4 Ne zutun he timpu layun duen menge etew he egkengetiǥum diyà te ki Jesus he ebpemuun diyà te langun he menge inged.

Ne hein nengetiǥum is utew mezakel he menge etew impezineg kandan ni Jesus is sempità,

ke sikandin te,

5 “Duen etew he midhendiyà te pemuleey zin su ebpemula.

Ne haazà is benì din,

duen dutun nengeulug diyà te zalan ne nengeǥiekan te etew ne migkaan te menge tagbis.

6 Ne zuen daan benì din he nengeulug he nemekeuntud diyà te menipis he tana he nekeapid te vatu ne midtuvù haazà,

iyan,

petuluy zà neǥangu su nemezahan haazà is tanà.

7 Ne zuen daan dutun benì din he nengeulug diyà te tanà he menge zuǥiyen is menge sagbet dutun.

Ne hein mibmelayat haazà is menge pinemula,

mibmelayat daan haazà is menge sagbet ne mibpengulembezan dan haazà is pinemula.

8 Ne zuen daan benì din he ziyà mengeulug te meupiya he tanà ne midtuvù ne mibpemeǥas mebpurung te tignenggatus.”

Ne ke si Jesus te,

“Sevuta niw heini is nezineg niw.”

9 Is menge sumusundan ni Jesus,

in-insè dan ke hengkey is kehuluǥan dutun te sempità.

10 Ne midtavak si Jesus te,

“Sikan is in-eles dengan mehitenged te kedhadì te Megbevayà,

ibpesavut ku en keniyu te menge sumusundan ku,

iyan,

is menge zuma he menge etew he kenè dan edsundan kedì,

ibpenurù ku kandan pinaaǥi te menge sempità su wey minsan edtengteng dan,

kenè dan ebpekeahà ne minsan ebpemineg dan ne kenè dan ebpekesavut.”

11 Ne ke si Jesus te,

“Ibpesavut ku keniyu is kehuluǥan kayi te sempità.

Haazà is benì,

ne iyan is Lalag te Megbevayà.

12 Ne haazà is benì he ziyà mengeulug te zalan,

ne iyan is Lalag te Megbevayà he nezineg te menge etew ne zutun ebpekeuma si Setanas ne edhimuwen din he egkelipatan dan haazà is lalag he nezineg dan su wey kenè dan meketuu ne kenà melibri te silut.

13 Ne haazà is benì he ziyà mengeulug te menipis he tanà he zivavew te vatu,

ne iyan is Lalag te Megbevayà he is nemekezineg duen,

ne utew zan egkesuati te ebpemineg ne edtuuwan dan.

Iyan,

kenà egkeheǥet is kedtuu zan ne kenè en utew egkeuǥet dutun emun egezaman ni Setanas is kedtuu zan,

ne edlikù dan diyà te zaan he ulaula zan.

14 Ne haazà is benì he ziyà mengeulug te tanà he zuǥiyen is menge sagbet dutun,

ne iyan is Lalag te Megbevayà he nezineg te menge etew,

iyan,

tenged te menge seeng dan wey is suat dan te selapì,

wey is menge kelipey he kayi te kelibutan,

egkelipatan dan is nezineg dan ne kenà ebpulus diyà te kandan is Lalag te Megbevayà.

15 Ne haazà is benì he ziyà mengeulug te meupiya he tanà,

ne iyan egkeǥiyen dutun is Lalag te Megbevayà he nezineg te menge etew ne midawat dan,

ne midtuman dan haazà,

ne mibpeniguduwan dan te edtuman taman te mibpulus te zekelà is Lalag te Megbevayà diyà te kandan.”

16 Ne zuen pa sempità he migkaǥi ni Jesus,

ke sikandin te,

“Is etew he edtemtem te sulù,

ne kenà egkehimu he ebpelengkevan din te revan wey ke idsihung din be te vangkù he hizeǥaan su idsavuk din diyà te selevukà.

Ne emun duen etew he edseled ne egketeyawan.”

17 Ne ke si Jesus maan te,

“Ne iring din ded daan is minsan hengkey he in-eles guntaan su ibpeǥawaǥawa zed keuzemà,

ne is minsan hengkey he penurù ku he kenè niw egkesavut guntaan,

ne egkesavut niw zed keuzemà.

18 Umba,

purungi niw te ebpemineg is ibpenurù ku su is etew he edewaten din is ibpesavut kandin te Megbevayà,

ed-umanan pa te Megbevayà is kedsavut din,

iyan,

is etew he kenè din edewaten is ibpesavut te Megbevayà,

id-awà diyà te kandin haazà is kunaan din ke nesavut din en.”

19 Is iney ni Jesus wey is menge hazi zin,

ne edhendiyè dan te kandin,

iyan,

wazè dan meuvayi su nepurung en sikandin melingut te mezakel he etew.

20 Ne zuen etew zutun he midtazem ki Jesus,

ke sikandin te,

“Keniyà te ǥawas is iney nu wey is menge hazi nu ne ebpengahaan ke zan.”

21 Ne migkaǥi si Jesus diyà te menge etew zutun te,

“Duen ku pa iney wey menge hazi su is langun he ebpemineǥen dan is Lalag te Megbevayà ne ebpezumdumahan dan,

iyan daan sikandan iney ku wey menge suled ku.”

22 Sengeandew zutun ne mid-untud si Jesus wey is menge sumusundan din te avang.

Ne ke sikandin te,

“Kuwa kew en su edlayun kiw ziyà layun.”

Ne zutun migenat dan is ed-aavang.

23 Ne zutun te ked-aavang dan ne nekelipezeng si Jesus.

Ne nesuǥat haazà is ranew te mevendes he keramag ne egketeǥuan en te wahig haazà is avang dan ne amaama zan kenà melavu.

24 Ne mid-uvayan dan si Jesus ne mibpukew zan,

ke sikandan te,

“He Zatù,

egkengeǥerè kiw en!”

Ne nepukew zutun si Jesus ne mid-enew ne migkeǥiyan din haazà is keramag wey haazà is menge zekelà he vaǥel he mebpeeneng-eneng dan,

ne zutun ne mibmelinew utew haazà is ranew.

25 Ne migkaǥi dutun si Jesus diyà te menge sumusundan din te,

“Maan is wazè niw kedsarig kediey?”

Ne utew zan nengeinuinu wey nengehandek.

Ne zutun neked-iinseey sikandan te,

“Hentei heini vuwa he etew?

Maan is minsan keramag wey vaǥel ne ebpemineg te lalag din?”

26 Ne zutun midlaus dan is ed-aavang taman te nekezunggù dan diyà te tanà he iyan ed-ubpaan te menge etew he Geresinen he ziyà te zehipag te prubinsya he Geliliya.

27-29 Ne zutun te kegaun ni Jesus neuma zin is etew he zaan he meǥinged dutun te inged te menge Geresinen.

Ne midsuukan sikandin te menge mezaat he mulin-ulin.

Ne haazà is etew,

neuǥet en utew he wazè din seseberen.

Kenà ed-ubpà diyà te valey,

kekenà,

diyà ed-ubpà te penlevengà he menge surung.

Kenà kepipira zà uwita haazà is maama zutun te ebpemekaid kandin.

Ne minsan pa te layun sikandin edhiketan ne ibpenagkes te kedina ne ebentayan pa te menge etew,

iyan,

melemu zin dà he ebpemidtawen is kedina ne ed-uwiten sikandin dutun te mezaat he mulin-ulin pehendiyà te tanà he wazà ubpai te menge etew.

Ne hein neehè din si Jesus,

mid-erang ne midlangkeb diyà te etuvangan din is egkaǥi he utew mezaǥing te,

“Sikew,

Jesus he Anak te utew lavew he Megbevayà,

ebmenuwen a kenikew?

Ebpengemuyù a kenikew he kenè e pa kenikew siluti!”

Nekaǥi zin heini su migkeǥiyan ni Jesus haazà is mezaat he mulin-ulin he ibpaawà diyà te kandin.

30 Ne mid-insaan ni Jesus haazà is etew te,

“Hentei is ngazan nu?”

Ne midtavak te,

“Iyan ngazan ku si Liblibuwen.”

Umba nekaǥi zin heini su utew zan mezakel is mezaat he mulin-ulin he nemen-ulin dutun te etew.

31 Ne haazà is menge mezaat he mulin-ulin,

midhangyù dan ki Jesus he kenè din pa sikandan iagbur ziyà te vitu he wazà pidtemanan te kezalem din.

32 Ne zutun te kenà utew meziyù,

duen layud he menge vavuy he ebpemenuwal ziyà te kelendiǥan.

Ne midhangyù ki Jesus haazà is menge mezaat he mulin-ulin he zutun dan ipehalin te menge vavuy.

Ne midtuǥutan sikandan ni Jesus.

33 Ne iyan dà haazà,

ne mid-awè dan dutun te maama ne midhalin dan dutun te menge vavuy.

Ne haazè dà ne nemelelaǥuy haazà is menge vavuy petupang dutun te utew mesilid he kelendiǥan ne mid-agbur zan diyà te ranew ne naamin dan mengelened.

34 Ne zuen menge maama he ebpemen-elima zutun te menge vavuy;

ne hein neehè dan is nehitavù,

ne henduen dan te midhiyup he vulvul is nemelaǥuy ne mibpenudtul zan diyà te inged wey ziyà te menge unayan is neulaula.

35 Ne is menge etew he nekezineg dutun te tudtul,

ne nemenhendutun dan te ki Jesus su ed-ahaan dan.

Ne neehè dan dutun kes neulian he ziyà mebpinuu te etuvangan ni Jesus he midsun-ud en te ugelingen,

ne hustu en is ked-isip-isip din.

Ne tenged dutun utew zan en nengeinuinu.

36 Ne sikan is menge etew he nekeahà ki Jesus te kebewii zin dutun te etew,

ne mibpenudtulan dan is menge etew he sikan pa mekeuma ke nemenumenu is kegkeulii zutun te etew he midlalung te menge mezaat he mulin-ulin.

37 Ne zutun,

haazà is langun he menge etew he meǥinged dutun te tanà te menge Geresinen,

ne midhangyù dan ki Jesus he med-awà sikandin dutun te kandan su utew zan ingkehandek sikandin.

Ne iyan dà haazà,

ne mid-untud ensi Jesus te avang su egenat dan.

38 Ne zutun,

haazà is etew he veǥu he neulian,

midhangyù sikandin ki Jesus,

ke sikandin te,

“Egkesuat a he eduma kenikew.”

Iyan,

wazà ipezuma ni Jesus,

kekenà,

impeulì din.

Ke si Jesus te,

39 “Ulì ke en ne tudtula nu ke hengkey is utew meupiya he midhimu te Megbevayà kenikew.”

Ne zutun,

mid-ulì haazà is maama ne mibpenudtul zin duen te langun he menge meǥinged dutun ke hengkey is midhimu ni Jesus diyà te kandin.

40 Ne hein nekezunggù ensi Jesus dutun te ebpuunan dan ne utew nengeǥalew is utew mezakel he menge etew he nengetiǥum dutun su edtaǥad dan kandin.

41 Ne zutun duen maama he egngezanan ki Hayru he pengulu te sevaha he simbahan te menge Hudiyu.

Ne mid-uvey heini ziyà te ki Jesus ne midluhud diyà te etuvangan din is edhangyù kandin he zumahi zin sikandin diyà te valey zin.

42 Su zuen budtung he anak din he raǥaraǥa he menge sepulù pa wey zezuwa is penuiǥen din,

ne egkezeruwan ne edluwàluwè en te ǥehinawa.

Ne miduma kandin si Jesus.

Ne zutun te kedhipanew zan ebpenelektelek dan dà su egkengelipitlipit dan te utew mezakel he menge etew zutun.

43 Ne zuen dutun bahi he utew en nerasey su midsepulù en wey zezuwa he tuig is kedlengesahi kandin ne kenà ed-engked.

Ne wazà minsan hentei he nekeulì kandin.

44 Ne mibpenlietliet medhendiyà te egkeiniyuǥan ni Jesus ne midsengkawad din kevita is sidsid te kumbalà ni Jesus.

Ne zutundutun ne mid-engked is kegkevusbusi kandin.

45 Ne redsà dutun ne migkaǥi si Jesus te,

“Hentei is migawed kedì?”

Ne is menge etew zutun,

pudu mibarew he wazè dan mekeǥawed.

Ne migkaǥi si Pedro te,

“Datù,

maan is ebpenginginsè ke pa te iring keniyan,

te hanu man mezakel utew he menge etew is edlilipitlipit diyan te kenikew.”

46 Iyan,

migkaǥi si Jesus te,

“Duen iyan migawed kedì su neǥezam ku he zuen etew he neulian te zaru pinaaǥi te ǥehem ku.”

47 Ne hein nesavut dutun te vahi he netuenan ni Jesus haazà is mid-ulaula zin,

mid-uvey ziyà te ki Jesus is egkerkeren su utew nahandek.

Midluhud sikandin diyà te ki Jesus,

dutun te etuvangan te langun he menge etew.

Ne midtudtul zin ke hengkey is ketezengan ke maan is migawed sikandin te kumbalà ni Jesus ne midtudtul zin daan he segugunà dutun neulii is daru zin.

48 Ne migkaǥi kandin si Jesus te,

“Bayi,

umba neulian ka te zaru nu su midsarig ka kedì.

Ulì ke en ne mebmelinawen is kebpekesavuk nu.”

49 Ne te kemulu pa si Jesus egkaǥi zutun ne zuen nekeuma he ebpuun diyà te valey ni Hayru.

Ne migkaǥi diyà te ki Hayru te,

“Kenè nu en bigbigata te eduma pa maan si Jesus su kenè niw en egkesepenan is gehinawa zuen te anak nu.”

50 Ne hein nezineg ni Jesus haazà ne migkaǥi sikandin te,

“Kenè ka meseeng,

kekenà,

sarig ke zà kedì,

ne egkeuyag is anak nu.”

51 Ne hein nekeuma zan diyà te valey ni Hayru,

ne wazà ipemeseled ni Jesus is menge etew.

Iyan din dà dutun impeseled ensi Pedro,

si Juan,

si Santiago,

wey is menge ǥinikanan dutun te vatà.

52 Ne zutun,

is langun he menge etew he nerivurun dutun,

egkengeǥisaweg sikandan ne ebpemenineǥew su nengeseeng.

Ne migkeǥiyan sikandan ni Jesus te,

“Kenè niw sineǥawi su wazà mebpatey heeyan is batà,

kekenà,

midlipezeng dà!”

53 Ne te kegkezineǥa zan dutun te migkaǥi ni Jesus,

ne và dan dà mid-engiti su netuenan dan he minatey en iyan haazà is batà.

54 Ne mid-uvayan ni Jesus haazà is batà ne migewezan din diyà te velad ne mid-umew zin he ke sikandin te,

“Bayi,

enew kad.”

55 Ne zutundutun nekesunggud is gehinawa zutun te vatà ne mid-enew.

Ne migkaǥi si Jesus dutun te ǥinikanan te vatà he ipekaan dan haazà is anak dan.

56 Ne utew ingkeinuinu te ǥinikanan dutun te vatà haazà is midhimu ni Jesus.

Ne migkeǥiyan sikandan ni Jesus he kenè dan tudtula haazà ziyà te minsan hentei.