13
A dꞌa jun cꞌual chiꞌ, ol jacchaj jun sjaj a aꞌ, yic vachꞌ ol yal sbꞌicchajel smul ebꞌ yin̈tilal vin̈aj David yedꞌ pax schucal ebꞌ yedꞌ yic ebꞌ cajan dꞌa Jerusalén. 2 A in Jehová in tic svalaꞌ to a dꞌa masanil yol jun nación tic, ol vacꞌ satel masanil juntzan̈ comon dios yic vachꞌ man̈xo ol nachajcot sbꞌi. Masanil ebꞌ syaloch sbꞌa in checabꞌoc, ol in satpaxel ebꞌ dꞌa yol nación tic yedꞌ masanil ebꞌ ayoch spensar dꞌa ebꞌ demonio. 3 Yuj chiꞌ, tato ay junoc mach stzꞌac yal in lolonel, axo smam snun ol alan dꞌay icha tic: A ach tic, man̈xo smojoc pitzan ach, ¿tas yuj tza tecꞌbꞌej a bꞌa alanel esal lolonel, tzalani to slolonel Jehová tzalaꞌ? xcham ebꞌ dꞌay. An̈ejaꞌ smam snun chiꞌ ol tecan chamoc, yujto syesejoch sbꞌa in checabꞌoc.4 A dꞌa jun cꞌual chiꞌ, masanil ebꞌ syaloch sbꞌa in checabꞌoc, ol qꞌuixvocqꞌue ebꞌ yuj tas ix chꞌoxchaj yil ebꞌ chiꞌ. Man̈xo ol yacꞌochlaj pichul ebꞌ yic ebꞌ in checabꞌ yic syacꞌan musansatil anima ebꞌ. 5 Palta ol yal junjun ebꞌ icha tic: A in tic, man̈ in schecabꞌoc Dios, an̈ej to munlajvum in. Yictax unin in, ix in cꞌaybꞌaj dꞌa munlajel, xcham ebꞌ. 6 Tato ay junoc mach scꞌanbꞌan dꞌa junoc ebꞌ icha tic: ¿Tas yaj juntzan̈ echen dꞌa a nivanil chiꞌ? tato xchi, ol spacan icha tic: Ix in acꞌji echnaj dꞌa spat ebꞌ vamigo, xcham ebꞌ, xchi Jehová.*
Ol miljoccham Vin̈ stan̈vumal schon̈abꞌ Dios
7 A Jehová Yajal dꞌa Smasanil tzꞌalan icha tic: Icꞌchajocabꞌqꞌue qꞌuen espada yic stecjicham Vin̈ stan̈vumal in chon̈abꞌ, aton Vin̈ lajan vedꞌoc. Miljocabꞌcham Vin̈ tan̈vum calnel chiꞌ, axo nocꞌ calnel chiꞌ ol saclemcanbꞌat nocꞌ. Ol in ochcan ajcꞌolal dꞌa nocꞌ yunetac calnel chiꞌ.
8 A in Jehová in svalaꞌ to a ebꞌ cajan dꞌa jun nación tic, ecꞌto nan̈al ebꞌ ol chamoc. Jayvan̈xon̈ej ebꞌ olto canoc.
9 A ebꞌ olto can chiꞌ, ol vacꞌ yabꞌ syaelal ebꞌ, yic tzꞌelcan schucal ebꞌ, icha tzꞌaj yel smical qꞌuen plata dꞌa scal cꞌacꞌ, ma icha tzꞌaj sbꞌo qꞌuen oro. Ol lajvoc chiꞌ, ol yalan sbꞌa ebꞌ dꞌayin, a inxo ol in tacꞌvoc dꞌa ebꞌ. Ol valani to in chon̈abꞌ ebꞌ, axo ebꞌ ol alan icha tic: Aton val Jehová co Diosal, xcham ebꞌ, xchi Jehová.