A jun cꞌaybꞌubꞌal squiqꞌuelta dꞌa sleyal icꞌlajbꞌail
7
Ex vucꞌtac ex vanabꞌ,
eyojtac to a juntzan̈ ley ay yalan yic dꞌayon̈ yacbꞌan pitzan on̈to.
2 Qꞌuinaloc ay junoc ix ix ay yetbꞌeyum,
ayic pitzanto vin̈ yetbꞌeyum ix chiꞌ,
ichato tzecꞌbꞌiloch ix dꞌa vin̈ yuj sleyal icꞌlajbꞌail.
Palta tato scham vin̈,
libre tzꞌajcan ix.
3 Tato pitzanto vin̈ yetbꞌeyum ix chiꞌ scomon bꞌat ix dꞌa junocxo vin̈ vinac,
tzꞌem ix ajmulal.
Axo tato scham vin̈ yetbꞌeyum ix chiꞌ,
libre tzꞌaj ix dꞌa jun ley chiꞌ.
Vachꞌchom syicꞌ junocxo vin̈ vinac ix,
palta man̈ muloclaj scꞌulej ix chiꞌ.
4 Ex vucꞌtac ex vanabꞌ,
junxon̈ej caj yedꞌ snivanil Cristo.
Yujto ix chami,
yuj chiꞌ chamnac on̈xo elta dꞌa yalan̈ ley Moisés.
Ay junxo mach icha quetbꞌeyum yaji,
aton Cristo,
jun pitzvinacxi dꞌa scal ebꞌ chamnac.
Icha chiꞌ caj yedꞌoc yic scacꞌan servil Dios dꞌa vachꞌil.
5 A dꞌa yalan̈taxo,
an̈ej co chuc pensaril sco cꞌanabꞌajej.
Yuj ley Moisés chiꞌ ix pitzvi juntzan̈ chucal sgana co nivanil.
A juntzan̈ chucal chiꞌ tzon̈ icꞌanbꞌat dꞌa chamel dꞌa juneln̈ej.
6 A dꞌa yalan̈tax chiꞌ,
a jun ley chiꞌ ay yalan yic dꞌayon̈,
axo ticnaic,
chamnac on̈xo el dꞌa yalan̈ ley dꞌa yichan̈ Dios.
Yuj chiꞌ quicxo co bꞌa,
yic axon̈ej Dios scacꞌ servil.
Yuj chiꞌ van co bꞌeybꞌalan jun acꞌ bꞌeybꞌal yacꞌnac Yespíritu Dios dꞌayon̈.
Axo jun pecaꞌ ley tzꞌibꞌabꞌilcan chiꞌ,
man̈xa yalan yic dꞌayon̈ ticnaic.
A chucal ayoch dꞌayon̈
7 Palta ¿tas tze na jun?
A ley Moisés,
¿tom chuc?
Maay.
Yujn̈ej jun ley chiꞌ snachajel chucal cuuj.
Qꞌuinaloc sviloch in cꞌool dꞌa junoc tas ticnaic,
vojtac to chuc tzin cꞌulej yujto a ley tzꞌalani:
Man̈ iloch a cꞌool dꞌa junoc tas,
xchi.
Qꞌuinaloc malaj tas syalaꞌ,
man̈ vojtacoc ama tato chuc.
8 Palta yuj juntzan̈ checnabꞌil chiꞌ,
ix pitzvi juntzan̈ chucal chiꞌ dꞌayin.
Tzijtum macan̈il chucal ix in cꞌulej.
Qꞌuinaloc malaj jun ley chiꞌ,
malaj am yelcꞌoch juntzan̈ chucal chiꞌ.
9 Ayic manto vojtacoc jun ley chiꞌ,
pitzan in dꞌa yichan̈ Dios in naani.
Axo yic ix vojtacaneli,
ix nachajel vuuj to te malaj in vachꞌil.
Ichato chiꞌ bꞌian ix vojtacaneli to ayoch chamel dꞌa vibꞌan̈ yuuj dꞌa yichan̈ Dios.
10 A jun ley chiꞌ ay yopisio yacꞌan co qꞌuinal.
Palta a ix acꞌancot chamel dꞌa vibꞌan̈.
11 Yuj jun ley chiꞌ,
ix te pitzvi chucal dꞌayin,
in te ixtax yuj juntzan̈ chiꞌ.
A chucal chiꞌ ix acꞌlabꞌan jun ley chiꞌ yic syicꞌancot chamel dꞌa vibꞌan̈.
12 A jun ley chiꞌ,
malaj spaltail.
An̈ejtonaꞌ,
icha pax chiꞌ smasanil juntzan̈ checnabꞌil ay dꞌa jun ley chiꞌ,
te tojol,
te vachꞌ.
13 Palta,
¿tas tze na jun?
¿Tom a jun ley te vachꞌ chiꞌ tzꞌicꞌancot chamel dꞌa vibꞌan̈?
Maay,
man̈oclaj.
Aton jun in chuc pensaril tzꞌicꞌancoti.
Icha chiꞌ ix aj scheclajeli to yel te chuc jun chiꞌ.
A jun chucal chiꞌ ix yacꞌlabꞌej jun ley to vachꞌ yic syicꞌancot chamel dꞌa vibꞌan̈.
Ichato chiꞌ ix checlajelta to a jun in chuc pensaril chiꞌ,
te chuc toni.
14 Cojtac to a Yespíritu Dios acꞌjinaccot jun ley chiꞌ.
Palta a in tic an̈ejaꞌ vedꞌ jun in chuc pensaril tic.
Ichato chon̈bꞌil in och vacꞌan servil chucal.
15 Yujto a juntzan̈ tas tzin cꞌulej chiꞌ,
man̈ vachꞌoc svilaꞌ.
Ay juntzan̈ tas vachꞌ in gana tzin cꞌulej,
palta max in cꞌulejpaxlaj.
Axo juntzan̈ tas malaj svachꞌil,
a tzin cꞌulej.
16 Tato chuc vilan juntzan̈ tas malaj svachꞌil tzin cꞌulej chiꞌ,
syalelcꞌochi to ecꞌalxo svachꞌil jun ley chiꞌ dꞌa vichan̈.
17 Yujto man̈oc in tzin cꞌulej juntzan̈ chiꞌ.
A jun chucal toxon ayoch dꞌayin,
a jun chiꞌ scꞌulani.
18 Vojtac to max yal in cꞌulan junoc tas vachꞌ dꞌa yol vicoꞌ yujto chuc in pensar.
In gana tzin cꞌulej juntzan̈ tas vachꞌ,
palta max yal-laj vuuj.
19 A tas vachꞌ in gana tzin cꞌulej,
max in cꞌulejlaj.
Palta a juntzan̈ tas malaj svachꞌil max in nibꞌej tzin cꞌulej,
a tzin cꞌulej.
20 Palta tato a juntzan̈ tas malaj in gana,
a tzin cꞌulej,
syalelcꞌochi,
man̈oc in van in cꞌulani.
A jun chucal ayoch dꞌayin,
a jun chiꞌ van scꞌulani.
21 Yuj chiꞌ icha tic tzin cꞌulej.
In gana tzin cꞌulej juntzan̈ tas vachꞌ,
axo svilani,
axon̈ej juntzan̈ chucal tzin cꞌulej.
22 A in tic,
tzin tzalaj yedꞌ sley Dios.
23 Palta a in nivanil tic,
a jun chucal ayoch dꞌay,
a tzꞌacꞌan mandar.
A tzꞌacꞌan oval yedꞌ junxo ley bꞌaj tzin tzalaji.
Yuj chiꞌ,
icha val to preso vaj yuj chucal,
yujto a tzꞌacꞌan mandar in nivanil tic.
24 Obꞌiltac in.
¿Mach junoc syal in scolanelta dꞌa yol scꞌabꞌ in nivanil tic,
yujto a tzin icꞌanbꞌat dꞌa chamel dꞌa juneln̈ej?
25 An̈ej Dios syal yuuj,
yuj Cajal Jesucristo.
Yuj chiꞌ,
svacꞌ yuj diosal dꞌa Dios chiꞌ.
Icha vaj tic,
a yedꞌ in pensar,
svacꞌ servil Dios.
Palta axo jun in chuc pensaril tic,
ayoch yacꞌan servil chucal.