Is Kebewii Zuen te Etew he Mibinting
9
Ne zutun mid-untud en maan ensi Jesus te avang ne midlikù diyà te zehipag.
Ne mid-ulì diyà te inged din.
2 Ne nemekeuma is menge etew he ed-uwit diyà te ki Jesus te minatey is divaluy he lawa zin he ziyà ipehizeǥà te zuyanà he ebintingen.
Hein nesavut ni Jesus he zekelà is kedsarig dan kandin,
migkeǥiyan din haazà is minatey is divaluy he lawa te,
“Mama,
mebmeupiya is gehinawa nu,
su nepesaylu en is menge salè nu.”
3 Ne zuen dutun menge menunudlù te kesuǥuan;
ne te kegkezineǥa zan dutun,
neisip dan he utew zekelà is supak ni Jesus te Megbevayà.
4 Ne nesavut ni Jesus is diyà te isip dan ne migkeǥiyan din sikandan te,
“Maan is ed-isip kew te mezaat he iring keniyan?
5 Hendei zapit is egkehimu te etew zà duen,
iyan be is kebpesaylu te salè din wey ke iyan is kegkeulii kandin?
6 Pinaaǥi te kebewii ku ǥuntaan kayi te etew,
ibpeehè ku keniyu he siak is Kakey te Menusiyà,
duen ku keǥehem dini te lumpad te kebpesaylu te salà.”
Ne zutun migkeǥiyan din haazà is etew he minatey is divaluy he lawa te,
“Sikew,
Mama,
enew ka;
kuwaa nu heeyan is duyanè nu ne ulì ka.”
7 Ne zutundutun mid-enew haazà is maama ne mid-ulì.
8 Hein naahà heini te menge etew zutun,
nengehandek dan ne midalig dan is Megbevayà tenged te mibeǥayan din is menusiyà te keǥehem he iring kayi.
Is Kedtewaǥa ki Mateo
9 Ne mid-ewaan sikandan ni Jesus ne zutun te ibayè din neehè din is menunukut te vuhis he egngezanan ki Mateo he zutun he timpu ebpimpinuu ziyà te upisina zin.
Migkeǥiyan ni Jesus te,
“Sunud ka kedì.”
Ne zutun midhitindeg si Mateo ne midsunud ki Jesus.
10 Ne hein egkaan si Jesus wey is menge sumusundan din diyà te valey ni Mateo,
mezakel is menge menunukut te vuhis wey menge etew he mesinupaken he nemekeuma ne nemengaan duma kandan.
11 Duen menge Perisiyu he nekeahà dutun te menge etew.
Ne migkeǥiyan dan is menge sumusundan ni Jesus te,
“Is egalen niw,
maan is egkaan wey ed-inum duma te menge limbungan he menunukut te vuhis wey menge mesinupaken?”
12 Nezineg haazà ni Jesus ne midtavak sikandin pinaaǥi te sempità,
ke sikandin te,
“Sikan is wazè din daru,
ne kenà egkinahanglan he ebpevawì,
kekenà,
iyan dà sikan is duen din daru.
13 Susiya niw ke hengkey is kehuluǥan duen te insurat he Lalag te Megbevayà he egkaǥi te,
‘Kenè ku iyan egkesuatan is kebpemuhat niw,
kekenà,
iyan egkesuatan ku is kebpekedhihizuwè niw.’ ”
Ne mid-uman megkaǥi si Jesus te,
“Siak,
wazà a medhendini wey ku ikepeengked te ed-ulaula te mezaat is menge metazeng,
kekenà,
iyan is menge mesinupaken te Megbevayà.”
Is Insà Mehitenged te Kedsalang Kegkaan
14 Ne zutun nekeuma ziyà te ki Jesus is menge sumusundan ni Juan Megbebewtismu.
Ne mid-insè dan te,
“Is menge sumusundan nu,
maan is kenè dan ebentayan is betasan tew he edsalang egkaan?
Sikami mulà wey is menge Perisiyu,
layun key edsalang egkaan wey zey mepurungi is ked-azap dey te Megbevayà.”
15 Ne migkaǥi si Jesus diyà te kandan te,
“Penenglitan,
ke zuen eseweey kenà egkehimu he kenà edlipey is menge zuma te ebpengesawa ke kemulu zan pa zuma haazà is ebpengesawa.
Ne zutun te timpu he ibpaawè en diyà te kandan sikan is ebpengesawa,
human sikandan edsalang egkaan.
Iring din ded daan is menge sumusundan ku su te kemulu e pa zini te kandan,
kenè dan edsalang egkaan.”
16 Ne zutun insempità ni Jesus is kenà kebpeked-amur te veǥu he penurù din wey te zaan he tuluuwen.
Ke sikandin te,
“Is beǥu he manggad he wazè pa megkenseng,
kenà meupiya he idapi te kumbalà he merunut en,
su emun ebpìpian,
ne egkenseng ne egkevindas haazà is daan tenged dutun te veǥu ne tuwas pa he meluag is kegkevindas dutun te kumbalà.
17 Iring din ded daan sikan is binu he sikan pa ebeeli he idtaǥù diyà te teleǥuey te vinu he lundis te kambing,
su kenà egkehimu he ziyà idtaǥù te zaan he teleǥuey su ebetu haazà is teleǥuey ne egkeulaan is binu ne egkezeetan daan is teleǥuey.
Kinahanglan he is binu he sikan pa ebeeli,
ne ziyà idtaǥù te veǥu he teleǥuey.
Ne zutun kenà egkezeetan haazà is binu wey haazà is teleǥuey.”
Is Minatey he Vatà wey Sikan is Bahi he Zeruwanen
18 Ne te kemulu pa zutun egkaǥikaǥi si Jesus,
duen nekeuma he sevaha he pengulu te menge Hudiyu.
Ne zutun midluhud sikandin diyà te etuvangan ni Jesus ne midhangyù he ke sikandin te,
“Minatey ǥeina is anak ku he vahi,
iyan,
emun ebayaan nu ne edepenetan nu te velad nu ne egkevanhew sikandin.”
19 Ne midhitindeg si Jesus ne miduma kandin,
ne miduma zaan is menge sumusundan ni Jesus.
20-21 Ne hein diyè dan en te zalan duen mid-uvey he sevaha he vahi ziyà te iniyuǥan ni Jesus.
Ne haazà is bahi,
duen din daru.
Sepulù en wey zezuwa he tuig is kegkevusbusi kandin ne kenà ed-engked.
Ne egkeisip din he emun egkekevit din is minsan kumbalè dà ni Jesus,
egkeulian en sikandin.
Ne zutun nekevit din is sidsid te kumbalà ni Jesus.
22 Ne midlingì si Jesus ne neehè din haazà is bahi ne ke sikandin te,
“Bayi,
kenè ka mahandek;
su umba neulian ka te zaru nu su midsarig ka kedì.”
Ne zutundutun neulian haazà is bahi.
23 Ne midlaus dan is edhipanew ne midseled si Jesus diyà te valey zutun te pengulu.
Ne hein neehè din is menge memumulalà wey nezineg din is meǥurub tenged te egkengeǥisaweg he menge etew,
24 ne migkeǥiyan ni Jesus sikandan te,
“Pemen-awè kew is langun.
Wazà mebpatey heeyan is batà,
kekenà,
midlipezeng.”
Ne mid-engitan dutun te menge etew si Jesus.
25 Ne hein nemen-awè en haazà is menge etew,
ne midseled si Jesus dutun te ruǥu te vatà.
Ne migewezan din diyà te velad ne zutundutun mid-enew haazà is batà.
26 Ne nevantug heini is neulaula ziyà te langun he menge siringan he menge inged dutun.
Is Kebewii Zuen te Zezuwa he Lakap
27 Ne zutun te ked-awà ni Jesus dutun,
midtelukun kandin is dezuwa he lakap.
Ne haazà is menge lakap,
mid-umew zan ki Jesus is edhangyù te,
“Kehizuwi key kenikew,
su iyan ka kes kevuwazan te hadì dengan he si David!”
28 Ne hein mid-ulì en si Jesus diyà te valey zin,
nekeuma zaan haazà is dezuwa he lakap.
Ne migkeǥiyan din sikandan te,
“Edtuu kew ve he egkeulian ku is mata niw?”
Ne midtavak dan te,
“Uya,
Datù,
edtuu key.”
29 Ne zutun midampà ni Jesus is mata zan ne ke sikandin te,
“Berakat he meulii kew tenged te kedtuu niw.”
30 Ne neulian is menge mata zan.
Ne zutundutun nepuwasan is ked-ehè dan.
Ne zutun migkeǥiyan sikandan ni Jesus he kenè dan penudtula.
31 Iyan,
te ked-awè dan dutun nasì dan mibantug si Jesus diyà te langun he menge siringan dutun he inged.
Is Kebewii te Emew
32 Ne zutun te wazè pa megenat haazà is menge lakap,
nekeuma is menge etew he edumahan dan diyà te ki Jesus is maama he neemew su midsuukan te mezaat he mulin-ulin.
33 Ne mibewian heini ni Jesus,
ne segugunà dutun nekekaǥi haazà is etew.
Ne nengeinuinu is langun he menge etew zutun,
ne ke sikandan te,
“Sikitew is menge kevuwazan ni Israyil,
sikan tew pa maahà is iring kayi!”
34 Iyan,
migkaǥi is menge Perisiyu zutun te,
“Is tekinan te menge mezaat he mulin-ulin,
iyan mibeǥey kandin te ǥehem wey zin mevewii is edlelungen te mezaat he mulin-ulin.”
Is Meluag he Legtayen
35 Ne neeneb ni Jesus is langun he menge inged dutun wey menge unayan.
Mibpenurù din is menge etew zutun diyà te seled te menge simbahan dan wey impesavut din diyà te kandan is Meupiya he Tudtulanen te keaǥi te kedhadì te Megbevayà.
Nengeulian din is menge etew te minsan hengkey he zaru wey ebpenggezamen dan.
36 Ne kada zin egkeahà is mezakel he menge etew zutun,
egkengehizuwan din sikandan su mezakel is menge seeng dan ne wazà ebpeketavang kandan.
Iring sikandan te menge ayam he kerehidu he wazà ed-elima kandan.
37 Ne migkaǥi si Jesus diyà te menge sumusundan din te,
“Mezakel pezem is edawat te Meupiya he Tudtulanen.
Iring sikandan te kamet he nelutuan en.
Meluag heini is kamet,
iyan,
deisey kiw zà is ebpemenlegtey.
38 Iampù niw ziyà te Nengazen he suǥua zin pa zini te kamet din is duma pa he ebpekelegtey.”