2 Man̈ ichoctaꞌ spac tzꞌacꞌji dꞌa ebꞌ scꞌanbꞌej yabꞌ dꞌa yechel comon dios yedꞌ dꞌa ebꞌ ajchum. A juntzan̈ ebꞌ chiꞌ, ton̈ej syesej ebꞌ, malaj yelcꞌoch svayich ebꞌ syalaꞌ, ton̈ej tzꞌacꞌji musansatil anima yuj ebꞌ. A slolonel ebꞌ yic syacꞌan snivanil scꞌol ebꞌ anima, malaj jabꞌoc yelcꞌochi. Yuj chiꞌ ton̈ej satecꞌ jun chon̈abꞌ tic icha nocꞌ calnel syabꞌ syail, yujto malaj stan̈vumal.

3 Yuj chiꞌ syal Jehová icha tic: Toxo ix cot voval dꞌa ebꞌ stan̈van in chon̈abꞌ, yuj chiꞌ ol vacꞌoch syaelal ebꞌ. A in Jehová Yajal in dꞌa Smasanil ol in tan̈vej in chon̈abꞌ, aton ebꞌ yin̈tilal Judá. Nivan ol aj yelcꞌoch ebꞌ, icha nocꞌ chej acꞌum oval.

4 A dꞌa scal ebꞌ chiꞌ, ay jun mach ol elta, te nivan ol aj yelcꞌochi, icha junoc qꞌuen qꞌueen te nivan yelcꞌochi, icha junoc estaca yic mantiado, icha pax jul-labꞌ yic oval, aton ol cuchbꞌan ebꞌ.

5 Ol ecꞌ tecꞌton ebꞌ dꞌa yibꞌan̈ ebꞌ yajcꞌool, icha stecꞌanqꞌue socꞌom ebꞌ soldado dꞌa yoltac calle. Ol yacꞌan ganar oval ebꞌ, yujto ay in och yedꞌ ebꞌ. Ol qꞌuixvoccanqꞌue ebꞌ ajcꞌol ayqꞌue dꞌa yibꞌan̈ chej yuj ebꞌ.

6 A in ol vacꞌ stecꞌanil ebꞌ yin̈tilal Judá, ol vacꞌanxi colchajel ebꞌ yin̈tilal vin̈aj José. Ol in cuchbꞌanxi meltzaj ebꞌ dꞌa schon̈abꞌ, yujto tzꞌocꞌ in cꞌol dꞌa ebꞌ. Ol cajnajxoc ebꞌ junelxo, ichato malaj bꞌaj ix vactejcan ebꞌ. A in ton Jehová sDiosal in ebꞌ, ol vabꞌn̈ej tas ol scꞌan ebꞌ dꞌayin.

7 Tecꞌan ol aj ebꞌ aj Israel icha soldado. Ol tzalaj scꞌol ebꞌ icha ebꞌ tzꞌucꞌan vino. Ayic ol yilan jun tic ebꞌ yuninal ebꞌ, ol tzalajpax scꞌol ebꞌ. Ol te tzalaj val scꞌol ebꞌ yuj in colval.

8 Ol in xubꞌan dꞌa ebꞌ yic ol in molbꞌej ebꞌ, yujto colchajnacxo ebꞌ vuuj. Ol te nivanbꞌoc sbꞌisul ebꞌ, icha val ix aj ebꞌ dꞌa pecaꞌ.

9 Ix in saclemejbꞌat ebꞌ dꞌa scaltac nación. Vachꞌchom najat ay ebꞌ, palta ol in nachajcot yuj ebꞌ. Ay val jun cꞌual ol meltzaj ebꞌ yedꞌ yal yuninal.