3 Yuj chiꞌ, ix vilan sbꞌat jun ángel van slolon chiꞌ vedꞌoc. Ay junxo ángel chiꞌ ix elta ul schaꞌa, aꞌ ix alan dꞌay: 4 Ixic dꞌa elan̈chamel, al dꞌa vin̈ quelem chiꞌ icha tic: A Jerusalén, man̈xo ol yal-laj yoch smuroal, yujto a ebꞌ anima ol cajnajxoc dꞌay, man̈xo jantacoc ol aj sbꞌisul ebꞌ. Ol te qꞌuibꞌpaxchaan̈ nocꞌ smolbꞌetzal nocꞌ ebꞌ. 5 Palta a Jehová tzꞌalani: A in ol in och oyan dꞌa spatictac Jerusalén chiꞌ icha junoc cꞌacꞌ, icha muro. Ol in chꞌox in tziquiquial dꞌa scal chon̈abꞌ chiꞌ, xchi Jehová, xa chi, xchi jun ángel chiꞌ.

6-7 A Jehová tzꞌalan icha tic: A in ix ex vacꞌ saclembꞌat dꞌa masanil yolyibꞌan̈qꞌuinal. Palta a ticnaic, sval dꞌayex icha tic: Ex aj Sion, elan̈eccot elan̈chamel dꞌa Babilonia ay dꞌa stojolal norte bꞌaj sacleminac eyajcanbꞌati, xchi Jehová.

8-9 A Jehová Yajal dꞌa Smasanil, schecan val juntzan̈ lolonel tic dꞌa juntzan̈ nación ix ex pechan saclem a ex schon̈abꞌ ex tic. A tzꞌalan icha tic: Yaln̈ej mach tzꞌixtan in chon̈abꞌ tic, ichato a snenal yol in sat syixtej. Yuj chiꞌ a in ol vacꞌ oval yedꞌ juntzan̈ nación chiꞌ, a in ol in chec ebꞌ ayoch schecabꞌoc ebꞌ yic a ebꞌ ol icꞌanecꞌ jantac sbꞌeyumal ebꞌ, xchi Jehová. Icha chiꞌ ol aj schꞌoxan sbꞌa stziquiquial Jehová, icha pax chiꞌ ol aj snachajel eyuuj to aꞌ ix in checancot val dꞌayex.

10 A Jehová tzꞌalan icha tic: Bꞌitanan̈ec dꞌa tzalajcꞌolal ex aj Sion, yujto ol in cꞌochoc, ol in cajnaj dꞌa e cal, xchi Jehová. 11 Ayic ol ujoc jun tic, tzijtum nación ol javoc dꞌa Jehová, ol och schon̈abꞌoc. Ol cajnajn̈ej Jehová chiꞌ dꞌa e cal. Icha chiꞌ ol aj snachajel eyuuj to a Jehová Yajal dꞌa Smasanil ix in checancot dꞌayex. 12 A Jehová, ol yacꞌ checlaj dꞌa sat lum luum yictaxoni to a Judá yicoꞌ, axo pax Jerusalén sicꞌbꞌilel yuuj. 13 Numcꞌajocabꞌ masanil anima dꞌa yolyibꞌan̈qꞌuinal dꞌa yichan̈ Jehová, yujto van scot yuj ebꞌ schon̈abꞌ, van yelta dꞌa yol scajnubꞌ yicn̈ej yaji.