A jun tzꞌecꞌ jen̈en̈oc bꞌaj tzꞌibꞌabꞌiloch lolonel
5
Ay junxo ix chꞌoxji vilaꞌ. Ay jun bꞌaj tzꞌibꞌabꞌiloch juntzan̈ lolonel, tzꞌecꞌ jen̈en̈oc ix vilaꞌ. 2 Axo jun ángel chiꞌ ix cꞌanbꞌan dꞌayin icha tic: ¿Tas jun tzil chiꞌ? xchi dꞌayin. Ix valan dꞌay: Ay jun bꞌaj tzꞌibꞌabꞌiloch juntzan̈ lolonel tzꞌecꞌ jen̈en̈oc svilaꞌ. Bꞌalun̈eꞌ metro scꞌatul, nan̈al yoil metro sat, xin chi.3 Ix yalan dꞌayin icha tic: Ataꞌ tzꞌibꞌabꞌiloch jun yaelal ol ja dꞌa yibꞌan̈ masanil ebꞌ chuc dꞌa jun nación tic. Icha syal tas tzꞌibꞌabꞌiloch dꞌa junoc pacꞌan̈, ol satel masanil ebꞌ elcꞌum. Icha syal tas tzꞌibꞌabꞌiloch dꞌa junxo pacꞌan̈, ol satel masanil ebꞌ syacꞌ stiꞌ dꞌa esal. 4 A Jehová Yajal dꞌa Smasanil tzꞌalan icha tic: A in ol vacꞌbꞌat jun yaelal tic, yic vachꞌ tzꞌoch dꞌa yol spat ebꞌ elcꞌum yedꞌ ebꞌ slocan in bꞌi dꞌa esal. Ol ajn̈ej ecꞌ jun yaelal chiꞌ dꞌa yol spat ebꞌ chiꞌ, masanto man̈xa junoc teꞌ patzabꞌ, ma junocxo qꞌuen qꞌueen ol canoc, xchi Jehová, xchi jun ángel chiꞌ dꞌayin.
A jun ix ix ayem dꞌa yol jun echlabꞌ
5 Ix lajvi chiꞌ, ix javi jun ángel dꞌa in tzꞌey, ix yalan dꞌayin icha tic: Scham val ilan jun van schꞌoxanqꞌue sbꞌa chiꞌ, xchi dꞌayin. 6 Ix in cꞌanbꞌan dꞌay: ¿Tas jun chiꞌ? xin chi. Ix yalan dꞌayin: A jun chiꞌ, echlabꞌ. Aton schꞌoxancot schucal ebꞌ anima cajan dꞌa jun nación tic, xchi.
7 A jun echlabꞌ chiꞌ, plomo ayoch smaculoc stiꞌ. Axo yic ix icꞌjichaan̈ jun smacul chiꞌ, a jun ix ix cꞌojanem dꞌa yol jun echlabꞌ chiꞌ. 8 Ix yalan jun ángel chiꞌ dꞌayin icha tic: A jun ix ix, ix il chiꞌ, aton mul schꞌoxcot ix, xchi. Ix lajvi chiꞌ, ix ecjicanem ix dꞌa yol jun echlabꞌ chiꞌ yuj jun ángel chiꞌ, ix smacancan stiꞌ yedꞌ jun smacul nabꞌa plomo chiꞌ.
9 Ix vilanpaxi, ay chavan̈ ebꞌ ix ix van scot jen̈en̈oc yuj yipal icꞌ. A ebꞌ ix chiꞌ, ay scꞌaxil ebꞌ ix icha yic nocꞌ julumchay, ix yicꞌanqꞌue jun echlabꞌ chiꞌ ebꞌ ix, ix bꞌatxi jen̈en̈oc ebꞌ ix.
10 Ix in cꞌanbꞌanxi dꞌa jun ángel van slolon chiꞌ vedꞌoc icha tic: ¿Bꞌajtil syicꞌbꞌat jun echlabꞌ chiꞌ ebꞌ ix ix chiꞌ? xin chi dꞌay. 11 Ix yalan dꞌayin: Ol bꞌat sbꞌo jun templo ebꞌ ix dꞌa Babilonia. Ayic toxo ix bꞌoel jun templo chiꞌ, ol sbꞌoanoch cꞌojan jun echlabꞌ chiꞌ ebꞌ ix dꞌa yibꞌan̈ sbꞌachnubꞌal, xchi dꞌayin.