Schꞌoxnac sbꞌa Jesús dꞌa ucvaan̈ ebꞌ scꞌaybꞌum
21
Axo junelxo,
ix schꞌoxxi sbꞌa Jesús dꞌa ebꞌ vin̈ scꞌaybꞌum ayic ayecꞌ ebꞌ vin̈ dꞌa stiꞌ aꞌ n̈ajabꞌ Tiberias.
Icha tic ix aj schꞌoxan sbꞌa dꞌa ebꞌ vin̈.
2 Ayecꞌ vin̈aj Simón Pedro yedꞌ vin̈aj Tomás tzꞌalji Tioxal.
Ajun pax vin̈aj Natanael aj Caná dꞌa yol yic Galilea.
An̈ejtonaꞌ,
ayecꞌ pax ebꞌ vin̈ yuninal vin̈aj Zebedeo yedꞌ chavan̈xo ebꞌ vin̈ yetcꞌaybꞌumal ebꞌ vin̈.
Jesús en el mar de Galilea (Juan 21.1-25)
—Ol in bꞌat yamoj chay,
xchi vin̈ dꞌa ebꞌ vin̈.
—Ol on̈ bꞌat edꞌoc,
xchi ebꞌ vin̈ dꞌa vin̈.
Yuj chiꞌ ix bꞌat ebꞌ vin̈.
Ix och ebꞌ vin̈ dꞌa yol jun teꞌ barco.
Palta a dꞌa jun acꞌval chiꞌ,
malaj junoc nocꞌ ix yamchaj yuj ebꞌ vin̈.
4 Axo yic vanxo sacbꞌi,
ayecꞌ Jesús dꞌa stiꞌ aꞌ chiꞌ.
A ebꞌ vin̈ scꞌaybꞌum chiꞌ maj snalaj ebꞌ vin̈ tato aꞌ.
5 Ix yalancot dꞌa ebꞌ vin̈:
—Ex vetanimail,
¿ay am nocꞌ ix eyicꞌaꞌ?
xchi dꞌa ebꞌ vin̈.
—Maay.
Malaj nocꞌ,
xchi ebꞌ vin̈ dꞌay.
6 —Aqꞌuequem chꞌan̈ e chimpa chiꞌ dꞌa svachꞌ teꞌ barco chiꞌ,
ataꞌ ol yamchaj nocꞌ eyuuj,
xchi dꞌa ebꞌ vin̈.
Ix yacꞌanem chꞌan̈ ebꞌ vin̈.
Ix yacꞌlan ebꞌ vin̈ stocꞌanqꞌueta chꞌan̈,
majxo yal-laj sqꞌueta chꞌan̈ yuj yalil nocꞌ,
yujto te tzijtum nocꞌ.
7 Axo jun vin̈ scꞌaybꞌum Jesús te xajan yuuj,
a vin̈ ix alan dꞌa vin̈aj Pedro chiꞌ:
—Inai,
a Cajal Jesús ayecꞌ chiꞌ,
xchi vin̈.
Ix lajvin̈ej yabꞌan chiꞌ vin̈aj Simón Pedro chiꞌ,
ix yacꞌanoch spichul vin̈,
yujto an̈ej yol spichul vin̈ ayochi.
Ix syumanelta sbꞌa vin̈ dꞌa yol teꞌ barco chiꞌ,
ix elcꞌoch vin̈ dꞌa stiꞌ aꞌ.
8 Ay am chan̈eoc chꞌan̈il aybꞌat ebꞌ vin̈ dꞌa sat aꞌ.
Axo juntzan̈xo ebꞌ vin̈ yetcꞌaybꞌumal ebꞌ vin̈,
tzacꞌanto ix cꞌoch ebꞌ vin̈ yedꞌ jun yuneꞌ barco,
n̈erbꞌil chꞌan̈ chimpa bꞌudꞌan yuj nocꞌ chay chiꞌ yuj ebꞌ vin̈.
9 Axo ix elta ebꞌ vin̈,
ix yilan ebꞌ vin̈,
ayoch jun cꞌacꞌ toxo ix el ichan.
Van sbꞌolan jun nocꞌ chay Jesús chiꞌ.
Ay pax ecꞌ juntzan̈ ixim pan dꞌa stzꞌey.
10 Axo ix yalan dꞌa ebꞌ vin̈:
—Iqꞌueccot jayvan̈oc nocꞌ e chay ix e yam chiꞌ,
xchi.
11 Yuj chiꞌ ix ochxi vin̈aj Simón Pedro dꞌa yol teꞌ barco chiꞌ.
Ix stocꞌanelta chꞌan̈ chimpa chiꞌ vin̈ dꞌa staquin̈al stiꞌ aꞌ.
Ix yilan ebꞌ vin̈ to bꞌudꞌan chꞌan̈ yuj juntzan̈ nocꞌ nivac chay chiꞌ.
153 sbꞌisul nocꞌ smasanil.
Palta vachꞌchom te al nocꞌ,
maj dꞌin̈chajlaj chꞌan̈.
12 Ix lajvi chiꞌ,
ix yalan Jesús dꞌa ebꞌ vin̈:
—Cotan̈ec,
vaan̈ec,
xchi.
Malaj junoc ebꞌ scꞌaybꞌum chiꞌ ix cꞌanbꞌani:
¿Mach ach?
man xchioc ebꞌ vin̈,
yujto yojtacxo ebꞌ vin̈ to a Cajalil.
13 Ix snitzanoch sbꞌa Jesús dꞌa stzꞌey ebꞌ vin̈.
Ix yicꞌanqꞌue ixim pan chiꞌ,
ix spucanecꞌ ixim dꞌa ebꞌ vin̈.
An̈ejtonaꞌ icha chiꞌ ix yutej spucanecꞌ nocꞌ chay chiꞌ.
14 Yoxelalxo schꞌoxan sbꞌa Jesús dꞌa ebꞌ scꞌaybꞌum chiꞌ yictax ix pitzvixi dꞌa scal ebꞌ chamnac.
Lolonnac Jesús yedꞌ vin̈aj Pedro
15 Ix lajvi sva ebꞌ,
ix yalan Jesús dꞌa vin̈aj Simón Pedro:
—Ach Simón yuninal vin̈aj Jonás,
tzin cꞌanbꞌej dꞌayach,
¿más am tzin a xajanej dꞌa yichan̈ ebꞌ vin̈ tic?
xchi dꞌa vin̈.
—Yel ton Mamin.
Ojtacxo to xajan ach vuuj,
xchi vin̈aj Pedro chiꞌ dꞌay.
—Tato icha chiꞌ,
icha junoc tan̈vum calnel syacꞌ va nocꞌ yunetac scalnel,
icha chiꞌ tzutej a cꞌaybꞌan ebꞌ vicoꞌ,
xchi Jesús dꞌa vin̈.
16 Ix lajvin̈ej yalan juntzan̈ chiꞌ,
ix yalanxi:
—Ach Simón yuninal vin̈aj Jonás,
¿tzam in a xajanej?
xchi dꞌa vin̈.
—Yel ton Mamin.
Ojtacxo to tzach in xajanej,
xchixi vin̈.
—Tato icha chiꞌ,
icha junoc tan̈vum calnel stan̈van nocꞌ scalnel,
icha chiꞌ tzutej a tan̈van ebꞌ vicxo,
xchi Jesús chiꞌ dꞌa vin̈.
17 Ix yalanxi dꞌa yoxelal:
—Ach Simón yuninal vin̈aj Jonás,
¿tzam in a xajanej?
xchi dꞌa vin̈.
Yuj chiꞌ ix te cusqꞌue vin̈aj Pedro chiꞌ,
yujto yoxelalxo scꞌanbꞌan Jesús chiꞌ dꞌa vin̈ tato xajan yuj vin̈.
Yuj chiꞌ ix yalanxi vin̈:
—Mamin,
ojtacxo smasanil,
ojtac to xajan ach vuuj,
xchi vin̈ dꞌay.
—Tato icha chiꞌ,
icha junoc tan̈vum calnel syacꞌ va nocꞌ scalnel,
icha chiꞌ tzutej a cꞌaybꞌan ebꞌ vicxo.
18 Val yel sval dꞌayach,
a dꞌa yic quelem achto,
munil tza pich a bꞌa.
Tzach bꞌeyecꞌ bꞌaj ay a gana.
Palta ayic ol ach ichamaxoc,
ton̈ej ol aqꞌuel lian a cꞌabꞌ,
chꞌoc mach ol tzecꞌan a nan̈al,
ol ach icꞌjocbꞌat bꞌaj max yal a cꞌool,
xchi Jesús dꞌa vin̈aj Pedro chiꞌ.
19 Icha chiꞌ yutejnac yalan yuj tas ol aj scham vin̈aj Pedro chiꞌ,
yic ol schꞌoxel vin̈ to nivan yelcꞌoch Dios.
Ix lajvi chiꞌ,
ix yalanxi dꞌa vin̈:
—Ochan̈ tzacꞌan vuuj,
xchi dꞌa vin̈.
A jun scꞌaybꞌum Jesús xajan yuuj
20 Axo ix meltzajbꞌat qꞌuelan vin̈aj Pedro chiꞌ dꞌa spatic,
ix yilan vin̈,
a vin̈ scꞌaybꞌum Jesús xajan yuuj,
tzacꞌanxooch vin̈ yuj ebꞌ.
Aton jun vin̈ chiꞌ ix em cꞌojan dꞌa stzꞌey Jesús ayic ix va ebꞌ junel,
ayic ix scꞌanbꞌan vin̈ dꞌa Jesús chiꞌ:
Mamin,
¿mach ol ach acꞌanoch dꞌa yol scꞌabꞌ chamel chiꞌ?
xchi vin̈ dꞌay.
21 Ayic ix yilan jun vin̈ chiꞌ vin̈aj Pedro,
ix scꞌanbꞌan vin̈ dꞌa Jesús:
—Mamin,
xal jun vin̈ sja tic,
¿tas ol icꞌan scham vin̈?
xchi vin̈ dꞌay.
22 Yuj chiꞌ ix yalan Jesús chiꞌ dꞌa vin̈:
—Taxon̈ej in gana pitzanto vin̈ ayic ol in jaxoc,
malaj ochi.
A ach tic,
ochan̈ tzacꞌan vuuj,
xchi dꞌa vin̈.
23 Yuj chiꞌ ix el specal dꞌa scal ebꞌ yicxo Dios to man̈ ol cham jun vin̈ scꞌaybꞌum Jesús chiꞌ.
Palta maj yal-laj Jesús tato man̈ ol cham vin̈,
an̈ej ix yalaꞌ:
Taxon̈ej in gana pitzanto vin̈ ayic ol in jaxoc,
malaj ochi,
xchi.
24 Aton jun vin̈ cꞌaybꞌum tic syacꞌ testigoal sbꞌa dꞌa juntzan̈ tic,
ix stzꞌibꞌejcan vin̈.
Cojtac to te yel juntzan̈ ix stzꞌibꞌejcan vin̈ tic.
25 Tzijtumto juntzan̈xo tas ix scꞌulej Jesús.
Qꞌuinaloc tato ix tzꞌibꞌchajcan dꞌa junjunal,
tzin naꞌa to max yabꞌlaj jun yolyibꞌan̈qꞌuinal tic yic smolchajcan juntzan̈ uum bꞌaj tzꞌibꞌabꞌilcan chiꞌ.
Amén