A yaljubꞌal Jesús
2
A dꞌa jun tiempoal chiꞌ,
ix yaqꞌuelta jun órden vin̈aj Augusto,
aton vin̈ sat yajal dꞌa Roma,
yic sqꞌue vaan sbꞌisul masanil ebꞌ anima dꞌa yol smacbꞌen Roma chiꞌ.
Lucas 2.1-24
2 A vin̈aj Cirenio ayoch gobernadoral dꞌa yol yic Siria ayic sbꞌabꞌlaj bꞌischajnac ebꞌ anima smasanil.
3 Masanil ebꞌ anima sacleminac yajcanbꞌati,
tzul yacꞌ tzꞌibꞌchaj sbꞌa ebꞌ dꞌa schon̈abꞌ.
4 Yuj chiꞌ a vin̈aj José,
ix cot vin̈ dꞌa chon̈abꞌ Nazaret dꞌa yol yic Galilea,
ix cꞌoch vin̈ dꞌa chon̈abꞌ Belén dꞌa yol yic Judea,
aton bꞌaj aljinac vin̈aj David dꞌa pecaꞌ,
yujto a vin̈aj José chiꞌ,
a vin̈aj David ay yin̈tilal vin̈.
5 Ix bꞌat vin̈ dꞌa Belén yic syacꞌ tzꞌibꞌchaj sbꞌa vin̈ yedꞌ ix María,
aton ix ayxo strato yedꞌ vin̈,
cuchbꞌiltooch yuneꞌ ix yuuj.
6 Ayic ayecꞌ ebꞌ dꞌa Belén chiꞌ,
ix cꞌoch scꞌual yalji yuneꞌ ix chiꞌ.
7 Ataꞌ ix alji jun sbꞌabꞌel unin ix.
Ix spich ix dꞌa sbꞌal,
ix yacꞌanecꞌ cꞌotan ix bꞌaj sva nocꞌ chej,
yujto man̈xalaj bꞌaj colan dꞌa yol mesón.
A ebꞌ ángel yedꞌ ebꞌ tan̈vum calnel
8 Dꞌa slacꞌanil chon̈abꞌ Belén chiꞌ ayecꞌ juntzan̈ ebꞌ vaymitum calnel.
9 Elan̈chamel ix ja jun yángel Dios Cajal dꞌa ebꞌ.
Ix ja copnaj stziquiquial Dios Cajal dꞌa spatic yichan̈ ebꞌ.
Ix te xivqꞌue ebꞌ.
10 Ix yalan jun ángel chiꞌ dꞌa ebꞌ icha tic:
—Man̈ ex xivoc yujto vedꞌnac jun vachꞌ abꞌix dꞌayex.
Yuj jun abꞌix tic,
ol tzalaj masanil anima.
11 A dꞌa Belén,
dꞌa schon̈abꞌ can vin̈aj David,
ataꞌ ix alji jun e Columal qꞌuiqꞌui,
aton Cristo Cajal.
12 Ol eyilaꞌ,
ayoch sbꞌal jun unin chiꞌ.
Ayecꞌ dꞌa yol bꞌaj sva nocꞌ chej,
icha chiꞌ ol aj snachajel eyuuj to aꞌ,
xchi jun ángel chiꞌ.
13 A dꞌa jun rato chiꞌ,
tzijtum ebꞌ ángel ix cot dꞌa satchaan̈ ix ul schꞌoxan sbꞌa ebꞌ yedꞌ junxo ángel chiꞌ,
ix yalan vachꞌ lolonel ebꞌ dꞌa Dios.
Ix yalan ebꞌ icha tic:
14 Calec vachꞌ lolonel dꞌa Dios ay dꞌa satchaan̈.
Ayocabꞌ juncꞌolal dꞌa scal ebꞌ anima bꞌaj ix schꞌox svachꞌcꞌolal,
xchi ebꞌ ángel chiꞌ.
15 Ayic toxo ix pax ebꞌ ángel chiꞌ dꞌa satchaan̈,
ix laj yalan junjun ebꞌ tan̈vum calnel chiꞌ icha tic:
—Coyec dꞌa Belén chiꞌ,
bꞌat quilec tas ix uji taꞌ,
aton tas ix schec aljoc Cajalil dꞌayon̈,
xchi ebꞌ.
16 Yelcꞌolal ix bꞌat ebꞌ.
Ix ilchaj ix María yedꞌ vin̈aj José yuj ebꞌ.
Ix yilan jun unin chiꞌ ebꞌ,
cꞌotanecꞌ bꞌaj sva nocꞌ chej.
17 Ayic ix yilan ebꞌ,
ix yalan ebꞌ tas ix yal jun ángel chiꞌ dꞌa ebꞌ.
18 Masanil ebꞌ ix abꞌani,
ix te sat scꞌool ebꞌ yuj tas ix yal ebꞌ chiꞌ.
19 Axo ix María chiꞌ,
ton̈ej ix yabꞌcan juntzan̈ chiꞌ ix,
ix ste naubꞌtan̈an ix.
20 A ebꞌ tan̈vum calnel chiꞌ,
ix meltzajxi ebꞌ,
ix yalan vachꞌ lolonel ebꞌ dꞌa Dios.
Ix yacꞌan yuj diosal ebꞌ dꞌay yuj masanil tas ix yabꞌ ebꞌ yedꞌ yuj tas ix yil ebꞌ,
yujto ix elcꞌoch masanil icha ix alji dꞌa ebꞌ.
Ix icꞌjibꞌat Jesús dꞌa stemplo Dios
21 Ucubꞌixitax chiꞌ,
ix acꞌji circuncidar jun unin chiꞌ.
JESÚS ix sbꞌiejcani,
aton jun bꞌi chiꞌ ix aljican dꞌa ix María yuj jun ángel atax yic manto scuchoch ix.
22 Ay juntzan̈ checnabꞌil yalnaccan vin̈aj Moisés to scꞌanabꞌajej ebꞌ ix tzꞌalji yuneꞌ,
yic vachꞌ scan ebꞌ ix dꞌa yichan̈ ley.
Dꞌa scꞌual yic scꞌanabꞌajan jun checnabꞌil chiꞌ ix,
ix yicꞌanbꞌat Jesús ebꞌ dꞌa chon̈abꞌ Jerusalén yic syacꞌanoch jun unin chiꞌ ebꞌ dꞌa yol scꞌabꞌ Dios Cajal.
23 Ix scꞌulej jun tic ebꞌ yujto icha tic tzꞌibꞌyajcan dꞌa sley Dios Cajal chiꞌ:
“Junjun vinac unin sbꞌabꞌlaj alji,
a tzꞌacꞌji yicoc Dios Cajal,”
xchi.
24 Ix bꞌat ebꞌ bꞌian,
ix yacꞌan jun silabꞌ ebꞌ dꞌa Dios icha silabꞌ ebꞌ mebꞌaꞌ syacꞌaꞌ,
icha tas syal sley Dios chiꞌ:
“Yovalil tzꞌacꞌji chavan̈oc nocꞌ cuvajteꞌ,
mato chavan̈oc nocꞌ paramuch,”
xchi.*
25 A dꞌa jun tiempoal chiꞌ,
ay jun vin̈ cajan dꞌa Jerusalén scuch Simeón.
Te tojol sbꞌeybꞌal jun vin̈ chiꞌ.
Slesalvi vin̈ dꞌa Dios.
Van stan̈van vin̈ scꞌoch scꞌual yic ol colchaj chon̈abꞌ Israel chiꞌ.
Ayoch Yespíritu Dios dꞌa vin̈.
Lucas 2.25-52
26 Yalnac Dios dꞌa vin̈ to manto ol cham vin̈ masanto ol yil Cristo vin̈,
aton ol checjoccot yuj Cajalil.
27 Aton jun vin̈ tic ix checjibꞌat yuj Yespíritu Dios dꞌa yamaqꞌuil templo.
Ayecꞌ vin̈ taꞌ ix icꞌjicot Jesús dꞌa yol yamaqꞌuil templo chiꞌ yuj vin̈ tzꞌalji smamoc chiꞌ yedꞌ ix snun,
yic scꞌanabꞌajej ebꞌ tas syal ley.
28 Axo vin̈aj Simeón chiꞌ ix chelanqꞌue jun unin chiꞌ,
ix yalan vachꞌ lolonel vin̈ dꞌa Dios.
Ix yalan vin̈:
29 Mamin Vajal,
syalxo in cham dꞌa juncꞌolal ticnaic,
yujto ix elcꞌoch tas ix al dꞌayin a in a checabꞌ in tic.
30 Ix yil val in sat sjavican vin̈ Colvajvum tic.
31 Aton vin̈ tic ix acꞌ yopisio dꞌa yichan̈ ebꞌ anima smasanil dꞌa yolyibꞌan̈qꞌuinal tic.
32 A vin̈ tic ol acꞌan saquilqꞌuinal dꞌa ebꞌ man̈ israeloc.
Axo jun a chon̈abꞌ Israel,
te nivan ol aj yelcꞌoch yuj vin̈,
xchi vin̈.
33 Axo vin̈aj José yedꞌ ix María,
ix te sat scꞌool ebꞌ yuj tas ix yalcan vin̈aj Simeón chiꞌ yuj jun unin chiꞌ.
34 Ix lajvi chiꞌ,
ix scꞌanan svachꞌcꞌolal Dios vin̈ dꞌa yibꞌan̈ ebꞌ,
ix yalan vin̈ dꞌa ix María,
ix snun Jesús chiꞌ icha tic:
—Ina jun unin tic,
chequeltaxon yaji to nivan ebꞌ quetisraelal ol somchajel spensar yuuj.
Tzijtum pax ebꞌ ol bꞌo spensar yuuj.
Aꞌ ol chꞌoxanoc tas sgana Dios dꞌa ebꞌ,
palta tzijtum ebꞌ ol paticaneloc.
35 Icha chiꞌ ol aj scheclajelta tas sna junjun anima.
A ach tic,
ol ja jun cꞌual ol ochcan pitzꞌan cuscꞌolal dꞌa a pixan.
Ichato ol tecchajoch junoc qꞌuen espada dꞌa a pixan,
xchi vin̈aj Simeón chiꞌ.
36 Ay pax jun ix ix taꞌ scuch Ana.
A jun ix chiꞌ syalel slolonel Dios ix.
A vin̈ smam ix scuchan Fanuel,
yin̈tilal vin̈aj Aser.
Te chichimxo ix.
Uninto ix snupnajnac ix,
uqueꞌ abꞌil ix yicꞌlaj sbꞌa ebꞌ,
ix cham vin̈ yetbꞌeyum ix.
37 84 abꞌilxo scan ix.
Max yactejcan stemplo Dios ix,
syacꞌn̈ej servil Dios Cajal ix dꞌa cꞌual,
dꞌacꞌval,
dꞌa tzecꞌojcꞌolal yedꞌ dꞌa lesal.
38 Dꞌa jun rato chiꞌ ix cꞌoch ix bꞌaj ayecꞌ ebꞌ chiꞌ.
Ix yacꞌan yuj diosal ix dꞌa Dios,
ix och ijan ix yalanel yabꞌixal Jesús chiꞌ dꞌa masanil ebꞌ van stan̈van scolchajel chon̈abꞌ Jerusalén chiꞌ.
Ayic ix paxta ebꞌ dꞌa Nazaret
39 Ayic ix lajvi scꞌanabꞌajan juntzan̈ sleyal albꞌilcan yuj Dios Cajal ebꞌ,
ix pax ebꞌ dꞌa schon̈abꞌ scuch Nazaret,
aton jun ay dꞌa yol yic Galilea.
40 Axo jun unin chiꞌ,
ipan yel qꞌuinal dꞌay,
van sqꞌuibꞌi,
van sjelanbꞌi,
ay val och svachꞌcꞌolal Dios dꞌay.
A ix cꞌoch Jesús dꞌa stemplo Dios
41 A vin̈ tzꞌalji smamoc Jesús chiꞌ yedꞌ ix snun,
junjun abꞌil xidꞌecꞌ ebꞌ dꞌa Jerusalén yuj qꞌuin̈ yic snajicoti tas aj yelnaccot ebꞌ israel dꞌa Egipto.
42 Axo ix tzꞌacvi slajchavil abꞌil sqꞌuinal Jesús,
ix bꞌatxi ebꞌ dꞌa Jerusalén dꞌa qꞌuin̈ chiꞌ ichataxon sleyal.
43 Ayic ix lajvi jun qꞌuin̈ chiꞌ,
ix paxta ebꞌ.
Axo yuneꞌ quelem Jesús,
ix can dꞌa Jerusalén,
max snalaj ix snun yedꞌ vin̈aj José tato ix cani.
44 A snaan ebꞌ to tzacꞌan yedꞌ juntzan̈xo ebꞌ tzijtumal anima.
Yuj chiꞌ,
jun cꞌual ix bꞌey ebꞌ.
Axo ix sayanecꞌ ebꞌ dꞌa scal ebꞌ scꞌabꞌ yoc yedꞌ ebꞌ yamigo,
45 malaj.
Yuj chiꞌ,
ix meltzajxi ebꞌ dꞌa Jerusalén chiꞌ sayxi.
46 Ato dꞌa schabꞌjial ix ilchaj yuj ebꞌ dꞌa yamaqꞌuil stemplo Dios,
cꞌojanem dꞌa scal juntzan̈ ebꞌ vin̈ cꞌaybꞌum dꞌa ley Moisés,
van smaclan yabꞌi tas syal ebꞌ vin̈,
scꞌanbꞌanpax yabꞌ dꞌa ebꞌ vin̈.
47 Masanil ebꞌ ix abꞌan sloloni,
ix te och qꞌuelan ebꞌ,
yujto te n̈ican,
te jelan pax spacani.
48 Axo ix yilan ebꞌ smam snun chiꞌ,
ix te sat scꞌool ebꞌ.
Axo ix snun chiꞌ ix alani:
—Ach vuneꞌ,
¿tas yuj icha tic tzon̈ utej?
A vin̈ a mam tic yedꞌ in,
te ilcꞌolal caji,
van ach co sayaneqꞌui,
xchi ix dꞌay.
49 Ix tacꞌvi Jesús dꞌa ix icha tic:
—¿Tas yuj tzin e sayeqꞌui?
¿Tom man̈ eyojtacoc to yovalil a smunlajel in Mam tzul in bꞌoꞌo?
xchi.
50 Palta maj nachajel-laj yuj ebꞌ tas ix yalaꞌ.