Is inged he Kurintu nepenù te mezaat. Is menge etew kayi, ebeelan dan is minsan hengkey he paaǥi te kebaal te salà. Mahabet is menge vahi kayi he ebpemelegya te zengeg dan wey mahabet daan is kenà tutuu he megbevayà he ed-ezapen te menge etew kayi. Ne is menge etew kayi, indengeg he menge leǥezen.

Hein nekeuma si Pablo ziyà te Kurintu, mahabet he menge tigKurintu is mid-iniyuǥan dan is menge vaal zan he mezaat su nehimu en sikandan he sumusundan ni Jesus. Mid-ubpà si Pablo ziyà te Kurintu seled te sengetuig wey tengà ne zutun he timpu mibpenurù din is menge tumutuu.

Ne hein nepipire en he tuig is ked-ewai ni Pablo te menge tigKurintu, duen nezineg din mehitenged kandan he utew ingkesemuki te ǥehinawa zin. Netudtulan sikandin he mezakel kandan is mibmeluya is kedtuu wey kebminahalà. Duen duma he kenà egkilala te kegkeepustul ni Pablo wey zuen daan egkengesumpakì wey zuen utew mesamuk is ulaula zan; iring is menge ulaula zan te ulaula te menge etew zutun he wazà medtuu te tutuu he Megbevayà.

Umbe midsawey sikandan ni Pablo ke maan is ebpesumsumbungè dan is menge tumutuu ziyà te menhuhusey he kenà tumutuu. Wazè dan be metueni he nesevaha zan pinaaǥi te kedtuuwi zan ki Jesu Kristu? Ne maan is kenè dan egkilelaan is kegkeepustul ni Pablo? Wazè dan be metueni he Megbevayà is mibeǥey kandin te kegehem te kebpenurù kandan? Ne maan is ebaal zan te meremerik he menge vaal? Wazè dan be metueni he ed-ubpà is Waǥas he Mulin-ulin diyà te lawa zan?

Piru minsan pa te iyan heini, mibmahal ǥihapun ni Pablo is menge tumutuu ziyà te Kurintu ne nekaǥi zin kandan is pelanu zin te kebpenumbaley ziyà te kandan su wey zin sikandan mezasig.

Is puunà te terebabahu ni Pablo ziyà te Kurintu egkevasa ta ziyà te Nengeulaula 18:1-11.