A bꞌeybꞌal snibꞌej Yespíritu Dios
8
A ticnaic,
junxon̈ej caj yedꞌ Cristo Jesús,
yuj chiꞌ man̈xalaj yoval scꞌol Dios aycot dꞌa quibꞌan̈.
2 A Yespíritu Dios tzꞌacꞌan co qꞌuinal dꞌa juneln̈ej,
yujto junxon̈ej caj yedꞌ Cristo Jesús.
Yuj spoder Espíritu,
ix on̈ colchajelta dꞌa yol scꞌabꞌ chucal yedꞌ dꞌa yol scꞌabꞌ chamel.
3 Yuj co chuc pensaril,
max yal co cꞌanabꞌajan tas syal ley Moisés.
Yuj chiꞌ malaj yopisio jun ley chiꞌ on̈ scolani.
Palta axo Dios ix on̈ colani.
A acꞌjinaccot Yuninal yedꞌ snivanil icha co nivanil bꞌaj ayoch co chuc pensaril a on̈ anima on̈ tic.
A Jesús ix ul cham yuj co mul.
Ayic ix cham yedꞌ snivanil ix yacꞌ ganar dꞌa yibꞌan̈ chucal,
yic vachꞌ man̈xalaj yalan yic jun chucal chiꞌ dꞌayon̈.
4 Icha chiꞌ yutejnac sbꞌa,
yic vachꞌ syal tojolxon̈ej scutej co bꞌa icha syal ley.
Yujto a on̈ tic,
man̈xo vanoc co bꞌeybꞌalan icha sgana co chuc pensaril.
Palta van co bꞌeybꞌalan icha sgana Yespíritu Dios.
5-6 Axo ebꞌ tzꞌacꞌan sgana jun chuc pensaril,
an̈ej taꞌ syacꞌoch spensar ebꞌ.
Yuj val chiꞌ sbꞌatcan ebꞌ dꞌa chamel dꞌa juneln̈ej.
A on̈xo tic,
van co bꞌeybꞌalan icha sgana Yespíritu Dios,
an̈ej pax taꞌ scacꞌoch co pensar,
yuj chiꞌ ol co cha co qꞌuinal dꞌa juneln̈ej yedꞌ juncꞌolal.
7 Palta axo ebꞌ sbꞌeybꞌalan icha sgana jun chuc pensaril chiꞌ,
ton̈ej syajcꞌolej sbꞌa ebꞌ yedꞌ Dios.
Malaj sgana ebꞌ scꞌanabꞌajan sley.
An̈ejaꞌ max yal paxlaj yuj ebꞌ.
8 Yuj chiꞌ,
a ebꞌ tzꞌacꞌan sgana jun chuc pensaril chiꞌ,
max yal-laj scꞌulan ebꞌ icha tas sgana Dios.
9 Palta a on̈ tic,
maxtzac cacꞌ sgana jun chuc pensaril chiꞌ.
An̈ej sgana Yespíritu Dios sco bꞌeybꞌalej,
yujto a ayoch dꞌayon̈.
A ebꞌ man̈ ayococh Yespíritu Cristo dꞌay,
man̈ yicoc Cristo ebꞌ.
10 Palta a on̈ tic,
ayxo och Cristo dꞌayon̈,
yuj chiꞌ vachꞌchom ayoch chamel dꞌa yibꞌan̈ co nivanil tic yuj chucal sco cꞌulej,
palta a yuj Yespíritu Dios ayn̈ej co qꞌuinal,
yujto vachꞌ on̈xo dꞌa yichan̈ Dios.
11 A Dios acꞌjinac pitzvocxi Jesús dꞌa scal ebꞌ chamnac yuj Yespíritu.
Tato ayoch Yespíritu dꞌayon̈,
yuuj ol acꞌjocxi sqꞌuinal co nivanil chamelbꞌa yaj tic yuj Dios,
icha ix aj yacꞌji pitzvocxi Cristo Jesús yuuj.
12 Yuj val chiꞌ,
ex vucꞌtac yedꞌ ex vanabꞌ,
quibꞌan̈ yaj co bꞌeybꞌalan icha sgana Yespíritu Dios.
Man̈xo ayoc ochlaj dꞌa quibꞌan̈ cacꞌan sgana co chuc pensaril.
13 Tato an̈ejaꞌ co bꞌeybꞌalan icha sgana co chuc pensaril chiꞌ,
ol on̈ cham yuuj dꞌa juneln̈ej.
Palta tato yuj scolval Yespíritu Dios,
scactejcan co cꞌulan juntzan̈ chucal sgana co nivanil tic,
ol co cha co qꞌuinal dꞌa juneln̈ej.
14 A jantacn̈ej ebꞌ sbꞌeybꞌalan icha schꞌox Yespíritu Dios,
a ebꞌ chiꞌ,
yel yuninal Dios ebꞌ.
15 A jun Espíritu chabꞌilxo cuuj,
max on̈ yacꞌoch cacꞌ servil Dios dꞌa xivcꞌolal,
palta Aꞌ tzon̈ acꞌanoch yuninaloc Dios.
Yuj Yespíritu chiꞌ,
ayic tzon̈ avaj dꞌa Dios:
Mamin,
xco chi dꞌay.
16 Cojtac junjun on̈ dꞌa co pensar to yel yuninal on̈xo Dios.
An̈ejaꞌ syalpax Yespíritu Dios chiꞌ dꞌayon̈.
17 Yujto yuninal on̈xo Dios,
yuj chiꞌ ol co cha co macbꞌen,
aton jun svachꞌilal ol spucbꞌat dꞌayon̈.
A jun chiꞌ,
ol co cha yedꞌ Cristo.
Tato junn̈ej scutej cabꞌan syail yedꞌoc,
junn̈ej pax ol on̈ aj yedꞌ bꞌaj ay svachꞌilal.
18 A in tic tzin naꞌa,
a juntzan̈ yaelal van cabꞌan ticnaic,
max yal co lajbꞌan yedꞌ jun svachꞌil Dios ol yacꞌ dꞌayon̈ dꞌa slajvubꞌalxo.
19 Masanil juntzan̈ tastac bꞌobꞌil yuj Dios dꞌa yolyibꞌan̈qꞌuinal tic,
stan̈vej yilaꞌ,
smaclanpax yilaꞌ bꞌaqꞌuin̈ ol on̈ checlaj elta a on̈ yuninal on̈xo Dios tic.
20 Yujto a juntzan̈ tas sbꞌonac Dios,
maj elcꞌoch icha tas snanac Dios chiꞌ yuuj.
Palta man̈ yoloc yic juntzan̈ chiꞌ icha chiꞌ ajnac,
a Dios chiꞌ icha chiꞌ elnac dꞌa scꞌool
21 yic ol colchajel juntzan̈ chiꞌ smasanil,
yic man̈xa tas ol icꞌanoc.
Icha ol aj co colchajel a on̈ yuninal on̈ Dios tic,
yic ol on̈ och dꞌa svachꞌil,
icha pax chiꞌ ol aj scolchajel juntzan̈ chiꞌ.
22 Cojtac to atax dꞌa pecaꞌ,
masanil juntzan̈ tas bꞌobꞌilcan yuj Dios aycanoch dꞌa syaelal.
Icha junoc ix ix tzꞌabꞌan syail,
ayic tzꞌalji yuneꞌ,
icha chiꞌ yaj juntzan̈ chiꞌ yabꞌan syail ticnaic.
23 Man̈ocn̈ej juntzan̈ chiꞌ van yabꞌan syail.
An̈ejtonaꞌ,
icha chiꞌ caj pax a on̈ tic.
Ayxo och Yespíritu Dios dꞌayon̈ yic scheclajeli to ayto tas ol yacꞌ Dios dꞌayon̈.
Vachꞌchom icha chiꞌ,
palta van cabꞌan syail ticnaic yacbꞌan van co tan̈vani bꞌaqꞌuin̈ ol on̈ vachꞌ och yuninaloc Dios chiꞌ,
yic ataꞌ ol vachꞌ colchajel co nivanil tic.
24 Atax yic ix on̈ colchaji,
scacꞌoch yipoc co cꞌool to ol co vachꞌ chaej co colnabꞌil.
Qꞌuinaloc tato toxo ix co cha jun chiꞌ ticnaic,
man̈xo yovaliloc tzato co tan̈vej sjavi.
Yujto a tas squil yedꞌ co sat maxtzac co tan̈vej sjavi.
25 Palta a jun scacꞌoch yipoc co cꞌool,
max quilochlaj yedꞌ co sat,
yuj chiꞌ yovalil tecꞌan scutej co bꞌa co tan̈van sjavi.
26 An̈ejtonaꞌ tzꞌoch Yespíritu Dios quedꞌoc ayic man̈ tzꞌacanoc co pensar.
Yujto man̈ cojtacoc chajtil scutej co lesalvi icha sgana Dios.
Ay bꞌaj ton̈ej tzon̈ cꞌacvi yujto max nachaj cuuj tas scutej calan co bꞌa dꞌa Dios chiꞌ.
Yuj chiꞌ,
a Yespíritu Dios slesalvi cuuj.
27 Axo Dios syilaꞌ tas ay dꞌa co pensar junjun on̈.
Snachajel yuuj tas syal Yespíritu.
Yujto a Yespíritu chiꞌ slesalvi cuuj a on̈ yic on̈xo tic,
icha sgana Dios chiꞌ.
Xajan on̈ yuj Cristo dꞌa masanil tiempo
28 Cojtac to a Dios tzꞌacꞌlabꞌan jantacn̈ej juntzan̈ tas sja dꞌa quibꞌan̈ yuj co vachꞌiloc,
a on̈ sco xajanej tic,
a on̈ avtabꞌil on̈xo yuuj yic tzon̈ och icha ajnac snaani.
29 Atax dꞌa pecataxo yojtacxo Dios to yic on̈.
Atax taꞌ,
sicꞌnac on̈ eli yic vachꞌ lajan tzon̈ aj yedꞌ Yuninal.
Icha chiꞌ ix on̈ yutej Dios,
yic vachꞌ axo Yuninal tzꞌoch co bꞌabꞌel ucꞌtacoc co masanil.
30 A on̈ sicꞌbꞌil on̈ el yuuj,
avtabꞌil on̈ pax yuuj.
A on̈ avtabꞌil on̈ tic yuuj,
a tzꞌalani to vachꞌ on̈ dꞌa yichan̈.
Ix yacꞌpax svachꞌil dꞌayon̈.
31 Yuj juntzan̈ sval tic,
man̈xa tas sco na ticnaic.
Ayxo och Dios quedꞌoc.
Yuj chiꞌ,
¿tom ay junoc mach syal stecꞌbꞌan sbꞌa yoch ajcꞌolal dꞌayon̈?
32 A Dios acꞌjinacoch Yuninal dꞌa yol scꞌabꞌ chamel cuuj co masanil.
Vachꞌchom Yuninal,
palta maj scol-laj.
Tato yacꞌnac Yuninal chiꞌ cuuj,
ocxom masanil tas vachꞌ,
¿tom man̈ ol yacꞌ dꞌayon̈ yedꞌoc?
33 A on̈ sicꞌbꞌil on̈ el yuj Dios,
¿tom ay junoc mach syal yacꞌanoch dꞌa quibꞌan̈?
A Dios tzꞌalani to vachꞌ on̈ dꞌa yichan̈.
34 Yuj chiꞌ,
¿mach junoc syal yacꞌanoch dꞌa quibꞌan̈?
A Cristo Jesús ix chami,
ix acꞌjixi pitzvoc.
Axo ticnaic,
ayecꞌ dꞌa svachꞌ cꞌabꞌ Dios,
van stevi dꞌa Dios chiꞌ cuuj.
35 Malaj junoc tas schꞌoxani to man̈xo on̈ xajanoc yuj Cristo.
Vachꞌchom yaelal,
junoc nivan cuscꞌolal,
taxon̈ej ay mach tzꞌacꞌanoch junoc tas dꞌa quibꞌan̈,
vejel,
man̈ pichulal,
junoc tas ay smay,
vachꞌchom tzon̈ miljichamoc,
man̈ jabꞌoc syactej Cristo on̈ xajanani.
36 Yujto syalcan dꞌa Slolonel Dios icha tic:
Palta jun,
uuj val dꞌa junjun rato ijan tzon̈ smilcham ebꞌ,
icha junoc nocꞌ calnel tzꞌicꞌjibꞌati yic schami,
icha chiꞌ tzon̈ yutej ebꞌ,
xchicani.
37 Vachꞌchom ol ja juntzan̈ tic dꞌa quibꞌan̈,
palta ol ton co vachꞌ aqꞌuej ganar yuj scolval jun tzon̈ xajanani.
38 Yuj chiꞌ vojtacxo to vachꞌchom ay tastac,
an̈ejaꞌ te xajan on̈ yuj Dios.
Vachꞌchom chamel,
ma co qꞌuinal,
vachꞌchom junoc ángel,
mato junoc ay yopisio,
taxon̈ej junoc tas ayecꞌ ticnaic,
ma tas toto ol javoc,
39 vachꞌchom junoc ayecꞌ dꞌa satchaan̈,
ma junoc ayecꞌ dꞌa yalan̈ tic,
yaln̈ej tas junocxo bꞌobꞌil yuj Dios,
toxon max yal yoch dꞌa co cal yedꞌ co Mam Dios chiꞌ,
an̈ejaꞌ te xajan on̈ yuuj.
A Dios tzon̈ xajanan yuj Cristo Jesús,
aton Cajal.