Is midsurat kayi he libru te egngezanan te Nengeulaula te Menge Epustul ni Jesu Kristu, iyan is duktur he egngezanan ki Lucas. Ne sumpul heini te nehuna he surat din mehitenged te mibpen-ulaula ni Jesus hein kayi pa sikandin te kelibutan su wazè pa sikandin med-ulì diyà te langit. Ne egkevasa ta kayi te ikezuwa he surat din is duma he menge vaal ni Jesus su impelaus din is menge vaal zin pinaaǥi te Waǥas he Mulin-ulin he impeulin din te menge sakup din.

Nevatun si Jesus pehendiyà te langit, piru hein wazè pa haazà meulaula, ke sikandin diyà te menge epustul te, “Ebeǥayan kew zin te ǥehem emun egkelumunan kew en te Waǥas he Mulin-ulin, ne is tudtul te keaǥi ku, idsangyew niw zini te Hiruselim wey id-eneb niw zini te prubinsya he Hudiya wey ziyà daan te prubinsya he Semarya wey minsan hendei zini te egketemanan te kelibutan” (Nengeulaula 1:8). Ne iyan iyan haazà nehitavù su iyan dan midhunaan sengyawi te Meupiya he Tudtulanen mehitenged ki Jesu Kristu is inged he Hiruselim, ne zutun mahabet he menge Hudiyu is nemeketuu ki Jesus (Nengeulaula 1:1–8:3). Iyan, hein neuma is timpu he mibpesipelahan is menge sumusundan ni Jesus te zuma zan he menge Hudiyu ziyà te Hiruselim he wazà medtuu ki Jesus, nemelaǥuy sikandan pehendiyà te prubinsya he Hudiya wey Semarya. Ne hein dutun dan en, insangyew zan is Meupiya he Tudtulanen taman te mahabet en dutun is nemeketuu ki Jesus (8:4–12:25).

Neuma is timpu he zutun midtiǥum is menge tumutuu zuen te inged he Entiyukya ne midsuǥù dan si Pablo wey si Birnabi te kedlayun te zaǥat pehendiyà te meziyù he menge lugar su wey zan daan mekewali zutun. Ne puun dutun insangyew ni Pablo is Meupiya he Tudtulanen mehitenged ki Jesus diyà te mezakel he nekedseselekawà he menge inged lavew en diyà te menge etew zutun he kenà menge Hudiyu (13:1–28:31). Ne heini is kedseweza te tudtul mehitenged ki Jesus taman en guntaan is ked-ul-ulaha kayi, su is Waǥas he Mulin-ulin, kemulu ebeǥey te ǥehem diyà te menge sakup ni Jesus su wey mekezineg te Meupiya he Tudtulanen is minsan hentei.