Ol yacꞌxi svachꞌcꞌolal Jehová dꞌa Jerusalén
8
A Jehová Yajal dꞌa Smasanil ix alan dꞌayin icha tic: 2 A in Jehová in sval icha tic: Te aycot yoval in cꞌol yuj tas tzꞌutaj Sion. 3 Ol in meltzaj dꞌa Jerusalén yic tzin cajnajxi taꞌ. Ichato chiꞌ a Jerusalén chiꞌ, Chon̈abꞌ Cꞌanabꞌajum ol sbꞌiejxicani. Axo in tzalan a in Jehová Yajal in dꞌa Smasanil, ol scuch tzalan Yicn̈ej Jehová. 4 A ebꞌ vin̈ ichamtac vinac yedꞌ ebꞌ ix chichimtac ix, ol emxoc cꞌojan ebꞌ bꞌajtac smolbꞌej sbꞌa anima dꞌa Jerusalén. Cꞌocochteꞌxon̈ej ol ecꞌ ebꞌ yuj icham animail. 5 Axo bꞌaj smolbꞌej sbꞌa ebꞌ anima chiꞌ, ol bꞌudꞌjoc yuj ebꞌ unin stajni taꞌ. 6 A ebꞌ anima aycan dꞌa yol in chon̈abꞌ tic, toxon̈ej ol sat scꞌol ebꞌ yilan jun chiꞌ. Palta a in tic, man̈ ol satlaj in cꞌol vilani. A in ton Jehová in sval juntzan̈ tic. 7 A in ol in col in chon̈abꞌ dꞌa yol scꞌabꞌ juntzan̈ nación dꞌa stojolal bꞌaj sjavi cꞌu yedꞌ bꞌaj tzꞌem cꞌu. 8 Ol vicꞌanxicot ebꞌ, ol cajnajxoc ebꞌ dꞌa Jerusalén tic. Ol ochxoc ebꞌ in chon̈abꞌoc, ol in ochn̈ej sDiosaloc ebꞌ. Ol vacꞌxi yajalil dꞌa ebꞌ dꞌa stojolal, icha ix aj valani, xchi Jehová.9 A Jehová Yajal dꞌa Smasanil tzꞌalan icha tic: A ex ix eyabꞌ juntzan̈ lolonel ix yalel ebꞌ in checabꞌ atax ix em yich sbꞌojixi in templo, aqꞌuec eyip, munlajan̈ec e masanil. 10 A dꞌa yalan̈tax juntzan̈ cꞌual chiꞌ, malaj bꞌaj scot stojol ebꞌ vin̈ munlajvum yedꞌ stojol nocꞌ chej smunlaji. Yuj ebꞌ ajcꞌool, man̈ juncꞌolaloc tzex bꞌeyeqꞌui, an̈ejtonaꞌ a in ix vacꞌ eyajcꞌolej e bꞌa. 11 Palta axo ticnaic, a in Jehová Yajal in dꞌa Smasanil svalaꞌ to man̈xo ol in cꞌulej dꞌayex a ex tzex can dꞌa jun chon̈abꞌ tic, icha ix in cꞌulej dꞌa yalan̈tax chiꞌ. 12 Dꞌa juncꞌolal ol ex ajoc, ol yacꞌ n̈abꞌ, yuj chiꞌ a teꞌ eyuva, ol ste aqꞌuej sat teꞌ, ol yacꞌ val sat tas tzeyavej dꞌa sat e luum. A inxo ol vacꞌ masanil juntzan̈ tic dꞌayex a ex janac exxi dꞌa jun chon̈abꞌ tic. 13 Ex aj Judá yedꞌ ex aj Israel, icha ix aj e bꞌinaj dꞌa scatabꞌ juntzan̈xo chon̈abꞌ, icha pax chiꞌ ol aj e bꞌinaj yuj ebꞌ dꞌa vachꞌilal, yujto a in ol ex in coleli. Man̈ ex xivoc, tecꞌbꞌejec e bꞌa.
14 A in ton Jehová Yajal in dꞌa Smasanil sval icha tic: Ix in naꞌ vacꞌoch syaelal ebꞌ e mam eyicham ayic ix stzuntzancot voval ebꞌ. A tas ix in naꞌ chiꞌ, ix in cꞌulej. 15 Ichapax chiꞌ ticnaic, ix in naꞌ to ol vacꞌ in vachꞌcꞌolal dꞌa Jerusalén yedꞌ dꞌa Judá. Yuj chiꞌ man̈ ex xivoc. 16 Aton val juntzan̈ tic yovalil tze cꞌulej: An̈ej tas yel tzeyal-laj dꞌayex junjun ex. Tze chꞌolbꞌitej yaj tas dꞌa stojolal, yic vachꞌ ay juncꞌolal dꞌa e cal. 17 Man̈ eyacꞌ chucal dꞌayex junjun ex, man̈ eyacꞌ e tiꞌ dꞌa esal dꞌayex junjun ex. A in Jehová in svalaꞌ, val yel malaj in gana dꞌa juntzan̈ bꞌeybꞌal chiꞌ, xchi Jehová.
18 Ix yalanxi Jehová Yajal dꞌa Smasanil dꞌayin icha tic: 19 Ex yin̈tilal Judá, a tzecꞌojcꞌolal tzꞌoch dꞌa schan̈il uj, dꞌa yoil, dꞌa yuquil yedꞌ dꞌa slajun̈il uj, ol meltzajcanoch dꞌa qꞌuin̈al yuj e tzalajcꞌolal. Yuj chiꞌ, bꞌeybꞌalejec tojolal yedꞌ juncꞌolal, xchi Jehová.
20 A Jehová Yajal dꞌa Smasanil tzꞌalan icha tic: Ol cot anima dꞌa juntzan̈xo nivac nación, ol javoc ebꞌ dꞌa Jerusalén tic. 21 A ebꞌ anima dꞌa junoc nación, ol ecꞌ yal ebꞌ dꞌa ebꞌ ay dꞌa junocxo icha tic: Coyec, bꞌat caqꞌuequem co bꞌa dꞌa Jehová Yajal dꞌa Smasanil yic syacꞌ svachꞌcꞌolal dꞌayon̈. Coyec elan̈chamel quedꞌoc, xcham ebꞌ. 22 Yuj chiꞌ man̈xo jantacoc anima dꞌa nivac nación te ay yip ol ja dꞌa Jerusalén tic, ol ul yaqꞌuem sbꞌa ebꞌ dꞌayin a in Jehová Yajal in dꞌa Smasanil, yic scꞌanan in vachꞌcꞌolal ebꞌ dꞌa yibꞌan̈. 23 A dꞌa jun tiempoal chiꞌ, lajun̈van̈ ebꞌ chꞌoc chon̈abꞌil tzꞌalan chꞌoc tiꞌal ol och tzuctzuc dꞌa spichul junoc aj Judá, ol yalan ebꞌ icha tic: Sco nibꞌej tzon̈ bꞌat edꞌoc, yujto ix cabꞌi to a Dios ayoch eyedꞌoc, xcham ebꞌ, xchi Jehová.