11
Jacchajocabꞌ bꞌe dꞌa teꞌ cꞌacꞌ yic sbꞌat tzꞌabꞌat teꞌ cꞌuteꞌ dꞌa Líbano.2 Ocꞌocabꞌ teꞌ taj, yujto toxo ix telvi teꞌ cꞌuteꞌ. A juntzan̈ te teꞌ man̈xo jantacoc svachꞌil chiꞌ, toxo ix lajviel teꞌ. Ocꞌocabꞌ teꞌ ji dꞌa yol yic Basán, yujto a teꞌ nivac teꞌ, te cꞌayum, toxo ix chꞌacjiel teꞌ.
3 Abꞌec val yel yav ebꞌ tan̈vum calnel yoqꞌui, yujto man̈xalaj an̈ an̈cꞌultac scꞌux nocꞌ snocꞌ ebꞌ. Abꞌec pax yel yav nocꞌ choj, yujto toxo ix lajviel nivac vayumtac dꞌa stiꞌ aꞌ Jordán.
A chavan̈ ebꞌ tan̈vum calnel
4 Ix yal Jehová in Diosal dꞌayin icha tic: Tan̈vej val nocꞌ calnel to dꞌin̈an smiljichamoc. 5 A ebꞌ smananel nocꞌ, malaj jabꞌoc sna ebꞌ yuj bꞌaj smilcham nocꞌ, axo ebꞌ schon̈an nocꞌ chiꞌ, syal ebꞌ icha tic: Yuj val dios, a ticnaic bꞌeyum on̈xo, xchi ebꞌ. Axo pax ebꞌ stan̈vumal nocꞌ, man̈ jabꞌoc tzꞌocꞌ scꞌol ebꞌ yuj nocꞌ. 6 Ichinpaxtaꞌ a in tic, man̈ jabꞌoc ol ocꞌ in cꞌol dꞌa anima cajan dꞌa sat jun luum tic. A in Jehová in svalaꞌ to ol laj vacꞌoch ebꞌ dꞌa yol scꞌabꞌ ebꞌ yetchon̈abꞌ yedꞌ pax dꞌa yol scꞌabꞌ sreyal ebꞌ. A ebꞌ chiꞌ ol ixtanel sat lum luum tic, man̈xo ol in col-laj ebꞌ anima chiꞌ dꞌa yol scꞌabꞌ ebꞌ, xchi Jehová.
7 Ichato chiꞌ ix in och in tan̈vej nocꞌ calnel dꞌin̈an smiljicham chiꞌ, axo ebꞌ manum calnel chiꞌ ix in tupani. Ix in sayan chabꞌ teꞌ cꞌococh. Ay jun teꞌ ix vacꞌ scuch Vachꞌcꞌolal, axo junxo teꞌ ix vacꞌ scuch Junn̈ej yaji. 8 A dꞌa jun ujal, oxvan̈ ebꞌ tan̈vum calnel chiꞌ ix in chec paxoc, yujto man̈xa in gana dꞌa ebꞌ, man̈xa pax sgana ebꞌ dꞌayin.
9 Ix valan dꞌa nocꞌ calnel chiꞌ icha tic: Man̈xo ol ex in tan̈vej. Tato ay junoc ex tzex chami, chaman̈ec. Tato ay junoc mach tzex milanchamoc, ex miljocabꞌchamoc. A exxo tzex to cani, tze satlajel e bꞌa, xin chi dꞌa nocꞌ.
10 Ix vicꞌanchaan̈ teꞌ in cꞌococh ix vacꞌ scuch Vachꞌcꞌolal, ix in locan can̈chaj teꞌ, yic scheclajeli to slajvi strato Jehová ix sbꞌo yedꞌ masanil chon̈abꞌ. 11 Aton dꞌa jun cꞌu chiꞌ, ix lajvican jun trato chiꞌ, axo ebꞌ ay yic nocꞌ calnel chiꞌ, van yilan ebꞌ tas van in cꞌulan chiꞌ, ix nachajel yuj ebꞌ to a Jehová van slolon yuj tas van in cꞌulan chiꞌ. 12 Ix valan dꞌa ebꞌ icha tic: Tato e gana, aqꞌuec in tojol, tato maay jun, canocabꞌ icha chiꞌ, xin chi dꞌa ebꞌ. Yuj chiꞌ te nivan in tojol ix yacꞌ ebꞌ yalani, 30 n̈ej qꞌuen plata ix yacꞌ ebꞌ dꞌayin.
13 Ix yalan Jehová dꞌayin icha tic: Te jabꞌtzin jabꞌ in tojol ix yacꞌ ebꞌ tic, yuj chiꞌ julcanbꞌat qꞌuen bꞌaj sicꞌchaj qꞌuen tumin dꞌa templo, xchi. Ix vicꞌanbꞌat qꞌueen, ix in yumancanbꞌat qꞌuen bꞌaj sicꞌchaj qꞌuen tumin chiꞌ. 14 Ix in locan can̈chaj junxo teꞌ cꞌococh ix vacꞌ scuch Junn̈ej yaji. Icha chiꞌ ix aj in chꞌoxani to man̈xo junn̈ejoc yaj Judá yedꞌ Israel.
15 Ix yalanxi Jehová dꞌayin icha tic: A ticnaic, utej a bꞌa icha jun tan̈vum calnel man̈ jabꞌoc syacꞌoch scꞌol stan̈van nocꞌ calnel chiꞌ. 16 Yujto ol vacꞌoch junoc stan̈vumal jun nación tic, te chuc ol yutej sbꞌa icha junoc tan̈vum calnel max yacꞌ pensar yuj nocꞌ calnel satbꞌati, max saylaj nocꞌ, max yan̈tejpax nocꞌ echen yaji, max yacꞌpaxlaj svael nocꞌ scham yuj vejel. Palta to schibꞌat nocꞌ bꞌaqꞌuech, masanil qꞌuen yech nocꞌ schibꞌati. 17 Obꞌiltac val jun stan̈vumal in chon̈abꞌ malaj pensar chiꞌ, yujto syactejcan tas stan̈vej. Sicbꞌocabꞌel svachꞌ cꞌabꞌ, tzepjocabꞌel dꞌa qꞌuen espada, icꞌjocabꞌpaxqꞌueta yol sat dꞌa svachꞌ, xchi Jehová.