Man̈xa yalan yic chucal dꞌayon̈
6
¿Tas tze na jun?
¿Tom vachꞌ sco cꞌulejn̈ej chucal,
yic tzon̈ ste aqꞌuej nivancꞌolal Dios,
axo svachꞌ checlajel svachꞌcꞌolal icha chiꞌ?
2 Maay,
man̈xoocabꞌ co na icha chiꞌ.
Yujto ichato chamnac on̈xo eli,
yuj chiꞌ man̈xa yalan yic chucal dꞌayon̈.
Yuj chiꞌ,
¿tom tzato yal co bꞌeybꞌalan chucal chiꞌ?
3 Ina eyojtac,
ayic ix on̈ acꞌji bautizar,
ix checlajeli to junxon̈ej ix on̈ aj yedꞌ Cristo Jesús.
Ataꞌ scheclajeli to icha ix aj schami,
icha chiꞌ ix aj co cham yedꞌoc.
4 Yuj chiꞌ,
scheclajeli ichato chamnac on̈xo,
junxon̈ej ix aj co mucji yedꞌ Cristo chiꞌ.
Yuj chiꞌ,
icha ix aj spitzvixi dꞌa scal ebꞌ chamnac yuj snivan poder Dios,
icha pax chiꞌ ol aj co pitzvixi.
Syalelcꞌochi,
a jun acꞌ bꞌeybꞌal sco bꞌeybꞌalej ticnaic.
5 Junn̈ej ix aj co cham yedꞌ Cristo,
icha ix aj schami.
Tato icha chiꞌ,
icha ix aj spitzvixi,
icha pax chiꞌ ol aj co pitzvixi yedꞌoc,
yujto junxon̈ej caj yedꞌoc.
6 Cojtac to a jun co pensar dꞌa yic yalan̈,
dꞌun̈bꞌabꞌilqꞌue yedꞌ Cristo dꞌa teꞌ culus,
yic vachꞌ satel spoder co chuc pensaril,
ichato schami,
yic vachꞌ maxtzac cacꞌ servil jun co chucal chiꞌ ticnaic.
7 Yujto a mach chamnacxo,
man̈xa yalan yic chucal dꞌay.
8 Yujto a dꞌa yichan̈ Dios chamnac on̈ yedꞌ Cristo,
yuj chiꞌ scacꞌpaxoch dꞌa co cꞌool to pitzan on̈ yedꞌ dꞌa juneln̈ej.
9 Cojtac to pitzvinacxi Cristo dꞌa scal ebꞌ chamnac,
yuj chiꞌ man̈xa bꞌaqꞌuin̈ ol cham junelxo.
Man̈xa pax yalan yic chamel chiꞌ dꞌay.
10 Yujto ix chami,
yuj chiꞌ man̈xa yalan yic chucal dꞌay dꞌa juneln̈ej.
Axo ticnaic,
pitzan dꞌa juneln̈ej,
yic syacꞌan servil Dios.
11 An̈ejtonaꞌ ich on̈ pax taꞌ.
Co naec to chamnac on̈xo,
man̈xa yalan yic chucal dꞌayon̈.
Nachajocabꞌel cuuj to pitzan on̈xo,
yic scacꞌan servil Dios,
yujto junxon̈ej caj yedꞌ Cristo Jesús.
12 Yuj chiꞌ,
a chucal,
man̈xoocabꞌ co cha och yacꞌ yajalil dꞌa jun co nivanil chamelbꞌa yaj tic,
yic maxtzac co cꞌanabꞌajej co cꞌulan juntzan̈ chucal icha co gana.
13 Man̈xo caqꞌuec och jun co nivanil tic dꞌa yol scꞌabꞌ chucal yic sbꞌoan juntzan̈ tas malaj svachꞌil.
Yovalil an̈ej dꞌa Dios scacꞌoch co bꞌa,
yujto chamnac on̈xo dꞌa yichan̈,
palta ix on̈ pitzvixi.
Yuj chiꞌ,
caqꞌuec val co nivanil tic dꞌa Dios chiꞌ,
yic vachꞌ an̈ej juntzan̈ tas vachꞌ sco cꞌulej yedꞌoc.
14 Man̈xo co chaec yacꞌ yajalil juntzan̈ chucal dꞌayon̈.
Yujto man̈xotoc ayon̈ och dꞌa yol scꞌabꞌ ley Moisés chiꞌ.
Axo dꞌa yol scꞌabꞌ svachꞌcꞌolal Dios ay on̈ ecꞌ ticnaic.
Man̈xotoc yacꞌumal on̈ servil chucal
15 A ticnaic ay on̈ och dꞌa yalan̈ svachꞌcꞌolal Dios,
man̈xooc dꞌa yalan̈ ley Moisés.
Palta ¿tas tze na jun?
¿Tom yuj chiꞌ syal an̈ejaꞌ cacꞌan chucal?
Maay,
max yal-laj.
16 Qꞌuinaloc ay junoc mach schon̈nacbꞌat sbꞌa checabꞌoc dꞌa junocxo,
cojtac to yicn̈ej jun chiꞌ yaj dꞌa juneln̈ej.
An̈ejtonaꞌ,
ich on̈ pax taꞌ.
Tato sco cꞌanabꞌajej chucal,
axo co cham chiꞌ yuuj dꞌa juneln̈ej.
Palta tato sco cꞌanabꞌajej Dios,
axo svachꞌ tojolbꞌi co pensar chiꞌ yuuj.
17 Palta svacꞌ yuj diosal dꞌa Dios eyuuj.
Yujto vachꞌchom e cꞌanabꞌajejnac chucal dꞌa yalan̈taxo,
palta a ticnaic,
dꞌa smasanil e cꞌool van e cꞌanabꞌajan jun cꞌaybꞌubꞌal bꞌaj ix ex acꞌjiochi.
18 Ix ex colchajel dꞌa yol scꞌabꞌ chucal,
ix ex och eyacꞌ servil vachꞌil.
19 A juntzan̈ van valan tic dꞌayex,
chꞌoxnabꞌiln̈ej yaji,
yujto max yal snachajel val juntzan̈ cꞌaybꞌubꞌal tic eyuuj.
A dꞌa yalan̈taxo,
cacꞌnacoch juntzan̈ co nivanil scꞌulan chucal yic ste qꞌuechaan̈ co chucal chiꞌ.
Axo ticnaic,
an̈ejtonaꞌ icha chiꞌ scutej cacꞌanoch juntzan̈ co nivanil tic scꞌulan vachꞌil,
yic vachꞌ an̈ej dꞌa Dios scacꞌoch co pensar.
20 Ayic ix co cꞌulan chucal dꞌa yalan̈,
malaj yalan yic vachꞌil dꞌayon̈.
21 Malaj jabꞌoc co ganar dꞌa spatic juntzan̈ ix co cꞌulej chiꞌ.
Ton̈ej tzon̈ te qꞌuixvi yuj ticnaic.
Yuj val juntzan̈ chiꞌ,
sbꞌatcan ebꞌ anima dꞌa chamel dꞌa juneln̈ej.
22 Axo ticnaic,
colchajnac on̈xo el dꞌa yol scꞌabꞌ juntzan̈ chucal chiꞌ.
Man̈xa yalan yic dꞌayon̈.
Ix on̈ och schecabꞌoc Dios.
Yuj chiꞌ ay co ganar ticnaic,
yujto ayoch co pensar dꞌay.
Axo co chaan co qꞌuinal dꞌa juneln̈ej.
23 Tato a chucal sco cꞌulejn̈ej,
a stojol ol co chaꞌa,
aton chamel dꞌa juneln̈ej.
Axo jun silabꞌ syacꞌ Dios dꞌayon̈,
aton co qꞌuinal dꞌa juneln̈ej,
yujto junxon̈ej caj yedꞌ Cristo Jesús,
aton Cajal.