoch yuninaloc Dios.
A ebꞌ yin̈tilal vin̈aj Abraham pitzvinaquel icha yutejnac Dios yacꞌannaccan stiꞌ dꞌa vin̈,
an̈ejton ebꞌ yel yin̈tilal vin̈ dꞌa yichan̈ Dios chiꞌ.
9 Yalnaccan Dios dꞌa vin̈aj Abraham chiꞌ icha tic:
Yabꞌ val icha tic junabꞌ tzin jax junelxo vacꞌ a paxyal.
Ataꞌ ol aljoc junoc svinac unin ix Sara tic,
xchican Dios chiꞌ dꞌa vin̈.
10 Man̈ocn̈ej juntzan̈ tic sval dꞌayex.
A vin̈ co mam quicham Isaac,
a ix Rebeca yicꞌnac vin̈.
Axo yic scuchanoch yuneꞌ ix,
ay chavan̈ unin yuneej ix.
A vin̈aj Isaac chiꞌ ay yic ebꞌ schavan̈il.
11-13 A chavan̈ ebꞌ unin chiꞌ tiox ebꞌ.
Ayic manto alji ebꞌ,
manta tas vachꞌ,
mantalaj pax tas chuc scꞌulej ebꞌ.
Palta icha tic yutejnac Dios chiꞌ yalan dꞌa ix Rebeca chiꞌ:
A vin̈ bꞌabꞌel,
ol can vin̈ dꞌa yalan̈ smandar vin̈ tzacꞌan,
xchi.
Tzꞌibꞌyajpaxcan junxo tic dꞌa Slolonel Dios,
aton bꞌaj syal icha tic:
A vin̈aj Jacob,
xajanabꞌil vin̈ vuuj.
Axo vin̈aj Esaú,
chacbꞌilel vin̈ vuuj,
xchicani.
A juntzan̈ tic schꞌoxani to a Dios ay yalan yic sicꞌanel junjun mach sgana.
Man̈ yujoc tas sco cꞌulej tzon̈ yavtejoch yicoc.
14 Palta ¿tas scutej co naani?
¿Tom man̈ tojoloc Dios dꞌa icha chiꞌ?
Maay.
Tojol toni.
15 Yujto icha tic yutej yalannaccan dꞌa vin̈aj Moisés:
“Ol vacꞌ in vachꞌcꞌolal dꞌa ebꞌ bꞌaj syal in cꞌool svacꞌaꞌ.
Ol ocꞌ in cꞌool dꞌa ebꞌ bꞌaj syal in cꞌool,”
xchi Dios.
16 Vachꞌchom co gana tzon̈ colchaji,
vachꞌchom scacꞌ val quip,
man̈ yujoc chiꞌ tzon̈ colchaji,
palta yujn̈ej val to tzꞌocꞌ scꞌool Dios dꞌayon̈.
17 Tzꞌibꞌabꞌilcan dꞌa Slolonel tas yalnaccan Dios dꞌa vin̈ yajal Egipto.
Syal icha tic:
Ix ach vacꞌoch dꞌa opisio yic vachꞌ uuj tzin chꞌoxel in poder,
yic ay smay in bꞌinaj dꞌa masanil yolyibꞌan̈qꞌuinal,
xchi Dios dꞌa vin̈.
18 Yuj chiꞌ,
a ebꞌ sgana Dios bꞌaj tzꞌocꞌ scꞌool,
aton ebꞌ chiꞌ bꞌaj tzꞌocꞌ scꞌool.
Yedꞌ pax ebꞌ sgana Dios spitbꞌi,
aton ebꞌ chiꞌ spitbꞌi yuuj.
19 Palta tecan ayex tzeyal icha tic dꞌayin:
Tato icha chiꞌ,
¿tas yuj syal Dios jun to ay co mul?
¿Toc ay mach syal scachanoch vaan tas sgana Dios chiꞌ?
tecan xe chi.
20 Palta max yal-laj calan icha chiꞌ.
Malaj junoc mach syal stelan sbꞌa yedꞌ Dios.
A junoc lum chen,
¿tom syal yalan luum icha tic dꞌa mach stzꞌacani,
tas yuj icha tic tzin utej,
tom xchi luum?
21 Yujto a jun tzꞌacum,
ay yalan yic stzꞌacan luum icha dꞌa sgana.
Vachꞌchom junn̈ej slumal scꞌanaꞌ,
palta ay yalan yic sbꞌoan junoc te vachꞌ yilji yedꞌ junoc palta yilji.
22 Icha pax chiꞌ yaj co Mam Dios quedꞌoc a on̈ anima on̈ tic.
Vachꞌchom snibꞌej schꞌox yoval scꞌool dꞌa yibꞌan̈ chucal,
snibꞌej pax schꞌox spoder,
palta syacꞌ techaj dꞌa yibꞌan̈ ebꞌ anima smoj sbꞌatcan dꞌa syaelal yuj schucal,
aton ebꞌ yictaxon yaj sateli.
23 Icha chiꞌ yutejnac Dios schꞌoxanel snivan vachꞌcꞌolal dꞌayon̈,
yujto ix ocꞌ scꞌool dꞌayon̈.
Atax dꞌa pecaꞌ sicꞌnac on̈ och yicoc,
yic ay calan quic dꞌa svachꞌil.
24 Yavtejnac on̈ och yicoc,
vachꞌchom israel on̈,
vachꞌchom man̈ on̈ israeloc.
25 Yujto icha chiꞌ syal Dios dꞌa slibro vin̈aj Oseas,
bꞌaj syal icha tic:
A juntzan̈ man̈ in chon̈abꞌoc dꞌa yic yalan̈,
ol vacꞌoch ebꞌ in chon̈abꞌoc.
A ebꞌ man̈ xajanoc vuuj dꞌa yic yalan̈,
ol in xajanejpax ebꞌ,
xchi Dios.
26 A dꞌa jun lugar bꞌaj yalnaccan Dios dꞌa ebꞌ:
A ex tic,
man̈ ex in chon̈abꞌoc,
xchi.
An̈ejaꞌ taꞌ ol aljoc dꞌa ebꞌ to yuninal Dios pitzan yaj ebꞌ,
xchi dꞌa Slolonel Dios chiꞌ.
27 Palta yalnaccan yabꞌixal ebꞌ israel vin̈aj Isaías,
bꞌaj syal icha tic:
A ebꞌ yin̈tilal vetisraelal,
vachꞌchom te nivan ol aj sbꞌisul ebꞌ icha sbꞌisul yarenail stiꞌ aꞌ mar,
palta jayvan̈n̈ej ebꞌ ol colchajoc.
28 Yujto a Dios Cajal,
man̈xo ol stan̈vej ecꞌ tiempo,
yic ol schꞌolbꞌitan tas yaj ebꞌ anima dꞌa yolyibꞌan̈qꞌuinal tic.
Icha chiꞌ ol yutoc yacꞌan tzꞌacvoc elcꞌoch slolonel,
xchi.
29 An̈ejtonaꞌ vin̈aj Isaías chiꞌ aljinaccan junxo tic:
A Dios Cajal aton Syal yuj smasanil,
ix el dꞌa scꞌool on̈ yactancan jayvan̈on̈xo tic.
Qꞌuinaloc maay,
ix am on̈ satel co masanil icha ajnac ebꞌ aj Sodoma yedꞌ ebꞌ aj Gomorra,
xchi
Majxo yacꞌoch jun vachꞌ abꞌix tic ebꞌ israel dꞌa scꞌool
30 A ticnaic ol val dꞌayex,
tas syalelcꞌoch juntzan̈ sval tic.
A ebꞌ man̈ israeloc,
max snalaj ebꞌ tas syutej ebꞌ yoch vachꞌil dꞌa yichan̈ Dios.
Palta syal Dios to ay ebꞌ vachꞌ dꞌa yichan̈.
Icha chiꞌ syal Dios yuj ebꞌ,
yujto syacꞌoch Cristo ebꞌ dꞌa scꞌool.
31 Axo ebꞌ israel,
syacꞌoch spensar ebꞌ dꞌa ley Moisés yic tzꞌoch ebꞌ vachꞌil dꞌa yichan̈ Dios yuuj,
palta max tzacꞌvanlaj yoch ebꞌ vachꞌil yuj ley chiꞌ dꞌa yichan̈ Dios.
32 ¿Tas yuj icha chiꞌ tzꞌajcan ebꞌ tze naꞌa?
Scann̈ej ebꞌ icha chiꞌ,
yujto max yacꞌoch Cristo ebꞌ dꞌa scꞌool.
A snaan ebꞌ to syal yoch ebꞌ vachꞌil dꞌa yichan̈ Dios yuj juntzan̈ tas munil scꞌulej ebꞌ.
Yuj chiꞌ,
icha yaj junoc qꞌueen bꞌaj sco tenoch coc,
icha chiꞌ yaj Cristo dꞌa ebꞌ.
33 Yalnac yabꞌixal Cristo Dios dꞌa Slolonel,
bꞌaj syal icha tic:
A dꞌa chon̈abꞌ Sion,
ataꞌ ol in chꞌox junoc mach icha junoc qꞌueen bꞌaj stenoch yoc ebꞌ,
stelvi ebꞌ yuuj,
palta a ebꞌ tzꞌacꞌanoch jun chiꞌ yipoc scꞌool,
man̈ ol somchajel-laj ebꞌ yuuj,
xchi Dios chiꞌ.