Jun sbꞌachnubꞌ candil yedꞌ chabꞌ teꞌ olivo
4
Ix meltzajcot jun ángel ix lolon chiꞌ vedꞌoc, ix xibꞌtanel in vayan̈, icha yel lenaj svayan̈ junoc mach vaynacbꞌati. Ix scꞌanbꞌan dꞌayin icha tic: 2 ¿Tas tzilaꞌ? xchi dꞌayin. Ix valan dꞌay: Svil jun bꞌachnubꞌ candil nabꞌa oro yedꞌ jun yedꞌtal aceite ayqꞌue dꞌa yibꞌan̈. A dꞌa jun bꞌachnubꞌ chiꞌ, ayoch uqueꞌ candil. Junjun candil chiꞌ ay stuboal tzꞌicꞌan bꞌey aceite chiꞌ. 3 Junn̈ej ay chabꞌ teꞌ olivo yedꞌ jun bꞌachnubꞌ candil chiꞌ, jun teꞌ ayoch dꞌa svachꞌ, aypaxoch junxo teꞌ dꞌa sqꞌuexan̈, xin chi dꞌay.4 Ix in cꞌanbꞌan pax dꞌay icha tic: Mamin, ¿tas val syalelcꞌoch jun tic? xin chi dꞌay. 5 Ix yalan dꞌayin: ¿Tom man̈ ojtacoc tas syalelcꞌochi? xchi dꞌayin. Ix valani: Maay mamin, xin chi dꞌay.*
6 Ix yalanxi jun ángel chiꞌ dꞌayin icha tic: Aton jun lolonel tic syal Jehová Yajal dꞌa Smasanil dꞌa vin̈aj Zorobabel: Man̈ yujoc ebꞌ soldado, man̈ yujoc pax ipalil, palta a yuj Vespíritu ol yal uuj. 7 Ach Zorobabel, vachꞌchom te ajaltac sbꞌo in templo icha nivac vitz, palta malaj ol och dꞌayach. A ach ol acꞌoch qꞌuen lajvubꞌ qꞌueen nivan yelcꞌochi, yacbꞌan tzꞌel yav masanil ebꞌ chon̈abꞌ icha tic: Te vachꞌ yilji. Ayocabꞌ svachꞌcꞌolal Dios dꞌa yibꞌan̈, xcham ebꞌ, xchi Jehová, xchi jun ángel chiꞌ.
8 Ix lajvi chiꞌ, ix yalan Jehová dꞌayin icha tic: 9 A vin̈aj Zorobabel ix acꞌanem yich jun templo tic, an̈ejaꞌ vin̈ ol lajanpaxoc. Ichato chiꞌ, ol nachajel yuj in chon̈abꞌ to a in Jehová Yajal in dꞌa Smasanil ix ach in checbꞌat alaꞌ. 10 A juntzan̈ ebꞌ tzꞌalani to malaj svachꞌil jun templo ayic ex el yich sbꞌoi, ayic ol yilanoch ebꞌ to van yacꞌanoch plomo vin̈aj Zorobabel dꞌa qꞌuen lajvubꞌ qꞌueen, ol tzalajqꞌue ebꞌ, xchi Jehová.
Ix lajvi juntzan̈ tic, ix yalan jun ángel chiꞌ icha tic: A uqueꞌ candil tic, aton schꞌoxancot yol sat Jehová, to syil dꞌa masanil yolyibꞌan̈qꞌuinal, xchi dꞌayin.
11 Ix in cꞌanbꞌanxi dꞌay: ¿Tas pax syalelcꞌoch chabꞌ teꞌ olivo chiꞌ, junjun teꞌ dꞌa stzꞌeytac jun bꞌachnubꞌ candil chiꞌ? xin chi dꞌay. 12 Ix in cꞌanbꞌanpaxi: ¿Tas syalelcꞌoch chabꞌ scꞌabꞌ teꞌ olivo junn̈ej yaj yedꞌ chabꞌ tubo nabꞌa oro bꞌaj tzꞌem aceite chiꞌ? xin chi. 13 Ix tacꞌvi jun ángel chiꞌ dꞌayin icha tic: ¿Tom man̈ ojtacoc tas syalelcꞌochi? xchi dꞌayin. Maay mamin, man̈ vojtacoclaj, xin chi.
14 Ix yalan dꞌayin: Aton chabꞌ scꞌabꞌ tic schꞌoxancot ebꞌ chavan̈ sicꞌbꞌileli, aton ebꞌ tzꞌacꞌan servil Jehová, aton Yajal dꞌa Smasanil yolyibꞌan̈qꞌuinal tic, xchi jun ángel chiꞌ.