Is Egkesuatan te Zuma he Etew
15
Ne sikitew is meheǥet is kedtuu te Megbevayà,
kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheǥet is kedtuu zan.
Ne kenè ta iyan idteǥel is kenita he egkesuatan,
2 kekenà,
iyan ta ebpen-ahaan is igkesuat te zuma ta su wey meheǥet is kedtuu zin.
3 Su si Kristu,
wazè din isipa is kandin he egkesuatan su insurat dengan is midtagnà he menge lalag din diyà te Megbevayà he edhenduen te,
“Is menge mezaat he lalag te menge etew he insulè dan kenikew,
ne iyan daan kedsulaa zan kediey.”
4 Su is minsan hengkey he insurat dengan he Lalag te Megbevayà,
ne umba impesurat din su wey kiw mepenurù.
Su pinaaǥi te Lalag te Megbevayà ibpenurù kenitew is kebmeinentusen te kemereǥenan wey edsembaǥan kiw su wey kenà maawà is kebpeebuta tew te meupiya he egkeulaula keuzemà.
5 Is Megbevayà,
ne iyan edsambag kenitew wey ebeǥey kenitew te kebmeinentusen te kemeresayan.
Berakat he himuwa zin he mesevaha is gehinawa niw wey isip niw kayi te kedsundani niw ki Jesu Kristu.
6 Ne emun iyan haazà ne human egkesevaha is kedalig niw te Megbevayà tew wey Amey te Nengazen tew he si Jesu Kristu.
Is Kedtuu te Kenà Menge Hudiyu
7 Is menge zuma niw he tumutuu,
ne zewata niw he iring te menge tempezè niw en te pused niw su midawat kew zaan ni Kristu he iring te tempezè din en te pused.
Ne emun ed-ul-ulahan niw heini egkezalig is Megbevayà.
8 Benar is egkeǥiyen ku he si Kristu,
nehimu sikandin he iring te suluǥuen te menge Hudiyu su wey zin ikepaahà kandan he tutuu iyan he edtumanen te Megbevayà is menge penaad din dengan diyà te menge kepuun dan.
9 Ne elin daan ketezengan ke maan is neulaula heini su wey sikiyu is kenà menge Hudiyu,
mehizuwi kew zaan te Megbevayà ne tenged kayi ebpekezalig kew zaan kandin.
Su zuen insurat he lalag ni Kristu ziyà te Megbevayà he edhenduen te,
“Siak wey is menge etew he kenà menge Hudiyu,
utew zekelà is kebpeselemati zey kenikew ne egkentahan ku is kedalig kenikew.”
10 Ne zuen pa egkeehè ta ziyà te insurat he Lalag te Megbevayà he edhenduen te,
“Sikiyu is menge etew he kenà menge Hudiyu,
tampu kew te kelipey su iring kew en te menge Hudiyu,
sikan is daan he nengepilì te Megbevayà.”
11 Ne zuen pa zaan edhenduen te,
“Sikiyu is langun he menge etew he kenà menge Hudiyu,
deliǥa niw is Nengazen;
ne sikiyu is tivuuk he menusiyà,
deliǥa niw sikandin.”
12 Ne zuen pa migkaǥi zengan ni Esaias he egkevasa ta,
ke sikandin te,
“Duen ebpekeuma he kevuwazan ni Isai
ne iyan sikandin edhadì te menge etew he kenà menge Hudiyu.
Ne iyan sikandin edseriǥan dan,”
ke sikandin.
13 Is Megbevayà he iyan puunà te langun he meupiya he ebpeebuten tew,
berakat he veǥayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaaǥi te ǥehem te Waǥas he Mulin-ulin meheǥet is kebpeebuta niw te langun he meupiya he egkezawat niw keuzemà.
Si Pablo Sugù Diyà te Kenà Menge Hudiyu
14 Menge suled,
netuenan ku en he layun meupiya is menge ulaula niw,
ne netuenan ku zaan he nepurung niw en mesavut is Lalag te Megbevayà,
ne egkehimu en he ebpekepenurù kew te zuma.
15 Ne minsan pa te iyan heini,
kayi te surat ku kenà a egkelenew he edsambag keniyu su zuen mezakel he impenurù keniyu he kenè ku egkesuatan he melipati niw.
Umba kenà a egkelenew su mibeǥayan a te Megbevayà te keǥehem
16 wey a mehimu he suǥù ni Jesu Kristu ziyan te keniyu te menge etew he kenà menge Hudiyu.
Henduen te memumuhat a su ke pinaaǥi kedì ebpeketuu is menge etew;
egkehimu zan he iring te pemuhat ku he pinaaǥi te kedlumpiyuwi kandan te Waǥas he Mulin-ulin edewaten te Megbevayà.
17 Ne tenged te kedtevangi kediey ni Jesu Kristu kenà a egkeeled te kebpenudtul kayi te langun he nehimu ku te suluǥuen te Megbevayà.
18 Asal iyan dà igkepenudtul ku is nehimu ni Kristu pinaaǥi kediey.
Su pinaaǥi kedì duen menge etew he kenà menge Hudiyu he edtumanen dan en is menge suǥù te Megbevayà.
Nehimu heini pinaaǥi te impepenudtul kedì,
pinaaǥi te impeulaula kedì,
19 pinaaǥi te menge singyal wey egkein-inuwan wey pinaaǥi zaan te ǥehem te Waǥas he Mulin-ulin.
Midhipanew a puun diyà te inged he Hiruselim pehendiyà te inged he Iliriku ne mibpurungan ku te ebpesavut is Meupiya he Tudtulanen te keaǥi ni Kristu.
20 Ne egkesuatan ku layun he mepenudtul ku is Meupiya he Tudtulanen diyà te menge inged he wazè pa zutun mezineg is ngazan ni Kristu.
Umba ed-ul-ulahan ku heini su wey ku kenà mesublì te ebpenudtul te Meupiya he Tudtulanen is menge etew he netudtulan en te zuma.
21 Su netuman ku is insurat he Lalag te Megbevayà he edhenduen te,
“Haazà is wazè pa mekezineg te ngazan din,
egketuenan dan gihapun ke hentei sikandin.
Ne is wazè pa metudtuli,
duen timpu he human dan ebpekesavut.”
Is Suat ni Pablo te Kedhendiyà te Ruma
22 Ne tenged kayi te langun he menge vaal ku te ebpenudtul zutun te menge inged,
nesanggen a is edhendiyan te keniyu.
23 Ne ǥuntaan te netapus ku en is baal ku kayi te menge inged,
wey ǥeina te neuǥet en utew is ked-isipa ku he edhendiyan a,
24 egkeisip ku he ǥuntaan human e en ebpekehendiyan te keniyu.
Egkesuatan ku he mekehendiyà a te Ispanya,
iyan,
edtuluy a ziyan te keniyu.
Ne emun egkeipus haazà is mevavà he kebpekiduma ku keniyu he igkelangan ku,
ne egketevangan a keniyu zutun te kedhipanew ku.
25 Ne ǥuntaan egenat ad su edhendiyà a zè pa te inged he Hiruselim su zuen idtavang he ibpehated kedì diyà te menge tumutuu te Megbevayà diyà.
26 Su is menge tumutuu zini te prubinsya he Mesidunya,
wey te prubinsya he Gerisya,
neisip dan he meupiya ke ebeǥey zan te tavang diyà te menge tumutuu he egkengeayuayu ziyà te inged he Hiruselim.
27 Utew meupiya ziyà te ǥehinawa zan is kebeǥaya zan kayi te tavang,
ne utew hustu zaan heini su zekelà is utang dan diyà te menge tumutuu he Hudiyu ziyà te Hiruselim su pinaaǥi te menge Hudiyu neuwit dini te kandan te kenà menge Hudiyu is Lalag te Megbevayà,
ne tenged kayi hustu zaan ke zuen selapì he igketavang dan diyà te menge Hudiyu he egkengeayuayu.
28 Ne emun egketapus en heini is baal ku igkehated ku en heini is selapì he idtavang kandan,
ne zutun edhipanew ad maan pehendiyà te Ispanya ne edtuluy a ziyan te keniyu.
29 Ne netuenan ku he ke ebpekeuma a ziyan,
utew zekelà is kedtuvazi kenitew ni Kristu pinaaǥi kayi te kebpehendiyan ku.
30 Menge suled,
tenged te mahal ziyà te ǥehinawa niw is Nengazen tew he si Jesu Kristu wey tenged te kebpekedhihizuwè tew he ibeǥey kenitew te Waǥas he Mulin-ulin,
edhengyuan ku sikiyu he peniguduwi a keniyu iampù diyà te Megbevayà.
31 Iampù niw he kenà a mekeizi te menge etew he kenà tumutuu ziyà te inged he Hiruselim.
Iampù niw zaan he ikelipey te menge tumutuu ziyà te Hiruselim heini is selapì he idhated ku kandan.
32 Ne emun egketapus heini,
wey ke egkesuatan te Megbevayà,
ebpekehendiyan a te keniyu he utew zekelà is kelipey ku ne egkehimu he ebmelinawen is ked-isip-isip ku pinaaǥi te kebpenumbaley ku ziyan te keniyu.
33 Is Megbevayà he iyan puunà te kelinew,
berakat he ulini kew zin.