2 Ix scꞌanbꞌan vin̈ dꞌay:

—¿Tom a ach tic sReyal ach ebꞌ israel?

xchi vin̈ dꞌay.

—Yel ton tzalaꞌ,

xchi Jesús dꞌa vin̈.

3 Axo ebꞌ sat sacerdote,

tzijtum tas ix yacꞌoch ebꞌ dꞌa yibꞌan̈ Jesús.

4 Yuj chiꞌ,

ix yalanpax vin̈aj Pilato chiꞌ dꞌay:

—¿Tom max ach tacꞌvi jabꞌoc?

Abꞌi,

man̈ jantacoc tas syacꞌoch ebꞌ vin̈ dꞌa ibꞌan̈,

xchi vin̈ dꞌay.

5 Palta axo Jesús,

majxo tacꞌvoclaj.

Yuj chiꞌ ix och qꞌuelan vin̈aj Pilato chiꞌ yuuj.

6 A dꞌa junjun abꞌil,

ayic tzꞌoch qꞌuin̈,

syacꞌanelta junjun ebꞌ presovum vin̈aj Pilato chiꞌ,

icha mach sgana ebꞌ anima scꞌanelta.

7 Ayoch jun vin̈ scuch Barrabás dꞌa preso yedꞌ juntzan̈xo ebꞌ vin̈ yetbꞌeyum,

yacꞌlejnac oval ebꞌ vin̈ yedꞌ ebꞌ vin̈ yajal.

Smilnac juntzan̈ ebꞌ anima ebꞌ vin̈ ayic yochnac jun oval chiꞌ.

8 Axo ix cꞌoch ebꞌ anima,

ix scꞌanbꞌan ebꞌ dꞌa vin̈aj Pilato chiꞌ tato tzato yiqꞌuelta junoc presovum chiꞌ vin̈ dꞌa libre ichataxon sley dꞌa junjun qꞌuin̈.

9 Yuj chiꞌ,

ix yalan vin̈aj Pilato chiꞌ dꞌa ebꞌ:

—¿E gana am svaqꞌuel vin̈ e reyal dꞌa libre a ex israel ex tic?

xchi vin̈ dꞌa ebꞌ.

10 Icha chiꞌ ix yal vin̈,

yujto yojtactaxon vin̈ to yuj schichoncꞌolal ebꞌ vin̈ sat sacerdote ix acꞌjioch Jesús dꞌa yol scꞌabꞌ vin̈.

11 Palta a ebꞌ vin̈ yajal chiꞌ ix acꞌan scꞌool ebꞌ anima chiꞌ,

yic a vin̈aj Barrabás scꞌanelta ebꞌ.

12 Axo ix yalan vin̈aj Pilato dꞌa ebꞌ anima chiꞌ:

—¿Tas e gana svutej vin̈ tzeyal e reyaloc tic?

xchi vin̈.

13 Ix laj qꞌue n̈ilnaj ebꞌ yalani:

—Culusejqꞌue vin̈,

xchi ebꞌ.

14 —Palta ¿tas smul vin̈ jun?

xchi vin̈.

Ix te qꞌue n̈ilnaj ebꞌ yalanxi:

—Culusejqꞌue vin̈,

xchi ebꞌ.

15 Axo vin̈aj Pilato chiꞌ,

sgana vin̈ to vachꞌ scan dꞌa yichan̈ ebꞌ anima,

yuj chiꞌ ix acꞌjielta vin̈aj Barrabás chiꞌ.

Ix lajvi chiꞌ ix acꞌji macꞌjoc Jesús yuj vin̈.

Ichato chiꞌ ix yacꞌanoch Jesús chiꞌ vin̈ dꞌa yol scꞌabꞌ ebꞌ sgana sculusanqꞌuei.

16 Axo ebꞌ vin̈ soldado ix icꞌanbꞌat Jesús dꞌa yamaqꞌuil spat vin̈ yajal.

A jun pat chiꞌ scuch Pretorio.

Ataꞌ ix yavtejcot ebꞌ vin̈ soldado ebꞌ vin̈ smasanil.

17 Ix yacꞌoch jun qꞌuicꞌmutzꞌinac cꞌapac ebꞌ vin̈ dꞌa Jesús.

Ix sjalan jun qꞌuix corona ebꞌ vin̈.

Ix yacꞌanqꞌue ebꞌ vin̈ dꞌa sjolom.

18 Ix lajvi chiꞌ ix och ijan ebꞌ vin̈ yalan dꞌay:

—Tzalajan̈ ach sreyal ebꞌ israel,

xchi ebꞌ vin̈ dꞌay.

19 Ix lajvi chiꞌ,

ix laj spajanoch jun teꞌ aj ebꞌ vin̈ dꞌa sjolom.

Ix laj stzubꞌan ebꞌ vin̈.

Ix laj stzꞌacan yaqꞌuem sbꞌa ebꞌ vin̈ dꞌay.

20 Axo ix lajvi sbꞌuchvaj ebꞌ vin̈ dꞌay,

ix yicꞌanxiel jun qꞌuicꞌmutzꞌinac cꞌapac chiꞌ ebꞌ vin̈ dꞌay.

Ix yacꞌanxioch spichultaxon ebꞌ vin̈.

Ichato chiꞌ ix yicꞌanbꞌat ebꞌ vin̈ bꞌaj ix culusajqꞌuei.

21 Ay jun vin̈ aj Cirene scuch Simón,

smam vin̈aj Alejandro yedꞌ vin̈aj Rufo.

Van sjax vin̈ bꞌaj ix xidꞌeqꞌui.

Ix acꞌji pural vin̈ yuj ebꞌ yic scuchanbꞌat sculusal Jesús vin̈.

22 Ix lajvi chiꞌ,

ix yicꞌanbꞌat Jesús ebꞌ dꞌa jun lugar scuch Gólgota.

Syalelcꞌochi:

Lum Bꞌaj Ay Sbꞌaquil Jolom.

23 Ataꞌ ix yacꞌ ebꞌ yucꞌ yal uva calan yaj yedꞌ jun teꞌ scuch mirra,^*

palta maj schalaj yuqꞌuej dꞌa ebꞌ.

24 Ix lajvi chiꞌ,

ix sculusanqꞌue ebꞌ.

Axo ebꞌ soldado chiꞌ,

ix laj yacꞌan suerte ebꞌ yic spucanecꞌ spichul ebꞌ dꞌa spatic,

icha syalaꞌ tas ix yicꞌ junjun ebꞌ.

25 Axo dꞌa qꞌuecꞌualil a las nueve,

ix sculusanqꞌue Jesús ebꞌ.

26 Ay jun letra ix tzꞌibꞌchajochi.

A tzꞌalani tas yuj ix acꞌjioch chamel dꞌa yibꞌan̈.

A sReyal ebꞌ aj Israel,

xchi.

27-28 Ay pax chavan̈ ebꞌ vin̈ elcꞌum ix culusajqꞌue yedꞌoc,

jun vin̈ dꞌa svachꞌ,

jun vin̈ dꞌa sqꞌuexan̈.

Junjun sculusal junjun ebꞌ vin̈.

29 Axo ebꞌ ix laj ecꞌ taꞌ,

ix bꞌuchvaj ebꞌ dꞌay.

Slaj svichubꞌtan̈an sjolom ebꞌ dꞌay.

Syalan ebꞌ:

—E...

a ach ton tic ix alaꞌ to tza satel stemplo Dios,

tza bꞌoanxiqꞌue sqꞌuexul dꞌa schabꞌjial.

30 Col a bꞌa.

Eman̈cot dꞌa teꞌ culus chiꞌ,

xchi ebꞌ dꞌay.

31 Icha pax chiꞌ ebꞌ sat sacerdote yedꞌ ebꞌ cꞌaybꞌum dꞌa ley Moisés,

ix laj bꞌuchjvaj ebꞌ dꞌay.

Ix laj yalanqꞌue ebꞌ:

—Ix laj colchaj juntzan̈ ebꞌ yuj vin̈,

palta max yal-laj scolan sbꞌa vin̈ ticnaic.

32 A Cristo tic,

co reyal a on̈ israel on̈ tic.

A ticnaic,

emocabꞌcot dꞌa teꞌ culus tic quilaꞌ.

Ichato chiꞌ ol cacꞌanoch dꞌa co cꞌool,

xchi ebꞌ.

Axo ebꞌ vin̈ ix culusajqꞌue yedꞌ chiꞌ,

ix bꞌuchvajpax ebꞌ vin̈ dꞌay.

33 Axo dꞌa chimcꞌualil,

ix qꞌuicꞌbꞌi dꞌa smasanil yolyibꞌan̈qꞌuinal tic masanto dꞌa yemcꞌualil a las tres.

34 Ix lajvin̈ej chiꞌ,

te chaan̈ ix avajqꞌue Jesús:

—Eloi,

Eloi,

¿lama sabactani?

xchi.

Syalelcꞌochi:

Ach in Diosal,

ach in Diosal,

¿tas yuj tzin actejcan in chꞌocoj?

xchi.

35 Axo ebꞌ ayecꞌ taꞌ,

ay ebꞌ ix abꞌan jun lolonel chiꞌ,

ix yalan ebꞌ:

—Abꞌec.

A dꞌa vin̈aj Elías,

vin̈ schecabꞌ Dios,

ataꞌ tzꞌavaji,

xchi ebꞌ.

36 Ix lajvi chiꞌ,

ay jun vin̈ ix bꞌat lemnajoc,

ix slabꞌanem jun tzꞌubꞌlabꞌ vin̈ dꞌa scal vinagre.

Ix yacꞌanoch vin̈ dꞌa sjolom jun teꞌ aj.

Ix yacꞌanqꞌue vin̈ dꞌa stiꞌ Jesús.

Ix yalan vin̈:

—Yilxo,

canocabꞌn̈ej icha chiꞌ bꞌela.

Ol quilaꞌ tato ol ja vin̈aj Elías chiꞌ ul yiqꞌuemta,

xchi vin̈.

37 Axo Jesús,

chaan̈ ix avaj junelxo.

Ichato chiꞌ bꞌian,

ix chami.

38 Axo jun cortina ayoch smaculoc snan̈al stemplo Dios,

ix n̈icꞌchaj snan̈al.

Ix cot n̈icꞌnaj dꞌa sjolom masanto ix emul dꞌa yich.

39 Axo vin̈ yajal ebꞌ soldado ayecꞌ dꞌa yichan̈ Jesús,

ix yilan vin̈ chajtil ix aj schami.

Yuj chiꞌ ix yalan vin̈:

—A jun vin̈ tic,

val yel Yuninal Dios,

xchi vin̈.

40 Ay pax juntzan̈ ebꞌ ix ix najattac aycoti,

van yilancot ebꞌ ix.

A dꞌa scal ebꞌ ix,

ayecꞌ ix María aj Magdala,

ix Salomé yedꞌ ix María snun vin̈aj José yedꞌ vin̈aj Jacobo,

vin̈ tzacꞌan unin.

41 A ebꞌ ix chiꞌ,

ecꞌnac ebꞌ ix yedꞌ Jesús ayic ayecꞌ dꞌa Galilea.

A ebꞌ ix acꞌjinac servil.

Tzijtum juntzan̈xo ebꞌ ix ix ayecꞌ yedꞌ ebꞌ ix.

Aton ebꞌ ix,

ix cꞌoch yedꞌ Jesús dꞌa Jerusalén chiꞌ.

42 A dꞌa jun cꞌu chiꞌ,

scꞌual yacꞌan lista sbꞌa ebꞌ israel,

yujto qꞌuicꞌanocxo scꞌual icꞌoj ip.

Axo yic van sqꞌuicꞌbꞌi

43 ix cꞌoch vin̈aj José,

aj chon̈abꞌ Arimatea.

Te nivan yopisio vin̈ dꞌa scal ebꞌ yetyajalil.

A jun vin̈ chiꞌ,

tan̈vabꞌil yoch Dios Yajalil yuj vin̈.

Ix stecꞌbꞌej sbꞌa vin̈,

ix cꞌoch vin̈ dꞌa vin̈aj Pilato.

Ix scꞌananemta snivanil Jesús vin̈ dꞌa vin̈.

44 Ix sat scꞌool vin̈aj Pilato chiꞌ ayic ix yabꞌan vin̈ to toxo ix cham Jesús.

Yuj chiꞌ ix yavtancot vin̈ yajal ebꞌ soldado vin̈.

Ix scꞌanbꞌan vin̈ dꞌa vin̈ tato toxo ix cham Jesús chiꞌ.

45 Axo ix yabꞌan vin̈ to toxo ix chami,

ix yalan vin̈ to syal bꞌat yicꞌanemta snivanil vin̈aj José chiꞌ.

46 Ix smanan jun sábana te vachꞌ vin̈aj José chiꞌ.

Ix lajvi chiꞌ,

ix bꞌat vin̈ yiqꞌuemta snivanil chiꞌ.

Ix sbꞌacꞌanoch cꞌapac sábana chiꞌ vin̈ dꞌay.

Ix bꞌat yacꞌancanoch vin̈ dꞌa yol jun qꞌuen qꞌueen joybꞌilxo el yool.

Ix yacꞌancanoch jun qꞌuen vin̈ smaculoc.

47 Axo ix María aj Magdala yedꞌ ix María snun vin̈aj José,

ix yil ebꞌ ix bꞌaj ix mucchajcanochi.