Hengkey is paaǥi wey mezawat te Megbevayà is etew? Iyan heini he insà midtavak ni Pablo kayi te surat din he para te menge tumutuu ziyà te Ruma.

Is duma egkaǥi te iyan dà egkezawat te Megbevayà is etew he egketuman din is langun duen te kesuǥuan he imbilinbilin ni Moises dengan. Iyan, iyan mulà impesavut ni Pablo he wazà minsan sevaha he egkezawat te Megbevayà tenged te meupiya he menge vaal zin etawa tenged te menge kepuun din, su mekesesalà is langun he menge etew ne zait he ebpekesuwey te Megbevayà ne edsilutan te silut he wazè din pidtemanan. Ne zuen sevaha zà he paaǥi wey mezawat te Megbevayà is etew he iyan is kedtuuwi wey kedseriǥi ki Jesu Kristu.

Utew ingkeseeng ni Pablo is duma zin he menge Hudiyu su kenà sikandan edtuu ki Jesu Kristu. Neuǥet en is kebperetenga zan te hadì he ibpahadì te Megbevayà kandan, piru kenè dan edtuu he iyan en si Jesus sikan is hadì he midsuǥù te Megbevayà he edhadì kandan wey edlibri kandan. Impesavut ni Pablo he egkeuma zed is timpu he ebpesakup en human ki Jesus is menge Hudiyu, ne ǥuntaan iyan pa edhimuwen ni Jesus he menge sakup din is kenà menge Hudiyu. Ne egkeuma zaan is timpu he edsevahaan te Megbevayà is menge Hudiyu wey is kenà menge Hudiyu su pudu zin edhimuwa he sakup din. Emun idsarig te etew ziyà te Megbevayà is untung din, egkehimu zin is kebpezumazuma te Megbevayà pinaaǥi te ǥehem te Waǥas he Mulin-ulin. Egkeveǥu is untung din, wey egkehimu zin is kebmahal te zuma, su is etew he midawat en te Megbevayà, kinahanglan daan he edewaten din is duma he etew wey edtevangan din.