Is Kedtewaǥa Zuen te Tetelu he Menlelaya
5
Sevaha he andew te ziyà si Jesus te veyvey te ranew he egngezanan te Giniserit,
utew mezakel he menge etew is nengetipun su ebpememineg dan te Lalag te Megbevayà he ibpenurù din.
2 Ne naahà ni Jesus is dezuwa he avang diyà te veyvey he wazà dutun mid-untud su midrenà dutun is menge teǥiǥaked su edlumpiyuwan dan is menge laya zan.
3 Ne mid-untud si Jesus dutun te sevaha he avang he ǥaked ni Simon ne impehalin din ki Simon haazà is avang te malù ebpekeziyù dutun te veyvey.
Ne mibpinuu si Jesus dutun te avang ne mibpenurù din is utew mezakel he menge etew.
4 Ne hein nekepasad si Jesus is ebpenurù,
migkeǥiyan din si Simon te,
“Begsaya niw heini is avang pehendutun te mezalem ne penlaya kew zutun ne ebpekeutel kew te menge pait.”
5 Ne midtavak si Simon te,
“Tivuuk he kezukileman is kebpenlaya zey ne wazè dey neutel he minsan sevaha,
iyan,
emun iyan heeyan lalag nu ne ed-uman key ebpenlaya.”
6 Ne zutun mibpenlaya zan en maan ne hein mibuwat dan haazà is laya ne nevenbenaran sikandan te utew mezakel he menge pait he neutel su samè dà kenà mevindas haazà is laya te kegkepenù din.
7 Ne migkapey zan is menge zuma zan dutun te sevaha he avang wey zan mekeuǥup.
Ne hein nekeuma haazà is menge zuma zan,
impen-ahuk dan is pait dutun te zezuwa he avang ne samè dà kenà melavu haazà is menge avang tenged te utew nepenù.
8 Ne si Simon Pedro,
hein neehè din is neulaula,
nekeluhud diyà te ki Jesus is egkaǥi te,
“Datù,
deyzey ke ebpekeziyuan a kenikew su utew a mekesesalà.”
9 Iyan ingkekeǥiya zin kayi su utew neherat is mata zin te nengeutel zan he pait.
Ne henduen ded daan haazà is menge zuma zan.
10 Elin daan nengeinuinu zutun is menge anak ni Sibidiyu he si Santiago wey si Juan he menge zuma ni Simon te ebpenlaya.
Ne migkaǥi si Jesus diyà te ki Simon te,
“Kenè ka mahandek.
Menlelaya ka te pait,
iyan,
puun guntaan iyan ku ibpeveelan kenikew is kebpen-ahà te etew wey mehimu he menge sumusundan ku.”
11 Ne zutun mid-uwit dan haazà is menge avang dan diyà te ǥeunan,
ne mid-ewaan dan dutun is langun ne midsundan dan ki Jesus.
Miraculous Catch of Fish
Is Kebewii te It-iten
12 Ne sevaha he andew ne ziyà si Jesus te sevaha he inged ne neuma zin is etew he nepurung en meeneb te menge it-it.
Haazà is it-iten,
hein neehè din si Jesus,
mid-uvey ziyà te kandin ne midluhud ne midungul diyà te etuvangan din is egkaǥi te,
“Datù,
emun meupiya zà te ǥehinawa nu ne egkeulian a kenikew kayi te utew meremerik he egezamen ku.”
13 Ne zutun midampà sikandin ni Jesus te egkaǥi te,
“Utew meupiya te ǥehinawa ku;
meulii ka!”
Ne segugunà nehanewhanew zutun te etew haazà is it-it din.
14 Ne zutun mibeleuzan sikandin ni Jesus te,
“Kenè nu heini zè pa tudtula ziyà te minsan hentei he etew,
kekenà,
hendiyè ka ǥuntaan te memumuhat he midhimu te Megbevayà wey zin maahà he neulian ka.
Ne iveǥey nu kandin is ibpemuhat wey nu metuman sikan is insuǥù dengan ni Moises su wey metueni te langun,
he tutuu iyan he neulian ke en.”
15 Iyan,
minsan pa zutun,
nekeeneb diyà te meziyù is bentuǥan ni Jesus ne tenged dutun utew mezakel he menge etew is ebpemenhendutun te kandin wey zan mezineg is kebpenurù din ne wey zaan meulii sikandan te menge zaru zan.
16 Iyan,
duen menge timpu he ed-ewaan din haazà is mezakel he menge etew ne edhendiyà sikandin te tanà he wazà dutun duma zin he etew ne zutun ed-ampù diyà te Megbevayà.
Is Kebewii te Mibinting he Etew
17 Sevaha he andew he ebpenurù si Jesus,
duen ebpemimpinuu he mezakel he menge Perisiyu wey menge menunudlù te kesuǥuan he midtelavuk dutun.
Diyà haazà ebpemuun te langun he menge inged he sakup te Geliliya wey sakup te Hudiya.
Ne zuen daan duma zan dutun he ebpemuun te Hiruselim.
Ne zutun te ki Jesus is gehem te Megbevayà su wey zin mevewii is menge etew.
Jesus Heals a Paralytic (Luke 5:17-26)
18 Ne zutun nekeuma is menge etew he ed-uwit te etew he minatey is divaluy he lawa zin he impehizeǥà te zuyanà.
Idseled dan pezem dutun te valey su wey zan ikesavuk diyà te etuvangan ni Jesus.
19 Ne ǥeina te nepurung mehasek is menge etew zutun te valey ne wazè dan ikevayà sikandin dutun.
Diyè dan mebayà te atep ne mibudsiyan dan is atep he renged ni Jesus ne haazà is duyanà he zutun is etew he minatey is divaluy he lawa zin,
midteyuntun dan dutun te teliwazà te menge etew he zutun si Jesus.
20 Ne hein nesavut ni Jesus he zekelà is kedsarig dan kandin,
migkeǥiyan din heini is etew te,
“Mama,
nepesaylu en is menge salè nu.”
21 Ne zutun,
is menge Perisiyu wey is menge menunudlù te kesuǥuan,
neisip dan diyà te ǥehinawa zan is:
“Hentei heini he etew is edsupak te Megbevayà?
Megbevayà sikandin uvag su hentei is ebpekepesaylu te menge salà,
kekenà,
iyan dà is Megbevayà.”
22 Ne nesavut ni Jesus is diyà te isip dan ne migkeǥiyan din sikandan te,
“Maan is egkeisip niw is iring keniyan?
23 Hendei zapit is egkehimu te etew zà duen,
iyan be is kebpesaylu te salà kayi te etew wey ke iyan is kegkeulii kayi te etew su wey mekeenew ne mekehipanew?
24 Pinaaǥi te kebewii ku ǥuntaan kayi te etew,
ibpeehè ku keniyu he siak is Kakey te Menusiyà,
duen ku keǥehem dini te lumpad te kebpesaylu te salà.”
Ne zutun migkeǥiyan din haazà is etew he minatey is divaluy he lawa,
ke sikandin te,
“Sikew,
Mama,
enew ka,
ne kuwaa nu heeyan is duyanè nu ne ulì ka!”
25 Ne zutundutun mid-enew haazà is etew zutun te etuvangan dan te langun ne migkuwa zin haazà is impehizeǥaan kandin ne mid-ulì is edalig te Megbevayà.
26 Ne is langun he menge etew zutun ne nengeherat is mata zan,
ne utew zan nengeinuinu ne midalig dan is Megbevayà,
ne ke sikandan te,
“Heini is neehè tew ǥuntaan,
ne utew egkein-inuwi!”
Is Kedtewaǥa ki Levi
27 Ne hein neipus haazà,
ne mid-awà dutun si Jesus ne neehè din is sevaha he menunukut te vuhis he egngezanan ki Levi he ebpimpinuu ziyà te upisina zin.
Ne migkeǥiyan ni Jesus te,
“Mama,
sunud ka kedì.”
28 Ne zutun ne mid-ewaan ni Levi is minsan hengkey zutun ne midsunud ki Jesus.
29 Ne zutun midtukud te zekelà he keemuran si Levi ziyà te valey zin su zutun si Jesus.
Ne mezakel is nemenelavuk dutun he menge menunukut te vuhis he menge zuma ni Levi,
ne zuen daan menge zuma he menge etew he nemengaan duma kandan.
30 Ne zuen menge Perisiyu wey menge menunudlù te kesuǥuan he nekeahà kayi te menge etew.
Ne migkeǥiyan dan is menge sumusundan ni Jesus te,
“Maan is egkaan kew wey ed-inum kew zuma te menge limbungan he menunukut te vuhis wey te menge mesinupaken?”
31 Ne iyan midtavak dutun si Jesus,
ke sikandin te,
“Sikan is wazè din daru,
ne kenà egkinahanglan he ebewian,
kekenà,
iyan dà is duen din daru.
32 Siak,
wazà a medhendini wey ku ikepeiniyug te ked-ulaula te mezaat is menge metazeng,
kekenà,
iyan is mesinupaken te Megbevayà.”
Jesus Spends Time with Sinners
Is Insà Mehitenged te Kedsalang Kegkaan
33 Ne zuen menge etew he migkaǥi ziyà te ki Jesus te,
“Is menge sumusundan ni Juan Megbebewtismu wey is menge sumusundan te menge Perisiyu,
ne layun dan ed-ampù wey edsalang dan he egkaan su wey zan mepurungi is ked-azap dan te Megbevayà.
Iyan,
is kenikew he menge sumusundan,
kenè dan mulà edsalang he egkaan,
kekenà,
kada andew egkaan dan wey ed-inum dan.”
34 Ne migkaǥi si Jesus diyà te kandan te,
“Penenglitan,
ke zuen eseweey,
is menge zuma te ebpengesawa,
kenà egkehimu he ibpesalang sikandan te kegkaan ke kemulu zan pa zuma haazà is ebpengesawa.
35 Ne zutun te timpu he ibpaawà diyà te kandan sikan is ebpengesawa,
human dan edsalang egkaan,
su egkeseeng dan.”
36 Ne zutun insempità ni Jesus is kenà kebpeked-amur te veǥu he penurù din wey te zaan he tuluuwen te menge Hudiyu,
ke sikandin te,
“Wazà etew he ebindas te veǥu pa he kumbalà su idapi zin te kumbalà he tuǥak en.
Su emun ebeelan din is iring kayi,
ne nezezeetan din dà is beǥu,
ne haazà is daan he kumbalà,
kenà ed-engayan te veǥu he indapi zutun.
37 Ne iring din ded daan,”
ke si Jesus,
“is binu he sikan pa ebeeli he idtaǥù diyà te teleǥuey he lundis te kambing.
Kenà egkehimu he ziyà idtaǥù te zaan he teleǥuey su ebetu is teleǥuey ne egkeulaan haazà is binu ne egkezeetan daan is teleǥuey.
38 Kinahanglan he sikan is binu he sikan pa ebeeli,
diyà idtaǥù te veǥu en he teleǥuey.
39 Ne sikan is etew he nekeinum te zaan he vinu,
kenè en sikandin ed-inum duen te vinu he sikan pa ebeeli su ke sikandin te,
‘Iyan meupiya is daan he vinu.’ ”