A chan̈eꞌ carruaje yic oval
6
Ay pax junxo ix chꞌoxji vilaꞌ. Ix vil yelta chan̈eꞌ carruaje yic oval dꞌa scal snan̈al chabꞌ tzalan nabꞌa bronce. 2 A jun bꞌabꞌel carruaje, n̈erbꞌil yuj nocꞌ chacchac chej. Axo jun schabꞌil, qꞌuiqꞌuicꞌ yilji nocꞌ n̈erjinac. 3 Axo jun yoxil, sacsac yilji nocꞌ n̈erjinac. Axo junxo schan̈il, sacbꞌalinac yilji nocꞌ n̈erjinac.4 Ix in cꞌanbꞌan dꞌa jun ángel van slolon chiꞌ vedꞌoc icha tic: Mamin, ¿tas val syalelcꞌoch junxo tic? xin chi dꞌay. 5 Ix yalan dꞌayin icha tic: A juntzan̈ nocꞌ chej yedꞌ carruaje tic, a chan̈eꞌ espíritu schꞌoxoꞌ. A Dios Yajal dꞌa masanil yolyibꞌan̈qꞌuinal, a schecancot ebꞌ. 6 A jun carruaje n̈erbꞌil yuj nocꞌ qꞌuiqꞌuicꞌ chej chiꞌ, sbꞌat dꞌa jun nación dꞌa stojolal norte. Axo jun carruaje n̈erbꞌil yuj nocꞌ sacsac chej chiꞌ, sbꞌat dꞌa stojolal bꞌaj tzꞌem cꞌu. Axo junxo carruaje n̈erbꞌil yuj nocꞌ chej sacbꞌalinac chiꞌ, sbꞌat dꞌa stojolal sur, xchi jun ángel chiꞌ.
7 A juntzan̈ nocꞌ chej te ay yip chiꞌ, ix tzalaj nocꞌ sbꞌat sbꞌeytzitej masanil yolyibꞌan̈qꞌuinal tic. Ix yalan jun ángel chiꞌ dꞌa nocꞌ icha tic: Ixiquec e bꞌeytzitej masanil yolyibꞌan̈qꞌuinal tic, xchi dꞌa nocꞌ. Ix bꞌat nocꞌ bꞌian.
8 Ix lajvi chiꞌ, ix avajcot jun ángel chiꞌ dꞌayin icha tic: Ilnabꞌ val, a jun carruaje ix bꞌat dꞌa jun nación dꞌa stojolal norte, aꞌ ol bꞌoan tas nabꞌil vuuj taꞌ, xchi.
Ix acꞌjiqꞌue scorona vin̈aj Josué
9 Ix yalan Jehová dꞌayin icha tic: 10 Cha yofrenda ebꞌ meltzajnaccot dꞌa Babilonia: Aton vin̈aj Heldai, vin̈aj Tobías yedꞌ vin̈aj Jedaías. An̈ejtonaꞌ dꞌa jun cꞌu chiꞌ, tzach bꞌatpax dꞌa spat vin̈aj Josías yuninal vin̈aj Sofonías. 11 A yedꞌ qꞌuen plata yedꞌ qꞌuen oro ol a cha chiꞌ tza bꞌo junoc corona, tzacꞌanqꞌue dꞌa sjolom vin̈aj Josué, aton vin̈ sat sacerdote yuninal vin̈aj Josadac. 12 Tzalan dꞌa vin̈ icha tic: A Jehová Yajal dꞌa Smasanil tzꞌalani: Ay jun vinac scuchan Svol, ol tecꞌcꞌaj bꞌaj ayeqꞌui, aꞌ ol bꞌoanxiqꞌue in templo. 13 Aton dꞌin̈antaxon sbꞌoanxiqꞌue in templo chiꞌ, ol bꞌinaj val icha junoc rey, ol em cꞌojan dꞌa sdespacho yic syacꞌan yajalil. A dꞌa stzꞌey sdespacho chiꞌ ol em cꞌojan jun vin̈ sacerdote, junn̈ej pensaril ol aj ebꞌ schavan̈il, xa chi dꞌa vin̈. 14 A corona ol acꞌ bꞌo chiꞌ, scan dꞌa in templo yic snachajcot vin̈aj Heldai, vin̈aj Tobías, vin̈aj Jedaías yedꞌ vin̈aj Hen yuninal vin̈aj Sofonías, xchi Jehová dꞌayin.
15 Ol cot ebꞌ anima dꞌa najat, ol colvaj ebꞌ eyedꞌoc yic sbꞌochajxiqꞌue stemplo Jehová. Icha chiꞌ ol aj snachajel eyuuj to a Jehová Yajal dꞌa Smasanil ix in checancot val dꞌayex. A jun tic ol ujoc tato tze cꞌanabꞌajej dꞌa smasanil e cꞌool tas syal Jehová co Diosal.