Ol colchajel Jerusalén
12
A Jehová, sbꞌoumal satchaan̈ yedꞌ yich yolyibꞌan̈qꞌuinal tic, aꞌ tzꞌacꞌanpax sqꞌuinal ebꞌ anima, aꞌ tzꞌalan yuj chon̈abꞌ Israel icha tic: 2 A in Jehová in tic, a in ol vacꞌlabꞌej Jerusalén, ol ecꞌ quetcon juntzan̈ nación ay dꞌa slacꞌanil yuj xivelal, aton juntzan̈ ol acꞌan oval yedꞌ Jerusalén yedꞌ Judá.3 A dꞌa jun tiempoal chiꞌ, icha junoc qꞌuen qꞌueen te al ol vutejcan Jerusalén dꞌa juntzan̈xo nación. Vachꞌchom masanil nación ol snibꞌej yacꞌ oval yedꞌoc, chocꞌ ol ajcan ebꞌ yuuj. 4 Palta a in ol in tan̈vej ebꞌ yin̈tilal Judá. Ol in te xibꞌtej masanil nocꞌ chej molanecꞌ taꞌ, axo ebꞌ ayqꞌue dꞌa yibꞌan̈ nocꞌ, ol quistalaxcan ebꞌ. Ol vacꞌ qꞌuicꞌyataxcan nocꞌ schej juntzan̈ nación chiꞌ. 5 Ayic ol yilan juntzan̈ tic ebꞌ yajalil Judá, ol yalan ebꞌ icha tic: A val Jehová Yajal dꞌa Smasanil, co Diosal yedꞌ ebꞌ aj Jerusalén, a tzꞌacꞌan yip ebꞌ aj Jerusalén chiꞌ, xcham ebꞌ.
6 A dꞌa jun oval chiꞌ, a ebꞌ yajalil Judá, icha junoc tzacꞌacꞌ chac xilinac tzꞌoch dꞌa scal teꞌ cꞌatzitz ol vutej ebꞌ, ma icha sqꞌue scꞌacꞌal junoc tobꞌan̈ taj tzꞌoch dꞌa scal ixim trigo manojail yaji. Icha chiꞌ ol aj satanel masanil juntzan̈ nación ebꞌ ay dꞌa slacꞌanil Judá. A dꞌa jun tiempoal chiꞌ, man̈ jantacoc ebꞌ anima ol cajnajxoc dꞌa Jerusalén. 7 Palta a in Jehová in tic, bꞌabꞌel ol in colcanel juntzan̈ cotac chon̈abꞌ dꞌa yol yic Judá, yic vachꞌ man̈ ol yicꞌchaan̈ sbꞌa ebꞌ yin̈tilal vin̈aj David yedꞌ masanil ebꞌ cajan dꞌa Jerusalén dꞌa yichan̈ ebꞌ aj Judá chiꞌ. 8 A in Jehová in tic, ol in tan̈vejpax ebꞌ cajan dꞌa Jerusalén chiꞌ. A ebꞌ malaj yip dꞌa scal ebꞌ chiꞌ, tecꞌan ol aj ebꞌ icha vin̈aj rey David dꞌa pecaꞌ. Axo pax ebꞌ yin̈tilal vin̈aj rey David chiꞌ, bꞌabꞌel sbꞌat ebꞌ dꞌa yichan̈ ebꞌ, lajan ol aj stecꞌanil ebꞌ icha in tecꞌanil, ma icha stecꞌanil ebꞌ vángel.
9 A dꞌa jun tiempoal chiꞌ, ol vacꞌ vip in satanel masanil juntzan̈ nación ol yacꞌ oval yedꞌ Jerusalén chiꞌ. 10 Ol vacꞌ Vespíritu dꞌa ebꞌ yin̈tilal vin̈aj David yedꞌ dꞌa juntzan̈xo ebꞌ cajan dꞌa Jerusalén, yic tzꞌocꞌ scꞌol ebꞌ, stevipax ebꞌ dꞌayin. Ayic ol in yilan ebꞌ ix in tecani, ol ocꞌqꞌue ebꞌ icha yocꞌ junoc anima yuj schamel jun cꞌotan̈ yuninal, ma yuj sbꞌabꞌel yuninal. 11 A dꞌa jun cꞌual chiꞌ, ol och val jun nivan cuscꞌolal dꞌa ebꞌ aj Jerusalén, icha tzꞌaj scus ebꞌ anima dꞌa acꞌlic Meguido yuj jun comon dios scuch Hadad-rimón.* 12-14 Junjun macan̈ in̈tilal dꞌa nación chiꞌ, chꞌocchꞌoc yaj ebꞌ ayic ol ocꞌ ebꞌ: Aton yin̈tilal vin̈aj David, yin̈tilal vin̈aj Natán, yin̈tilal vin̈aj Leví, yin̈tilal vin̈aj Simei yedꞌ juntzan̈xo macan̈ in̈tilal, chꞌocchꞌoc bꞌaj ol ocꞌ ebꞌ. Yedꞌ ebꞌ ix yetbꞌeyum ebꞌ, chꞌoc bꞌaj ol ocꞌpax ebꞌ ix.