A tzecꞌojcꞌolal man̈ chabꞌiloc yuj Dios
7
A dꞌa schan̈il cꞌual yoch sbꞌalun̈il uj, (aton uj scuchan Quisleu), ayic schan̈il abꞌil yoch vin̈aj Darío reyal, ataꞌ ix lolon Jehová dꞌayin Zacarías in tic. 2 A dꞌa jun cꞌu chiꞌ, a ebꞌ aj Betel ix checancot vin̈aj Sarezer, vin̈aj Regem-melec yedꞌ juntzan̈xo ebꞌ vin̈ vinac dꞌa stemplo Jehová Yajal dꞌa Smasanil, yic scꞌanan svachꞌcꞌolal Jehová chiꞌ ebꞌ vin̈ dꞌa yibꞌan̈. 3 Ix scꞌanbꞌan ebꞌ vin̈ dꞌa ebꞌ vin̈ schecabꞌ Jehová yedꞌ dꞌa ebꞌ vin̈ sacerdote icha tic: Dꞌa yoil uj dꞌa junjun abꞌil tzon̈ och dꞌa tzecꞌojcꞌolal, scacꞌanoch pichul yic cuscꞌolal yic sco naancot bꞌaj juchajnac em templo. ¿Ol am co cꞌulejn̈ej icha chiꞌ, mato man̈xo? xchi ebꞌ vin̈.*4 Axo Jehová ix alan dꞌayin icha tic: 5 Al dꞌa masanil ebꞌ anima ay dꞌa yol nación tic yedꞌ dꞌa ebꞌ vin̈ sacerdote: A ex tic, 70 abꞌilxo e bꞌeybꞌalan eyacꞌanoch pichul yic cuscꞌolal yedꞌ eyoch dꞌa tzecꞌojcꞌolal dꞌa yoil uj yedꞌ dꞌa yuquil uj, palta man̈ yujoc in eyicꞌanchaan̈ tze cꞌulej jun chiꞌ. 6 An̈ejaꞌ ayic tzex vaꞌi, tzeyucꞌan aꞌ, yicn̈ej tzeyacꞌ tzalajbꞌoc e cꞌool e chꞌocoj, xchi Jehová, xa chi. 7 A tas sval tic dꞌayex, aton yalnac ebꞌ schecabꞌ Jehová dꞌa pecaꞌ, ayic juncꞌolal yajecꞌ Jerusalén, tzijtum anima cajan dꞌay, tzijtum pax chon̈abꞌ oyanoch dꞌa spatictac yedꞌ dꞌa smacbꞌen Neguev yedꞌ dꞌa acꞌlic.
8 Yuj chiꞌ a Jehová tzꞌalan icha tic: 9 Aton val juntzan̈ tic valnac dꞌa ebꞌ in chon̈abꞌ dꞌa pecaꞌ: Vachꞌ tzeyutej e chꞌolbꞌitan ebꞌ eyetanimail, vachꞌ tzeyutej e cꞌool, ocꞌocabꞌ e cꞌol dꞌayex junjun ex. 10 Man̈ eyacꞌ chucal dꞌa ebꞌ ix ix chamnacxo yetbꞌeyum, ma ebꞌ unin man̈xa smam. Man̈ eyixtejpax ebꞌ chꞌoc chon̈abꞌil, ma ebꞌ mebꞌaꞌ. Man̈ e na eyacꞌ chucal dꞌayex junjun ex, xin chi dꞌa ebꞌ in checabꞌ chiꞌ, xchi Jehová. 11 Palta a ebꞌ co mam quicham chiꞌ, maj scꞌanabꞌajej ebꞌ, chꞌoc bꞌaj ix yacꞌoch spensar ebꞌ smasanil, chacan̈ ix yutej sbꞌa ebꞌ. 12 Ix yacꞌan pitbꞌoc spensar ebꞌ icha qꞌuen yaxqꞌueen, yic vachꞌ max scha yabꞌ ebꞌ tas ix yal Jehová Yajal dꞌa Smasanil yuj Yespíritu dꞌa ebꞌ schecabꞌ dꞌa pecaꞌ, aton juntzan̈ cꞌaybꞌubꞌal yedꞌ checnabꞌil.
Yuj chiꞌ ix te cot yoval scꞌol Jehová dꞌa ebꞌ, 13 ix yalan icha tic: Yujto max scha yabꞌ ebꞌ dꞌayin ayic tzin lolon dꞌa ebꞌ, ichinpaxtaꞌ a in tic, man̈ ol in tacꞌvoc dꞌa ebꞌ ayic ol tevoc ebꞌ dꞌayin. 14 Yuj chiꞌ ix vacꞌ saclem ebꞌ, icha syutej cꞌalem chacxuxum icꞌ. Ix bꞌatcan ebꞌ dꞌa juntzan̈ nación man̈ yojtacoc. Axo snación ebꞌ, ix can tzꞌinan, man̈xalaj junoc anima ix cajnajcan dꞌay. A snación ebꞌ te nibꞌabꞌil chiꞌ, ix can tzꞌinan, xchi Jehová.