Menge Pengemusta
16
Pinaaǥi kayi te surat ibpekilala ku keniyu si Febe is suled tew he vahi tenged kayi te kedtuu tew,
ne edtavang sikandin te menge tumutuu ziyà te inged he Singkriya.
2 Gelǥelawa niw sikandin tenged te kedtuu zin te Nengazen tew su iyan heini ulaula he zait te menge tumutuu.
Ne ke zuen menge keel-elangan din,
ne tevangi niw sikandin su utew mezakel is midtevangan din daan he menge tumutuu ne midtevangan e zin daan.
3 Ipengemusta a ki Priscila wey si Ekilu.
Menge timbang ku sikandan te kedtumana ku te ebpeveelan kedì ni Jesu Kristu.
4 Tenged te kedtevangi zan kediey wazè dan isepayan ke ebpatey zan,
ne tenged kayi utew zekelà is peselamat ku kandan.
Ne kenà duen dà taman,
su zekelà daan is peselamat kandan te langun he menge tumutuu zini he kenà menge Hudiyu.
5 Ipengemusta a zaan te menge tumutuu he ziyà dà edtiǥumtiǥum te valey zan te ked-azap dan te Megbevayà.
Ipengemusta a zaan ki Ipinitu he utew ku emiǥu.
Nehuna sikandin he maama he neketuu ki Kristu ziyà te prubinsya he Asya.
6 Ipengemusta a zaan ki Maria;
utew zekelà is baal zin wey kew zin metevangi.
7 Ipengemusta a zaan ki Andruniku wey si Hunias.
Menge zuma ku sikandan he Hudiyu he mibpirisu zuma kedì.
Telehuzen sikandan te menge epustul,
ne nehuna sikandan neketuu ki Kristu,
ne human a.
8 Ipengemusta a ki Empliyatu;
utew ku sikandin emiǥu tenged te kedtuu zin te Nengazen.
9 Ipengemusta a zaan ki Urbano te zuma ku he suluǥuen ni Kristu wey si Istakis he utew ku zaan emiǥu.
10 Ipengemusta a ki Epilis.
Netuenan te langun he metinumanen sikandin te menge suǥù ni Kristu.
Ipengemusta a te pemilya ni Eristubulu.
11 Ipengemusta a ki Hirudyun te zuma ku he Hudiyu wey ipengemusta a zaan te menge tumutuu he ziyà te valey ni Narciso.
12 Ipengemusta a ki Tripina wey si Tripusa he menge meǥied he suluǥuen te Nengazen.
Ipengemusta a zaan ki Persida he utew ku emiǥu.
Utew zekelà is nehimu zin te kedtumana zin te ebpeveelan kandin te Nengazen.
13 Ipengemusta a zaan ki Rufo.
Nevantug en is kedtuu zin te Nengazen.
Ipengemusta a zaan te iney zin he impeiring din is ked-isipa zin kedì te tuney en he anak din.
14 Ipengemusta a ki Asinkritu,
si Pligunti,
si Hirmis,
si Petrubas,
si Hirmas wey is langun he menge maama he suled tew zaan he menge zuma zan.
15 Ipengemusta a ki Pilulugu,
wey ki Julia,
ki Nereo,
wey te etevey zin,
wey ki Ulimpas,
wey te menge sakup te Megbevayà he zuma zan.
16 Ne sikiyu is langun diyan,
emun edtiǥum kew pelimlimuey kew te uman sevaha keniyu.
Ebpengemusta keniyu is menge tumutuu te langun he menge inged dini.
Is Penapus he Telaan
17 Menge suled,
edhengyuen ku keniyu he mebantey kew,
ne likayi niw is menge etew he edsamuk te kebpekidsevaha niw wey kedtuu niw te menge tumutuu su edsupaken dan is tutuu he tuluuwen he impenurù keniyu.
18 Su is menge etew he ed-ulaula te iring kayi,
kenè dan edtumanen is suǥù te Nengazen tew he si Kristu,
kekenà,
iyan dan edtumanen is kandan he menge suat.
Pinaaǥi te ketau zan te kegkaǥi wey pinaaǥi te mekempet he egkeǥiyen dan,
egkeekalan dan is isip te menge paglung he etew.
19 Nevantug en is tudtul te kedtumana niw te menge suǥù te Megbevayà,
ne utew ku heini igkelipey.
Egkesuatan ku he zekelà is ketau niw te ked-ulaula te meupiya ne egkesuatan ku zaan he kenè kew metau te ked-ulaula te mezaat.
20 Ne emun iyan heini egkehitavù,
is Megbevayà he iyan puunà te kelinew,
meǥaan din en edhimuwa he mepurung niw mezaag si Setanas.
Berakat he ikeǥaǥew kew te Nengazen tew he si Jesu Kristu.
21 Is duma ku te edsangyew te Lalag te Megbevayà,
si Timoteo,
ebpengemusta keniyu ne henduen ded daan si Lucio,
si Jason wey si Susipatru,
is menge zuma ku he Hudiyu.
22 (Siak,
si Tiriku,
iyan a impesurat kayi ni Pablo te surat din;
ebpengemusta a zaan keniyu tenged te pudu kiw menge tumutuu ki Kristu.)
23 Ebpengemusta zaan keniyu si Gayu.
Siak si Pablo,
kayi a ed-ubpà te valey zin ne zini edsimba is menge tumutuu kayi te inged.
Is Trisuriru kayi te inged he si Irastu wey is suled tew te kedtuu he si Kuwartu,
ebpengemusta zan keniyu.
24 Sikiyu is langun,
berakat he ikeǥaǥew kew te Nengazen tew he si Jesu Kristu.
Is Kedeliǥa te Megbevayà
25 Edeliǥen tew is Megbevayà!
Pinaaǥi te Meupiya he Tudtulanen he ibpenudtul ku he iyan is mehitenged ki Jesu Kristu,
wey pinaaǥi te tuluuwen he neuǥet he timpu is ked-elesa zuen te Megbevayà,
egkehimu he edheǥeten din is kedtuu niw.
26 Ne haazà is tuluuwen he in-eles dengan,
impezayag en te Megbevayà pinaaǥi te menge surat dengan te menge ebpeneuven din.
Ne ǥeina te iyan suǥù te wazè din kemetayen he Megbevayà,
idsangyew en heini is tuluuwen diyà te menge etew ziyà te minsan hendei su wey meketuu is langun ne ebpeketuman te menge suǥù din.
27 Is sebsevaha zà he Megbevayà he iyan dà nesayud te minsan hengkey,
berakat he wazà pidtemanan te kedeliǥa kandin pinaaǥi ki Jesu Kristu.