Hentei si Jesus? Iyan heini insà te mahabet he menge etew zutun te kegkaahaa zan kandin wey te kegkezineǥa zan te tudtul mehitenged kandin. Ne iyan ded daan heini insà te menge etew ǥuntaan. Maan is kinahanglan he edseǥipaan tew sikandin?

Si Juan, utew emiǥu ni Jesus. Ne hein neipus en is kebpatey wey kegkevanhew ni Jesus, wazà med-engked si Juan he ebpenudtul mehitenged ki Jesus. Mezakel is midtuu kandin, iyan, eduwazuwa zaan is duma umba inseysey ni Juan pinaaǥi te surat is mehitenged ki Jesus wey is mehitenged te menge penurù ni Jesus su wey meketuu is kada sevaha.

Kayi te surat ni Juan egkevasa ta is kebpetug-iringa ni Jesus te keugelingen din te igkeuyag te etew he iyan is keenen wey wahig su ǥeine te ebeǥey sikandin te untung he wazà pidtemanan. Ne elin daan mibpetug-iringan din te keugelingen din is kerayag su ǥeina te ebpeketayew sikandin te menge etew kayi te kelibutan. Ne iring daan sikandin te teǥiǥaked te layud he kerehidu su ǥeina te ebpurungan din ed-elimahi is menge sakup din. Impesavut ni Jesus he iyan dà sikandin sikan is ibayà pehendiyà te Amey zin he Megbevayà wey inseysey zin daan he neked-iring dan te Amey zin.

Ne ǥuntaan, hentei si Jesus? Iyan sikandin utew lavew he egkinehenglanen tew, ne is minsan hentei he edawat wey edtuu kandin ebeǥayan din sikandan te ketenged wey zan mehimu he menge anak te Megbevayà. (Juan 1:12)