Ol javoc yaelal dꞌa yibꞌan̈ ebꞌ ajcꞌool
9
Yujto ayoch sat Jehová dꞌa masanil anima, icha yajoch sat dꞌa masanil yin̈tilal Israel, yuj chiꞌ aꞌ tzꞌalan juntzan̈ lolonel tic dꞌa yibꞌan̈ chon̈abꞌ Hadrac yedꞌ dꞌa yibꞌan̈ nivan chon̈abꞌ Damasco. 2 Yuj chiꞌ ol yacꞌcot yaelal dꞌa chon̈abꞌ Hamat, aton ay dꞌa stitac smacbꞌen Damasco chiꞌ. Ol yacꞌpaxcot yaelal chiꞌ dꞌa Tiro yedꞌ dꞌa Sidón, vachꞌchom te jelan spensar ebꞌ. 3 A chon̈abꞌ Tiro chiꞌ, ix sbꞌoqꞌue smuroal, man̈xo jantacoc qꞌuen oro yedꞌ qꞌuen plata ix smolbꞌejqꞌue juyan icha tzꞌaj smolchajqꞌue juyan lum luum. 4 A Dios Yajal ol icꞌanecꞌ masanil sbꞌeyumal chiꞌ, ol syumancanbꞌat dꞌa yol aꞌ mar. Ol tzꞌacanbꞌat jun chon̈abꞌ chiꞌ smasanil.5 Ayic ol yilan jun chiꞌ chon̈abꞌ Ascalón, ol xivbꞌatoc. Ol te och chon̈abꞌ Gaza yedꞌ chon̈abꞌ Ecrón dꞌa ilcꞌolal, yujto ix satel jun chon̈abꞌ ayoch yipoc scꞌol ebꞌ. A Gaza chiꞌ, man̈xalaj sreyal ol canoc. Axo Ascalón, man̈xo junoc anima ol cajnajcan dꞌay. 6 A dꞌa Asdod, chꞌocchꞌoc macan̈il ebꞌ anima ol cajnaj dꞌay. Yuj chiꞌ syal Jehová icha tic: Icha val chiꞌ ol aj in satanel yicꞌojchan̈bꞌail ebꞌ filisteo. 7 Man̈xo ol in cha smilcham anima ebꞌ. A dꞌa scal ebꞌ filisteo chiꞌ, ayto ebꞌ ol canoc, ol ochcan ebꞌ vicoc. Lajan ol ajcan ebꞌ icha junoc macan̈ ebꞌ aj Judá. A ebꞌ aj Ecrón chiꞌ, ol cajnaj ebꞌ dꞌa scal ebꞌ aj Judá icha ebꞌ jebuseo. 8 A in ol in ajn̈ejecꞌ dꞌa in cajnubꞌ, ol in tan̈vejn̈ej, yic malaj junoc soldado ajcꞌol ol och dꞌa yool. Man̈xo ol yixtejpaxlaj in chon̈abꞌ tic ebꞌ, yujto a in val ol in tan̈vej, xchi Jehová.
A sreyal Israel ol javoc
9 A Jehová tzꞌalan icha tic: Tzalajan̈ec ex aj chon̈abꞌ Sion. Bꞌitanan̈ec dꞌa tzalajcꞌolal ex aj Jerusalén. Ina val sjavi e reyal dꞌa e cal dꞌa emnaquilal, te tojol spensar. Aꞌ ol ex colanoc. Ayqꞌue dꞌa yibꞌan̈ jun nocꞌ yuneꞌ bꞌuru, yuneꞌ jun nocꞌ nun bꞌuru.
10 Aꞌ ol acꞌan lajvoquel carruaje yic oval dꞌa Efraín yedꞌ nocꞌ schej ebꞌ aj Jerusalén yedꞌ pax sjul-labꞌ ebꞌ yic oval. Aꞌ ol alanoc to juncꞌolal tzꞌaj masanil nación. Aꞌ ol acꞌan yajalil dꞌa stiꞌ aꞌ mar, masanto dꞌa stiꞌ junxo aꞌ, scotn̈ej dꞌa aꞌ Éufrates, masanto dꞌa slajvubꞌal lum luum.
11 Ex aj Jerusalén, yuj val schiqꞌuil junoc nocꞌ silabꞌ, yuj chiꞌ ay yopisio in trato eyedꞌoc, yuj chiꞌ ol ex vicꞌqꞌueta dꞌa jun olan teꞌ jul yich bꞌaj malaj a aꞌ, aton bꞌaj sacleminac eyajbꞌat dꞌa chꞌoc chon̈abꞌil.
12 Mach ex sacleminac eyajbꞌat chiꞌ, aqꞌuec in och yipoc e cꞌool, meltzajan̈ec bꞌaj vachꞌ ol ex ajoc. A in sval dꞌayex to ol vacꞌxi in vachꞌcꞌolal dꞌa eyibꞌan̈. Ecꞌto ol aj vacꞌanxi in vachꞌcꞌolal dꞌayex dꞌa yichan̈ dꞌa yalan̈taxo.
13 Ol vacꞌlabꞌej Judá icha jul-labꞌ te vachꞌ. Axo Efraín ol vacꞌlabꞌej dꞌa yoloc in jul-labꞌ chiꞌ. Ol vacꞌlabꞌej ebꞌ aj Sion icha vespada yic ol vacꞌan oval yedꞌ ebꞌ aj Grecia, xchi Jehová.
14 A Jehová ol schꞌox sbꞌa dꞌa yibꞌan̈ ebꞌ schon̈abꞌ, icha lebꞌlon ol aj sjulvaji. A Dios Yajal ol puꞌan strompeta, icha oval chacxuxum icꞌ scot dꞌa sur, icha chiꞌ ol aj sbꞌat yacꞌ oval yedꞌ ebꞌ ajcꞌool.
15 A Jehová Yajal dꞌa Smasanil ol colvaj yedꞌ ebꞌ schon̈abꞌ. Ol satjoquel syamcꞌabꞌ yic oval ebꞌ ajcꞌol chiꞌ yuj ebꞌ, chocꞌxon̈ej ol ajcanoc. Ol el val yav ebꞌ chon̈abꞌ chiꞌ icha ucꞌum an̈, yujto ix yacꞌ ganar ebꞌ yajcꞌol ebꞌ chiꞌ. Ol bꞌudꞌjoc val ebꞌ yuj jantac vino ol yuqꞌuej, icha tzꞌaj sbꞌudꞌji nivac ucꞌabꞌ yuj schiqꞌuil nocꞌ silabꞌ, aton stobꞌjiecꞌ dꞌa schꞌaac altar.
16 A dꞌa jun cꞌual chiꞌ, a Jehová ol colanel schon̈abꞌ icha tzꞌaj scolan nocꞌ calnel junoc yilumal. Tziquiqui ol aj yilji ebꞌ dꞌa yol schon̈abꞌ, icha yilji qꞌuen qꞌueen te vachꞌ yilji dꞌa junoc corona.
17 Man̈ jantacoc svachꞌil ol aj masanil tas dꞌa schon̈abꞌ chiꞌ, yujto te vachꞌ ol aj ixim trigo yedꞌ vino. Vachꞌn̈ej ol aj sqꞌuibꞌ ebꞌ quelemtac yedꞌ ebꞌ ix cobꞌestac dꞌay.