Ol colchaj Jerusalén yuj Jehová
14
Toxo ol javoc scꞌual yoval scꞌol Jehová. A ebꞌ ajcꞌool, ol spucbꞌat ebꞌ tastac ay dꞌa ebꞌ cajan dꞌa Jerusalén, a dꞌa yol chon̈abꞌ chiꞌ ol spuquecꞌ ebꞌ. 2 A dꞌa jun cꞌual chiꞌ, a Jehová ol molbꞌan masanil nación yic syacꞌan oval yedꞌ Jerusalén. Ol acꞌjoc ganar yuj ebꞌ. Ol icꞌjocbꞌat masanil tastac ay dꞌa yoltac pat yuj ebꞌ. Masanil ebꞌ ix ix ol yixtej ebꞌ ajcꞌool chiꞌ. Ol icꞌchajbꞌat nan̈aloc ebꞌ cajan chiꞌ dꞌa preso yuj ebꞌ. Nan̈alto pax ebꞌ ol can dꞌa Jerusalén chiꞌ. 3 Palta elan̈chamel ol elta Jehová yacꞌ oval yedꞌ juntzan̈ nación chiꞌ, icha ajnac yacꞌan oval dꞌa pecaꞌ. 4 A dꞌa jun cꞌual chiꞌ, ol em tecꞌtecꞌ yoc dꞌa lum tzalan Olivo dꞌa yichan̈ Jerusalén dꞌa stojolal bꞌaj sjavi cꞌu. Ol pojchaj snan̈al jun lum tzalan chiꞌ, ol jacvoc jun nivan chꞌolan, scot dꞌa stojolal bꞌaj sjavi cꞌu, tzꞌecꞌcꞌoch dꞌa stojolal bꞌaj tzꞌem cꞌu. A nan̈aloc jun tzalan chiꞌ, ol bꞌatcan dꞌa stojolal norte, axo nan̈alxo, ol bꞌatcan dꞌa stojolal sur. 5 Axo dꞌa jun chꞌolan chiꞌ ol ex el lemnajoc, yujto ol cꞌochn̈ej dꞌa Azal. Ol ex el lemnaj icha ajnac yel lemnaj ebꞌ e mam eyicham yuj jun quixcabꞌ ecꞌnac ayic ayoch vin̈aj Uzías reyal dꞌa Judá. Axo Jehová co Diosal ol javoc yedꞌ masanil ebꞌ yicxo.6 A dꞌa jun cꞌual chiꞌ, sacleinacn̈ej ol ajoc, man̈toc te sacqꞌuinal, man̈toc te qꞌuicꞌqꞌuinal. 7 A jun cꞌual chiꞌ, an̈ej Jehová ojtannac tas ol ajoc. Malaj junoc cꞌual icha jun cꞌu ol yacꞌ chiꞌ, sacqꞌuinaln̈ej, man̈ cꞌualiloc, man̈ dꞌacꞌvaliloc paxi, yuj chiꞌ ayic ol em cꞌu, man̈ ol qꞌuicꞌbꞌoclaj. 8 A dꞌa jun cꞌual chiꞌ, ol qꞌueul jun a aꞌ dꞌa Jerusalén, ol eln̈ej yoc aꞌ dꞌa n̈abꞌil qꞌuinal yedꞌ dꞌa varesma. A jun aꞌ chiꞌ, nan̈al aꞌ ol bꞌatcan dꞌa aꞌ mar Muerto, axo nan̈alxo aꞌ, ol bꞌatcan aꞌ dꞌa aꞌ mar Mediterráneo. 9 A dꞌa jun cꞌual chiꞌ, a Jehová ol acꞌan yajalil dꞌa masanil yolyibꞌan̈qꞌuinal tic. An̈ej Jehová chiꞌ ol bꞌinajoc yujto an̈ej Dios. 10 Pan̈anxon̈ej ol ajcan lum luum, aton lum sbꞌat dꞌa Geba masanto dꞌa Rimón, dꞌa stojolal sur yic Jerusalén. Axo Jerusalén chiꞌ, chaan̈ ol ajcan icha junoc tzalan. A bꞌaj ol cajnaj ebꞌ anima dꞌa Jerusalén chiꞌ, ol schael dꞌa puerta yic Benjamín, ol ecꞌ dꞌa jun puerta dꞌa pecaꞌ, masanto dꞌa junxo puerta yic yesquinail. Ol bꞌatn̈ej dꞌa storreal yic Hananeel, masanto bꞌaj stecꞌchajel yal sat teꞌ yuva vin̈ rey. 11 A Jerusalén chiꞌ, man̈xa bꞌaqꞌuin̈ ol sateloc. Ol cajnajxoc anima dꞌay, man̈xalaj tas ol sna ebꞌ.
12 A juntzan̈ nación ol acꞌan oval yedꞌ Jerusalén chiꞌ, ol acꞌchaj val och syaelal yuj Jehová. A ebꞌ anima chiꞌ, pitzanto ebꞌ ol syamanoch sbꞌacꞌchil ebꞌ scꞌabꞌati, ol cꞌabꞌat yol sat ebꞌ dꞌa yedꞌtal, ol cꞌapaxbꞌat yacꞌ ebꞌ dꞌa yol stiꞌ. 13 A dꞌa jun cꞌual chiꞌ, ol yacꞌcot nivan xivcꞌolal Jehová dꞌa scal ebꞌ anima chiꞌ. Junjun ebꞌ ol syamlaj sbꞌa yedꞌ mach ajun yedꞌoc, ol smil-lancham sbꞌa ebꞌ. 14 A dꞌa jun cꞌual chiꞌ, ol cot ebꞌ aj Judá scol ebꞌ aj Jerusalén. Ol tocꞌjoc ecꞌ masanil sbꞌeyumal juntzan̈ nación ay dꞌa slacꞌanil chiꞌ yuj ebꞌ, man̈xo jantacoc qꞌuen oro, qꞌuen plata yedꞌ pichul ol smolbꞌej ebꞌ. 15 A jun yaelal ol em dꞌa yibꞌan̈ ebꞌ anima, an̈ejaꞌ ol javocpax dꞌa yibꞌan̈ nocꞌ chej, nocꞌ mula, nocꞌ camello, nocꞌ bꞌuru yedꞌ masanil nocꞌ smolbꞌetzal nocꞌ ebꞌ ajcꞌol ayecꞌ dꞌa scampamento.
16 Ayic ol lajvoc juntzan̈ chiꞌ, a ebꞌ anima olto can dꞌa juntzan̈ chon̈abꞌ ix yacꞌ oval yedꞌ Jerusalén chiꞌ, junjun abꞌil, ol javoc ebꞌ yacꞌoch qꞌuin̈ yic Chinama, yic tzꞌochpax ebꞌ ejmelal dꞌa jun Rey, aton Jehová Yajal dꞌa Smasanil. 17 Tato ay junoc nación dꞌa yolyibꞌan̈qꞌuinal tic man̈ ol javoc dꞌa Jerusalén yic tzꞌoch ejmelal dꞌa jun Rey chiꞌ, man̈xo ol yacꞌlaj n̈abꞌ dꞌa smacbꞌen. 18 Tato ay ebꞌ aj Egipto man̈ ol javoc yacꞌoch qꞌuin̈ yic Chinama, man̈ ol yacꞌpaxlaj n̈abꞌ dꞌa slum ebꞌ. Ol javoc yaelal dꞌa yibꞌan̈ ebꞌ yuj Jehová icha yaelal ol javoc dꞌa yibꞌan̈ juntzan̈ nación max javilaj chiꞌ. 19 Aton val jun yaelal chiꞌ yovalil ol javoc dꞌa yibꞌan̈ Egipto yedꞌ dꞌa yibꞌan̈ juntzan̈xo nación max javi yacꞌoch qꞌuin̈ yic Chinama.
20 A dꞌa jun cꞌual chiꞌ, a dꞌa qꞌuen yunetac campana yedꞌnac nocꞌ chej tzꞌibꞌabꞌiloch icha tic: Yicxon̈ej Jehová yaji, xchi. Yedꞌ qꞌuen chen ol cꞌanchaj dꞌa stemplo Jehová bꞌaj ol tajoc nocꞌ schibꞌejal nocꞌ silabꞌ, yicxon̈ej pax Jehová ol ajoc, icha yaj nivac ucꞌabꞌ scꞌanchaj dꞌa altar. 21 Masanil qꞌuen chen dꞌa Jerusalén yedꞌ dꞌa Judá, yicxon̈ej Jehová Yajal dꞌa Smasanil ol ajoc. A mach sbꞌat yacꞌ junoc silabꞌ taꞌ, syal scꞌanan juntzan̈ chen chiꞌ, syacꞌan tajoc nocꞌ chibꞌej syacꞌ silabꞌil chiꞌ. A dꞌa jun cꞌual chiꞌ, man̈xalaj ebꞌ chon̈vajum ol ilchaj dꞌa stemplo Jehová Yajal dꞌa Smasanil.