Ix qꞌuexjiel spichul vin̈aj Josué
3
Ix chꞌoxji vilaꞌ to a vin̈aj Josué, aton vin̈ sat sacerdote, lin̈anoch vin̈ dꞌa yichan̈ Yángel Jehová. A dꞌa stojolal svachꞌ vin̈aj Josué chiꞌ, ataꞌ lin̈anoch vin̈ Satanás, yic syaloch smul vin̈aj Josué chiꞌ vin̈. 2 Ix yalan Yángel Jehová chiꞌ dꞌa vin̈ Satanás chiꞌ icha tic: A Jehová ix sicꞌanel chon̈abꞌ Jerusalén, a tzach cachani. Yujto a jun vin̈ vinac tic, lajan vin̈ icha junoc cuxcꞌacꞌ tzꞌicꞌchajelta dꞌa yol cꞌacꞌ, xchi. 3 A vin̈aj Josué chiꞌ, te mictac spichul vin̈ ayochi, lin̈ann̈ejoch vin̈ dꞌa yichan̈ Yángel Jehová chiꞌ. 4 A Yángel Jehová chiꞌ ix alan dꞌa juntzan̈ schecabꞌ lin̈anoch dꞌa yichan̈ to tzꞌicꞌchajel spichul vin̈aj Josué te mictac ayochi. Ix yalanpax dꞌa vin̈aj Josué chiꞌ icha tic: Scham val ilani, a syalelcꞌoch jun tic to a in svicꞌcanel a mul. A ticnaic ol vacꞌ cꞌapac pichul yic qꞌuin̈ acꞌochi, xchi. 5 Ix lajvi chiꞌ, ix valani: Comonoc val tzꞌacꞌchajqꞌue junoc cꞌox te sac dꞌa sjolom vin̈aj Josué chiꞌ, xin chi. Ix yacꞌanqꞌue ebꞌ bꞌian. Ix lajvi chiꞌ ix yacꞌanoch pichul yic qꞌuin̈ chiꞌ ebꞌ dꞌa vin̈, yacbꞌan lin̈ann̈ejecꞌ Yángel Jehová chiꞌ taꞌ.6 Ix lajvi chiꞌ, ix yalan Yángel Jehová dꞌa vin̈aj Josué chiꞌ icha tic: 7 Aton val juntzan̈ tic syal Jehová Yajal dꞌa Smasanil dꞌayach: Cha abꞌ tas svalaꞌ, tza cꞌanabꞌajann̈ej masanil tas svacꞌ a cꞌulej. Tato ol a cꞌulej masanil juntzan̈ chiꞌ, ol ach ochcan yilumaloc in templo, ol a tan̈vann̈ej yedꞌ yamaqꞌuil. A in ol vacꞌ opisio och dꞌa vichan̈ icha ebꞌ in checabꞌ ayecꞌ dꞌa vichan̈ tic. 8 Ach Josué, scham val abꞌani, a ach tic, sat sacerdote aji. Scham yabꞌanpax ebꞌ ayoch dꞌa yopisio edꞌoc, yujto a ex tic, chꞌoxnabꞌil eyaj yuj junoc tas toxo val ol ujoc. Ol vicꞌcot in checabꞌ, aton jun scuch Svol.* 9 A in svacꞌoch jun qꞌuen qꞌueen uqueꞌ pacꞌan̈ dꞌa yichan̈ vin̈aj Josué. A in ol in tzꞌibꞌej och dꞌa qꞌueen icha tic: Junn̈ej cꞌual ol aj vicꞌanel smul ebꞌ cajan dꞌa jun nación tic. 10 A dꞌa jun cꞌual chiꞌ, ol eyavtej e bꞌa. Dꞌa tzalajcꞌolal ol aj eyicꞌan eyip dꞌa yalan̈ yen̈ul xil teꞌ eyuva yedꞌ teꞌ eyigo. A in Jehová Yajal in dꞌa Smasanil sval jun tic, xchi Jehová, xchi jun ángel chiꞌ.