2-3 A in Jehová Yajal in dꞌa Smasanil, ix te cot voval dꞌa ebꞌ a mam icham, yuj chiꞌ al tas sval tic dꞌa ebꞌ etchon̈abꞌ: A in Jehová in svalaꞌ, meltzajan̈ecxicot dꞌayin yic ol in meltzajxipaxbꞌat dꞌayex. 4 Man̈ e pitej e bꞌa icha ix aj spitan sbꞌa ebꞌ e mam eyicham chiꞌ. Ix yal ebꞌ in checabꞌ dꞌa ebꞌ dꞌa pecaꞌ chiꞌ: Icha val tic yalan Jehová Yajal dꞌa Smasanil: Naecval e bꞌa dꞌa e chuc pensaril yedꞌ pax dꞌa chucal tze cꞌulej, xchi Jehová, xchi ebꞌ in checabꞌ chiꞌ, palta maj scha yabꞌ ebꞌ, maj scꞌanabꞌajejpaxlaj ebꞌ. 5 Palta a ticnaic, ¿bꞌajtil ayecꞌ ebꞌ e mam eyicham chiꞌ? An̈ejtonaꞌ pax ebꞌ in checabꞌ, man̈xo pitzanoc ebꞌ ticnaic. 6 Axo pax in lolonel yedꞌ in checnabꞌil ix val dꞌa ebꞌ in checabꞌ chiꞌ, ix elcꞌoch dꞌa ebꞌ e mam eyicham chiꞌ, yuj chiꞌ ix sna sbꞌa scꞌol ebꞌ, ix yalan ebꞌ: A Jehová Yajal dꞌa Smasanil, ix on̈ yutej icha ix aj snaani, icha smojal co chuc pensaril yedꞌ chucal sco cꞌulej, xchi ebꞌ, xchi Jehová dꞌayin.

7 A in Zacarías in tic, ix in cha juntzan̈ lolonel tic dꞌa Jehová, dꞌa 24 yoch yuxluchil uj (aton jun uj scuch Sebat) dꞌa schabꞌil abꞌil yoch vin̈aj Darío reyal. 8 A dꞌa jun acꞌval, ix chꞌoxji vil jun tic dꞌa in vayich: Ix vil jun vin̈ vinac ayqꞌue dꞌa yibꞌan̈ jun nocꞌ chacchac chej, ix vanaj nocꞌ dꞌa jun chꞌolan dꞌa scal juntzan̈ teꞌ arrayán. Axo dꞌa spatic jun vin̈ chiꞌ, ay junxo n̈ilan̈ nocꞌ chej, ay pax mach ayqꞌue dꞌa yibꞌan̈ nocꞌ. A dꞌa scal nocꞌ chiꞌ, ay nocꞌ chacchac, ay nocꞌ sacbꞌalinac, ay pax nocꞌ sacsac. 9 Ix in cꞌanbꞌan dꞌa jun ángel van slolon vedꞌoc icha tic: Mamin, ¿tas yaj juntzan̈ ebꞌ ayqꞌue dꞌa yibꞌan̈ chej chiꞌ? xin chi. Ix tacꞌvi dꞌayin, ix yalan icha tic: Ol in chꞌox dꞌayach tas yaj ebꞌ, xchi. 10 Yuj chiꞌ, ix yalan jun vin̈ ayecꞌ dꞌa scal juntzan̈ teꞌ arrayán chiꞌ icha tic: Aton ebꞌ tic ix checjibꞌat yuj Jehová yic bꞌat sbꞌeytzitan masanil yolyibꞌan̈qꞌuinal tic ebꞌ, xchi.

11 Ix yalan ebꞌ ayqꞌue dꞌa yibꞌan̈ chej chiꞌ dꞌa Yángel Jehová ayecꞌ dꞌa scal teꞌ arrayán chiꞌ icha tic: Toxo ix on̈ ecꞌ dꞌa masanil yolyibꞌan̈qꞌuinal tic. Vachꞌn̈ej yaj ix quilaꞌ, te juncꞌolal yaji, xchi ebꞌ. 12 Ix yalan Yángel Jehová chiꞌ icha tic: Mamin Jehová, Yajal ach dꞌa Smasanil, 70 abꞌilxo yajcot yoval a cꞌol dꞌa yibꞌan̈ Jerusalén yedꞌ dꞌa yibꞌan̈ Judá. ¿Jantacto val tiempo, ichato chiꞌ ol ocꞌxoc a cꞌol dꞌa masanil ebꞌ a chon̈abꞌ chiꞌ? xchi.

13 Ix tacꞌvi Jehová dꞌa jun ángel van slolon chiꞌ vedꞌoc, ix yacꞌan snivanil scꞌool. 14 Elan̈chamel ix yal jun ángel chiꞌ to svalel juntzan̈ lolonel tic: Aton juntzan̈ tic ix yal Jehová, Yajal dꞌa Smasanil: Te xajan chon̈abꞌ Jerusalén vuuj yedꞌ tzalan Sion. 15 Yuj chiꞌ te aycot yoval in cꞌol dꞌa yibꞌan̈ juntzan̈xo nación malaj jabꞌoc tas snaꞌa. Ayic quenn̈ej yoval in cꞌol dꞌa yibꞌan̈ Jerusalén chiꞌ, ix te ecꞌ ebꞌ dꞌa yibꞌan̈ yacꞌan yaelal dꞌay. 16 Yuj chiꞌ, a in Jehová in sval icha tic: A ticnaic, ol vacꞌxi in vachꞌcꞌolal dꞌa Jerusalén. Ol vacꞌan bꞌochajxiqꞌue in templo taꞌ, ol bꞌochajpaxqꞌue chon̈abꞌ Jerusalén chiꞌ, xchi Jehová dꞌa jun ángel chiꞌ.

17 Ix yalanxi jun ángel chiꞌ dꞌayin icha tic: Alpaxel juntzan̈xo tic: A Jehová Yajal dꞌa Smasanil tzꞌalan icha tic: Ol vicꞌxichaan̈ juntzan̈ in chon̈abꞌ tic, ol vacꞌanxi snivanil scꞌol Sion. Ol valanel junelxo to a Jerusalén tic, in chon̈abꞌ yaji, sicꞌbꞌilel vuuj, xchi Jehová, xchi jun ángel chiꞌ.

18 Ix in qꞌue qꞌuelan, ix vilan chan̈eꞌ nocꞌ chꞌaac. 19-21 Ix in cꞌanbꞌan dꞌa jun ángel van slolon chiꞌ vedꞌoc icha tic: ¿Tas syalelcꞌoch chan̈eꞌ nocꞌ chꞌaac chiꞌ? xin chi dꞌay. Ix yalan dꞌayin icha tic: A juntzan̈ nocꞌ chꞌaac chiꞌ, a juntzan̈ nación acꞌannacoch yaelal dꞌa yibꞌan̈ ebꞌ aj Israel, ebꞌ aj Judá yedꞌ ebꞌ aj Jerusalén schꞌoxcot nocꞌ, saclemnacbꞌat ebꞌ yuuj, xchi dꞌayin. Ix lajvi chiꞌ, ay pax chan̈van̈ ebꞌ vin̈ tenum qꞌueen ix schꞌox Jehová vilaꞌ. Ix in cꞌanbꞌan icha tic: ¿Tas tzul scꞌulej juntzan̈ ebꞌ vin̈ tenum qꞌueen tic? xin chi. Ix yalan dꞌayin icha tic: A juntzan̈ ebꞌ vin̈ tic, ix javi ebꞌ vin̈ ul xibꞌtani yedꞌ yacꞌan satel yipalil juntzan̈ nación ix saclemanbꞌat ebꞌ aj Judá, xchi dꞌayin.